Read the Gospels in 40 Days
Ne Tamintuk kiejekua Yeshu
4 Yeshu kiajkaw ne apan Yarden tentuk iwan ne Ijiutzin wan walmukwepki, wan ne Ijiutzin kiwikak tik ne kojtan 2 wan ne Tamintuk nemik kiejekua unpual tunal, wan muchi uni tujtunal te kikwaj tatka wan kwak tamiket sea mayanki. 3 Ne Tamintuk kilwij:
—Asu tiitelpuch ne Teut, shikilwi uni tet ma mukwepa tamal!
4 Yeshu nankilij:
—Nemi tajkwilujtuk: "Inte iwan ne tamal isel mutekipanus ne takat."
5 Wan ne Tamintuk kitejkultij wan kilwitilij muchi ne talmet ipal ne taltikpak tik se instantej, 6 wan kilwij:
—Nimetzmakas muchi uni ma shitatukti wan ma shimuchiwa wey, ika nuwan temakatiwit wan niweli niktakulia ká nikneki. 7 Asu timutankwaketza nuishpan, muchi mupal.
8 Wan Yeshu kilwij:
—Nemi tajkwilujtuk: "Timutankwaketzas iishpan mutajtzin ne Teut, wan semaya ipal titekitis."
9 Kiwikak ka Yerushalem wan kitalij itzunpan ne teupan, wan kilwij:
—Asu tiitelpuch ne Teut shimutamuta katani, 10 ika nemi ijkwilujtuk: "ne itajtanawatiani mutech kintuktis metzishpelwiat," 11 wan "tik inmejmey metzanasket ma inte kitasa tet ne mukshi."
12 Wan Yeshu kilwij, ina:
—Inat: "Inte tikejekus ne mutajtzin ne Teut."
13 Kwak tamik ne itaejekulis ne Tamintuk, kiajkaw nejmachnemi hasta ukse tunal.
Pewa itekiw Yeshu
14 Wan Yeshu mukwepki Galilaya iwan itajpal ne Ijiutzin, wan nujme ne tal mumati ká yaja. 15 Wan yaja tamachtia katka tik ne sejsennemit wan muchi inat ka yaja welituya wey.
16 Wan ajsik Nazaret kan muskalijtuk, wan kalak tik ne sennemit ken senpa tik ne tujtunal ipal sewilis, wan muketzki amataketza, 17 wan kimakaket ne amat kululujtuk ipal ne taketzani Ishaya, wan kitapuj ne amat wan kiajsik kan nemituya ijkwilujtuk ini:
18 "Ne Iijiutzin Tutajwan nujpak nemi ika yaja nechmawaltij pal nikinmaka yeknawatilis ne munekit, nechtuktij ma nikinnajnawati tetapupulwilis ne ijilpituk wan tachialis ne pupuyumet wan ma nikinchululti ne chajchalujtuk iwan tetapupulwilis, 19 pal nitanajnawatia se yek shiwit ipal Tutajwan."
20 Wan kikululuj ne amat, kikwepilij ne takat wan mutalij, wan muchi tik ne sennemit nakaket tachiat. 21 Pejki kinhilwia:
—Tik ini tunal, yekajtuk ini tay nemi tajkwilujtuk tik anmutakakilis.
22 Wan muchi inaket ka nemi yek, wan ishpuyawket ipanpa ne pajpalabraj ipal tetasujtalis kisat itech ne iten. Wan inaket:
—Tejkia ka yajini ne itelpuch ne Yosep?
23 Wan yaja kinhilwij:
—Annechilwisket ka inat: "Tapajtiani, shu-shimupajti musel! Muchi tay titakaktiwit ka muchijki tik Kaparnajum, shikchiwa nikan tik mutechan!"
