Chronological
1 Tejemet, Pawlo wan Silvanus wan Timoteo, tiktuktiat ini tajkwilul itech ne sennemit ipal ne Tesalonika chanejket ijtik tuteku Teut wan tajtzin Yeshu Mawaltijtuk.
Ma shikpiakan tetasujtalis wan nejmachnemilis.
2 Tikilwiat padiush ne Teut senpa ka anmumaku wan senpa timetzinhelnamikit muchi tik tuteujteutajtanilis. 3 Tikelnamikit ne anmutekiw ipal tayulmatilis, wan keski antekitket ipal tetasujtalis, wan ne anmutanejmachselilis ipanpa tejchialis ipal ne tutajtzin Yeshu Mawaltijtuk iishpan ne Teut wan Tuteku.
4 Tikmatit, nukniwan, ka ne Teut metzintasujta wan metzinhishpejpen, 5 ika ne tuyeknawatilis te ajsituk anmutech sema tik pajpalabraj sute nusan tik itajpal, wan iwan Ijiutzin, wan sujsul anmumatket ka tejkia; ijkiuni, ankimatit ken tejemet katka kwak tinemiket itzalan anmejemet ka anmumaku. 6 Wan anmejemet muchijket sejse ken tejemet wan ken ne Tajtzin. Ankikwijket ne palabraj, tik wey uijkayu, iwan pajpakilis ipanpa ne Ijiutzin, 7 ken anmuchijket se figuraj ipal muchi ne tayulmatit tik ne Macedonia wan ne Akaia. 8 Ika anmutech tzalanik ne ipalabraj ne Tajtzin te semaya tik Macedonia wan Akaia, sute nujme mukakik ne anmutayulmatilis ipal ne Teut, ken te timunekit tinat tatka, 9 ika yejemetsan taneshtiat insel ken tejemet tiajsiket anmutech wan ken anmuishkweptiwit itech ne Teut wan ankiajkawtiwit ne teujteutzin pal antekitit ipal ne Teut yultuk wan yekkaya, 10 wan ankichiat ne ikunew ne yawi kisa tik ne ilwikak, ne kiketzki kwak miktuk, Yeshu, ká techmakishtijtuk itech ne kwalan witz.
Pawlo tik Tesalonika
2 Ika anmejemet kimatit, nukniwan, ka kwak tiajsiket anmutech, timetzinpalewijket. 2 Melka achtu titajselijtuyat wan techijilwijtuyat, ken ankimatit, tik Pilipoy, titanawatijket melaknaj ipanpa ne Teut wan titanutzket anmuwan ipanpa ne Teut 3 ika tay ne techpalewia yaja te mushijshikulis, nian teshijshikulis, nian susulkayu, 4 sute ken ajwiak ipal ne Teut techmaka ne yeknawatilis pal titajpiat, ijkiuni titanutzat katka: te ken kitaskiat yek takamet sute Teut, ká yawi kita ken ne tuyujyulu. 5 Ika te keman tinatiwit se sema pal tinakat yek, ken ankimatit, nian pal timetzinshijshikuat pal timetzinhishtiliat tatka, ken kimati Teut, 6 nian tiktemuat katka ma ina aka ka tiwejwey, nian anmejemet nian sekit, 7 melka tiwelituskiat titajtanit, su tiknektuskiat, ma shitechtajkwaltikan ken itijtitanijtuk ne Mawaltijtuk; mas yek timuchijket sujsulin anmutzalan, ken se tiskaliani kitajpia yek ne ikukunew. 8 Ijkiuni timetzinnekit katka, wan tikitat yek ma timetzinmakakan te sema ne iyeknawatilis ne Teut sute nusan ne tuyujyulu, ika timetzintasujtaket.
