Read the Gospels in 40 Days
Majtakti siwapil
25 [Wan inak:]
—Kwakuni ne tatekimakalis ipal ne ilwikak yawi ken majtakti siwapil ne kikwijket intajtawil wan kisket kinamikit ne munamiktia. 2 Makwil pal yejemet tzujtzuntet, wan makwil tamatit. 3 Ne tzujtzuntet melka kiwikaket ujukut pal kitawilua ne ujti inte kiwikaket tumakka. 4 Ne tamatit kiwikaket tumakka pal kitaliliat ne ujukut. 5 Kwak ne munti ishtuna witz, muchi kuchket. 6 Ka tajkuyua pejki tzajtzi se:
"Uni witz ne munti! Shumet shiknamikikan!"
7 Kwakuni isaket muchi ne siwapipil wan pejket kiekchiwat ne intajtawil. 8 Ne tzujtzuntet kinhilwijket ne sekit:
"Shitechmakakan chiupi anmutumakka; ne tutajtawil yawit sewit."
9 Ne sejseuk nankilijket, inat:
"Inte, ka asu inte, inte techajsi. Mas yek shumet shikuakan intech ne kinamakat."
10 Kwak yejemet yawit takuat, walaja ne munti, wan ne siwapipil ne muekchijtiwit kalakket iwan kalijtik kan yawi munamiktia, wan mutzak ne tenkal. 11 Tipan nusan witzet ne siwapipil ne mukawtiwit, inat:
"Tajtzin, Tajtzin! Shitechtapuili!"
12 Yaja nankilij, inak:
"Kia nimetzinhilwia ka inte nimetzinhishmati!"
13 Yajika shikishpelwikan ika inte ankimatit nian ne tunal nian ne horaj.
Majtakti dolar
14 [Wan inak:]
—Ika kenha ken se takat ne yawi wejka, wan kinnutzki itejtekitini wan kinhajkawilij ne ipalwan pal tajpiat, 15 kimakak makwil dolar ne se, ume ne seuk, wan se dolar ne ukseuk, sejse ken welituya, wan yajki. 16 Ne kipiatuya makwil dolar kiski nemanha iwan ne tumin wan kikwij pal kiana uk makwil dolar. 17 Ne kipiatuya ume kichijki kenha wan nusan kianki uk ume. 18 Ne kipiatuya se dolar yajki kichiwa se shaput tik ne tal wan kitalpachuj ne itumin ne itekuyu. 19 Kwak panuket miak tunal ne intekuyu mukwepa witz wan mutalia kichiwa tajtapualis inwan, 20 wan ajsik ne kipiatuya ne makwil dolar, wan kalwika uk makwil dolar, wan ina:
"Tajtzin, tinechmakak makwil dolar wan shikita, uk makwil dolar nikanki."
21 Ne itekuyu kilwij:
"Yek takat, tikchijki tay yek. Iwan chiupi, tikchijki tay yek; ashan niaw nimetztalia tiktekimaka miak. Shiwi, shipajpaki iwan ne mutekuyu!"
22 Nusan ne kipiatuya ume dolar ajsik wan inak:
"Tajtzin, tinechmakak ume dolar wan shikita, uk ume dolar nikanki."
23 Ne itekuyu kilwij:
Yek takat, tikchijki tay yek. Iwan chiupi, tikchijki yek; ashan niaw nimetztalia tiktekimaka miak. Shiwi, shipajpaki iwan ne mutekuyu!"
24 Nusan ne kipishki se dolar ajsik wan inak:
"Tajtzin, nikmatiaya ka taja titakat takwawak, titapishka kan ne inte titatukak wan titatepewa kan ne inte titasentaluj, 25 wan nimajmawki, yajika niajki nikinaya ne mudolar tik ne tal. Nikan tikpia tay mupal."
