Read the Gospels in 40 Days
Tay inak ipanpa ne munamiktijtiwit wan muajkawat
10 Wan muketzki wan kiski, wan yawi nepa Yudaya wan iten ne apan Yarden, wan ken achtu, miak yawit katka iwan, wan yaja kinmachtia ken senpa. 2 Wan sejse Parishayuj ajsiket wan kitajtanilijket su nemi yek ma kiajkawa isiwaw se, pal kiejekuat. 3 Yaja kinhilwij:
—Tay metzintuktia Moshe?
4 Yejemet inaket:
—Moshe inak ka weli mutawawasua se amat ina ka muajkawtiwit wan weli kiajkawa.
5 Ne Yeshu kinhilwij:
—Metzinmakak uni tatuktilis ika anmejemet yujyultakwaknaj. 6 Kwak ne Teut pejki kichiwa muchi, kinchiwki takat wan siwat; 7 neka ne takat kiajkawas iteku wan ne inan 8 wan ne ujume mukwepasket sanse innakayu; ijkiuni intea ume asunte se. 9 Yajika, tay ne kisenputzuj ne Teut, ma inte kikupewa takat.
10 Wan kwak mukweptiwita ichan, ne mumachtianimet kitajtanilijket tay kinekituya ina, 11 wan kinhilwia:
—Ká ne kiajkawa isiwaw wan munamiktia iwan ukse siwat, kiawiltia, 12 wan asu ne siwat kiajkawa ishulejyu wan munamiktia iwan seuk, mawiltia.
Ne shujshulut
13 Wan kalinwikaket kukunetzitzin itech pal kinmatuka. Ne mumachtianimet kinhajwaket. 14 Kwak ne Yeshu kitak kwalanik wan kinhilwij:
—Shikajkawakan walajsit ne kukunetzitzin, maka shikinhajwakan; ika ne itatekimakalis ne Teut yawi pal sejse kiane. 15 Kia nimetzinhilwia: ká te kikwi ne itatekimakalis ne Teut ken se kunetzin inte kalakis.
16 Wan kinnapaluj, wan kitalij ijimey inhijpak wan kinteuchiwki.
Uij ma kalaki se kipia wey tik ne itatekimakalis ne Teut!
17 Wan kwak pejki nejnemi tik ne ujti, ajsik mutalua se itech mutankwaketza wan kitajtanilij:
—Yek tamachtiani, tay weli nikchiwa pal niyultuk senpa?
18 Yeshu kilwij:
—Taika tinechnutza yek? Inte kanaj yejyek asunte sema se wan yaja ne Teut. 19 Tikmatiaya tay nemi tuktijtuk: maka shitamikti; maka shimawilti; maka shitechteki; maka shina ka ukse kichiwki tay inte muchiwki; maka shitashijshiku; shikintakamati muteku wan munan.
20 Yajuni kilwij:
—Tamachtiani, nikishpelwija muchi uni senpa.
21 Ne Yeshu kitak wan kitasujtak, wan kilwij:
—Kinekiuk se: shu-shiknamaka muchi tay tikpia wan shikinmaka ne munekit, wan tikpias muchalchiw tik ne ilwikak, wan shiwi nikan nuipan.
22 Yajuni yajki tristej ipanpa tay inak, ika tetekia wejwey ne ipalwan. 23 Yeshu tajtachiak wan kinhilwia ne mumachtianimet:
—Ne kipiat wey, uij ma kalakikan ijtik ne itatekimakalis ne Teut!
24 Ishpuyawit ne mumachtianimet ipanpa tay inak. Ne Yeshu kinhilwia senpa:
—Kia nupilawan, sea uij ma kalakikan tik ne itatekimakalis ne Teut! 25 Uij ma kalaki se camelloj ijtik ne kuyuntuk ipal se agujajchin, mas uij ma kalaki se kipia wey ijtik ne itatekimakalis ne Teut!
26 Yejemet sujsul ishpuyawit, wan muilwiat:
—Wan ká weli mupalewia?