9 Ankielnamikit, nukniwan, ken titekitket wan tikutiaket ka tayua wan ka tunal, pal te tikchiwat ma techkechtanu aka, wan timetzinnajnawatilijket ne iyeknawatilis ne Teut. 10 Anmejemet, ká tayulmatket, ankitztiwit, wan ne Teut nusan, ken tejemet yujyulchipawak katka wan timuwikaket ken muneki wan te tikchijket tatka tay inteyek anmuwan; 11 ankimatit ken timuchijket iwan muchi anmejemet ken ne iteku se iwan ikunew, 12 timetzinmakat tepalewilis wan tetasujtalis wan timetzinnawatiat ma shimuwikakan ken muneki ipal ne Teut ne metzinnutza pal ankalakit tik ne itatekimakalis wan itzitzinakalis. 13 Wan neka tejemet nusan te timuketzat tinat panpadiush ika kwak antakakket ne palabraj wan ankikwijket tutech, ne Teut kiajkaw ma shikwikan te se tay inaket takamet sute, ken yaja tejkia, ipalabraj Teut ká nusan tekiti ijtik anmejemet ká tayulmatit. 14 Anmejemet, nukniwan, muchijket ken ne sejsennemit ipal ne Teut ne nemit tik Yudaya ipal ne Mawaltijtuk Yeshu; ika nusan anmejemet tajselijtiwit itech ne chanejket ipal ne anmutal kenha ken yejemetsan itech ne Yudayujmet, 15 ká ne kimiktijket Yeshu wan ne taketzanimet wan nusan kichijket ka titajselijket; yejemet te kipaktiat nian ne Teut nian muchi takamet; 16 te techajkawket tiknutzat ne tejtechan pal mupalewiat, pal kiane ma temikan iwan intajtateyekchijtuk senpa. Tamik ajsi inhijpak ne kwalan!
17 Tejemet, nukniwan, techwikatiwit achi wejka; melka tea annemit tik tutachialis, ijtik tuyulu ijkia. Sea timutatemuilijtiwit pal tiajsit timetzinhitat ika tikelewiat. 18 Neka tiknektuskiat tiajsit anmutech, naja nusan, Pawlo; seujseujti nikejekuj wan ne Tenewani kichijki ka nishtunak, 19 ika tay ne tutejchialis? Wan tupajpakilis? Wan tuyawal pal timuweymatit? Sute anmejemet, iishpan ne tutajtzin Yeshu kwak ajsi witz, 20 ika anmejemetsan ne tutzitzinakalis wan tupakilis.
Timoteo tik Tesalonika
3 Neka kwak tea tiwelituyat timuseliat, tinaket ka tiawit tinakat tusel tik Atenas 2 wan tiktuktijket se itepalewiani ne Teut ipal ne iyeknawatilis ne Mawaltijtuk, tuiknew Timoteo, ma metzinmaka fuerzaj wan mutajtaweli ipanpa ne anmutayulmatilis, 3 pal kiane ma te aka mukakasu ipanpa ini ujuijkayu; ika ankimatit ka yaja nemi talijtuk ka tiawit tikseliat. 4 Ika nusan kwak tinemituyat anmuwan, timetzinhilwiat katka ka yawit techpitziniat, kenha ken ankimatit ka muchijtuk. 5 Neka naja tea niwelik nimuselia wan niktuktij se anmutech pal nikmati su antayulmatit o su metzinhejekujtuk ne taejekuani wan su te tatka ipatiw ne tutekiw.
6 Seman tel, walmukweptuk Timoteo ka nikan wan techneshtilijtuk ipanpa ne anmutayulmatilis wan anmutetasujtalis, wan techilwijtuk ka senpa antechelnamikit yek, wan ankielewiat techitat, ken tejemet nusan tikelewiat. 7 Yajika timumatit yek anmupanpa, nukniwan, melka techpachuat wan techpitziniat, ipanpa ne anmutayulmatilis, 8 ika ashan kenhayuk tiyujyultuk asu anmejemet nakat iwan ne Tajtzin.