26 Ne itekuyu nankilij, kilwij:
"Taja titatziwi, takapala! Asu tikmati ka naja nitapishka kan ne inte nitatukak wan nitatepewa kan ne inte nitasentaluj, 27 taika tel inte tikintakwiltij nutumin ne tuminpianimet, wan kwak niwalaj nalkwijtuskia tay nupal iwan ne talilijtuk. 28 Shikishtilikan uni dolar wan shikmakakan ne kipia majtakti. 29 Ika kinmakasket wan kintepewilisket ká ne kipiat; wan ká ne inte kipia, kishtilisket hasta tay ne kipia; 30 wan ini tekitini te tatka ipatiw shikishtikan wan shikajkawakan tatenpan kan kunyua. Ikuni yawi chuka wan tzalani itajtan."
Kwak muchi yawit muchiwat juzgar
31 [Wan inak:]
—Kwak yawi witz ne Itelpuch ne Takat tzitzinaka wan muchi ne tanawatianimet iwan, kwakuni nemis muetztuk pak ikuijpal tzitzinaka, 32 wan iishpan mutepewasket muchi ne tejtechan, wan yaja takupewas intzalan kenha ken se tajpia takwalmet takupewa intzalan ne ichkamet wan ne cabrajmet, 33 wan kintalis ne ichkamet ka iyekkan, ne cabrajmet ka seuk ladoj. 34 Kwakuni ne tatekimaka kinhilwis ne nemit ka iyekkan:
"Nuteku metzintasujta: shiwikikan wan shikpiakan ne tatekimakalis ne muekchijtuk anmupal kwak pejki ne taltikpak, 35 ika nimayanki wan annechtakwaltijket, niamikik wan annechmakaket at, niejkuni katka wan annechkalaktijket ka anmuchan, 36 ninemituya petznaj wan annechtakentijket, nikukushki wan annechtajpishket, ninemik tzaktuk wan anhajsiket nechitat."
37 Kwakuni nankilisket ne yejyek, inat:
"Tajtzin, keman timetzitaket timayana wan timetztakwaltijket, o tiamiki wan timetzmakaket at? 38 Keman timetzitaket tiejkuni wan timetzkalaktijket ka tuchan, o tipetznaj wan timetztakentijket? 39 Keman timetzitaket tikukuya o tinentuk tzaktuk wan tiajsiket timetzitat?"
40 Wan ne tatekimaka yawi nankilia:
"Kia nimetzinhilwia: kwak ankichiwat ijkiuni ipal se pal nukniwan, melka ne mas chikitik, ankichiwat ka numaku."
41 Kwakuni kinnutzas nusan ne nemit ka seuk ladoj:
"Tetekia anmuwan! Shinechajkawakan wan shumet tik ne tit senpa tata ne muekchijtuk ipal ne Tamintuk wan ne itajtanawatiani, 42 ika nimayanki wan te annechtakwaltijket, niamikik wan te annechmakaket at, 43 niejkuni wan te annechkalaktijket ka anmuchan, ninemituya petznaj wan te annechtakentijket, nikukushki wan ninemik tzaktuk wan te anhajsiket."
44 Kwakuni yejemet nusan nankilisket inat:
"Tajtzin, tejemet keman timetzitaket timayana o tiamiki o tiejkuni o tipetznaj o tikukuya o tzaktuk wan te timetzpalewijket?"
45 Kwakuni kinhilwis:
"Kia nimetzinhilwia: kwak inte ankichiwat ijkiuni ipal se melka ne mas chikitik, nusan inte ankichiwat nuwan."
46 Wan yejemet yasnekit kan senpa kinhajwat wan ne yejyek yasnekit kan senpa yujyultuk.
Musenputzujket pal kitat ken welit kimiktiat Yeshu
26 Wan kwak Yeshu tamik ina muchi ini, kinhilwij ne mumachtianimet:
2 —Ankimatit ka ijtik ume tunal witz ne Paskwaj. Wan temakat ne Itelpuch ne Takat pal mucruzpilua.
