Read the Gospels in 40 Days
Ne yeshpual-majtakti-ume
10 Tipan, ne Tajtzin kintukaytij uk yeshpual-majtakti-ume wan kintuktij ujume-ujume ka iishpan tik muchi ne tejtechan kanka yasneki. 2 Kinhilwij:
—Wey ne tapishkal wan chiujchiupi ne tapishkanit. Yajika shiktajtanikan ne itekuyu ne tapishkal ma kintukti tapishkanit tapishkat ipal. 3 Shumet nejnejmach, né nimetzintitania ken masatzitzin itzalan kujkuyut. 4 Maka shikwikakan anmuchuspaj nian anmutanaj nian anmukak, wan maka shiktajpalukan aka tik ne ujti. 5 Kwak ankalakit ichan se, achtu shinakan "Ma shinemikan yek tik ini kal", 6 wan asu nemi ka ikuni se pal yek, ijpak yajane musewis ne anmunejmachnemilis. Asu inte, anmutech mukwepas. 7 Shinakakan tik ne se kal wan shikwakan wan shikunikan tay ne metzinmakat, ika ká tekiti ma kipia ipatiw. Maka shikajkawakan se kal pal anyawit seuk asunte shimukawakan kan annemit. 8 Wan tik ne techan kanka anyawit wan metzinkwit yek, shikwakan tay metzintaliliat 9 wan shikinpajtikan ne kukuyanit ijtik yaja wan shikinhilwikan:
"Nemia ne itatekimakalis ne Teut nikansan."
10 Tik ne techan kanka anyawit wan te metzinkwit yek, shumet tatajku ne techan wan shinakan:
11 "Timuishtiliat hasta ne tejti ipal anmutechan musalujtuk tik ne tujtukshi. Sema shikmatikan ini: nemia nikansan ne itatekimakalis ne Teut."
12 Nimetzinhilwia ka tik uni tunal Sodom yasneki mas yek! 13 Ay taja, Korazin, ay taja, Bet-Tzaida! Asu tik Tzor wan Tzidon muchijtuskia tay muchijtuk ijtik anmejemet, ikman muyulpatatuskiat tik kushtalkwachti wan neshti. 14 Kwak muita ká yejyek wan ká inte, yasnekit mas yek tik Tzor wan Tzidon! 15 Wan taja, Kaparnajum, tay, titejkuskia hasta ikajku? Katani hasta miktanshaput tiasneki! 16 Ká metzinkaki nechkaki, wan ká metzinhilwia ka inte, nechilwia ka inte. Ká nechilwia naja ka inte, nusan kilwia ne nechtitanij ka inte.
17 Ne yeshpual-majtakti-ume mukwepket iwan pakilis, inat:
—Tajtzin, hasta ne nawalmet techtakamatit tik mutukay!
18 Yaja kinhilwij:
—Nikita katka kuwetzi ne Tenewani ken takipini kistuk ka ilwikak. 19 Nimetzinmakatuk tatuktilis pal welit antaksat ijpak kujkuat wan kujkulut, wan ijpak muchi ne itajpal ne kineki metzinhijtakua, wan te tatka yawi metzinchiwilia. 20 Sema maka shiyulpakikan ika ne nawalmet metzintakamatit, shipakikan ika ne anmutujtukay muijkwilujtiwit tik ne ilwikak.
Ne sujsulin
21 Tik uni horaj pajpakik ipanpa ne Ijiutzin wan inak:
—Nuteku ne Tajtzin pal ne ilwikak wan ne tal, nina ka yek ka inte tikinneshtilij ini ne tamatit wan ne mumachtijtiwit, asunte ne sujsulin. Ijkia Nuteku, ika ijkiuni tikitak yek. 22 Muchi tay nikpia nechmakak Nuteku, wan te aka kishmati ká ne ikunew, sema ne teteku, nian ká ne teteku, sema ne ikunew wan ká kineki ne itelpuch kineshtilia.
