Chronological

³ यहोवा परमेस्सर कहत ह, “मइँ आपन चुने भए राजा क संग एक ठु करार किहेउँ ह।
    आपन सेवक दाऊद क मइँ वचन दिहेउँ ह:
⁴ ‘दाऊद तोहरे बंस क मइँ हमेसा बरे अमर बनाउब।
    तोहरे राज्ज सदा सदा बरे बनाइ रखबेउँ।’”

⁵ हे यहोवा, तोहरे ओन अद्भुत करमन क अकास स्तुति करत हीं।
    सरगदूतन क सभा तोहरी ईमानदारी क गीत गावत हीं।
⁶ सरगे मँ कउनो मनई यहोवा क तुलना नाहीं कइ सकत।
    कउनो भी देवता यहोवा क समान नाहीं।
⁷ पवित्तर सरगदूतन क सभा मँ परमेस्सर अत्यंत सम्मानित बाटइ।
    उ सबइ जउन ओकर चारिहुँ कइँती अहइ,
    क जरूर डरइ चाही अउर ओकर आदर करइ चाही।
⁸ सर्वसक्तिमान परमेस्सर यहोवा, तोहस जियादा कउनो सक्तिसाली नाहीं अहइ।
    अउर यहोवा तू हमेसा भरोसेमन्द अहा।
⁹ तू गरजत समुद्दर पइ सासन करत अहा।
    तू ओकर उमंगित तंरगन क सांत करत अहा।
¹⁰ हे परमेस्सर, तू ही अहा जउन राहाब^[a] क हराए रह्या अउर ओका जुद्ध मँ मार डाए रह्या।
    तू आपन महासक्ति स आपन दुस्मन बिखराइ दिह्या।
¹¹ सरग अउ धरती तोहार अहइ।
    उ तू ही अहा जउन इस संसार क बनाय अउर संसार मँ क हर वस्तु रच्या।
¹² तू ही सब कछू उत्तर दक्खिन रच्या ह।
    ताबोर अउ हर्मोन पर्वत तोहार गुन गावत हीं।
¹³ तू सक्तिसाली अहा।
    तोहार सक्ति महान अहइ।
    तोहार सक्ति क सम्मान कीन्ह जात हीं।
¹⁴ तोहार राज्ज धार्मिकता अउ निआउ पइ टिका बाटइ।
    पिरेम अउ बिस्सासी तोहरे सेवा करत अहइँ।
¹⁵ जउन तोहमाँ खुस अहइँ उ धन्न अहइँ।
    उ पचे तोहरी समर्थन क प्रकास मँ जिअत रहत हीं।
¹⁶ तोहार नाउँ ओनका सदा खुस करत ह
    अउर तोहार धार्मिकता क कारण उ सम्मान पावत ह।
¹⁷ तू ओनकर सक्ति क अद्भुत स्रोत अहा।
    उ तोहार समर्थन क कारण तोहसे सक्ति पावत ह।
¹⁸ काहेकि हमार रच्छा यहोवा स सम्बंधित अहइ।
    हम लोगन क राजा इस्राएल क पवित्तर क कइँती स अहइ।
¹⁹ एक बार दर्सन मँ तू आपन सच्चे मनइयन स कहे रहा,
“मइँ ओनका मदद दिहे हउँ जउन मज़बूत अहइ,
    मइँ लोगन क बीच मँ स नउ जवान मनई क प्रतिस्ठित किहेउँ।
²⁰ मइँ आपन सेवक दाऊद क पाइ लिहेउँ,
    अउर मइँ ओकर ताजपोसी किहेउँ ह अउ ओकरे अभिसेक आपन तेल स किहेउँ ह।
²¹ मइँ आपन दाहिने हाथे स दाऊद क सहारा दिहेउँ,
    अउर मइँ ओका आपन सक्ति स बलवान बनाएउँ।
²² कउनो दुस्मन चुने भए राजा क धोखा नाहीं देइ सकतेन।
    दुट्ठ जन ओहे पइ अत्याचार नाहीं कइ सकतेन।
²³ मइँ ओकरे दुस्मनन क समाप्त कइ दिहेउँ।
    जउन लोग चुने भए राजा स बैर राखत रहेन, मइँ ओनका हराइ दिहेउँ।
²⁴ मइँ हमेसा आपन चुने भए राजा स पिरेम राखब अउर ओका समर्थन देब।
    उ मोहे पइ निर्भर रहिके मोर सक्ती स भरि जाइ।
²⁵ मइँ आपन चुने भए राजा क महासागर क नियंत्रक तइनात करब।
    उ नदियन पइ हुकुमत करी।
²⁶ उ मोहसे कही, ‘तू मोर पिता अहा।
    तू मोर परमेस्सर, मोर चट्टान अउ मोर उद्धारकर्ता अहा।’
²⁷ मइँ ओका आपन पहिलौटा पूत बनाउब।
    उ सबइ राजन पइ प्रमुख होइ।
²⁸ मइँ सदा ओका आपन पिरेम दिखावत हउँ।
    मोर करार ओकरे संग दृढ़ता स स्थापित होइ।
²⁹ मइँ इ बंस क अमर बनाउब।
    ओकर सासन हुआँ तब तलक टिका रही जब तलक कटनी क समई रही।
³⁰ अगर ओकर संतानन मोर कानून अउर आदेस क पालन तजि दिहन ह,
    अउर अगर उ लोग मोरे उपदेसन क मानब तजि दिहन ह।
³¹ अगर मोर अभिसिक्त राजा क संतानन मोरे कानून क पालन नाहीं किहन
    अउर अगर मोरे आदेसन क न मानेन।
³² तउ मइँ ओकर बिद्रोह बरे ओका दण्ड देइ बरे अधर्म चिजियन क न होइ देब,
    अउर मइँ ओकरे आग्याभंग करइ बरे मनइयन क दण्ड क रूप मँ देब।
³³ मुला मइँ ओन लोगन क परिवार स आपन पिरेम क नाहीं हटाउब।
    मइँ सदा ही ओनके बरे बिस्सासी रहब।
³⁴ जउन करार मोर दाऊद क संग अहइ, मइँ ओका नाहीं तोड़ब।
    मइँ आपन वाचा क नाहीं बदलब।
³⁵ मइँ आपन पवित्तरता प्रतिग्या लेब,
    अउर मइँ ओहे स आपन वाचा क नाहीं तोड़ब।
³⁶ दाऊद क बंस हुवाँ सदा बना रही।
    जब तलक हुवाँ सूरज रही तब तलक ओकर सिंहासन भी रही।
³⁷ उ सदा हुवाँ रहब।
    निहचय ही जब तलक आकासे मँ चन्द्रमा साच्छी रही तब तलक लगातार रही।” (सेला)

