Read the Gospels in 40 Days
Ne majtakti-ume
10 Wan kalinnutzki majtakti-ume imumachtiani wan kinmakak tatuktilis ijpak nawalmet inteyek pal welit kintajkalit wan pal welit kipajtiat muchi ne kujkukulis. 2 Ini ne intujtukay ne majtakti-ume titanijtuk:
ne achtu yaja Shimon ne muilwia Pedro,
wan Andreas ne iikaw,
wan Yakob ikunew Zabday
wan Yojan ne iikaw,
3 Pilipo wan Bar-Tolmay,
Tomas wan Matay ne tumintepewani,
Yakob ikunew Halpay
wan Tadayo,
4 Shimon pal Kanan
wan Yuda Ishkaryot, ne temakak.
5 Yeshu kintitanij ini majtakti-ume wan ijkini kinnawatij:
—Maka shumet tik ujujti ka sejseuk techan, wan maka shikalakikan tik tejtechan pal Shamarea; 6 shumet mas yek kan nemit ne ichkamet pulijtiwit ipal Israel. 7 Shumet shitanajnawatikan, shinakan ka ne tatekimakalis ipal ne ilwikak nemia nikansan. 8 Shikpajtikan ne kukuyat, shikyulkwiltikan ne miktiwit, shikpupukan ne shinpiat, shiktajkalikan ne najnawalmet. Metzintakulijket, ashan shitakulikan anmejemetsan! 9 Maka shikanakan teukwit nian tumin nian centavojchichin tik anmucinchoj, 10 nian anmutanaj tik ne ujti, nian ume anmuwipil, nian anmukak, nian anmutupil, ika yek ma kikwi ne tekitini ne itakwal. 11 Nujme ankalakit tik se techan, shiktajtanikan ká yek wan shinemikan ichan yajane hasta ankisat ka ikuni. 12 Kwak ankalakit tik ne kal, shiktajpalukan. 13 Wan asu yek ne kal, ma wiki ijpak yaja ne anmunejmachnemilis; asu inte yek, ma mukwepa anmujpak ne anmunejmachnemilis. 14 Wan su ajaka inte metzinkwi yek nian metzinkaki, kwak ankisat tik uni kal wan uni techan shiktzejtzelukan ne tewti tik anmujmukshi, 15 wan kia nimetzinhilwia: tik ne tunal pal muita ká yek wan ká inte, ne tal pal Sodom wan Gomora yasneki mas yek que yejemet.
16 Ka né naja nimetzintitania ken majmasat itzalan kujkuyut; yajika, shitamatikan ken ne kuat, melka yujyulyamanik ken ne wilut.
17 Shiktalikan cuidadoj wan ne takamet, ika tik ne kajkalpuli yawit metzintemakat wan tik ne kajkalsennemit yawit metzinwitekit, 18 wan yawit walmetzinwikat ishpan tatuktianimet ka numaku pal kiane mumati tay kichijtiwit yejemet wan intejtechan.
19 Kwak metzintemakat maka shiyulkakasiwikan tay anyawit anhinat, ika tik uni horaj anyawit kimatit tay anhinaskiat, 20 ika inte anmejemet ne taketzat asunte ne Iijiutzin ne Anmuteku ne anmutech taketza.
21 Ne se yawi temaka ne iikaw pal kimiktiat, wan ne seuk ne iteku kenhaya; wan tepilawan kintejtenewasket tetekuwan wan kinmiktisket. 22 Wan sujsul yawit metzinhijiat anmejemet ipanpa nutukay. Ká ne kiselia muchi ini hasta ma tami, yawi mupalewia.
23 Kwak metzintalultiat tik ne se techan, shichulukan ka seuk, ika kia nimetzinhilwia ka achtu ma wiki ne Itelpuch ne Takat inte tamisket ne tejtechan pal Israel.
24 Se mumachtiani inte nemi ijpak ne tamachtiani,
nian se tekitini ijpak ne itekuyu:
25 techajsi ma muchiwa ne mumachtiani ken itamachtiani
wan ne tekitini ken itekuyu.
