Read the Gospels in 40 Days
Taiwan mususulwia se takat?
7 Wan musentepewket ne Parishayujmet itech, wan ankakeski tajkwiluani walajtiwit tik Yerushalem. 2 Wan kitaket sejse pal ne imujmumachtiani kikwat tamal majmasusulnaj, kineki ina ka te mupupujtiwit. 3 Ika ne Parishayujmet wan muchi ne Yudayujmet asu te mumapakat ken muneki te takwat, ika ijkiuni kichiwat katka ne innoywan wan yejemetsan, 4 wan kwak yawit ne tiankis, kwak mukwepat inchan te takwat hasta muajwiliat, wan senpa kichiwat miak ken muchiwa katka ikman, yajika kipakat ajatiluni, kujkumit wan kajkashit. 5 Wan ne Parishayujmet wan ne tajkwiluanimet kitajtaniliat:
—Taika te muwikat ne mumujmumachtiani ken katka kichiwat tunoywan, sute yejemet takwat majmasusulnaj?
6 Yaja kinhilwij:
—Yek inak ne taketzani Ishaya ipanpa ne tensasalmet, ken nemi tawawasujtuk:
"Ini techan nechtakamati iwan itenshipal;
ne iyulu wejka nemi nupal!
7 Inte yek mutankwaketzat nuishpan
ika tamachtiat tay tatuktijket takamet."
8 Te ankichiwat tay kituktij ne Teut wan kia ankichiwat tay katka kichiwat ne takamet.
9 Wan kinhilwij:
—Yektzin ankielkawat tay tatuktij ne Teut pal kiane ankitajpiat tay katka ankichiwat. 10 Ika Moshe inak: "Shiktakamati ne muteku wan ne munan", wan nusan "Ká kinhijilwia iteku wan inan, ma miki". 11 Melka uni anhinat ka asu se kilwia iteku wan ne inan ka "korban", kineki ina "naja niktakulia ne Teut muchi tay nupal", ma tea ijkiuni: 12 intea ankiajkawat kichiwa tatka ipal iteku nian ipal ne inan, 13 wan ankichiwat ka tay ne tatuktij ne Teut inte tatka, ika anhinat ma tikchiwakan tay inte tatuktij, wan kiane miak kenha ankichiwat.
14 Wan senpa kalnutzki ne miaktal wan kinhilwia:
—Shinechkakikan muchi anmejemet wan shikmatikan tay antakakit: 15 te nemi tatka ka itenpan ne takat ne kalaki ijtik taiwan weli mususulwia, asunte tay kisa itech kisusulwia ne takat! (16) .
17 Wan kwak kiajkaw ne miaktal wan mukwepki ka ichan, ne mumachtianimet kitajtaniliat tay kineki ina ne casoj 18 wan kinhilwia:
—Anmejemet inteuk ankimatit? Te ankimatit ka iwan muchi tay nemi tatenpan wan kalaki ijtik ne takat inte weli mususulwia 19 ika inte kalaki tik ne iyulu sute tik ne ielishku wan ka né kisa wan yawi tik ne mijkwitayan wan mupupua muchi tay tikwajtiwit?
20 Ina:
—Tay kisa itech ne takat, yajaya ne kisusulwia ne takat, 21 ika kisa tik iyulu ne takat muchi tay teyek ijtik iyulu, ken kwak tatzinhejenchiwa wan techteki wan tamiktia 22 wan mawiltia wan kielewia tay tepal wan kichiwa tay teyek wan tashijshikua wan kilwitia tay susul wan taishkukulita wan kukujtaketza wan muweymati wan tzuntekisa. 23 Muchi uni ka ijtik tay inteyek kisa wan iwan mususulwia ne takat.