24 Inak:
—Kia nimetzinhilwia: se taketzani inte keman muita yek tik itechan! 25 Naja nimetzinhilwia ne tejkia: miak siwat kipulujket ishujshulejyu tik ne tujtunal pal Eliya tik Israel kwak mutzak ne ilwikak yey shiwit wan tajku wan te wetzki ne at wan muchijki se mayan tetekia nujme ne tal, 26 wan te mutuktij Eliya itech se pal Israel asunte itech se lamajtzin ipal Tzarpata inawak Tzidon. 27 Wan nemituyat miak kukuyat iwan shinyu tik Israel kwak nemik yultuk ne taketzani Elisha, wan nian se yejemet mupajtij asunte Naman, se pal Siria.
28 Wan muchi tik ne sennemit kwalanket kwak kikakket uni, 29 wan muketzket wan kishtijket tik ne techan, wan kiwikaket itzunpan ne tapetat kan muketztuk ne techan pal kiustumimat. 30 Yaja walkiski intzalan wan yajki.
Tik ne kalsennemit pal Kaparnajum
31 Temuk ka Kaparnajum, se techan tik Galilaya, wan né kinmachtia tik ne tunal ipal sewilis, 32 wan ishpuyajket ipanpa ne itamachtilis ika ne ipalabraj kipiatuya tatuktilis.
33 Wan tik ne kalsennemit nemik se takat kipiatuya se nawal teyek, wan pejki tzajtzi:
34 —Shu, tay tikneki tuwan, Yeshu pal Nazaret? Tiwalaj titechpulua? Nikmati ká taja, taja tiipal ne Teut!
35 Wan Yeshu kiajwak, ina:
—Shitakaktuk wan shalkisa!
Wan ne nawal kitajkal ne takat né tatajku wan walkiski tik iweyka, wan te kishutak ne takat. 36 Muchi ishpuyawket wan musennawatijket, inat:
—Tay ini? Kintuktia ne nawalmet teyek iwan tatuktilis wan iwan itajpal, wan yejemet walkisat!!
37 Wan mupatawki ne chachalaka nujme ne tajtal ka nepa.
Tanajnawatia wan tapajtia nujme Galilaya
38 Muketzki wan walkiski tik ne kalsennemit, wan yajki ichan Shimon. Ne inan ne isiwaw Shimon kipiatuya se wey tutunkayu, wan kitemujket ma wiki kipalewia. 39 Yaja mutalij ejkatuk inawak wan kiajwak ne itutunkayu, wan kiajkaw. Ne siwat muketzki nemanhachin wan pejki kintakwaltia.
40 Kwak kalak ne tunal, muchi ká kipiatuyat sejse kukuyat iwan ankakeski kukulisyu kalwikaket, wan kitalij ne imey ijpak sejse ika wan kinpajtij. 41 Nusan walkisket itech miak yejemet nawalmet ká tzajtzit wan inat:
—Taja ti Itelpuch ne Teut!
Wan kinhajwak wan te kinhajkaw taketzat ika yejemet kimatit ka yaja ne Mawaltijtuk.
42 Ka tapuyawa, kiski pashalua isel ka kojtan, wan kitemuat wan ajsiket itech wan te kinekiket ma kinhajkawa. 43 Wan yaja kinhilwij:
—Nemi pal nikinmaka sejseuk techan ne yeknawatilis ipal ne itatuktilis ne Teut, ka yajika nechtuktijket.
44 Wan tanajnawatij nemik tik ne kajkalsennemit ipal Yudaya.
Kinnutzki ne ajachtu mumachtiani
5 Seujti kwak tapitzinia nemi ne miaktal itech Yeshu wan takaki ne ipalabraj ne Teut, wan yaja nemituya ejkatuk inawak ne weyat Genesaret, 2 kitak ume barcoj iten ne at. Ne michitzkianimet kistuyat tik ne bajbarcoj wan nemituyat kipakat ne majmatat. 3 Yaja kalak ijtik se barcoj, ne ipal Shimon, wan kitajtan ma kiwika achi ijpak ne at. Mutalij wan pejki tamachtia tik ne barcoj. 4 Kwak tamik tamachtia, kilwij ne Shimon:
—Shikwika ne barcoj kan nemi miktan wan shiktemultikan ne majmatat pal ankitilanat michin.