23 Wan muishkwepki kinhita ne mumachtianimet insel wan inak:
—Suertej kipiat ne anmujmuish ne kitat tay ankitat, 24 ika nimetzinhilwia ka miak taketzani wan tatuktiani kinekiket kitat tay ankitat wan te kitaket, wan kinekiket kikakit tay ankikakit wan te kikakket.
Ne yek takat ipal Shamarea
25 Né muketzki se tajtulmati wan inak pal kiejekua:
—Tamachtiani, tay nemi pal nikchiwa pal weli niyultuk pal senpa?
26 Yaja kilwij:
—Ijtik ne iamaw Moshe tay tikita tajkwilujtuk?
27 Yaja inak:
—"Tiktasujtas ne Muteku ne Teut iwan muchi muyulu, muchi mualmaj, muchi mutajpal wan muchi mutamatilis, wan tiktasujtas muiknew ken tajasan timutasujta."
28 Kilwij:
—Yek tinankilij. Shikchiwa kiane, wan tiaw tiyultuk.
29 Yajane kineki naka yek wan kilwij ne Yeshu:
—Wan ká nuiknew?
30 Inak Yeshu:
—Se takat kiski Yerushalem wan temuk ka Yerijo, wan mutaski wan kimichinket tik ne ujti. Yejemet kipetztilijket wan kitzuntekket wan kiajkawket tajkumiktuk. 31 Panuk ka né se palej wan kwak kitak panuk sentapal ne ujti. 32 Kenhaya se pal ne Lewijmet ajsik wan kan kitak panuk ka sentapal nusan. 33 Se pal Shamarea pashalua witz, ajsik né, wan kwak yaja kitak kikukuj iyulu 34 wan yajki kan nemi wan kikimiluj ne ichijchiraj wan kitalilij tumakka wan atata. Kitejkultij pak ne iburroj wan kiwikak hasta ne kal pal ejkunimet, wan né kitajpishki. 35 Wan ne ukse tunal kwak yajki, kimakak ume tumin ne itekuyu ne kal wan inak:
"Shiktajpia, wan su muneki chiupiuk tumin, niaw nimetzmaka kwak nalmukwepa."
36 Katiawel pal ini yey tinaskia ka ne iiknew pal ne ká mutaski wan ne techtekinimet?
37 Yaja inak:
—Ne ká kipalewij.
Yeshu kilwij:
—Shiawa tel wan shikchiwa kenhaya.
Marta wan Maryam
38 Yajket tik ne ujti wan kalak se kojtantechan kan se siwat itukay Marta kikwij tik ne ikal. 39 Wan yaja kipia se ieltiw itukay Maryam wan kikaki katka tay ina yaja muetztuk itech ne ijikshi. 40 Ne Marta yujyulmakak ipanpa miak tay kichiwaskia. Walaj kan nemituya wan kilwij:
—Tajtzin, tay tina? Nueltiw nechajkaw nitekiti nusel pal nimetztakwaltia! Shikilwi ma nechpalewi.
41 Ne Tajtzin kilwij:
—Marta, Marta: tiyulkakasiwi sea. 42 Sema muneki se, wan Maryam kishpejpen uni tay yek. Uni inte yawi muishtilia!
Ken nemi pal tiknutzat ne Teut
11 Seujti kan yaja nemituya kinujnutza ne Teut, kwak mukawki, se ne mumachtianimet kilwij:
—Tajtzin, shitechmachti tiknutzat ne Teut, ijkiunisan ken Yojan nusan kinmachtij ne imujmumachtiani!
2 Yaja kilwij:
—Kwak ankinutzat ne Teut shinakan:
"Nuteku, ma inakan ka wey mutukay.
Ma wiki ne mutatekimakalis.
3 Ne tutamal pal tipanut shitechmaka mujmusta.
4 Wan shitechtapupulwi tay titateyekchijtiwit
ika tejemet nusan tikintapupulwiat ne techwikiliat,
wan maka shikajkawa ma techejekukan."