³⁸ मुला अब, तू ओकर अपमान किहा ह अउर ओका तजि दिहा ह।
    तू आपन अभिसिक्त राजा पइ कोहाइ गवा ह।
³⁹ तू आपन सेवक क कीन्ह भवा करार क रद्द कइ दिहा।
    तू ओकरे मुकुट धूरि मँ लोकाइ दिहा।
⁴⁰ तू राजा क नगर क देवारन बर्बाद कइ दिहा,
    तू ओकरे सब किला क तहस नहस कइ दिहा।
⁴¹ राजा क पड़ोसी ओह पइ हँसत अहइँ, अउर उ सबइ लोग जउन पास स गुजरत हीं,
    ओनकर चिजियन क चोराइ लइ जात हीं।
⁴² तू राजा क दुस्मनन क खुस किहा।
    तू ओकरे दुस्मनन क जुद्ध मँ जिताइ दिहा।
⁴³ तू ओकरे तरवार क जुद्ध मँ असफल किहा।
    तू आपन राजा क जुद्ध जीतइ मँ मदद नाहीं किहा।
⁴⁴ तू ओकरे खास स्थान क समाप्त कइ दिहा ह,
    अउर तू ओकर पवित्तर सिंहासन क तू धरती पइ पटक दिहा।
⁴⁵ तू ओकरे जवानी क दिनन क
    घटा दिहा ह।

⁴⁶ हे यहोवा, इ कब तलक रही?
    का सदा-सदा हमार मदद नाहीं करब्या?
    का तू सदा सदा बरे आपन किरोध आगी क नाईं धधकत भए रखब्या?
⁴⁷ याद करा मोर जिन्नगी केतनी अल्पकालीन अहइ।
    तू ही हमका नान्ह जिन्नगी जिअइ अउर फुन मरि जाइ क रच्या ह।
⁴⁸ अइसा कउनो मनई नाहीं जउर सदा जिई अउर कबहुँ नाहीं मरी।
    कब्र स कउनो मनई बच नाहीं पाई। (सेला)

⁴⁹ हे सुआमी, उ पिरेम कहाँ अहइ जउन तू अतीत मँ देखाँए रह्या
    अउर तू आपन बिस्सास क दाऊद क वचन दिह्या।
⁵⁰ हे सुआमी, कृया कइके याद करइ क जतन करा, कि लोगन तोहरे सेवक क कइसे अपमानित किहन।
⁵¹ मइँ आपन हिरदय मँ बहोत सारे रास्ट्रन क अपमान क सहन किहे हउँ।
    केकरे बारे मँ तोहार दुस्मन मज़ाक उड़ाएन, हे यहोवा? तोहरे चुने भए राजा क उ पचे अपमानित किहेन ह।

⁵² यहोवा, क हमेसा ही स्तुति होइ।
    आमीन आमीन!