5 Wan ne Shimon nankilij:
—Tajtzin, tinemiket muchi ne tayua hasta tikujkutiat wan te tatka tikitzkijket; asu taja tina niaw niktemultia ne majmatat.
6 Wan kwak kichijket, kitzkijket miak michin hasta tapanit ne majmatat, 7 wan kinhishnutzket ne inkunpawan ipal ne ukse barcoj ma wikikan kinpalewiat, wan walajket, wan kitenket ne ume barcoj hasta yawit akalakit. 8 Kwak kitak Shimon Pedro, wetzki talchi itech itejtewajka Yeshu wan inak:
—Maka shaltzinkisa nutech ika naja nitateyekchiwani, Tajtzin!
9 Ika sea ishpuyajki kwak kitak keski michin kitilantiwit, wan ne nemituyat iwan nusan. 10 Ne ikunpawan Shimon kenhaya, ne intukay Yakob wan Yojan, ipilawan Zabday. Wan Yeshu kilwij Shimon:
—Maka shimajmawi. Ashan tiaw timukwepa se kitilana takamet!
11 Wan kwak kiwikatiwit ne ume barcoj hasta ne tal, kiajkawket muchi wan yajket iwan.
Kipajtij se shinpiani
12 Seujti kwak yaja nemituya tik se pal ne tejtechan, né nemik se takat tentuk iwan shinyu. Kwak kitak Yeshu, mutamutak talchi mutajtawelia wan inak:
—Tajtzin, su tikneki weli tinechpajtia!
13 Yeshu kimelawki ne imey wan kimatukak wan ina:
—Nikneki. Shimupajti.
Wan ne ikukulisyu yajki nemanha. 14 Wan kituktij ma inte kilwi aka, ina:
—Shu-shikita ne palej wan shiktakuli ken tatuktij Moshe ika timupupujtuk ma kitakan.
15 Melka uni, tajtaketzket wan musentepewket miak kikakit wan mupajtiat ne inkujkukulisyu. 16 Yaja mijkwan yajki tik ne kojtan kinutza ne Teut.
Yeshu weli tetapupulwia wan tapajtia
17 Wan tik se pal uni tujtunal nemituya tamachtia wan kistiwit Parishayujmet wan tajtultamachtianimet tik muchi ne tejtechan pal Galilaya wan Yudaya wan Yerushalem wan né nemituyat, wan ne itajpal Tutajwan nemituya iwan kwak tapajtia. 18 Wan né ajsiket kalsajsakat pak se petat se takat te weli mijkwani, wan pejket kitejtemuat ken welit kikalaktiat pal kitaliat iishpan, 19 wan ken inte kiajsiket ken kipanultiskiat ijtik ne miaktal, kutejkuket ka itzunpan ne kal wan itzalan ne kaltzunkal kitemultijket iwan ne itapech tatajku iishpan Yeshu. 20 Wan kwak kitak ken kimatit tik inyujyulu, inak:
—Nuiknew, mutapupulwijtuk tay titateyekchijki.
21 Wan ne tajkwiluanimet wan ne Parishayujmet pejket inat tik inyujyulu:
—Ká ini ne kukujtaketza? Ká weli kitapupulwia tay titateyekchijtiwit? Sema ne Teut!
22 Yeshu kimatki tay inat tik inyujyulu, wan inak:
—Tay annemit anhinat ijtik anmuyujyulu? 23 Katiawel anhinat sea uij: ma nina "mutapupulwijtuk tay titateyekchijtuk" ush ma nina "shimuketza wan shinejnemi"? 24 Pal ankimatit ka ne Itelpuch ne Takat kia weli kitapupulwia ne tateyekchijtuk ijpak ne tal— kilwij ne kukuyani —nimetzilwia ma shimuketza, shikana ne mutapech wan shu ka muchan!