5 Wan kinhilwij:
—Katiawel anmutzalan kipia se iiknew ne ajsi anmuchan tajkuyua wan kilwia:
"Nuiknew, shinechajkawili ankakeski tamal, 6 ka se nuiknew pashalua witz nuchan wan te nikpia pal niktakwaltia",
7 wan su ijkiuni anka anyawit annakat kalijtik inat:
"Shiawa, shinechajkawa nusel! Niktzaktuka ne kal wan ne nupilawan mutekatiwit, inte niweli nimuketza pal nimetztakulia"?
8 Nina ka inte, ka melka inte ankimakaskiat ika anmuiknew, kia yawit muketzat kimakat tay kineki ika mutajtawelij anmuwan.
9 Yajika nimetzinhilwia: shitajtanikan wan san metzinmakasket; shitatemukan wan ankiajsisket; shitatujtunwikan wan kitapusket anmupal. 10 Ika muchi ká tajtanit yawit kikwit, wan muchi ká tatemuat yawit kiajsit, wan pal muchi ká tatujtunwiat yawi mutapua ne tenkal.
11 Katiawel anmutzalan ne teteku ne anmukunew metzintajtani se michin wan te yawit kimakat se michin asunte se kuat, 12 wan su metzintajtani se teksisti kimakaskiat se kulut? 13 Wan su anmejemet ká inte anyejyek welit ankintakuliat yek ne anmupilawan, keski mas Tutajwan ikajku yawi kinmaka muchi ne kitajtanit ne Ijiutzin!
Yeshu wan Bal-Zebul
14 Wan nemituya kishtia se nawal; yaja se inte weli taketza. Wan kwak kiski ne nawal, welik taketza wan muchi ishpuyajket. 15 Sejse inaket:
—Iwan Bal-Zebul, ne tatuktiani ipal ne nawalmet, yaja kishtia nawalmet!
16 Wan sejseuk, pal kiejekuat, kitejtemuat itech se pal muishmati, kinekituyat ma kisa se tik ne ilwikak ijkiuni. 17 Yaja kimatki tay yujyultaketzat wan kinhilwij kiane:
—Se techan mutajkutijtuk senpa puliwi, wan yawi wetzi kal ijpak kal. 18 Su ne Tenewani musuma se tajku iwan ukse tajku ken weli tatekimaka? Ken ka anhinat ka naja nikwi Bal-Zebul pal nikishtia nawalmet; 19 su naja nikintajkali ne nawalmet iwan Bal-Zebul, ká iwan kishtiat ne anmupilawan? Yawit metzinchiwat juzgar!
20 Asu nikishtia ne nawalmet iwan ne imapipil ne Teut, kineki ina ka ejkutuk ne itatekimakalis ne Teut.
21 Kwak se hombron kikwi tajtaiwan wan kishpelwia itenkal, nemisket yek ne ipalwan 22 hasta kwak ajsi se mas hombron wan kikeluna wan kitzkia muchi ne itajtaiwan wan kitakutuntia muchi. ipalwan
23 Ká inte nemi nuwan, nechijilwia, wan ká inte tatepewa nuwan, tasentalua.
24 Se nawal teyek kiski itech se takat. Nejnenki tik tajtal waktuk kitemua, kitemua kan musewiskia, wan inte kanaj. Kwakuni ina:
"Niaw nimukwepa tik ne kal kan nikiski."
25 Wan kwak ajsi, muchi kiajsi uchpantuk wan muekchijtuk. 26 Kwakuni yawi kalkwi uk chikume nawal mas inteyek que yaja wan yawit kalakit wan nakat ka ikuni, wan uni takat nakak mas inteyek ashan que achtu.
Ne takakit wan tajpiat ne ipalabraj ne Teut
27 Kwak yaja taketza, se siwat itzalan ne musentepewtiwit inak:
—Suertej kipia ne iijti ipal yajane ká metzwikak wan ne chichiwal ipal ká ne metzchichik!
28 Yaja inak:
—Mas yek, suertej kipiat ne takakit wan tajpiat ne ipalabraj ne Teut!