Ne siwat pal Kanan
24 Kiski pashalua wan yajki ne tal nepa Tzor. Ka né kalak tik se kal wan te kinekituya ma kimati aka, wan melka uni te welik minaya: 25 nemanha takakik se siwat kipiatuya isiwapiltzin iwan se nawal teyek, wan walaj wan mutamutak talchi ishpan ne ijikshi. 26 Yaja se siwat pal Grecia nestuk tik ne tal pal Poynikia tik Siria. Wan kitajtan ma kishti ne nawal itech ne isiwakunew, 27 wan Yeshu kilwij:
—Achtu ma ishwikan ne kukunet, ika te yek ma tikwikakan ne tamal pal ne kukunet pal tiktamutiliat ne pejpelutzitzinmet.
28 Ne siwat kilwia:
—Kia Tajtzin; melka uni, hasta ne pelutzitzinmet itan ne mesaj kikwat ne mujmumushu pal ne kukunet.
29 Wan yaja kilwij:
—Ika tinak uni, shiawa, ne nawal walkistuka itech ne musiwakunew.
30 Wan kwak yajki ichan, né kiajsik ne kunet wetztuk ijpak ne tapech wan ne nawal walkistuya.
Kipajtia se tenpupuluka
31 Wan ukseujti walkiski ne tal nepa Tzor wan panuk ijtik Tzidon hasta ajsik ne weyat pal Galilaya, tik itajku ne tajtal ipal ne Majtaktitechan. 32 Wan kalwikat itech yaja se te welituya takaki wan tenpupuluka, wan mutajtaweliat ma kitali ne imey ijpak. 33 Wan kikwij ka ikwaj wejka ne miaktal wan kitalij ne imapipil ijtik ne inakas, wan tachijchak wan kimatukak ne inenepil, 34 wan ajkutachiak ka ilwikak wan ijiumik wan kilwij:
—Epataj!
kineki ina: Shimupelu! 35 Wan tapuik ne itakakilis wan nemanha musutun ne ilpika tik ne inenepil wan welituya taketza yek. 36 Wan kintuktij ma te kilwikan aka. Wan melka kintuktia, yejemet tanajnawatiat katka nujme, 37 wan sujsul ishpuyawit katka, inat:
—Yaja kichiwtuk muchi yek, wan kichiwa ka takakit ne te welit takakit wan ka taketzat ne te welit taketzat.
Yeshu kitakwaltia se miaktal
8 Senpa tik uni tujtunal kwak nemituyat miak wan te kipiatuyat takwal, kalinnutzki ne mumachtianimet wan kinhilwij:
2 —Nechkukua nuyulu inpanpa ika kipiata yey tunal ka nemit nuwan wan te kipiat tatka pal kikwat, 3 wan asu nikintuktia inchan kwak mayanat welit majmatamit tik ne ujti, wan sejse walajtiwit sea wejka.
4 Wan ne mumachtianimet kitajtanilijket:
—Taiwan welit tikintakwaltiat muchi ka nikan kan inte kanaj tatka?
5 Wan yaja kintajtanilij:
—Keski tamal ankipiat?
Wan inaket:
—Chikume.
6 Wan kituktia muchi ma mutalikan talchi, wan kikwij ne chikume tamal wan kiteuchiwki wan kipitzakuj wan kinmajmakak ne mumachtianimet ma kintalilikan muchi. 7 Wan kipiatuyat chiupi michintzitzin wan yaja kiteuchiwki wan inak ma kintalikan nusan. 8 Wan takwajket wan ishwiket, wan kianket ne pusul tik chikume chikiwit tejtentuk. 9 Nemituyat achka cuatro mil. Wan kinhajkaw yawit.
Ne Parishayujmet kitajtanit se pal muishmati
10 Wan nemanha kalak tik ne barcoj wan ne mumachtianimet, wan ajsik ne taltakutun itukay Dalmanuta.
11 Wan kisket ne Parishayujmet wan pejket kitajtaniliat. Wan pal kiejekuat, kitejtemuat katka ma kinmaka se pal muishmati tik ne ilwikak, 12 wan yaja ijiumik tik iyulu wan ina:
—Taika ne takamet pal ashan kitemuat se pal muishmati? Kia nimetzinhilwia: intesu kipiasket nian se pal muishmati ini takamet pal ashan.
13 Wan kinhajkaw wan kalak tik ne barcoj senpa wan yajki sentapal.
Cuidadoj iwan ne shukutishti!