25 Wan muketzki nemanhachin iishpan Yeshu wan kianki ne kan muteka katka wan yajki ichan, wan inak nujme ka ne Teut wey. 26 Wan muchi ishpuyajket wan nemituyat inat ka ne Teut wey, wan kipishket mawi, wan inat:
—Te aka weli kimati tay ne tikitaket tik ini tunal!
Yeshu sentakwa ichan Lewi
27 Wan tipan kiski wan kitak se tumintepewani itukay Lewi nemituya tik ne tasentepewayan, wan kilwij:
—Shiwi nuwan.
28 Wan né kinaktij muchi wan muketza wan yawi iwan. 29 Wan Lewi kichijki ipal Yeshu se wey yualu tik ne ikal, wan né nemiket miak tumintepewani wan sejseuk sentakwat inwan, 30 wan ne Parishayujmet wan ne intajtajkwiluani kikinakat, kinhilwiat ne mumachtianimet:
—Taika anmejemet takwat wan atit intech ne tumintepewanimet wan ne tateyekchiwat?
31 Wan Yeshu nankilij:
—Ká nemit yek inte munekit tapajtiani asunte ne kukuyat. 32 Inte niwalajtuk pal nikinnutza ne nejnemit yek iwan Teut, asunte ne tateyekchiwat ká muyulpatat.
33 Yejemet kilwijket:
—Ne imujmumachtiani Yojan inte takwat, wan panut kinujnutzat ne Teut, wan ne inpal ne Parishayujmet kenhaya. Ne mumujmumachtiani takwat wan atit!
34 Ne Yeshu kinhilwij:
—Welit ankichiwat ma kisejselikan mayan ne ikunpalejwan kwak ne yawi munamiktia nemiuk inwan? 35 Walasket tujtunal kwak kiwikasket ne munti, kwakuni kisejselisket mayan!
36 Yaja kinhilwij se casoj, inak:
—Te aka kiteki se takutun ipal itaken yankwik pal kisalua ijpak ikwajkwach palikman, asu inte, ne yankwik kitzayanaskia, nian nakaskia yek ne yankwik iwan ne ikwachpala palikman.
37 Wan te aka kitalia kushushaj yankwik ijtik kwejkwetashtaijtik palikman, asu inte, ne kushushaj kikelunaskia ne tajtaijtik wan kushini ne kushushaj wan palanit ne tajtaijtik, 38 asunte nemi pal mutalia kushushaj yankwik ijtik tajtaijtik yankwik.
39 Wan te aka ne kiuni atata palikman kineki ne pal yewa; ina ka ne palikman ne ajwiak.
Ne sewilis
6 Se tunal ipal sewilis, yaja nejnenki itzalan ne mijmil. Ne mumachtianimet kipejpenket yajket ejelut wan tauyat iwan ne inmejmey wan takwat. 2 Ankakeski pal ne Parishayujmet kilwijket:
—Ken ka ne sejsewilis ankichiwat tay te nemi pal tikchiwat?
3 Wan Yeshu inak:
—Ankimatit— inak —tay kichijki Dawid kwak yaja wan ne ikunpawan mayanat? 4 Kalak tik ne ikal ne Teut, kitzkij ne tajtamal ishpanujtuk wan kikwaj, wan kinmakak ne nemituyat iwan, tay ne sema ne palejmet welit kikwat.
5 Wan inak:
—Ne Itelpuch Ne Takat itekuyu ne sewilis.
Welit titapajtiat tik ne sewilis?
6 Ukse sewilis, yaja yajki tik ne kalsennemit tamachtia wan ikuni nemik se takat, wan se imey, ne imayekkan, nemituya tzitzintik. 7 Ne tajkwiluanimet wan ne Parishayujmet kipachiwiat pal kitat asu tapajtia tik ne sewilis pal kiajsit ken kitenewaskiat. 8 Yeshu kimatki tay inat tik inyulu; kilwij ne takat kipia tzitzintik ne imey:
—Shimuketza wan shimutali tatajku.