Ne Parishayujmet kitajtanit se pal muishmati
29 Kwak musenputzujtiwit miak, pejki ina:
—Ne takamet pal ashan inte yejyek: kitemuat se pal muishmati, wan te kipiasket, semaya ne ipal Yona. 30 Ika ken Yona muchijki se pal muishmati pal ne Niniwa chanejket, ijkiunisan ne Itelpuch ne Takat yawi se pal muishmati pal ne takamet pal ashan. 31 Ne siwatatuktiani pal Tatzinu yawi muketza, wan yawi ina ka inte yejyek ne takamet pal ashan; ika yaja walaj wejka pal kikaki ne itamatilis Shalomo, wan nikan nemi se mas wey que Shalomo! 32 Ne Niniwa chanejket san muketzasket wan inasket ka inte yejyek ne takamet pal ashan; ika yejemet kia muyulpataket kwak Yona tanajnawatij, wan nikan nemi se mas wey que Yona!
Ne tawil ijtik taja
33 [Nusan inak:]
—Te aka kitimaka tawil wan kitalia kan nemi minashtuk asunte ijtik se tawilkal pal ne kalakit kalijtik kitat ne tawil.
34 Ne tawil pal ne muweyka ne muish. Kwak ne muish tachia yek, muchi muweyka nusan mutawilua. Kwak ne muish inte yek, muchi ne muweyka takumia nusan. 35 Yajika shikpajpachiwi ma inte kunyuakisa ne tawil ijtik taja. 36 Yajika asu tikpia muchi ne muweyka tawilujtuk wan te tatka nemi kunyua, yawi tajtawia muchi ken kwak tzitzinaka ne candelaj wan metztawilua.
Ay anmejemet!
37 Kwak tamik taketza, se Parishayuj kitajtani ma yawi takwa ka ichan tajkutunal, wan ajsik wan mutalij. 38 Ne Parishayuj kwak kitak ishpuyawik ka inte mumapakak achtu ka takwaj. 39 Ne Tajtzin kilwij:
—Anmejemet ne Parishayujmet kipupuat ajatiluni wan kajkashit tatenpan, wan ne anmuijtik mupusunia iwan techtekilis wan muchi tay inteyek. 40 Melemet! Ne kichijki ne itenpan anka inte kichijki nusan ne kalijtik? 41 Sema shiktasujtatakulikan tay naka, wan kiane, muchi tay anmupal yawi mupupua.
42 Ay anmejemet ne Parishayujmet: melka ankimakat ne teupan ne majtaktakutun ipal ne yerbabuenaj wan ne ajkapajti wan ne sejseuk kilit, ankielkawat ne tamelakchiwalis, wan ankielkawat ankitasujtat ne Teut; yaja ne achtu tay nemituya pal ankichiwat, wan ma inte ankielkawat ne seuk. 43 Ay anmejemet ne Parishayujmet: metzinhajwiak anmutaliat tik ne ajachtu mutalijka tik ne kalsennemit wan ma metzintajpalukan tik ne tiankis. 44 Ay anmejemet: ankenhat ken ne shajshaput pal mikinimet ne inte muitat kan ne taksat takamet ijpak wan te kimatit.
45 Se pal ne tajtulmatit kilwia:
—Tamachtiani, kwak tina ini titechijilwia tejemet nusan!
46 Yaja inak:
—Nusan anmejemet ne tajtulmatit nimetzinhilwia ka ankintakimiltiat ne takamet iwan kijkimil inte welit musajsakat, wan anmejemetsan inte ankimatukat uni kijkimil nian wan se anmumapipil. 47 Ay anmejemet: ankiketzat shajshaput pal ne taketzanimet, wan ne anmutejteku ankinmiktijket! 48 Muita ka ankishmatit wan ankitat yek tay ne kichijket anmunojnoywan, ika yejemet kinmiktijket wan anmejemet shajshapuketzat! 49 Yajika ne Teut ne kimati muchi inak:
"Niaw nikintuktilia taketzanimet wan tijtitanijtuk, wan sejse yejemet kinmiktisket wan kichiwasket ma tajselikan 50 pal kiane kitashtawiat ne takamet pal ashan ipatiw ne iesyu muchi ne taketzanimet ne pejki mushinia kwak mutzintij ne taltikpak wan hasta ashan; 51 nusan ne achtu esti mushinij, ne ipal Habel, wan nusan ne iesyu Zakarya, ká mikik itzalan ne tikashit wan ne teupantzin."