Asu kinutzket itekuyu ne kal Bal-Zebul, keski mas ne imiakwan!
26 Yajika maka shimajmawikan, ika muchi tay minashtuk yawi muneshtia wan muchi tay mutzaktuk yawi muishmati. 27 Tay ne nimetzinhilwia tik kunyua, shinakan anmejemet tik tawil, wan tay ne antakakit tik anmutakakilis shitejkukan itzunpan ne kajkal ankinajnawatiat. 28 Wan maka shimajmawikan inpanpa ne kimiktiat anmuweyka wan te welit kimiktiat anmualmaj. Mas yek shimajmawikan ipanpa yajane ká weli kiwilewa ne ujume tik miktanshaput, anmualmaj wan anmuweyka.
29 Ankimatit ka munamakat ume gorrion ka se centavojchin; wan se yejemet inte wetzi talchi su ne Anmuteku inte kineki! 30 Hasta mupujtiwit ne tzujtzunkaltzitzin ipal ne anmutzuntekun. 31 Yajika maka shimajmawikan: anmejemet mas anmupatiw que miak gorriontzitzin!
32 Yajika, muchi ká ina ishpan takamet ka yaja nupal, naja nusan niaw nina ishpan Nuteku ka ikajku ka yaja nupal; 33 wan muchi ká ina ishpan takamet ka yaja inte nupal, naja nusan niaw nina ishpan Nuteku ka ikajku ka yaja inte nupal.
34 Maka shikejketzakan ka niwalaj pal nejmachnemi ne tal! Inte niwalaj pal nalwika nejmachnemilis asunte majmachej! 35 Ika niwalaj pal ma mutejtenewakan itzalan se takat wan iteku, itzalan se siwat wan inan, itzalan se siwamunti wan ne inan ishulejyu; 36 wan ne imiakwan se yawit kinekit kijtakuat.
37 Ká ne kitasujta iteku wan ne inan mas que naja inte ipani nupal, wan ká ne kitasujta itelpuch wan isiwakunew mas que naja inte ipani nupal; 38 wan ká ne inte kikwi icruz pal yawi nuipan inte ipani nupal. 39 Ká kiajsiskia ne ialmaj yawi kipulua, wan ká kipuluskia ne ialmaj ka numaku yawi kiajsi!
40 Ká ne metzinkwi nechkwi, wan ká ne nechkwi kikwi ne nechtitanij. 41 Ká ne kikwi se taketzani tik itukay taketzani, ipatiw taketzani yawi ipal; wan ká ne kikwi se yek takat o siwat tik itukay ne yejyek, ipatiw ne yejyek yawi ipal. 42 Wan ká ne kimaka chiupi asesek ne mas chikitik pal yejemet tik itukay se mumachtiani, kia nimetzinhilwia ka inte yawi kipulua ipatiw!
11 Kwak Yeshu tamik kintuktia ne majtakti-ume mumachtiani, yajki tamachtia wan tanajnawatia tik ne tejtechan.
Yojan kitajtanilia Yeshu ká yaja
2 Yojan, tik ne tetzakwiluyan, takakik tay kichiwa nemi ne Mawaltijtuk wan kintuktij sejse imumachtiani itech 3 pal kitajtanilia:
—Taja ne yawi witz o nemi pal tikchiat seuk?
4 Wan Yeshu kinhilwij:
—Shumet shikilwikan Yojan tay ankikakit wan ankitat: 5 pupuyumet tachiat wan metzkelumet nejnemit, ne kipiat shinyu mupajtiat wan ne inte takakit katka takakit, ne miktiwit muketzat wan ne munekit muyeknawatiat. 6 Suertej kipia ká ne inte mutekukujmati ka numaku.
7 Kwak yejemet yajket, Yeshu pejki kinhilwia muchi ipanpa Yojan:
—Tay anwalajket tachiat tik ne kojtan: se uatzin ejekatzejtzelujtuk? 8 Tay anwalajket kitat: se takat yamanik takentijtuk? Ne kipiat inkwajkwach yajyamanik nepa nemit inchan ne tatuktianimet! 9 Wan taika anwalajket: pal kitat se taketzani? Nimetzinhilwia ka kia! Wan mas que taketzani. 10 Ipanpa yajuni ne tajkwilujtiwit:
"Naja niktuktia muishpan nutanawatiani ma metzajshitili ne ujti."