¹ यहोवा बरे एक ठु गीत गावा।
    हे समस्त ब्रह्माण्ड यहोवा बरे गीत गावा।
² यहोवा बरे गावा, ओकरे नाउँ क धन्न कहा।
    हर दिन इ ओकरे उद्धार क बारे मँ सुसमाचार क सुनावा।
³ दूसर रास्ट्रन क बतावा कि यहोवा फुरइ अद्भुत बाटइ।
    सब कतहूँ क लोगन मँ ओन अद्भुत बातन क जेनका उ करत ह बखान करा।
⁴ यहोवा महान बा अउर बड़कई क जोग बा।
    उ कउनो “देवतन” स जियादा स्रद्धालु बा।
⁵ दूसर रास्ट्रन क सबहिं “देवतन” सिरिफ मूर्तियन अहइँ,
    मुला यहोवा अकासन क रचेस।
⁶ ओकरे समन्वा सुन्दर महिमा दमकत बा।
    परमेस्सर क पवित्तर मन्दिर सामरथ अउ सुरन्दरता अहइँ।
⁷ हे वंसो, अउर रास्ट्रो,
    यहोवा बरे महिमा अउर बड़कई क गीत गावा।
⁸ यहोवा क नाउँ क गुणगान करा।
    आपन भेंटन उठावा अउ मन्दिर मँ जा।
⁹     यहोवा क ओकर भव्य, मन्दिर मँ उपासना करा।
अरे ओ धरती क मनइयो, यहोवा क उपासना करा।
¹⁰     रास्ट्रन क जानइ द्या कि यहोवा राजा अहइ।
निहचय ही उ उहइ अहइ जउन जगत क स्थिर अउर अखण्ड बनाएस ह।
    यहोवा मनइयन पइ निआउ स सासन करी।
¹¹ अरे अकास, खुस ह्वा, हे धरती, आनन्द मनावा।
    हे सागर, अउर ओहमाँ क सबइ चिजियन क आनन्द स ललकारा।
¹² अरे ओ खेतो अउर ओहमाँ उगइवाली हर वस्तु आनन्द स भरपूर होइ जा।
    हे जंगल क बृच्छो गावा अउर आनन्द मनावा।
¹³ आनन्द स भरपूर होइ जा
    काहेकि यहोवा आवत अहइ।
यहोवा जगत क सासन करइ आवत अहइ,
    उ खरेपन स निआउ करी।

⁶ मइँ आपन संग काम करई बरे बिस्सासी लोगन क दूढ़ता हउँ।
    सिरिफ ओन लोग मोर सेवक होइ सकत हीं
    जउन इमानदारी स जिन्नगी जिअत हीं।
⁷ मइँ आपन घरे मँ अइसे लोगन क रहइ नाहीं देब जउन झूठ बोलत हीं।
    मइँ झूठ लोगन क आपन लगे भी फटकइ नाहीं देब।
⁸ मइँ ओन दुट्ठन क सदा ही नस्ट करब, जउन इ देस मँ रहत हीं।
    मइँ ओन दुट्ठ लोगन क मजबूर करब, कि उ पचे यहोवा क नगर क तजि देइँ।