Kia, nimetzinhilwia ka itech ne takamet pal ashan yawit kintajtaniliat ne inpatiw muchi.
52 Ay anmejemet ne tajtulmatit: ankishtijtiwit ne iwan mutapua ne itenkal ne tamatilis. Anmejemet nian kalaktiwit nian kiajkawtiwit panut ne kalakiskiat!
53 Tipan, kwak yaja kiski, ne tajtulmatit wan ne Parishayujmet pejket kipitziniat wan kitajtaniliat tetekia sea pal kichiwat ma tajtaketza 54 wan kinekit kipajpashuat ipanpa se tay inaskia.
Maka shimajmawikan, shikpiakan tayulmatilis...
12 Musenputzujket sujsul miak takamet wan siwatket hasta mupachanat. Wan ini ne achtu ne pejki kinhilwia ne mumachtianimet:
—Shiktalikan cuidadoj iwan ne shukutishti ipal ne Parishayujmet, ika yaja trampaj. 2 Muchi tay nemi minashtuk yawi muneshtia wan muchi tay nemi tzaktuk yawi muishmati. 3 Yajika, ne tay anhinatiwit tik kunyua yawi mukaki tik tawil, wan ne tay antaketztiwit tik ne tzinkal yawi munajnawatia intzunpan ne kajkal.
4 Nukujkunpawan, nimetzinhilwia: Maka shimajmawikan ipanpa yejemet ká kimiktiat anmuweyka wan kwak tamit intea tatka welit kichiwat. 5 Naja niaw nimetzinmachtia ká ipanpa welit majmawit: shimajmawikan ipanpa ká, kwak tami metzinmiktia, weli metzintamuta tik Miktanshaput. Yajane kia, ma shimajmawikan!
6 Ankimatit ka makwil gorriontzin munamakat ka ume centavojchin; wan ne Teut inte kielkawa nian se yejemet. 7 Hasta ne tzujtzunkaltzitzin ipal ne anmutzuntekun muchi mupujtiwit! Yajika maka shimajmawikan: anmejemet mas anmupatiw que miak gojgorriontzitzin!
8 Nimetzinhilwia ka ká ina ishpan takamet ka yaja nupal, ne Itelpuch ne Takat senpa yawi ina nusan ishpan ne itajtanawatiani ipal ne Teut ka yajuni ipal. 9 Ká ina ishpan takamet ka yaja inte nupal, yawit inat kenha ipanpa yajuni ishpan ne itajtanawatiani ipal ne Teut.
10 Wan ká ina se palabraj pal kijilwia ne Itelpuch ne Takat, san mutapupulwis; ká ne kukujtaketza iwan ne Ijiutzin, inte yawi mutapupulwia.
11 Kwak walmetzinkalaktiat inhishpan ne kajkalsennemit wan ne tajtuli wan ne tatuktianimet, maka shiyulkakasiwikan ipanpa tay wan ken anyawit anhinat, 12 ika tik uni horaj ne Ijiutzin yawi metzinmachtia tay nemi pal anhinat.
Ne casoj ipal ne kipia wey wan kiana muchi
13 Ajaka pal ne miaktal kilwij:
—Tamachtiani, shikilwi ne nuechkaw ma nechmaka nutakutun ipal tay techajkawilij ne tuteku.
14 Yaja kilwij:
—Takat, ká nechchijtuk juez anmujpak nian inatuk ma nina ken nemi pal antakupewat anmutzalan?