3 Kwakuni musentepewket ne weypalejmet wan ne noymet pal ne techan tik ne ikal ne weypalej itukay Kayapa 4 tajtaketzat pal kitat ken welit kichiwat pal kishijshikuat Yeshu pal ma kitzkikan pal kimiktiat. 5 Inat:
—Inte tik ne ilwit, ma inte kumuni ne techan.
Se siwat kimaka pajtipuputuka
6 Kwak Yeshu nemituya tik Bet-Anya, ichan Shimon ne shinpiani, 7 ajsik se siwat kipiatuya se botellaj iwan ushit wey ipatiw wan kikushinij ijpak ne itzuntekun Yeshu kan takwa nemi. 8 Ne mumachtianimet kitaket wan kwalanket, inat:
—Taika mutzunpulua ijkiuni? 9 Weliskia munamaka ini ka miak tumin pal tikinmakat ne munekit!
10 Ne Yeshu kimatki, wan kinhilwij:
—Taika ankijilwiat ne siwat? Nemi yek tay nechchiwilijtuk, 11 ika sejsenpa ankipiasket anmuwan sejse ká munekit; naja inte annechpiasket senpa. 12 Ika yajini kitalij ushit ijpak nuweyka wan nechekchiwa pal nechtalpachuat. 13 Kia nimetzinhilwia: nujme kan munajnawatia ini yeknawatilis tik ne taltikpak, yawit taketzat ipanpa tay ne kichijki yajini pal muelnamiki.
Yuda Ishkaryot
14 Kwakuni se pal ne majtakti-ume, ne itukay Yuda Ishkaryot, yajki kan nemituyat ne weypalejmet 15 wan inak:
—Tay annechmakat? Wan naja niaw nitemaka anmuwan.
Kitashtawket senpual-majtakti tumin, 16 wan yaja pejki kitejtemua se horaj yek pal temaka.
Ne tipan Paskwaj
17 Tik ne achtu tunal kwak te mukwa tatka tay kipia shukutishti, ajsiket ne mumachtianimet kitajtaniliat Yeshu:
—Kan tikneki ma tikekchiwakan ma shitakwa ne Paskwaj?
18 Yaja inak:
—Shumet tik ne techan wan shiktemukan inte-kimati-ká wan shikilwikan: "Ne tamachtiani ina: Nupal witzaya ne tunal; niaw nikchiwa ne Paskwaj ka muchan inwan numujmumachtiani."
19 Wan ne mumachtianimet kichijket ken kintuktij Yeshu wan kiekchijket ne Paskwaj.
20 Kwak tayuakik mutalij sentakwa inwan ne majtakti-ume, 21 wan kwak takwat inak:
—Kia nimetzinhilwia ka yawi nechtemaka se pal anmejemet.
22 Wan mutechtiat tetekia sea, wan ne se wan ne seuk pejket kilwiat:
—Naja ne, Tajtzin?
23 Yaja nankilij, inak:
—Ká ne nuwan kiajwilia imajmapil tik ne yayu, yajaya ne yawi nechtemaka. 24 Tejkia ka yawia ne Itelpuch ne Takat, ijkiunisan ken nemi ijkwilujtuk. Saman ay! uni takat ká yawi temaka ne Itelpuch ne Takat!
25 Nankilij Yuda ne temaka, inak:
—Naja ne, tajtzin?
Kilwia:
—Tajasan tinak.
26 Kwak nemituyat takwat, ne Yeshu kikwij se tamal wan kiteuchij wan kipitzakuj wan kinmakak ne mumachtianimet wan inak:
—Shikwikan, shitakwakan: ini ne nuweyka.
27 Wan kikwij se atiluni wan inak panpadiush wan kinmakak, ina:
—Ma muchi shikunikan ini, 28 ika ini ne nuesyu ipal ne sentaketzat, ne mushinia pal mutapupulwiat tay muchijtiwit tay inte yejyek. 29 Nimetzinhilwia: intea niaw nikuni senpa ini iayu hasta uni tunal kwak nikunis ne yankwik anmuwan ijtik ne itatekimakalis ne Nuteku.