9 Ken tiweliskiat tiktashtawiat ne Teut, ken tiwelit tikilwiat padiush ka anmumaku ipanpa muchi ne tupakilis kwak tipajpakit anmupanpa iishpan ne Teut? 10 Ka tayua wan ka tunal, sujsul nimutajtawelia iwan ne Teut ma weli nimetzinhita wan ma weli tami nitamachtia tay kinekiuk ipal ne anmutayulmatilis. 11 Ma kichiwa ne Teut, wan Tuteku, wan ne tutajtzin Yeshu, ma techwika ne tuuj anmutech. 12 Ma kichiwa ne Tajtzin ma tepewi wan samawa ne anmutetasujtalis sejse iwan sejse wan iwan muchi, ken ne tutetasujtalis anmuwan, 13 pal kichiwa ma chikawayakan ne anmuyujyulu, wan ma te kipiakan tatka tay teyek ipal ne Teut, tuteku, kwak ajsi ne tutajtzin Yeshu iwan muchi ne yejyek. Amen.
Shimutasujtakan, shisentekitikan
4 Pal tami, tel, nukniwan, ini timetzintajtanit wan timutajtaweliat ipanpa tajtzin Yeshu: ka ijkiunisan ken timetzinhilwijket ken yek ma shimuwikakan pal ankipaktiat Teut, wan nusan ken anmuwikat, ma shikchiwakan ijkiuni mas, 2 ika ankimatit tay timetzintuktijtiwit itech imey ne tajtzin Yeshu, 3 ika ini tay kielewia ne Teut, pal ma shimuchiwakan ipal ne Teut: ma te shitatzinhejenchiwakan, 4 ma sejse pal anmejemet weli kipia yek iweyka ken kineki ne Teut: 5 tesu ken kineki ne taelewilis, ken ne tejtechan ne te kishmatit ne Teut; 6 wan ma te aka kichiwa tay te muneki iwan ne iiknew wan ma te kishijshiku tik itekiw, ika ne Tajtzin tetzunkwi ipanpa muchi uni, ijkiunisan ken tinaket pal ankimatit. 7 Ika te metzinnutzki ne Teut pal ankichiwat tay susul sute pal anmuchiwat ipal Teut. 8 Yajika tel, ká ina te, te kilwia te ne takamet sute ne Teut ká techmakak ne Iijiutzin.
9 Ipanpa ne iknitasujtalis te anmunekit ma tikijkwilukan tatka anmupal, ika ankipiata teumachtilis pal ma shimutasujtakan, 10 wan ijkia ankichiwat iwan muchi ne tukniwan ne nemit nujme Macedonia. Yek, nukniwan, timetzintajtanit ma shikchiwakan mas, 11 wan ma shikchiwakan tay welit pal annejmachnemit, wan pal ankichiwat tay anmupal, wan pal anmejemetsan tekitit iwan anmumejmey ijkiunisan ken timetzintuktijtiwit, 12 ma shimuwikakan yek iwan ne nemit tatenpan wan ma te shimunekikan tatka.
Ken ijtuk iwan ne miktiwit
13 Tiknekiskiat ma shikmatikan, nukniwan, ken ijtuk iwan ne mijmikini pal te metzinkukua ijkiuni ken ne sekit te kipiat tejchialis, 14 ika su tikmatit ka Yeshu miktuk wan yaja muketztuk, kineki ina ka ne Teut nusan yawi kinwika ne mijmikini ká ipal Yeshu iwan.
15 Ika timetzinhilwia ini tay ina ne Tajtzin: ka tejemet ká yujyultuk, ne nakat hasta ma wiki ne Tajtzin, te tiawit tiajsit iishpan ne mijmikini, 16 ika ne Tajtzin yawi waltemu tik ne ilwikak tatuktia iwan ikupak weytanawatiani wan yawi tzalani itrompetaj ne Teut, wan ne mijmikini ipal ne Mawaltijtuk yawit muyulkwit achtu; 17 tipan yawi techitzkia tik ne mijmishti tejemet ne yujyultuk ká nakat pal tiknamikit ne Tajtzin tik ne ejekat wan ijkiuni tiawit tinemit pal senpa iwan ne Tajtzin. 18 Kiane shimuyulpaktikan anmutzalan iwan ini pajpalabraj.
Te aka kimati keman yawi witz ne Tajtzin
5 Ipanpa keman yawi witz yajuni, nukniwan, te muneki nitajkwilua anmupal, 2 ika anmejemetsan kimatit ka ne tunal ipal ne Tajtzin witz kenha ken se techtekini ne tayua. 3 Keman tamit inat "muchi tinejmachnemit wan tinemit yek", wan te kichiat tatka, nemanhachin yawi wilewi muchi, yawi ken ne wey takukulis ipal se yawi puni, wan te yawit chuluat.