Wan muketzki wan nakak ejkatuk. 9 Yeshu kinhilwij ne sejseuk:
—Nimetzintajtanilia se: nemi pal tikchiwat tay yek ush tay inteyek tik ne sewilis? Yek ma tikpalewikan se almaj o ma tikpulukan?
10 Wan tajtachishki; kwak tamik kinhita muchi, kilwij ne takat:
—Shikmelawa ne mumey.
Kichijki kiuni, wan walmupajtij ne imey. 11 Mikit iwan kwalan wan ne se kilwia ne seuk:
—Tay tiawit tikchiwat iwan yajini?
Yeshu kishpejpena majtakti-ume titanijtuk
12 Tik uni tujtunal yaja kiski kinujnutza ne Teut tik ne tepet wan panuk muchi ne tayua tik teutajtanilis. 13 Wan kwak tanesik kinnutzki ne mumachtianimet wan kishpejpen majtakti-ume pal yejemet, ká nusan kintukaytij ne tijtitanijtuk:
14 Shimon ne kinutzki nusan Pedro
wan Andreas ne iikaw,
wan Yakob,
wan Yojan,
wan Pilipo,
wan Bar-Tolmay,
15 wan Matay,
wan Tomas,
wan Yakob ikunew Halpay
wan Shimon ne munutza Zelotes,
16 Yuda ikunew Yakob,
wan Yuda Ishkaryot ne muchijki Temakani.
17 Wan waltemuk inwan wan walnakak tik se kan petztik iwan miak imumachtiani wan miak pal ne techan walejkutiwit tik muchi Yudaya wan Yerushalem wan iten ne alamal nepa Tzor wan Tzidon, 18 ne walajket kikakit wan mupajtiat ne inkujkukulisyu, wan mupajtiat ne mukakasuat iwan inhijiu teyek. 19 Wan muchi kitejtemuat pal kimatukat ika walkisa ne itajpal itech iweyka wan kinpajtia muchi.
Pewa tanawatia
20 Yaja ajkutachishki wan kinhitak ne mumachtianimet wan taketzki ijkini:
—Suertej kipiat ne munekit, ika anmupal ne itatekimakalis ne Teut.
21 Suertej ne mayanat ashkan, ika san anhishwisket.
Suertej ne chukat ashkan, ika san anwetzkasket.
22 Suertej ankipiat kwak metzinhishijiat ne takamet wan kwak walmetzinkupewat wan metzinhijilwiat wan inat ka anmutukay inte tatka ka imaku ne Itelpuch ne Takat. 23 Shitzijtzikwinikan iwan pakilis tik uni tunal, ka ne anmupatiw yawi wey né tik ne ilwikak, ika anmutejteku kenhaya kinchiwiliat katka ne taketzanimet.
24 Sema, ay anmejemet ne kipiat wey,
ika ankipiata ne anmupatiw!
25 Ay anmejemet ne ishwitiwit, ika san anmayanasket!
Ay ne wetzkat ashkan, ika san anmutechtisket wan anchukasket!
26 Ay kwak taketzat yek anmupanpa muchi ne takamet, ika anmutejteku kiane kinchiwiliat katka ne tashijshikuanimet.
Shikintasujtakan ne metzinhishijiat
27 Wan anmejemet ká annechkakit, ini tay nimetzinhilwia:
Shiktasujtakan ne kinekit metzinhijtakuat,
shikchiwilikan yek ne metzinhishijiat,
28 shikteuchiwakan ne metzintenewat,
shiktajtanikan ne Teut ka inmaku ne metzinhijilwiat.
29 Ne metztasa pak ne se mukamak shiktalili ne seuk,
wan ne kitzkia ne mutaken shikajkawili nusan ne muwipil asu kineki.