27 Ne Yeshu kinhitak wan ina:
—Ne takamet te welit, ne Teut kia ika ne Teut weli muchi.
28 Ne Pedro pejki taketza, kilwia:
—Tejemet nikan muchi tikajkawket wan tiwalajtiwit muwan.
29 Inak ne Yeshu:
—Naja kia nimetzinhilwia: muchi ká ne kiajkawtuk ikal wan iikawan wan ieltiwan wan inan wan iteku wan ipilawan wan itajtal nupanpa wan ipanpa ne yeknawatilis 30 yawia kipia, asu kiajkaw sé, sentzunti kal wan iikawan wan ieltiwan wan inajnan wan ipilawan wan tajtal, melka yawit kiejekuat; wan tik ne tay witz yawi yultuk senpa. 31 Miak ká ajachtu yawit tijtipan, wan tijtipan ajachtu.
Tay yawi muchiwa tik Yerushalem
32 Tejkuket yajket ka Yerushalem wan ne Yeshu yawi katka inhishpan, wan ishpuyawit wan ne yawit iwan majmawit. Wan yaja kinnutzki ne majtakti-ume senpa wan pejki kinhilwia tay yawi panu:
33 —Nikan titejkut ka Yerushalem, wan yawit temakat ne Itelpuch ne Takat iwan ne weypalejmet wan ne tajkwiluanimet, wan tatuktisket ma miki, wan kintemakasket iwan ne tejtechan, 34 wan yawit ajkawetzkat, yawit tachijchat ijpak, yawit kiwitekit wan yawit kimiktiat, wan kwak panutiwit yey tunal yawi muyulkwi.
Ne ipilawan Zabday
35 Wan ajsit Yakob wan Yojan ne ipilawan Zabday kilwiat:
—Tamachtiani, timetztajtanit ma shitechchiwili se.
36 Wan kinhilwij:
—Tay ankinekit ma nikchiwa?
37 Yejemet kilwijket:
—Ma mutali ne se tejemet ka mumayekkan wan ne seuk ka ukse ladoj muejmuetztuk kan tiaw titzitzinaka.
38 Ne Yeshu kinhilwij:
—Inte ankimatit tay antajtanit! Tay anhinat, ka welit anhatit tik ne atiluni kan niaw niati naja wan welit anmumakat ne ulyuj ne niaw nimumaka?
39 Yejemet kilwijket:
—Tiwelit.
Wan Yeshu kinhilwij:
—Melka anhatisket tik ne atiluni kan niati wan ne ulyuj ne naja nimumaka anmumakasket, 40 inte niweli nimetzinhilwia ma shimutalikan né, asunte semaya ká ipal muajshitilijtuk.
41 Wan kwak ne majtakti takakket, pejket mukwalantiat iwan Yakob wan Yojan, 42 wan ne Yeshu kalinnutzki wan kinhilwia:
—Ankimatit ka ne mumatit ka tatuktiat tik sejse techan muchiwat tajtzitzinmet wan ne weymet kipiat tatuktilis ijpak muchi. 43 Inte yawi ijkiuni ijtik anmejemet: ká anmutzalan kielewiskia muchiwa wey, yawi tekiti anmupal, 44 wan ká muchiwaskia ne achtu, muchiwas anmutekitini, 45 ika nusan ne Itelpuch ne Takat inte walaj pal tatekimaka asunte pal kintekipanua sejseuk wan pal temaka ne ialmaj pal kiane welit mumakishtiat muchi.
Kipajtij ume pupuyut tik Yerijo
46 Wan ajsiket Yerijo, wan kwak kisat yawit tik Yerijo yaja wan ne mumachtianimet wan se wey miaktal, se pupuyut itukay Bar-Timay (ne ikunew Timay) nemituya tajtani muetztuk itech ne ujti; 47 wan kwak takakik ka yaja Yeshu pal Nazaret, pejki tzajtzi, ina:
—Ikunew Dawid, Yeshu, shinechpalewi!