11 Kia nimetzinhilwia: itzalan muchi ne sijsiwapunijtuk Yojan ne teulyujmaka ne sea wey; wan ne mas chikitik tik ne itatekimakalis ne Teut mas wey que yaja!
12 Tik ne tujtunal ipal Yojan ne teulyujmaka wan hasta seman, sejse musujsumat ipal ne tatekimakalis ipal ne ilwikak wan kinekit kitzkiat tay kipia, 13 ika inaketa ijkia muchi ne taketzanimet wan ne tajtuli hasta Yojan, 14 wan asu ankinekit kitat yek, uni Eliya ne nemituya pal witz. 15 Ká ne kipia takakilis ma takaki!
16 Ken ne tukniwan pal ini tujtunal? Kenhat ken kukunetzitzin mawiltiat tik ne tiankis ne kintzajtzaliat ne inkunpawan, inat: 17 "Titatzutzunket anmupal, wan te anmijtutijket! Timutechtijket, wan te anmutajtawelijket!" 18 Ika walaj Yojan: inte takwa katka, nian ati katka, wan inat:
"Kipia se nawal!"
19 Walaj ne Itelpuch ne Takat: takwa wan ati, wan inat:
"Yajane takwani, tawanani, wan yawi iwan tumintepewanimet wan tateyekchiwat!"
Muilwitia ka yek ne tamatilis ipanpa tay ne muchiwa.
20 Kwakuni Yeshu pejki kinhijilwia ne tejtechan kan muchijki itajpal ika inte muyulpataket:
21 —Ay taja, Korazin, ay taja, Bet-Tzaida! Asu tik Tzor wan Tzidon muchijtuskia tay muchijtuk itzalan anmejemet, muyulpatatuskiat ikman wan mutakentijtuskiat tik kushtalkwachti wan neshti. 22 Sema nimetzinhilwia ka kwak muita ká yejyek wan ká inte, tik Tzor wan Tzidon yasnekit mas yek! 23 Wan taja, Kaparnajum, tay, taja titejkuskia hasta ikajku? Katani hasta miktanshaput tiasneki! Ika asu tik Sodom muchijtuskia itajpal ken muchijtuk ijtik taja, yaja nakatuskia nikan hasta ashkan! 24 Sema nimetzinhilwia ka kwak muita ká yejyek wan ká inte, ne tal pal Sodom yasneki mas yek!
Ne sujsulin
25 Ikuka Yeshu tanutzki wan inak:
—Nuteku ne Tajtzin pal ne ilwikak wan ne tal, nina ka yek ka inte tikinneshtilij ini ne tamatit wan ne mumachtijtiwit, asunte ne sujsulin. 26 Ijkia Nuteku, ika ijkiuni tikitak yek.
27 Muchi tay nikpia Nuteku nechmakak, wan te aka kishmati ne itelpuch, sema ne teteku, nian ne teteku, sema ne itelpuch wan ká kineki ne itelpuch kineshtilia.
28 Shalajsikan nutech muchi ne kujkutiat wan ne mutakimiltijtiwit, wan naja nikchiwas ka anmusewiat. 29 Shikwikan ne nukimil anmujpak wan shimumachtikan nutech, ka yamanik wan kanawak nuyulu, wan welisket musewiat anmuajalmaj, 30 ika ajwiak wan ajkatik ne nukimil.
Ne tunal ipal sewilis
12 Ikuka se tunal ipal sewilis Yeshu nejnenki itzalan ne mijmil. Ne mumachtianimet mayanket wan pejket tapejpenat wan takwat. 2 Kwak ne Parishayujmet kitaket, inaket:
—Ne mumujmumachtiani né nemit kichiwat tay inte nemi pal tikchiwat tik ne sewilis.
