Read the Gospels in 40 Days
Kalaki tik Yerushalem
21 Wan kwak tzinkisket Yerushalem wan ajsiket Bet-Page inawak ne Olivajtepet, Yeshu kintuktij ume mumachtiani 2 kienej:
—Shumet uni techan né anmumelawka. San ankiajsisket se burroj ilpituk itech se burrojtzin. Shiksutumakan wan shalwikakan. 3 Wan asu aka metzinhilwiskia tatka, shinakan:
"Muneki ne intekuyu."
Wan yawia kintuktia.
4 Muchijki ini pal yekawi tay inak ne taketzani, ina:
5 "Shikilwikan ne siwapiltzin ipal Tzion:
Uni witz mutatuktiani
nejmachnemi pak se burroj
wan pak se burrojtzin."
6 Ne mumachtianimet yajket wan kichijket ijkiunisan ken Yeshu kintuktijtuya. 7 Kalinwikaket ne burroj wan ne burrojtzin wan kintalilijket kwajkwachti wan inhijpak kitalijket ne Yeshu. 8 Sekit kichayajket inkwajkwach tik ne ujti; sekit tamajmajtzalkutunket wan kitenket ne ujti wan majmajtzal. 9 Tzajtziket yajket ne takamet wan siwatket iishpan wan iipan, inat:
—Hosha-na ne itelpuch Dawid! Teutasujtatuk ne witz tik itukay Tutajwan! Hosha-na tik ne wejwejkapan!
10 Wan kwak kalak tik Yerushalem, mukumuntijket muchi ne techanchanejket inat:
—Ká ini?
11 Inat muchi:
—Yajini ne taketzani Yeshu ipal Nazaret tik Galilaya.
12 Wan ajsik Yeshu ne teupan wan kinhishtij muchi ne tanamakanimet wan ne takuanimet nemituyat itech ne teupan wan kishtapachuj ne mejmesaj pal ne tuminpatanimet wan ne kujkuijpal pal ne kinamakat wijwilut, 13 kinhilwia:
—Nemi tajkwilujtuk: "Ne nukal munutzas se kal ipal teutajtanilis". Anmuwan mukweptuk se ustut pal techtekinimet!
14 Ajsiket itech ka teupan pupuyumet wan metzkelumet, wan kinpajtij.
15 Kwak ne weypalejmet wan ne tajkwiluanimet kitaket muchi tay kichijki wan ken ne pijpipiltzitzinmet tik ne teupan tzajtzit nemit wan inat "Hosha-na ne itelpuch Dawid!", sujsul kwalanket 16 wan kilwijket:
—Taja titakaki tay inat?
Yeshu kinhilwia:
—Nikinkaki. Niakeman antakaktiwit ka "itech inten sujsulin wan shujshulut timunutzki wey"?
17 Wan kinhajkaw wan kiski tik ne techan wan yajki Bet-Anya, wan ka né panuk ne tayua.
Ne kwawit inte tamaka itakil
18 Kwak mukwepki yajki tik ne techan peyna, yaja mayanki 19 wan kitak se ikuyu amat tik ne ujti, wan kwak ajsik itech te kiajsik tatka, sema ijiswat, wan kilwia:
—Ma intea keman kisa mutech nian se mutakil!
Wan ne kwawit kuwakik nemanhachin. 20 Wan ne mumachtianimet kitaket wan ishpuyawiket, inat:
—Ken ka ne kuyu amat kuwakik nemanhachin?
21 Ne Yeshu nankilij, kinhilwij:
—Kia nimetzinhilwia: asu antayulmatiskiat, inte sema anweliskiat kichiwat ijkiuni iwan ne amat; nusan weliskiat ankilwiat uni tepet ma muketza wan ma mutamuta tik ne wey at wan kiuni muchiwaskia! 22 Wan muchi tay ankitajtanit kwak ankinutzat ne Teut, asu antayulmatit tik anmuteutajtanilis, san ankipiasket.
Kanka witz ne itatuktilis Yeshu?