48 Wan melka miak kiajwat ma takaktu, yaja tzajtzi mas:
—Ikunew Dawid, shinechpalewi!
49 Wan Yeshu muketzki wan inak:
—Shalnutzakan yajuni!
Wan kinutzat ne pupuyut, kilwiat:
—Yek nemi, shimuketza, yaja metznutza.
50 Kikutaminki talchi ne ikwenyu wan ijisiwki muketza wan yajki itech Yeshu, 51 wan Yeshu taketzki iwan ne pupuyut, inak:
—Tay tikneki ma nikchiwa mupal?
Wan ne pupuyut kilwij:
—Nutamachtiani, ma nitachia!
52 Wan Yeshu kilwij:
—Shiawa. Ne mutayulmatilis metzpalewtuk.
Wan tachishki nemanha wan yajki iwan tik ne ujti.
Kalaki tik Yerushalem
11 Wan kwak tzinkisket Yerushalem wan ajsiket Bet-Page wan Bet-Anya inakastan ne Olivajtepet, yaja kintuktia ume pal ne mumachtianimet 2 wan kinhilwia:
—Shumet uni techan nemi anmumelawka, wan kwak tamit anhajsit né anyawit ankiajsit se burrojchin ilpituk ne inteuk mutalij aka ijpak: shiksutumakan wan shalwikakan. 3 Wan su aka metzintajtanilia taika ankichiwat ijkiuni, shinakan:
"Ne itekuyu muneki, nemanha yawi kikwepa."
4 Wan yajket wan kiajsiket se burrojchin ilpituk itech se tentzakka né kan munamikit ne ujujti, wan kisutumat. 5 Wan nemituyat sejse ka né wan kinhilwijket:
—Tay ankichiwat? Taika ankisutumat ne burrojchin?
6 Yejemet kinhilwijket ijkiunisan ken inatuya ne Yeshu, wan kinhajkawket, 7 wan kalwikaket ne burrojchin kanka nemituya Yeshu, wan kitaliat inkwajkwach ijpak wan kitalijket ne Yeshu muetztuk ijpak. 8 Wan miak kichayawket ne inkwajkwach pak ne ujti, wan sejseuk kitekaket ijiswat ne kikutuntiwit tik ne kojtan, 9 wan ne yawit iishpan wan iipan tzajtziket yajket:
—Hosha-na! Teutasujtatuk ne witz tik itukay Tutajwan! 10 Teutasujtatuk ne tatekimakalis witz ipal ne tuteku Dawid! Hosha-na tik ne wejwejkapan!
11 Wan kalak tik Yerushalem. Yajki ne teupan, wan tajtachiak nujme. Kwak teutaka, kiski wan yajki Bet-Anya iwan ne majtakti-ume.
Ne kwawit inte tamaka itakil
12 Ne ukse tunal kwak kisat tik Bet-Anya, mayanki. 13 Né wejka kitak se kuyu amat tentuk wan ijiswat, wan ajsik itech kita su kipia itakil, wan kwak ajsik te kiajsik tatka, semaya ijiswat, ika te nemituya ne metzti pal kipia itakil, 14 wan yaja kilwij:
—Ma aka intea keman kikwa ne mutakil!
Wan ne mumachtianimet kikakket.
Ajsik ne teupan
15 Wan ajsit Yerushalem, wan Yeshu ajsik ne teupan wan pejki kishtia ne tanamakanimet wan ne takuanimet nemituyat itech ne teupan wan kishtapachuj ne mejmesaj pal ne tuminpatanimet wan ne kujkuijpal pal ne kinamakat wijwilut; 16 wan te kiajkawa katka ma aka kisajsaka nian se taijtik tik ne teupan. 17 Wan yaja tamachtia katka wan kinhilwia katka:
—Anka inte ankimatit ka nemi tajkwilujtuk: "Ne nukal munutzas se kal ipal teutajtanilis ipal muchi ne tejtechan"? Ankichiwtiwit ka mukweptuk se ustut pal techtekinimet!