3 Yaja kinhilwij:
—Anhamatachishketa tay kichijki Dawid kwak mayanket yaja wan ne ikunpawan; 4 ken kalak tik ne ikal ne Teut, wan kikwaj ne tajtamal ishpanujtuk ne inte nemituya pal kikwa yaja nian ne ikunpawan, sema ne palejmet? 5 Wan ankitztiwit ne tajtuli ina ka tik ne sewilis melka ne palejmet kichiwat tik teupan tay mutuktijtuk ma inte aka kichiwa tik ne sewilis, nemi yek? 6 Nimetzinhilwia ka nikan nemi tay ne mas wey que ne teupan. 7 Asu ankimattuskiat tay kineki ina "Nikelewia tetasujtalis, inte nikelewia esti", inte anhinatuskiat ka kipiat culpaj ká ne inte kichijtiwit tatka inte yek. 8 Ika ne Itelpuch Ne Takat yaja ne itekuyu ne sewilis.
Welit titapajtiat tik ne sewilis?
9 Wan kiski ka ikuni wan temuk ka kalsennemit 10 wan né nemik se takat kipia se imey tzitzintik, wan kitajtanilijket su weli mupajtia tik ne sejsewilis, pal kiane welit kitenewat. 11 Yaja kinhilwij:
—Katiawel pal anmejemet ne takat, asu kipia se ichkat wan su ne ichkat ustuwetziskia tik ne sewilis, inte kitzkiskia ne ichkat wan kitejkultiskia? 12 Wan keski mas ipatiw se takat que se ichkat? Yajika, nemi pal tikchiwat tay yek tik ne tunal ipal sewilis.
13 Kwakuni kilwia ne takat:
—Shikmelawa ne mumey.
Wan kimelajki wan walmupajtij ken ne seuk. 14 Kisket ne Parishayujmet wan sentajtaketzket pal kitat tay yawit kichiwat pal kipuluat.
15 Yeshu kimatki wan yajki ka senkak, wan miak yajket iwan, wan yaja kinpajtij muchi, 16 wan kinhajwak ma inte kineshtikan, 17 pal kiane yekawi tay inak ne taketzani Ishaya, ina:
18 "Ini nupiltzin nikishpejpen,
yektasujtatuk, ne nikwelitak:
ijpak niktalis nuijiutzin
wan yaja kinnawatilis ne tejtechan;
19 inte musumas nian tzajtzis
nian mukakis tik itajku ne techan;
20 nian uatzin pustektuk kikupewas,
nian tawil mumulutza kisewis
hasta ma tami muchiwa tay yek,
21 wan ipanpa itukay tejchiasket tejtechan."
Yeshu wan Bal-Zebul
22 Kwakuni kalwikaket se nawalpia pupuyut wan te weli taketza, wan yaja kipajtij wan pejki taketza wan tachia, 23 wan muchi ishpuyawit wan inaket:
—Tejemet tinat ka ini ne itelpuch Dawid!
24 Kwak ne Parishayujmet kikakket, inaket:
—Yajini kintajkali ne nawalmet iwan Bal-Zebul, ne tatuktiani pal ne nawalmet! Asu inte, inte!
25 Yaja kimatki tay inat nemit wan kinhilwij:
—Se techan tajkutijtuk senpa puliwi, wan se kal tajkutijtuk inte keman mukawa ejkatuk. 26 Wan asu ne Tenewani kitajkali ne Tenewani, yaja mutajkutijtuk; ken yawi mukawa ne itatekimakalis tel? 27 Wan asu naja nikintajkali ne nawalmet iwan Bal-Zebul, ne anmupilawan tay iwan kintajkalit? Neka yejemetsan yawit metzinchiwat juzgar!
28 Saman asu naja nikintajkali ne nawalmet itech ne Iijiutzin ne Teut, kineki ina ka ne itatekimakalis ne Teut walejkutuka anmutech.
29 Ken weli kalaki ajaka ijtik ne ikal se hombron pal kitzkia ipalwan asu inte achtu kilpia uni hombron, wan kwakuni yawi techteki?