23 Wan kwak yaja yajki tamachtia itech ne teupan, ajsiket ne weypalejmet wan ne noymet ipal ne techan, inat:
—Katiawel ne tatuktilis pal taja tiweli tikchiwa muchi uni, wan ká ne metzmakak?
24 Ne Yeshu nankilij; kinhilwij:
—Naja nusan nikpia se pal nimetzintajtanilia, wan asu annechilwiat naja nusan niaw nimetzinhilwia katiawel ne tatuktilis pal weli nikchiwa tay nikchiwa. 25 Ne iteulyujmakalis Yojan kan walkiski: ka ilwikak o itech takamet?
Yejemet inat tik inyujyulu:
—Asu tejemet tinat ka ilwikak, yawi techilwia: taika tel inte ankiyulmatket? 26 Asu tinat ka itech takamet, kimatit muchi ne miaktal ka Yojan se taketzani pal ne Teut, yajika timajmawit.
27 Yejemet nankilijket:
Te tikmatit.
Kinhilwij:
—Naja nusan inte niaw nimetzinhilwia katiawel ne tatuktilis pal nikchiwa uni! 28 Tay anhinat? Se takat kipiatuya ume piltzintzin, wan ajsik itech ne achtu wan inak:
"Pipil, shu-shitekiti tik ne mil."
29 Yaja nankilij:
"Te nikneki."
Tipan kipatak iyulu wan yajki tekiti. 30 Ajsik itech ne seuk, wan kilwij kenha. Yaja nankilij:
"Niasneki, tajtzin!"
Melka uni inte yajki. 31 Katiawel pal yejemet kichijki tay kinekituya iteku?
Inat:
—Ne achtu.
Ne Yeshu kinhilwia:
—Kia nimetzinhilwia ka ne tumintepewanimet wan ne siwapalamet yasnekit tik ne itatekimakalis ne Teut achtu ka anmejemet, 32 ika walaj anmutech Yojan tik ne ujti yek, wan te ankiyulmatket. Ne tumintepewanimet wan ne siwapalamet kia kiyulmatket. Anmejemet kwak ankitaket uni inte ankipataket anmuyujyulu nian pejket ankiyulmatit.
Ne talchiwanimet tik ne shukumekamil
33 [Wan inak:]
—Shitakakikan seuk casoj: Nemik se takat kipia tajtal, wan kitukak se ishukumekamil, wan kiyawaluj uni shukumekamil iwan se kulal, wan nusan kikuyun ne shaput kan weli mupachua ne itakil ne shukumekat pal muishtia ne iayu pal muchiwa kushushaj, wan kiketzki se tepekal pal tapachiwiat, wan kiajkaw ne mil tik inmejmey talchiwanimet wan yajki wejka. 34 Kwak ajsiket ne tujtunal pal muana ne itakil, kintuktij itejtekitini pal kalkwit tay ipal. 35 Ne talchiwanimet kitzkijket uni tekitinimet, wan se kichalujket, seuk kimiktijket wan ukseuk kitejteminket. 36 Senpa kintuktij miak tekitini, wan ijkiasan kinchiwilijket. 37 Kwakuni kituktij ne itelpuch, ka inak: "Kitakamatisket ne nutelpuch." 38 Kwak ne talchiwanimet kitaket ne piltzin, muilwijket:
"Yajini yawi itekuyu muchi ipalwan kwak yawi miki tutekuyu! Tikmiktikan tel wan muchi yawi tupal!"
39 Wan kitzkijket wan kishtijket tik ne shukumekamil wan kimiktijket. 40 Kwak ajsi ne itekuyu ipal ne mil, tay yawi kichiwa iwan uni talchiwanimet?
41 Kilwiat:
—Yawi kinwilewa tetekia sea, wan yawi kinmaka ne mil sejseuk talchiwani ká kikwepilisket ne itajtakil kwak nemit pal kimakat.