18 Wan takakket ne weypalejmet wan ne tajkwiluanimet, wan pejket tatejtemuat ken kipuluskiat. Yejemet majmawit ika muchi ishpuyawit katka iwan ne itamachtilis. 19 Wan kwak kalaki ne tunal, kisat tik ne weytechan.
Ne kwawit inte tamaka itakil (senpa)
20 Wan kwak panut ka peyna, kitaket ne kuyu amat wan muchi nemituya kuwaktuk, hasta ne inejnelwayu, 21 wan ne Pedro kielnamik wan kilwij:
—Tajtzin, shikita ne kuyu amat tikchiwki maldictar! Kuwaktuka!
22 Wan ne Yeshu kinhilwij:
—Shikyulmatikan ne Teut! 23 Naja kia nimetzinhilwia: asu se kilwiskia uni tepet: "Shimuketza wan shimutamuta tik ne wey at!" wan asu kimati tik iyulu ka ne tay ina yawi muchiwa, yawi muchiwa. 24 Yajika nimetzinhilwia: muchi tay ankitajtanit kwak ankinujnutzat ne Teut, shitayulmatikan ka ankikwijketa wan ankipiasket. 25 Wan kwak anteutajtanit, asu aka metzchiwilij se tay teyek shikelkawaya, pal kiane ne anmuteku ne nemi ajku nusan yawi kitapupulwia muchi tay ankichiwtiwit tay teyek. (26) .
Ká kituktia Yeshu?
27 Wan ajsit Yerushalem senpa wan kwak yaja nejnemi itech ne teupan, itech ajsit ne weypalejmet wan ne tajkwiluanimet wan ne noymet, 28 wan kilwiat:
—Katiawel ne tatuktilis pal tiweli tikchiwa muchi uni, wan ká metzmakak pal taja tiweli tikchiwa?
29 Ne Yeshu kinhilwij:
—Naja nikpia se pal nimetzintajtanilia: shinechilwikan ini wan niaw nimetzinhilwia katiawel ne tatuktilis pal niweli nikchiwa. 30 Ne teulyujmakalis ipal Yojan walkiski ka ilwikak o itech takamet? Shinechilwikan!
31 Wan inat tik inyujyulu:
"Asu tejemet tinat ka ilwikak, yawi ina: taika tel inte ankiyulmatket? 32 Asu tinat itech takamet..."
Majmawit ika muchi ne miaktal kimatit ka tejkia ka Yojan se taketzani pal ne Teut. 33 Wan yejemet kilwijket Yeshu:
—Te tikmatit.
Wan Yeshu kinhilwia:
—Naja nusan inte nimetzinhilwia katiawel ne tatuktilis pal nikchiwa tay nikchiwa!
Ne talchiwanimet tik ne shukumekamil
12 Wan pejki kinhilwia cajcasoj. Inak:
—Se takat kitukak se shukumekamil, wan kiyawaluj iwan se kulal, wan kikuyun ne shaput kan mupachua ne itakil ne shukumekat pal muishtia ne iayu pal muchiwa kushushaj, wan kiketzki se tepekal pal tapachiwiat, wan kwak tamik kichiwa muchi kiajkaw ne mil tik inmejmey talchiwanimet wan yajki wejka. 2 Wan kwak ajsik ne horaj, kituktij ka né se tekitini pal ne talchiwanimet kimakat ne itakil ne shukumekamil, 3 wan kitzkijket wan kiwitekket wan kishtijket ka né, wan te kimakaket tatka. 4 Wan kituktij senpa ka né ukse tekitini, wan kitzunchalujket wan kitzuntekket. 5 Wan kituktij ukseuk wan yaja nusan kimiktijket, wan muchi ká kintuktia kichiwat katka kenha: kiwitekit sejse wan kimiktiat sejseuk. 6 Ne takat kipiatuya se itelpuch ká sujsul kitasujta, wan pal tami kituktij yajuni ika ina katka:
"Yawit kitakamatit ne nutelpuch."