14 Wan kielkawket kiwikat pan wan te kipiatuyat nian se tamal tik ne barcoj, 15 wan yaja pejki kintuktia, ina:
—Shitachiakan! Cuidadoj iwan ne shukutishti pal ne Parishayujmet wan ne shukutishti pal Herodes!
16 Wan muilwiat ka yaja inak "ika te tikpiat pan". 17 Wan yaja kimatki, wan kinhilwia:
—Taika anmutajtaniliat asu ika te ankipiat pan? Inteuk ankimatit nian antamatit? Anka takwawayatuk ne anmuyulu? 18 Anmujmuish ankipiat wan te antachiat, wan anmunajnakas ankipiat wan te antakakit? Nusan te ankielnamikit, 19 kwak nikpitzakuj makwil tajtamal ipal cinco mil, keski chikiwit ankianket tentuk wan ne pusul?
Kilwiat:
—Majtakti-ume.
20 —Kwak nikpitzakuj ne chikume tamal pal cuatro mil, keski?
Wan inat:
—Chikume.
21 Wan kinhilwia:
—Inteuk ankimatit tay antakakit?!
Ne pupuyut pal Bet-Tzaida
22 Wan ajsit Bet-Tzaida. Wan kalwikat se pupuyut wan mutajtaweliat ma kitali ne imey ijpak. 23 Wan kitzkij ne imey ne pupuyut wan kiwikak ka itenpan ne techan, wan tachijchak tik ne ijish wan kitalij ijimey ijpak wan kitajtanilia:
—Tay tikita?
24 Wan ajkutachiak, wan ina:
—Nikita takamet wan nikita ka nejnemit ken kwajkwawit.
25 Neman kitalij ijimey ijpak ne ijish senpa wan pejki tachia yek, wan walmupajtij wan kitak muchi chipawak. 26 Wan kituktij ka ichan, ina:
—Shiawa wan maka shu shimukwepa tik ne techan.
Ká naja?
27 Wan kisket Yeshu wan ne mumachtianimet wan ajsiket ne tejtechan inawak Kaysarea Pilipo, wan tik ne ujti kintajtanilij ne mumachtianimet:
—Ken inat muchi ká naja?
28 Yejemet kilwijket:
—Yojan ne teulyujmaka, wan sejseuk ka ti Eliya, wan uksejseuk ka taja se pal ne taketzanimet.
29 Wan yaja kintajtanilij:
—Anmejemet tay inat: ká naja?
Ne Pedro kilwij:
—Taja ne Mawaltijtuk.
30 Wan kintuktij ma inte kilwikan aka ká yaja.
Asu aka kineki yawi iipan Yeshu...
31 Wan pejki kinmachtia ka ne Itelpuch ne Takat nemi pal taekua wey, wan ne noymet wan ne weypalejmet wan ne tajkwiluanimet yawit kitejtenewat, wan yawit kimiktiat, wan kwak panut yey tunal yawi muketza, 32 wan taketza katka melaknaj. Wan Pedro kinutzki wan pejki kiajwa. 33 Yeshu muishkwepki kita ne mumachtianimet wan kiajwak Pedro, ina:
—Shiawa ka nuteputz, Tenewani, ika inte tikejketza tay ipal ne Teut asunte tay ipal ne takamet.
34 Wan kwak kalnutzki ne miaktal wan ne mumachtianimet, kinhilwij:
—Asu aka kineki yawi nuipan, ma kinakti muchi tay ipal wan ma kiana ne icruz wan ma yawi nuipan. 35 Ika ká tajpiaskia ne ialmaj yawi kipulua, wan ká kipuluskia ne ialmaj ka numaku wan imaku ne yeknawatilis yawi tajpia. 36 Ika ken kipalewia se asu muchi ne taltikpak ipal wan puliwi ne ialmaj? 37 Ika tay weli tamaka se ipatka ialmaj? 38 Ika ká ishpinawa nupanpa wan ipanpa ne nupajpalabraj tik ini tujtunal pal mawiltianimet wan tateyekchiwanimet, ne Itelpuch ne Takat nusan yawi ishpinawa ipanpa yaja kwak tzitzinaka witz ka imaku ne Iteku itzalan ne itajtanawatiani.