¹ यहोवा क धन्यवाद करा, ओकरे नाउँ क पुकारा।
    रास्ट्रन क ओकरे अदभुत कारजन क बारे मँ बतावा।
² यहोवा बरे तू गावा, तू ओकर बड़कई क गीत गावा।
    ओन सबहिं अचरज स भरी बातन कर वर्णन करा जेनका उ करत ह।
³ यहोवा क पवित्तर नाउँ पइ गर्व करा।
    ओ सबहिं लोगो जउन यहोवा क उपासक अहा, तू पचे खुस होइ जा।
⁴ सामरथ पावइ क तू यहोवा क लगे जा।
    सहारा पावइ क तू ओकरे लगे जा।
⁵ ओन अद्भुत बातन क सुमिरा जेनका यहोवा करत ह।
    ओकरे अचरज कर्म अउर ओकर विवेक स भरा फइसला क याद राखा।
⁶ तू परमेस्सर क सेवक इब्राहीम क संतान अहा।
    तू याकूब क संतान अहा, उ मनई जेका परमेस्सर चुने रहा।
⁷ यहोवा ही हमार परमेस्सर अहइ।
    सारे संसार पइ यहोवा क सासन अहइ।
⁸ उ आपन करार क सदा याद रखत ह।
    उ आपन आदेसन क हजार पीढ़ियन तलक याद रखत ह।
⁹ इब्राहीम क संग परमेस्सर करार बाँधे रहा।
    परमेस्सर इसहाक क वचन दिहे रहा।
¹⁰ उ याकूब क आपन करार क कानून क रूप मँ दिहे रहा।
    परमेस्सर इस्राएल क संग करार किहस।
    इ सदा सदा ही बना रही।
¹¹ परमेस्सर कहे रहा, “मइँ कनान क भुइँया क
    तोहका आपन सम्पत्ति क रूप देब।”
¹² जब इब्राहीम क परिवार छोटा रहा,
    अउर उ पचे हुवाँ महज़ ही बिदेसी रहेन।
¹³ उ पचे एक रास्ट्र स दूसर रास्ट्र मँ,
    एक राज्ज स दूसर राज्ज मँ घूमत रहेन।
¹⁴ मुला परमेस्सर उ घराने क दूसर लोगन स नस्कान नाहीं पहोंचइ दिहस।
    परमेस्सर राजा लोगन क सावधान किहस कि उ पचे ओका हानि न पहोंचावइ।
¹⁵ उ ओनका चेताउनी दिहे रहेन, “मोर अभिसिक्त भवा क^[a] तू नस्कान जिन पहोंचावा।
    तू मोर कउनो नबियन क बुरा जिन करा।”
¹⁶ परमेस्सर उ देस मँ अकाल पठएस।
    अउर लोगन क लगे खाइ क खूब भोजन नाहीं रहा।
¹⁷ मुला यहोवा एक मनई क ओनके लगे जेकर नाउँ यूसुफ रहा, ओनका अगवा मिस्र तलक पठएस।
    यूसुफ क एक ठु दास क नाई बेचा ग रहा।
¹⁸ उ पचे यूसुफ क गोड़ मँ जंजीर डालेन, अउर उ ओका विनम्र बनाएस।
    उ पचे ओकरी गटइ मँ एक लोहे क कड़ा डाइ दिहन।
¹⁹ यूसुफ क कैद मँ रखा गवा रहा जब तलक उ पचे बातन जउन उ कहे रहा फुरइ घटि नाहीं गइन।
    यहोवा सुसन्देस स प्रमाणित कइ दिहस कि यूसुफ नीक रहा।
²⁰     मिस्र क राजा, आग्या दिहन कि यूसुफ क बंधनन स अजाद कइ दीन्ह जाइ।
    उ रास्ट्र क एक नेता ओका कैद स आजाद कइ दिहस।
²¹ यूसुफ क आपन घर बार क अधिकारी बनाइ दिहन।
    यूसुफ राज्ज मँ हर बात क धियान रखइ लाग।
²² यूसुफ आपन राजकुमार क वइसा ही निर्देस देत रहा जइसा उ चाहेन।
    यूसुफ राजा क सलाहकारन क सिच्छा दिहे रहा।
²³ जब इस्राएल मिस्र गवा,
    याकूब हाम क देस^[b] मँ रहइ लाग।
²⁴ याकूब क सन्तानन बहोत स होइ गएन।
    उ पचे मिस्र क लोगन स जियादा बलवान बन गएन।
²⁵ एह बरे मिस्री लोग याकूब क घराना स घिना करइ लागेन।
    मिस्र क लोग आपन दासन क खिलाफ कुचक्र रचइ लागेन।
²⁶ एह बरे यहोवा निज सेवक मूसा
    अउर हारून जेका उ चुने रहा, पठएस।
²⁷ उ हाम क भुइँया मँ अचरज
    अउ अद्भुत करम किहेस।
²⁸ परमेस्सर गहिरा अँधियारा पठए रहा,
    मुला मिस्रियन ओकर नाहीं सुनेन।
²⁹ तउ फुन परमेस्सर पानी क खून मँ बदल दिहस,
    अउर ओनकर सबइ मछरियन मरि गइन।
³⁰ बाद मँ, मिस्री लोगन क भुइँया मेघन स भरि गवा।
    हिआँ तलक कि मेघन राजा क सयन कच्छ तलक भरि गएन।
³¹ यहोवा आदेस दिहा,
    अउर माखियन अउ पिस्सू आएन
    अउर उ सबइ हर कतहूँ फइल गएन।
³² परमेस्सर बर्खा क ओलन मँ बदलि दिहस।
    मिस्रियन क देस मँ हर कतहूँ आगी अउ बिजुरी गिरइ लाग।
³³ परमेस्सर मिस्रियन क अंगूरे क ब्गिया अउ अंजीर क बृच्छ बर्बाद कइ दिहस।
    परमेस्सर ओनकर देस क हर बृच्छ क तहस नहस कइ दिहस।
³⁴ परमेस्सर हुकुम दिहस अउर टिड्डी दल आइ गएन।
    टिड्डी आइ गइन अउर ओनकर गनती अनगिनत रहीं।
³⁵ टिड्डी दल अउ टिड्डीयन उ देस क सबहिं पैाधन चट कइ गएन।
    उ सबइ धरती पइ जउन भी फसलन ठाड़ रहिन, सबहिं क खाइ डाएन।
³⁶ फिन परमेस्सर मिस्रियन क पहिलउटी सन्तान क मार डाएस।
    परमेस्सर ओनकर सब स बड़कन पूतन क मारेस।
³⁷ बाद मँ परमेस्सर निज सेवकन क मिस्र स बाहेर निकारेस।
    उ पचे आपन संग सोना अउ चाँदी लइ आएन।
    परमेस्सर क कउनो भी सेवक नाहीं लड़खड़ान।
³⁸ ओन लोगन क जात भए लखिके मिस्र आनन्द मँ रहा,
    काहेकि उ पचे ओनसे डेराइ ग रहेन।
³⁹ परमेस्सर ओनके ऊपर कमरी जइसा एक बादर फइलाएस।
    उ राति मँ उजियारा देइ क बरे आगी क खम्भा क काम मँ लिआएस।
⁴⁰ लोग खाइ क माँग किहन अउ परमेस्सर ओनके खातिर बटेरन क लइ आवा।
    परमेस्सर अकास स ओनका भरपूर खइया क दिहस।
⁴¹ परमेस्सर चट्टान क फाड़ेस अउर जल उछरत भवा बाहेर फूटि पड़ा।
    उ रेगिस्ताने क बीच एक ठु नदी बहइ लाग।