7 Wan uni talchiwanimet muilwijket:
"Kwak miki ne tutekuyu muchi yawi ipal yajini. Tikmiktikan wan muchi yawi tupal!"
8 Wan kitzkijket wan kimiktijket wan kishtijket tik ne shukumekamil. 9 Tay yawi kichiwa ne itekuyu ipal ne mil? Yawi witz wan yawi kinwilewa ne talchiwanimet wan yawi kinmaka ne mil sejseuk. 10 Te ankimatit nian ini tay ijkwilujtuk?
"Ne tet ne kitejtenewket ne kalketzanimet
mukwepki ne itzinteu kal!
11 Tutajwan yajasan kichijki,
wan titachiat wan tishpuyawit."
12 Tatejtemuat katka pal kitzkiat. Melka uni, majmawit katka ika muchi kimatit ka yaja inak uni casoj inpanpa yejemet. Wan kinhajkaw wan yajki.
Shikmakakan ne taltikpaktuktiani tay ipal ne taltikpaktuktiani
13 Wan kintuktiat sejse pal ne Parishayujmet wan ne itepewa pal Herodes pal kitat su welit kipewiat ma ina se pal kitzkiat, 14 wan ajsiket wan kilwiat:
—Tamachtiani, tikmatit ka taja tina tay tejkia wan te tikishtemua aka ika muchi kenhat mupal wan semaya titamachtia ne ujti yek ipal ne Teut. Tiknekit timetztajtaniliat su nemi yek ma tiktashtawakan tumin ne taltikpaktuktiani ipal Roma. Tiawit titamakat o te tiawit titamakat?
15 Yaja kimatiaya ka kinekituyat kishijshikuat wan kinhilwij:
—Taika annechejekuat? Shalwikakan se tumin ma nikita.
16 Kalwikaket wan yaja kinhilwia:
—Ká ipal ne itachialis wan ne itukay tik ini pesoj?
Inaket:
—Ipal ne taltikpaktuktiani.
17 Yeshu kinhilwij:
—Shikmakakan ne taltikpaktuktiani tay ipal ne taltikpaktuktiani wan shikmakakan ne Teut tay ipal ne Teut.
Wan ishpuyawket.
Ne miktiwit yawit walmukwepat?
18 Wan walajsit Tzadukayujmet, yejemet ká inat katka ka te tiawit timuyulkwepat kwak timikit, wan kitajtaniliat:
19 —Tamachtiani, Moshe techilwij ijtik iamaw: "Asu miki ne imanuj se wan naka ne isiwaw wan te kiajkaw se ikunew, ne iikaw nemi pal kikwi ipal ne isiwaw ne miktuk pal kiketza ne ishinach ne imanuj." 20 Nemiket chikume takat ká muchi tekniwan wan ne achtu munamiktij wan mikik wan te kiajkaw ishinach, 21 wan ne iikaw kikwij ne siwat wan mikik wan nusan te kiajkaw ishinach, wan ne yey kenha, 22 wan ijkiuni hasta ne chikume kenhaya wan nian se pal ne chijchikume kiajkaw ishinach; wan ne siwat nusan mikik. 23 Kwak yawit muyulkwepat muchi, katiawel ne ishulejyu uni siwat? Ika ne chijchikume munamiktijtiwit iwan!
24 Ne Yeshu kinhilwij:
—Nina ka anmushijshikuat ika inte ankimatit tay nemi tajkwilujtuk, nian tay weli ne Teut. 25 Kwak yawit muyulkwepat, ne takamet wan siwatket inte yawit munamiktiat, muchiwat ken tanawatianimet tik ne ilwikak. 26 Inte ankimatit tay ne metzinhilwij ne Teut ijtik ne kwawit mimilaka (tik iamaw Moshe) ipanpa kwak muyulkwepat ne miktiwit? Ina:
"Naja ne Teut ipal Abraham wan ne Teut ipal Itzak wan ne Teut ipal Yakob."