42 Ne Yeshu kinhilwia:
—Niakeman ankitaket ka nemi tajkwilujtuk:
"Ne tet ne kitejtenejket ne kalketzanimet
mukwepki n' itzinteu kal!
Tutajwan yajasan kichijki,
wan titachiat wan tishpuyawit."
43 Neka nimetzinhilwia ka yawit metzinhishtiliat ne itatekimakalis ne Teut pal kimakat se techan tamaka itajtakil. 44 Muchi ká wetzi pak uni tet yawi keluni, wan asu ne tet wetzi ijpak se, yawi kikwechua.
45 Wan kwak ne weypalejmet wan ne Parishayujmet kikakket ini cajcasoj ne kinhilwij, kimatket ka ina inpanpa 46 wan tatejtemuat pal kitzkiat. Melka uni majmawket ika muchi inat ka yaja se taketzani ipal ne Teut.
Ne wey yualu
22 Wan Yeshu mukwepki kinhilwia cajcasoj, ina:
2 —Ne tatekimakalis ipal ne ilwikak, yaja ken se tatuktiani ne kichijki se yualu ika munamiktij ne ikunew, 3 wan kintuktij ne itejtekitini kinhilwiat ne nujnutztuk ma ajsikan, wan te kinekituyat ajsit. 4 Kintuktij sejseuk wan inak:
"Shikinhilwikan: nikekchijtuka ne takwal, nikmiktijtuka ne wajwakash wan nemia muchi, shiwikikan!"
5 Inte kichiwilijket casoj wan yajket, ne se tik ne imil, ne seuk ka tiankis, 6 wan sekit hasta kinhitzkijket ne tekitinimet, kinhijilwijket wan kinmiktijket. 7 Ne tatuktiani kwalanik sujsul: kituktij tasumanimet kinwilewat uni tamiktianimet, wan kitatij intechan. 8 Kwakuni kinhilwia ne tekitinimet:
"Melka ne yualu muekchijtuka, ne munutztiwit inte ipanit. 9 Yajika shipanukan tik ne ujujti wan shiknutzakan muchi ká ankinnamikit ma wikikan takwat."
10 Wan uni tekitinimet kisket wan panuket tik ne ujujti kisentepewat muchi ká kinnamikket, asu yejyek wan asu inte yejyek kenhaya, wan temik ne yualu iwan miak sentakwat. 11 Kwak ne tatuktiani kalak pal tachia, ikuni itzalan ne sentakwanimet yaja kitak tik se yualu se inte takentijtuk ishyektzin ken muneki, 12 wan kilwia:
"Kunpalej, ken ka tiwitz ka yualu wan te tiktalia mukwajkwach ishyektzin?"
Wan te inak tatka. 13 Kwakuni ne tatuktiani kinhilwij ne tekitinimet:
"Shikilpikan ne ijikshi wan ne imejmey yajuni wan shikishtikan tatenpan kan kunyua; yawi chuka, yawit tzalanit itajtan."
14 Melka mijmiak ne munutztiwit, chiujchiupi ne muishpejpenat.
Shikmakakan ne taltikpaktuktiani tay ipal ne taltikpaktuktiani
15 Kwakuni ne Parishayujmet yajket wan sentajtaketzket pal kitat ken kichiwaskiat pal kishijshikuat. Kinekituyat ma ina se, pal ipanpa welit kitzkiat, 16 wan kintuktijket ne inmujmumachtiani wan ne itepewa pal Herodes ma kilwikan:
—Tamachtiani, tikmatit ka taja tina tay tejkia wan titamachtia katiawel ne ujti tejkia ipal ne Teut, wan te tikishtemua aka ika muchi kenhat mupal; 17 shina tel tay tina, nemi yek ma tiktashtawikan ne taltikpaktuktiani ipal Roma o te?
18 Ne Yeshu kimatki ka yejemet kinekituyat kishijshikuat wan inak:
—Taika annechejekuat? Tensasalmet! 19 Shinechilwitilikan ne tumin ne mukwi pal mutashtawia!