9 Wan kinhilwij:
—Kia nimetzinhilwia ka ankakeski pal ne nikan nemit inte yawit mikit achtu ma kitakan ne itatekimakalis ne Teut walajtuk iwan itajpal.
Ne weykapatalis
2 Wan kwak panuket chikwasen tunal, Yeshu kinwika Pedro wan Yakob wan Yojan, wan tejkuket ijpak se kojtik tepet ka insel, wan muweykapatak ishpan yejemet, 3 wan ne ikwajkwach pejket tajtawiat wan istakisket ken te tatka weli istakisa ijtik ne taltikpak. 4 Nusan kiski inhishpan Eliya wan Moshe, wan tajtaketzket iwan Yeshu. 5 Wan ne Pedro kilwij Yeshu:
—Tajtzin, yek ma tinemikan nikan, tikchiwakan yey tawipanti, se mupal, se ipal Moshe wan se ipal Eliya.
6 Ika te kimati tay ina, ika sujsul majmawket. 7 Wan muchiwki se mishti wan ne mishti kinkimilua, wan ijtik ne mishti mukakik:
—Ini nutelpuch yektasujtatuk, shikakikan!
8 Wan kwak tajtachiaket te nemituya aka; sema Yeshu kitaket inwan. 9 Wan kwak temuket yajket katani, kintuktij ma te kineshtilikan aka tay kitztiwit sute hasta kwak ne Itelpuch ne Takat miktuk wan muyulkwijtuk. 10 Wan te taneshtijket; wan mutajtanilijket ken ka ina ka yawi muyulkwi, 11 wan kitajtanilijket:
—Taika inat ne tajkwiluanimet ka Eliya nemi pal witz achtu?
12 Yaja kinhilwij:
—Kiane, Eliya yawi witz achtu kiektalia muchi, wan ken nemi tawawasujtuk, ne Itelpuch ne Takat nemi pal taekua wey wan yawit inat ka te tatka ipatiw, 13 melka uni, naja nimetzinhilwia ka Eliya walajtuka, wan kichiwket iwan tay kielewijket, ijkiunisan ken nemi tawawasujtuk.
Kipajtia se mijmiki
14 Wan kwak ajsiket itech ne mumachtianimet, kitaket sujsul miak innawak wan tajkwiluanimet tajtanit. 15 Wan nemanha, muchi kitaket ne Yeshu wan ishpuyawket wan kisket mutaluat pal kitajpaluat. 16 Wan yaja kinhilwij:
—Tay ankintajtaniliat?
17 Wan se pal ne miaktal kilwij:
—Tamachtiani, nalwikak nikan nupiltzin ne kipia se nawal te weli taketza, 18 wan kwak kipewia, kikeluna wan yaja pupusuka wan tzalanit itajtan wan kuwaki. Wan nikinhilwij ne mumujmumachtiani ma tachiakan su kishtiliat wan te weliket.
19 Wan yaja kinhilwia:
—Ay, ashan inte kanaj tayulmatilis! Hasta keman nemi pal ninaka anmutzalan nimetzinselia? Shalwika tel.
20 Wan kiwikaket wan kwak kitak kijtzilikaltij ne nawal nemanha wan wetzki talchi muishmimilua wan pupusuka. 21 Wan kitajtanilij ne iteku:
—Keski kichiwa ka nemi ijkiuni?
wan ne iteku inak:
—Pejki kwak kunetzin katka, 22 wan seujseujti hasta kitamutak tik tit, wan nusan tik at, pal kipulua. Su tiweli, shiktasujta, shitechpalewi!
23 Ne Yeshu kilwij:
—Ken ka "su tiweli"? Muchi ká tayulmati weli!
24 Nemanha tzajtzik ne iteku ne piltzin, ina:
—Naja nitayulmati! Tay inte nitayulmati shitapalewi!