30 Kwak tamiket takwikat, kisket wan yajket ka Olivajtepet.
Gat-Shemani
31 Kwakuni Yeshu kinhilwij:
—Tik ini tayua muchi anmejemet anyawit anmutekukujmatit ka numaku, ika nemi tajkwilujtuk:
Nikchalus ne tajpiani wan musentalusket ne takwalmet.
32 Kwak tami nimuyulkwi niasneki Galilaya anmuishpan.
33 Nankilij ne Pedro, kilwij:
—Melka mutekukujmatit muchi mupanpa, naja inte!
34 Ne Yeshu kilwij:
—Kia nimetzilwia ka tik ini tayua, achtu ka takwika ne ukichtijlan, yey wipta tiaw tina ka inte tinechishmati.
35 Ne Pedro kilwia:
—Melka nemi pal nimiki muwan, inte ninaskia ka inte ninemi muwan.
Wan muchi ne mumachtianimet inaket kenha.
36 Kwakuni Yeshu yajki inwan hasta kan itukay Gat-Shemani, wan kinhilwia ne mumachtianimet:
—Shimutalikan ka né. Naja niaw ikuni niknutza ne Teut.
37 Wan kinwikak iwan ne Pedro wan ne ume ikunew Zabday, wan pejki sujsul mutechtia wan tajselia. 38 Kwakuni kinhilwia:
—Nechkukua nualmaj hasta niaw nimiki. Shinakakan nikansan taishpelwiat nuwan.
39 Wan yajki achi iishpan wan wetzki talchi kinutza ne Teut wan ina:
—Nuteku, asu weli, shinechishtili ini atiluni. Melka uni, inte ken naja nikneki asunte ken tina taja.
40 Wan ajsi kan nemit ne mumachtianimet wan kita ka kuchit, wan kilwia ne Pedro:
—Nikita ka anmejemet inte weliket nakat kishpelwiat nian se horaj nuwan. 41 Shikishpelwikan wan shiktajtanikan ne Teut ma inte shimuejekukan. Melka kineki ne tuyulu, ne tuweyka inte weli.
42 Yajki senpa wan kinutzki ne Teut, ina:
—Nuteku, asu inte weli panu ini atiluni wan nemi pal nikuni, ma muchiwa ken tikelewia.
43 Wan mukwepki wan kitak senpa ka kuchit ika ejetek ne inhijish. 44 Wan kinhajkaw wan mukwepki yajki kinujnutza ne Teut, wan taketzki iwan ne Teut senpa. 45 Kwakuni ajsi kan nemituyat ne mumachtianimet wan kinhilwia:
—Shikuchikan tel, shimusewikan. Nemia ne horaj, wan yawit temakat ne Itelpuch ne Takat tik ijimey ne tateyekchiwat. 46 Shimuketzakan, tiakanha! Nemia nikan ne nechtemaka!
47 Wan kwak inteuk tamik taketza, né walaj Yuda, ne se pal ne majtakti-ume, wan miak walajket iwan kiwikat majmachej wan kwajkwawit, wan sejse pal ne weypalejmet wan ne noymet ipal ne techan. 48 Yajuni ká temaka kinmakatuya se pal muishmati, inatuya:
—Ká ne niaw niktennamiki, yaja ne: shikitzkikan.
49 Wan nemanha ajsik itech Yeshu wan inak:
—Oj, tajtzin.
Wan kitennamik. 50 Ne Yeshu kilwij:
—Kunpalej, tay tiwalajtuk tikchiwa?
Kwakuni ajsiket wan kitzkijket wan kikwijket. 51 Wan se pal ne nemituyat né iwan Yeshu kitzkij ne iespadaj wan kichaluj ne itekitini ne weypalej wan kinakaskutun. 52 Kwakuni ne Yeshu kilwij:
—Shikana ne muespadaj, ika muchi ká kikwit espadaj itan espadaj yawit puliwit. 53 Anka tina ka inte niweli niktajtani ne Nuteku wan yaja yawi kishpanua se tzunti tanawatiani? 54 Asu ijkiuni, ken yawi yekawi tay nemi ijkwilujtuk, kan ina ka nemi pal muchiwa ini?