Wan kalwikaket se pesoj, 20 wan kintajtanilia:
—Ká ipal ne itachialis wan ne itukay tik ini pesoj?
21 Kilwiat:
—Ipal ne taltikpaktuktiani.
Kwakuni kinhilwia:
—Yek tel, shikmakakan ne taltikpaktuktiani tay ipal ne taltikpaktuktiani wan shikmakakan ne Teut tay ipal ne Teut.
22 Kwak kikakket ishpuyawiket, wan kiajkawket wan yajket.
Ne miktiwit yawit walmukwepat?
23 Uni tunal, ne Tzadukayujmet ajsiket itech. Yejemet inat ka inte timuyulkwepat kwak timikit, wan kitajtanilijket, 24 inat:
—Tamachtiani, Moshe inak ka su miki se wan te kipia ipilawan, ne iikaw nemi pal munamiktia iwan ne isiwaw ne miktuk pal kiketza ne ishinach ne iechkaw. 25 Nikan nemiket chikume takat. Yejemet tekniwan. Wan ne achtu munamiktij wan mikik, wan te kipiatuya ishinach, yajika kiajkawilij ne isiwaw ne iikaw. 26 Panuk kenha iwan yajuni wan iwan ne yey wan ne sejseuk, hasta ne chikume. 27 Wan ne siwat mikik nusan. 28 Kwak yejemet yawit muyulkwepat, ká ne ishulejyu uni siwat? Muchi munamiktijtiwit iwan!
29 Yeshu inak:
—Anmushijshikuat, inte ankimatit tay nemi tajkwilujtuk, nian tay weli ne Teut, 30 ika kwak muyulkwepat, ne takamet wan siwatket inte munamiktiat, muchiwat ken tanawatianimet tik ne ilwikak. 31 Inte ankimatit tay ne metzinhilwij ne Teut kwak muyulkwepasket ne miktiwit? Ina:
32 "Naja ne Teut ipal Abraham wan ne Teut ipal Itzak wan ne Teut ipal Yakob."
Yaja inte ne Teut ipal ne miktiwit asunte ipal ne yujyultuk.
33 Wan kwak muchi kikakket, ishpuyawiket ipanpa ne itamachtilis.
Katiawel ne mas wey tay nemi tuktijtuk?
34 Kwak ne Parishayujmet takakket ka yaja nankilij wan ne Tzadukayujmet inte weliket inat tatka, musentepewket, 35 wan se yejemet, se tajtulmati, kitajtanilij pal kiane kiejekua:
36 —Tamachtiani, katiawel wey ipal muchi tay nemi tuktijtuk tik ne tajtuli?
37 Yaja kilwij:
—"Tiktasujtas ne Muteku ne Teut iwan muchi muyulu, muchi mualmaj wan muchi mutamatilis": 38 ini ne wey wan ne achtu tay nemi tuktijtuk. 39 Ne ume, ijkiasan: "Tiktasujtas ne muiknew ken tajasan timutasujta." 40 Tik ini ujume tay mutuktijtwit mukupilua muchi ne tajtuli wan nusan ne taketzanimet.
Ká ne Mawaltijtuk?
41 Kwak musentepejtiwit ne Parishayujmet, Yeshu kintajtanilij, 42 ina:
—Tay anhinat? Ne Mawaltijtuk yaja ikunew ká?
Kilwiat:
—Yaja ne ikunew Dawid.
43 Kinhilwia:
—Su ijkiuni, ken ka Dawid, itech ne Ijiutzin, kilwia "nutajtzin"? Ina:
44 "Ne Nuteku kilwij ne nutajtzin:
Shimutali ka nuyekkan hasta ma niktali ká ne kinekit metzijtakuat ken se kuijpal ka itan mujmukshi."
45 Su Dawid kilwia "tajtzin", ken weli ma ikunew yaja?
46 Wan te welik aka nankilia tatka, nian aka kipiatuya valor pal kitajtanilia tatka mas.
Ne Bibliaj Tik Nawat · © 2008, 2012 Jan Morrow