30 Ká inte nemi nuwan, nechtejtenewa, wan ká inte tatepewa nuwan, tasentalua.
31 Yajika nimetzinhilwia: muchi tay ne takamet tateyekchiwat wan kukujtaketzat yawi mutapupulwia; tay ne kukujtaketzat iwan ne Ijiutzin inte yawi mutapupulwia. 32 Wan ká ne ina se palabraj pal kijilwia ne Itelpuch ne Takat, yawi mutapupulwia; ká ne kijilwia ne Ijiutzin inte yawi mutapupulwia nian tik ini tujtunal nian tik ne tujtunal witzet.
33 Shikmatikan ka asu ne kwawit yek, yek ne itakil, wan asu ne kwawit inteyek, inte yek ne itakil, ika muishmati ne kwawit itech ne itakil. 34 Kuatal! Ken welit antaketzat yek asu anmejemet inte anyejyek? Ika ken nemi tik tuyulu, ijkiuni taketza ne tuten. 35 Ne yek takat tik ne yek chalchiwit kishtia tay yek, wan ne inteyek takat tik ne chalchiwit inteyek kishtia tay inteyek.
36 Nimetzinhilwia ka muchi tay taketzat ne takamet tay inte muneki, tashtawisket ipanpa tik ne tunal pal muita ká yek wan ká inte, 37 ika tay ne titaketztuk kilwitis asu taja tiyek, wan tay ne titaketztuk kilwitis asu taja inte tiyek.
Ne Parishayujmet kitajtanit se pal muishmati
38 Kwakuni nankilijket sejse pal ne tajkwiluanimet wan ne Parishayujmet inat:
—Tamachtiani, tiknekit ma shitechmaka se pal muishmati.
39 Yaja kinhilwij:
—Semaya takamet inteyek wan mawiltianimet kishtemuat se pal muishmati, wan te ankipiasket, sema ne pal Yona ne taketzani, 40 ika kenha ken nemik Yona tik iijti ne wey michin yey tunal wan yey tayua, kenhaya ne Itelpuch ne Takat nemis tik iijti ne tal yey tunal wan yey tayua. 41 Ne Niniwa-chanejket yawit muketzat tik ne tunal kwak muita asu ne takamet pal ashan yejyek o inte, wan yawit inat ka inte; ika yejemet muyulpataket kwak tanajnawatij Yona, wan nikansan nemi se mas wey que Yona! 42 Ne siwatatuktiani pal Tatzinu yawi muketza kita asu yejyek ne takamet pal ashan, wan yawi ina ka inte; ika wejka walaj yaja kikaki ne itamatilis Shalomo, wan nikansan nemi se mas wey que Shalomo!
43 Kwak se nawal inteyek kiski itech se takat nejnenki tik wajwaktuk tal kitemua kan musewiskia wan inte kanaj. 44 Kwakuni ina:
"Niaw nimukwepa tik ne nukal kanka nikiski."
Wan kwak ajsi, kiajsi uchpantuk wan muekchijtuk wan te nemi aka. 45 Kwakuni yawi kalinwika uk chikume nawal mas inteyek que yaja, yawit kalakit wan nakat ka ikuni, wan uni takat yawi muchiwa mas inteyek tipan que achtu. Ijkiuni yawi panu nusan iwan ini takamet inteyek pal ashan.
Ne inan wan ne iikawan Yeshu
46 Kwak yaja nemituya taketza iwan muchi, ne inan wan ne iikawan nemituyat tatenpan kitemuat pal kinutzat. 47 Ajaka kilwij:
—Ne munan wan ne muikawan nemit né tatenpan metztemuat pal antanutzat.
48 Kilwij yajuni:
—Ká ne nunan? Wan ká nuikawan?
49 Wan kiajkukij ne imey ijpak muchi ne mumachtianimet wan inak:
—Nikan nemit ne nunan wan ne nuikawan! 50 Ika ká ne kichiwa tay kineki Nuteku ka ikajku, yajane nuikaw, wan nueltiw, wan nunan.
Ne Bibliaj Tik Nawat · © 2008, 2012 Jan Morrow