4 Anmejemet, nukniwan, te ankunyuanemit pal ma metzinhitzki ne tunal ken se techtekini, 5 ika muchi anmejemet ipal ne tawil. Tejemet te tiipal tayua nian ipal takumi. 6 Yajika tel, ma te tikuchikan ken ne sekit, sute tinakakan tikishpelwiat wan ma te titawanakan, 7 ika ne kuchit, kuchit ka tayua, wan ne mutawantiat, mutawantiat ka tayua. 8 Tejemet ká tiipal tunal, ma te titawanakan, tiktalikan tik tuelpan tayulmatilis wan tetasujtalis, wan timutzuntzakwakan iwan tejchialis ka tiawit timumakishtiat, 9 ika ne Teut te techtemakatuk iwan ikwalan sute pal tikpiat tamakishtilis ipanpa ne tutajtzin Yeshu Mawaltijtuk, 10 ká mikik ka tumaku, pal su tikishpelwiat wan nusan su tikuchit, senpa tiawit tiyujyultuk iwan. 11 Yajika, shimutajtawelikan ne se ipal ne seuk, wan ne se ma kiketza ne seuk, ijkiunisan ken ankichiwat.
Shimuwikakan ken muneki
12 Timetzintajtanit, nukniwan, ma shikishmatikan ne tekitit ijtik anmejemet, wan ne metzintekimakat ipal ne Tajtzin, wan ne metzinnawatiat, 13 wan ma shikintasujtakan sujsul ipanpa ne intekiw.
Shinejmachnemikan ijtik anmejemet.
14 Timetzintajtanit, nukniwan, ma shikinnawatikan ne te tetakamatit; ma shiktasujtakan ne tamatit chiupi; shiktajpiakan ne te welit tatka; wan ma wey anmuyulu iwan muchi.
15 Shitachiakan ma te kichiwa aka se tay teyek ipatka se tay teyek, mas yek shumet senpa iipan ne yek anmutzalan, wan kenhaya iwan muchi.
16 Sejsenpa shipajpakikan.
17 Maka keman shimuketzakan teutajtanit.
18 Tik muchi shitamakakan padiush: ika yaja tay kineki ne Teut itech ne Mawaltijtuk Yeshu ma shikchiwakan.
19 Ne Ijiutzin maka shumet shiksewikan.
20 Ne teujteutaketzalis, maka shinakan ka te tatka ipatiw.
21 Shikwikan muchi; ne tay yek, shikanakan; 22 muchi tay muita ka teyek, wejka!
Tami
23 Ma metzinteuchiwa ne Teut ipal nejmachnemilis yajasan tik muchi, wan ma te kipia tatka tay teyek muchi anmuijiu wan anmuyulu wan anmuweyka, pal kwak yawi witz ne tutajtzin Yeshu Mawaltijtuk. 24 Yek ne metzinnutza, asu yaja nusan kichiwas.
25 Nukniwan, shiktajtanikan ne Teut nusan tupanpa. 26 Shiktennamikikan muchi ne tukniwan ken Cristianojmet. 27 Nimetzintajtani tik itukay ne Tajtzin ma takakikan ini tajkwilul muchi ne tukniwan. 28 Ma nemi ne teutasujtalis ipal tutajtzin Yeshu anmuwan.
1 Tejemet, Pawlo wan Silvanus wan Timoteo, tiktuktiat ini tajkwilul itech ne sennemit ipal ne Tesalonika chanejket ijtik tuteku Teut wan tajtzin Yeshu Mawaltijtuk. 2 Ma metzinmaka tetasujtalis wan nejmachnemilis ne Teut, tuteku, wan ne tajtzin Yeshu Mawaltijtuk.