15 Kinhilwij:
—Shitachiakan wan shimuishpelwikan ma inte shikelewikan tatka anmupal, ika inte tiyujyultuk mas ika samawat tupalwan.
16 Kinhilwij se casoj; inak:
—Se takat kipiatuya wey wan samawa ne itakil ne imil, 17 wan pejki mutajtanilia, ina:
"Tay niaw nikchiwa? Inte nikpia kan niktepewaskia muchi ne tapishkal!"
18 Wan inak:
"Nikmati tay niaw nikchiwa: niaw niktajkali ne nushajshajkal wan niaw niketza sejse mas wejwey, wan niaw niktepewa ka ikuni muchi ne nusin wan muchi ne nupalwan, 19 wan niaw nikilwia ne nualmaj: Almaj, nikan tikpiaya wey pal tiyultuk miak shiwit. Shimusewi, shitakwa, shiati, shitatwa!"
20 Ne Teut kilwij:
"Mele! Ashan tayua metzishtilisket ne mualmaj, wan tay ne tikajshitijtuk ká ipal yawi?"
21 Kiane panu iwan ká ne kiana wey ipal yajasan, wan ipal ne Teut inte kipia tatka.
Ne Teut kintakwaltia ne tujtutut, kintakentia ne shujshuchit
22 Kinhilwij ne mumachtianimet:
—Yajika nimetzinhilwia: ma inte metzinyulkakasu tay anyawit kikwat nian taiwan anyawit mutzakwat, 23 ika weli mas tualmaj que ne takwal, wan weli mas tuweyka que tukwajkwach 24 Shikejketzakan ne kusmamet, yejemet inte tatukat nian tapishkat, inte kipiat kal nian shajkal, wan ne Teut kintakwaltia. Keski mas anmupatiw que inpatiw ne tujtutut! 25 Wan melka yaja sujsul yulkakasiwiskia, katiawel pal anmejemet weli kipetewa ne iweyka nian se chiupichin? 26 Asu inte anwelit nian uni tay chikitik, taipal anyulkakasiwit ipanpa ne sejseuk? 27 Shikejketzakan ne shujshuchit ken mutiskaliat: inte kujkutiat nian ichmalinit. Melka uni, nimetzinhilwia ka nian ne wey Shalomo mutakentij galantzin ken se shuchit ijkiuni! 28 Asu ne Teut kitakentia ijkiuni hasta se sakat ipal ne taweykan ne ashan nemi wan yasneki musta tik tit, ken ka inte yawi metzintakentia sujsul mas? Anmejemet inte ankipiat tayulmatilis! 29 Anmejemet nusan maka shiktemukan tay anyawit kikwat wan tay anyawit kiunit, wan maka shiyujyulmakakan, 30 ken kitemuat muchi ne tejtechan, ika kimatiaya Anmuteku ka ikajku ka uni anmunekit. 31 Mas yek shiktemukan ne itatekimakalis wan uni yawi metzintalilia. 32 Maka shimajmawikan, tepewatzin, ika ne Anmuteku kiwelitak metzinmaka ne tatekimakalis.
33 Shiknamakakan ne anmupalwan wan shitasujtatakulikan. Shikchiwakan anmupal chujchuspaj inte palanit, se chalchiwit inte tami tik ne ajku, kan nian kalaki techtekini nian kipulua mayat, 34 ika kan nemi anmuchalchiw, unisan yawi nemi anmuyulu.