27 Yaja inte ne Teut ipal ne miktiwit asunte ipal ne yujyultuk. Anmushijshikuat sujsul!
Katiawel ne mas wey tay nemi tuktijtuk?
28 Wan ajsik se pal ne tajkwiluanimet. Yaja takakik ken kitajtaniliat wan kitak ka yaja nankilij yek, wan kitajtan:
—Katiawel ne achtu ipal muchi tay nemi tuktijtuk?
29 Ne Yeshu inak ka ini ne achtu:
"Shitakaki Israel, Tutajwan ne Teut, Tutajwan sesan. 30 Wan tiktasujtas ne muteku ne Teut iwan muchi muyulu, muchi mualmaj, muchi mutamatilis wan muchi mutajpal."
31 Ini ne ukseuk:
"Tiktasujtas ne muiknew ken tajasan timutasujta."
Yejemet ne wejwey tay techtuktijtuk; inte kanaj nian tatka mas wey.
32 Wan ne tajkwiluani kilwij:
—Yek, tamachtiani, tinak tay tejkia, ka yaja sesan wan te nemi ukseuk, semaya yajasan, 33 wan su tiktasujtat iwan muchi tuyulu wan muchi tutamatilis wan muchi tutajpal wan su tiktasujtat tuiknew ken tejemetsan timutasujtat, mas wey ipatiw uni que muchi ne tay weliskiat tiktatiat ipal ne Teut wan tiktakuliat ne Teut.
34 Wan ne Yeshu kwak kitak ka taketzki iwan tamatilis kilwij:
—Te tinemi wejka ne itatekimakalis ne Teut.
Wan tea su aka kitajtanilia tatka ika majmawit.
Ká ne Mawaltijtuk?
35 Wan ne Yeshu taketzki kwak tamachtia nemi itech ne teupan, ina:
—Ken ka inat ne tajkwiluanimet ka ne Mawaltijtuk itelpuch Dawid? 36 Dawid yajasan inak itech ne Ijiutzin:
"Ne Nuteku kilwij ne nutajtzin:
Shimutali ka nuyekkan hasta ma niktali ká ne kinekit metzijtakuat ken se kuijpal ka itan mujmukshi."
37 Asu Dawid yajasan kilwia "nutajtzin", ken weli ma ikunew?
Wan miak pakit kikakit.
Maka shimuchiwakan ken ne Parishayujmet
38 Wan tik ne itamachtilis ina katka:
—Cuidadoj iwan ne tajkwiluanimet ne kinekit pashaluat tik wijwipil weyak wan ma muchi kintajpalukan tik ne tiankis, 39 wan kinekit ne ajachtu mutalijka tik ne kalsennemit, wan kinekit nemit itzalan ne weymet tik yujyualu. 40 Yejemet kalakit inchan lajlamajtzitzinmet kikwat muchi, wan taketzat wey pal kinutzat ne Teut semaya pal muitat. Yejemetsan yawit muchiwat juzgar!
Ne tetakulis ipal ne inte kipia tatka
41 Wan nemik muetztuk imelawka ne cajaj ipal ne teupan kan musentepewa tumin wan nemik tachia wan kita katka ken muchi kiajkawat itumin tik ne cajaj. Wan miak ká kipiatuyat wey kitakuliat katka wey. 42 Wan walaj se lamajtzin te kipiatuya tatka wan kitamutilij ume centavojchin (kineki ina chiupichin tumin), 43 wan Yeshu kinnutzki wan kinhilwij ne mumachtianimet:
—Kia nimetzinhilwia: uni lamajtzin ne inte kipia tatka kitakulij mas que muchi ne kitalijket tumin tik ne cajaj, 44 ika muchi kishtijtiwit ijtik tay kipiat wan tepewi ne intumin; yaja inte, yaja tamakak muchi tay kipia pal mutekipanua.
Ne Bibliaj Tik Nawat · © 2008, 2012 Jan Morrow