3 Senpa tinemit pal tikilwiat ne Teut padiush anmupanpa, nukniwan, ika sea weytia ne anmutayulmatilis wan tepewi ne itetasujtalis muchi anmejemet ipal ne se iwan ne seuk, 4 hasta tejemetsan timuweymatit ijtik ne sejsennemit ipal ne Teut ipanpa ne anmutanejmachselilis wan anmutayulmatilis tik muchi ne anmutajtaejekulis wan ne ujuijkayu ne ankiseliat.
5 Yaja techilwitia ka ne Teut kichiwa ken muneki ipanpa tay yek pal anmuitat yejyek ipal ne itatekimakalis ne Teut, ika antaekuat ipanpa. 6 Ika nemi yek ipal Teut ma kintashtawi ne metzinpitziniat iwan tapitzinilis, 7 wan anmejemet, ká anmupitzinijtiwit, ma metzinhajkawa anmusewiat tuwan tik ne itaneshtilis ne tajtzin Yeshu tik ne ilwikak iwan tanawatianimet welit wey. 8 Ijtik tit yaja yawi kintzunkwi ne te kishmatit Teut wan te kitakamatit ne iyeknawatilis ne tutajtzin Yeshu. 9 Yejemet yawit muchiwat juzgar wan yawit wilewit pal senpa, wejka itachialis ne Teut wan ne itzitzinakalis ne itajpal, 10 kwak tzitzinaka witz iwan ne itajtayulmatini wan muchi ne tayulmatit yawit ishpuyawit ipanpa, ika muyulmatki tay tikikinakaket anmuishpan, tik uni tunal.
11 Yajika senpa tiktajtanit ne Teut anmupanpa ma metzinhita yek pal metzinnutza wan ma yekawi muchi tay yek ipal ne iyekkayu wan ne tekit ipal tayulmatilis iwan itajpal, 12 pal kiane ma tzitzinaka ne itukay tutajtzin Yeshu anmutech, wan anmejemet itech yaja, iwan ne itetasujtalis ne Teut wan tutajtzin Yeshu Mawaltijtuk.
Keman walas ne Tajtzin
2 Nukniwan, sejse mutajtaniliat keman yawi witz ne tutajtzin Yeshu Mawaltijtuk wan tiawit timusenputzuat iwan. Timetzintajtanit 2 ma inte metzinyultzejtzelukan talul, wan ma inte shimajmawikan ipanpa se iijiu, nian se tay inat, nian se amat ken titajkwilujtuskiat tejemet, ne metzinhilwia ka walajsituk ne tunal ipal ne Tajtzin. 3 Ma inte aka kichiwa tatka pal metzinshijshikua, ika inte ijkiuni su achtu miak te kiajkawat ne Teut wan te muneshtia ne teyektakat, ne ikunew ne tapululis, 4 ne muchi kitejtenewa wan muajkukia ijpak muchi tay muilwia Teut o mutankwaketzalis, hasta yajasan yawi mutalia ka iteupantzin ne Teut muilwitia ken yajaya Teut.
5 Anka te ankielnamikit ka kwak ninemik anmutech nimetzinhilwij uni? 6 Wan ashan ankimatit tay ne inte kiajkawa kisa, ma muneshti tik ne tunal kwak muneki; 7 ika ne ichtaka ipal ne teyek kichiwaya itekiw, sema hasta ma muishti tatajku ne ká ashan te kiajkawa, 8 wan tipan yawi naka neshtijtuk ne teyek, ne tajtzin Yeshu yawi kiwilewa iwan ne iijiu ipal ne iten wan yawi kipulua kwak yaja muneshtia witz. 9 Yaja ajsi ika tekiti ne Tenewani iwan muchi ne itajpal wan sejse tetekia pal muishmati, wan te tejkia, 10 wan tashijshikua wan kinchiwilia tay teyek ne ká puliwit, ika te kinekituyat kitasujtat ne tejkia pal mumakishtiat, 11 wan yajika ne Teut kituktia intech tashijshikulis pal yejemet kiyulmatit ne sanka, 12 pal kiane yawit muchiwat juzgar muchi ne ká te kimatit ne tejkia wan kitat yek ne tay te yek.