30 Shikinmaka muchi ká metztajtanit, wan tay ne kikwi tay mupal maka shiktajtanili.
31 Wan ijkiunisan ken ankielewiat ma metzinchiwilikan, shikchiwakan kenha.
32 Wan asu ankintasujtat ká ne metzintasujtat, tay ipatiw?
ika ne tateyekchiwat nusan kintasujtat ká kintasujtat yejemet.
33 Wan asu ankinpalewiat ká ne metzinpalewiat, tay ipatiw?
ika ne tateyekchiwat nusan kichiwat kenha.
34 Wan asu antanewiltiat semaya kwak ankimatit ka anyawit kikwit, tay ipatiw?
Ne tateyekchiwat ijkiasan kintakwiltiat tateyekchiwat ma kinkwepilikan kenha.
35 Shikintasujtakan mas yek ne kinekit metzinhijtakuat,
wan shikinpalewikan,
wan shitanewiltikan melka inte ankimatit ka anyawit kikwit tatka,
wan ne anmupatiw yawi wey wan anmuchiwasket ipilawan ne Wejkapan, ika yajane kinchiwilia tay yek ne tateyekchiwat.
36 Shitaeknelikan ijkiunisan ken ne Anmuteku nusan taeknelia.
37 Maka shiktenewakan aka ipanpa tay kichijtuk
wan te aka yawi metzintenewa;
maka shinakan ka aka inte yek
wan te aka yawi ina inte anyejyek;
shitachulultikan wan metzinchulultisket.
38 Shitamakakan wan san ankikwisket:
tatamachiwasket yek, tapachusket wan tatzejtzelusket,
tatepewasket hasta kitemat anmukwey;
ika taiwan antatamachiwat tatamachiwasket anmupal.
Sejse taketza
39 Nusan kinhilwij ini:
—Se pupuyut weli kilwitilia ne ujti seuk pupuyut? Inte yawit ustuwetzit ne ujume?
40 Se mumachtiani inte nemi ijpak ne tamachtiani; kwak tami, san muchiwas ken itamachtiani.
41 Ken ka tikita ne sakatzin tik ne iish ne muiknew? Wan ne taketzal nemi tik ne muish anka inte tikita? 42 Ken tiweli tikilwia ne muiknew: "Nuikaw, shinechajkawa nikishtia ne sakatzin ijtik muish", kwak inte tikita uni taketzal ijtik ne muish?! Tensasal! Shikishti achtu ne taketzal tik ne muish, wan kwakuni tiaw titachia yek pal weli tikishtia ne sakatzin nemi tik ne iish ne muiknew.
43 Ika se yek kwawit inte tamaka itakil teyek, nian se kwawit teyek tamaka itakil yek. 44 Yajika sejse kwawit muishmati ipanpa ne itakil, ika itech ne witzkilit inte tikululuat tzatzaput, nian tikanat shujshukut itech ne witztumat.
45 Ne yek takat kishtia tik ne chalchiwit yek pal ne iyulu tay yek, wan ne inteyek kishtia tik ne inteyek ne inteyek; ika ken nemi tik tuyulu, ijkiuni taketza ne tuten.
46 Yajika, ken ka annechnutzat: "Tajtzin! Tajtzin!" wan te ankichiwat tay nina?
47 Ká ne ajsi nutech wan kikaki ne nupajpalabraj wan kichiwa, niaw nimetzinhilwitilia ken yaja. 48 Yaja kenha ken se takat ne kiketza se kal wan pejki tawawana wan kichijki se wey shaput wan kitukak ne tetzilnaj ijtik ne tesual; ajsik ne tepeat wan kichaluj uni kal, wan te welik kitzejtzelua ika ne kal nemituya yek mutzintijtuk.
49 Ká ne nechkaki wan te kichiwa tatka, yaja ken se takat ne kiketzki se kal ijpak ne tal, wan te kichijki tetzilnaj, wan kwakuni wetzki wan kipitzki wan kitajkal wan puliwik muchi.
Ne Bibliaj Tik Nawat · © 2008, 2012 Jan Morrow