Ne yek kalpiani, wan sejseuk tay inak
35 [Wan inak:]
—Shikpiakan ilpituk ne anmumashtaw, wan tatijtuk ne anmutawil, 36 wan shimuchiwakan ken takamet tejchiat ma wiki ne intekuyu ká tamik munamiktia wan walmukwepa witz, wan kwak yaja ajsi ichan wan tatzutzuna san kitapusket ne kal. 37 Suertej kipiat uni tekitinimet ká kishpelwiat nemit kwak kinnamiki ne intekuyu; kia nimetzinhilwia ka yaja yawi kitalia ikwajkwach wan yawi kichiwa ma mutalikan takwat, wan yajasan yawi kintakwaltia! 38 Su witz ka tayua, su witz ka tapuyawa, ma kinhajsi ijkiuni wan yejemet san pajpakisket. 39 Ini shikmatikan: su kimatiskia ne kaltekuyu tay horaj yawit ajsit techtekit, inte muajkawtuskia mukaltapana. 40 Nusan anmejemet shimuekchiwakan ika inte ankimatit ne horaj kwak yawi witz ne Itelpuch ne Takat!
41 Pedro inak:
—Tajtzin, taja tina ini casoj tupal ush tikinhilwia muchi?
42 Wan te Tajtzin inak:
—Ká ne yek kalpiani? Taja tikmati? Yaja ne kimati tay ne muneki muchiwa. Yaja ká ne tajtzin yawi kitalia tatuktia ijpak muchi ne tekitinimet ma kinmaka ne intakwal kwak muneki. 43 Suertej kipia uni tekitini kwak mukwepa witz ne itekuyu asu kiajsi kichiwa ijkiuni. 44 Ijkia nimetzinhilwia ka asu ijkiuni, yawi kitalia tatuktia ijpak muchi tay ipal. 45 Su uni tekitini ina tik iyulu: "Nutekuyu ishtuna witz!" wan asu pewa kinchajchalua ne takamet wan ne siwapipil, takwa, ati wan mutawantia, 46 yawi witz ne itekuyu uni tekitini kwak inte kichia, wan kwak inte kimati ne horaj yawi kikujkutuna, wan ne itakutun yawi kitalia iwan ne inte kiyulmatit.
47 Yawi kiwiteki sujsul uni tekitini ká kimatki tay kielewia ne itajtzin wan inte kiekchijki, nian kichijki tay kielewij. 48 Ne tekitini ká inte kimatki, melka yaja nusan kichijki tay inte yek, sema chiupi yawi kiwiteki. Kwak tiktakuliat wey sé, tiawit tiktajtaniliat wey; kwak wey ne itekiw sé, sujsul wey nemi pal kichiwa.
49 Niwalaj pal niktamutilia tit ne tal, wan tay nikneki asu yaja tataya? 50 Nikpia se ulyuj pal nimumaka ulyuj, wan ken nimumalachua hasta ma tami. 51 Anka anhinat ka niajsik pal nikmaka ne tal nejmachnemilis? Nimetzinhilwia ka inte, asunte mutakutuntilis, 52 ika kan nemit makwil tik se kal, ashan yawit mutakutuntiat: yey tik se ladoj wan ume tik ukse ladoj; ume kia, yey inte: 53 se teteku kitejtenewas ne itelpuch wan ne telpuch ne iteku; se tenan kitejtenewas ne isiwapil wan ne siwapil ne inan; se lamaj kitejtenewas ne isiwamun wan ne siwamunti ne isuegraj...
54 Wan kilwij nusan ne miaktal:
—Kwak ankitat ka kisa ne mishti kan kalaki ne tunal, anhinat nemanha: "Tapayawi witz!", wan kiane. 55 Wan kwak kishpitza ka tatzinu, anhinat: "Yawi mututunia!", wan kiane. 56 Tensasalmet, welit ankishmatit ne ilwikak wan ne tal: ini tujtunal ken ka inte ankishmatit?
57 Taika tel inte anhinat anmusel tay nemi yek? 58 Asu tiaw itech ne juez, kwak tinejnemiuk tik ne ujti inawak ne metztenewa, shikita ken tiweli tikchiwa pal ma metzmakishti achtu ma metztemaka iwan ne juez, wan ne juez iwan ne alguacil, wan ne alguacil yawi metztzakwa. 59 Nimetzilwia, inte tiaw tikisa ka ikuni hasta ma shiktashtawa ne tipan centavoj!
Ne Bibliaj Tik Nawat · © 2008, 2012 Jan Morrow