Ne Teut metzinhishpejpen pal anmumakishtiat
13 Tejemet tinemit pal tikilwiat ne Teut padiush senpa anmupanpa, nukniwan tajtasujtatuk ipal ne Tajtzin, ika metzinhishpejpentuk ne Teut achtu wan kineki ma muchiwa anmuijiu ipal Teut wan ma shikyulmatikan ne tejkia pal anmumakishtiat. 14 Yajika nusan metzinnutztuk iwan ne tuyeknawatilis ma shikpiakan ne itzitzinakalis wey ne tutajtzin Yeshu Mawaltijtuk. 15 Kiane tel, nukniwan, shiyulchikawikan wan shikpachukan ne tay anmumachtijket ika ninatuk tik anmutakakilis wan ika nitajkwilujtuk tik tuamaw.
16 Ne tutajtzin Yeshu Mawaltijtuk yajasan, wan ne Teut ne tuteku ne techtasujtatuk wan techmakatuk itepalewilis pal senpa wan yek tejchialis ipanpa itetasujtalis, 17 ma kipalewi ne anmuyujyulu wan ma metzmaka fuerzaj tik muchi ne yejyek tekit wan palabraj.
Shiktajtanikan ne Teut
3 Pal titamit, nukniwan, shiktajtanikan ne Teut tupanpa pal ne ipalabraj ne Tajtzin mutalua wan muweychiwa kenha ken anmutech, 2 wan pal timumakishtiat itech ne takamet ipal inteyek, ika te muchi kipiat tayulmatilis. 3 Yek ne Tajtzin ká kichiwa ka tichikawayat wan techishpelwia ma te techchiwili tatka ne inteyek. 4 Tikyulmatit ne Tajtzin anmupanpa, ika tikmatit ka ne tay titatuktiat ankichiwat wan ankichiwasket. 5 Ma kiwika ne Tajtzin ne anmuyujyulu itech ne itetasujtalis ne Teut wan ne itanejmachselilis ne Mawaltijtuk.
Shimutekipanukan anmejemetsan
6 Timetzintuktiat, nukniwan, tik itukay ne tutajtzin Yeshu Mawaltijtuk, ma shimukawakan wejka ne anmuiknew ká te kichiwa tatka wan te muwika ken tuwan anmumachtijtiwit. 7 Anmejemet kimatit ken muneki muchiwa ken tejemet, ika te tikchijket ijkiuni anmuwan: 8 nusan te tikwajket tamal takulijtuk ipal aka, sute titekitket wan tikutiaket ne tayua wan ne tunal pal kiane te timuchiwat se kimil ipal sejse anmejemet. 9 Inte ika te tiwelituskiat, sute pal tejemetsan timetzinmakat se pal antachiat wan ankichiwat kenha ken tejemet.
10 Nusan kwak tinemiket anmutech, timetzintuktijket ka su aka te kineki tekiti, ma te takwa. 11 Ika titakaktiwit ka sejse muajsit ijtik anmejemet ká te kichiwat tatka nian tekitit, semaya muishtukat. 12 Ne sejse ijkiuni, tikintuktiat wan tikintajtanit ipanpa ne tajtzin Yeshu Mawaltijtuk ma tentatziwikan wan ma mutekipanukan insel.
Tami
13 Anmejemet, nukniwan, maka shikutiakan kichiwat tay yek. 14 Asu aka te kitakamati tay tinatiwit tik ini amat, shikitakan yek ká yaja wan maka shimusenputzukan iwan, pal yaja ishpinawa, 15 wan maka shimumatikan ken se kineki metzinhijtakua, sute ma shiknawatikan ken anmuiknew.
16 Ne Tajtzin ipal nejmachnemilis ma metzinmaka ne nejmachnemilis nujme wan iwan muchi taiwan weli metzinmaka. Ma nemi ne Tajtzin anmuwan muchi!
17 Naja Pawlo nikijkwilua ini iwan ne numey pal nimetzintajpalua, ma shikishmatikan; ijkiuni nikchiwa tik muchi ne ajamat kwak nitajkwilua.
18 Ma nemi ne teutasujtalis ipal tutajtzin Yeshu Mawaltijtuk anmuwan muchi.
Ne Bibliaj Tik Nawat · © 2008, 2012 Jan Morrow