25 Kwak ne Yeshu kitak ka miak ajsit mutaluat, kiajwak ne nawal teyek, kilwia:
—Iijiu te weli taketza wan te weli takaki, naja nimetztuktia ma shalkisa itech wan ma intea shimukwepa tikalaki itech!
26 Wan tzajtzik wan sujsul ijtzilikak wan walkiski; wan nakak ken miktuk, wan inaket muchi ka miktuk. 27 Ne Yeshu kikwij ne imey wan kiketzki, wan yaja muyulkwij. 28 Wan kwak kalak ka ichan, ne mumachtianimet kitajtanilijket ka ikwaj:
—Taika tejemet te tiweliket?
29 Wan kinhilwij:
—Kwak ken ini, semaya weli tikchiwat ma walkisa iwan teutajtanilis.
Yeshu inak tay yawi panu
30 Kisket wan yajket pashaluat ijtik Galilaya, wan te kinekituya ma aka kimati, 31 ika yaja kinmachtia ne mumachtianimet wan kinhilwia ka temakat ne Itelpuch ne Takat ijtik inmejmey takamet wan yawit kimiktiat, wan kwak tamit kimiktiat wan panut yey tunal yawi muyulkwi.
32 Yejemet te kimatit katka tay kineki ina wan te kitajtanilijket ika majmawit.
Ká ne achtu?
33 Wan ajsiket Kaparnajum, wan kwak nemituya ka ichan kintajtanilij:
—Tay annemituyat tajtaketzat tik ne ujti?
34 Yejemet te inaket tatka ika tik ne ujti tajtaketzket yajket pal kimatit katiawel pal yejemet ne mas wey. 35 Wan yaja mutalij wan kinnutzki ne majtakti-ume wan kinhilwia:
—Asu se kineki muchiwa achtu, yaja yawi ne tipan pal muchi wan ne tekitini pal muchi.
36 Wan kikwij se kunetzin wan kitalij tatajku wan kinapaluj, wan kinhilwij:
37 —Ká ne kikwi se pal ne kukunetzitzin ken ini tik nutukay naja nechkwi, wan ká ne nechkwi inte naja nechkwi sute ne nechtuktijtuk.
Ká inte techtejtenewa tuwan nemi
38 Yojan kilwij:
—Tamachtiani, tikitztiwit ajaka nawalkishtia tik mutukay, wan te tikajkawket ika yaja te yawi tuwan.
39 Yeshu inak:
—Shikajkawakan yajuni, ika inte aka kichiwa tay wey tik nutukay yawi weli nechijilwia. 40 Ika ká inte techtejtenewa tuwan nemi. 41 Ká metzinmaka chiupi at pal atit tik nutukay ika anmejemet anhipal ne Mawaltijtuk, kia nimetzinhilwia ka yawia kipia ne ipatiw.
Sejseuk tay kinhilwij
42 [Nusan inak:]
Wan ká ne kitekukujmati se pal ini chijchikitik ká tayulmatit, mas yek ma mupilu se burrojmetat itech ikechkuyu wan ma kitamimakan ijtik ne weyat.
43 Wan su metztekukujmati ne mumey, shimumakutuna! Mas yek ma shiyultuk makutu wan te ma shu ne miktanshaput, tik ne tit te keman sewi, iwan ne ume mumey. (44) . 45 Wan su metztekukujmati ne mukshi, shimukshikutuna! Mas yek ma shiyultuk ikshikutu wan te ma metztamutakan iwan ne ume mukshi ka miktanshaput. (46) . 47 Wan su metztekukujmati ne muish, shikishti ne muish! Mas yek ma shikalaki tik ne itatekimakalis ne Teut ishpupuyut wan te ma metztamutakan iwan ne ujume muish ka miktanshaput, 48 né kan ne ijkwich inte miki wan ne tit inte musewia.
49 Ika muchi yawi muistawia iwan tit.
50 Melka yek ne istat, asu ne istat asesekisa, taiwan anyawit kikwepat ajwiak?
Shikpiakan ijtik anmejemet istat, wan shinejmachnemikan sejse wan sejse.
Ne Bibliaj Tik Nawat · © 2008, 2012 Jan Morrow