55 Tik uni horaj ne Yeshu kinhilwij muchi:
—Ankistiwit nechitzkiat ken muitzkia se techtekini, iwan majmachej wan kwajkwawit, wan mujmusta ninentuk tik ne teupan nitamachtia wan te anwalajket annechkwit!
56 Muchi ini muchijki pal ma yekawi tay kijkwilujket ne taketzanimet. Kwakuni muchi ne mumachtianimet kiajkawket wan chulujket.
Yeshu ilpituk
57 Ne kikwijket ne Yeshu kiwikaket ichan Kayapa ne weypalej wan né musentepewket ne tajkwiluanimet wan ne noymet. 58 Ne Pedro nejnenki ka wejka iipan hasta ne iweykal ne weypalej wan kalak kalijtik wan mutalij kan nemituyat ne tekitinimet pal kita ken ijtuk.
59 Tatejtemuat ne weypalejmet wan muchi ne kalpuli pal kiajsit ká inaskia sanka ipanpa ne Yeshu pal welit kimiktiat, 60 wan te kiajsiket, melka miak ajsiket inat sajsanka. Tipan ajsiket ume 61 inaket:
—Yaja inak: "Niweli niktajkali ne teupan ipal ne Teut wan niweli niketza ukseuk ijtik yey tunal."
62 Wan ne weypalej muketzki wan kilwij:
—Inte tina tatka? Tay ini yejemet inat ka tikchijki?
63 Ne Yeshu semaya nakak takaktuk, wan ne weypalej kilwij:
—Nimetztuktia tik itukay ne Teut Yultuk ma shitechilwi asu taja ne Mawaltijtuk, ne itelpuch ne Teut!
64 Ne Yeshu kilwia:
—Tajasan tinak. Sema nimetzinhilwia, san ankitasket ne Itelpuch ne Takat muetztuk ka imayekkan ne Weli Wey walejku pak ne mijmishti ipal ne ilwikak.
65 Kwakuni ne weypalej kitapanki ne ikwajkwach, wan ina:
—Intea muneki ma aka ina tatka! 66 Tay anhinat?
Yejemet inaket:
—Ma kimiktikan!
67 Kwakuni tachijchaket ijpak ne iishkalyu wan kichalujket, wan kimakaket 68 wan inat katka:
—Shitechnutza ken se taketzani, Mawaltijtuk: ká ne metzchaluj?
Pedro ina ka inte kishmati
69 Pedro kiski tatenpan wan mutalij. Wan se siwapil ajsik itech ina:
—Taja nusan tinemik itech Yeshu pal Galilaya!
70 Ishpan muchi yaja inak:
—Inte nikmati tay tikneki tina!
71 Kiski ka tenkal, wan ukse siwat kitak, wan pejki kinhilwia ne nemituyat inawak:
—Yajuni nemik iwan Yeshu ne Nazarayuj!
72 Wan kichijki jurar wan inak senpa:
—Inte nikishmati!
73 Tipan ajsiket itech Pedro ne unisan nemit wan kilwijket:
—Ijkia, taja nusan se pal yejemet! Hasta ipanpa ne mutaketzalis mumati!
74 Kwakuni pejki kichiwa maldictar wan kichiwa jurar ka:
—Inte nikishmati ne takat.
Kwakuni takwikak se ukichtijlan, 75 wan Pedro kielnamik tay inak Yeshu: "Achtu ka takwika ne ukichtijlan, yey wipta tiaw tina ka inte tinechishmati."
Wan kiski, yajki, wan pejki chuka.
Ne Bibliaj Tik Nawat · © 2008, 2012 Jan Morrow