⁴² उ आपन पवित्तर वचन सुमिरेस
    जउन उ आपन दास इब्राहीम क संग किहे रहा।
⁴³ परमेस्सर आपन खास क मिस्र स बाहेर निकारि लिआवा।
    लोग खुसी क गीत गावत भए अउर खुसियन मनावत भए बाहेर आइ गएन।
⁴⁴ फिन परमेस्सर निज भगतन क उ देस दिहस जहाँ अउर लोग रहत रहेन।
    परमेस्सर क भगतन उ सबइ चिजियन क पाइ लिहन जेनके बरे अउर लोग मेहनत किहे रहेन।
⁴⁵ परमेस्सर अइसा एह बरे किहस ताकि लोग ओकर व्यवस्था मानइँ।
    परमेस्सर अइसा एह बरे किहस ताकि उ पचे ओकरी सिच्छा पइ चलइँ।

यहोवा क गुण गावा।

⁶ एप्राता मँ हम दाऊद क वचन क बारे मँ सुनेउँ।
    हमका किरीयथ योरीम क वन मँ करार क सन्दूख मिली रही।
⁷ आवा, पवित्तर तम्बू मँ चला।
    आवा, ओकरे सिंहासन क समन्वा आराधना करी।
⁸ हे यहोवा, आपन आराम क जगह स उठा,
    अउ करार क सन्दूख संग होआ जहाँ तू सक्ति क संग सासन करत ह।
⁹ हे यहोवा, तोहार याजक धरम क भावना क धारण किया करी।
    तोहर बिस्सासी भगतन बहोत खुस रहीं।
¹⁰ तू आपन चुने भए राजा क आपन सेवक दाऊद क भले बरे
    जिन अस्वीकार करा।
¹¹ यहोवा दाऊद क एक वचन दिहेस ह जेका उ कबहुँ नाहीं तोड़िही।
    उ वचन दिहस ह कि दाऊद क बंस स राजा अइहीं।
¹² यहोवा कहे रहा, “अगर तोहार संतानन मोर करार पइ अउर मइँ ओनका जउन सिच्छन सिखाइन ओन पइ चलिहीं
    तउ फुन तोहरे परिवार क कउनो न कउनो सदा ही राजा रही।”

¹³ आपन मन्दिर क जगह बरे यहोवा सिय्योन क चुने रहा।
    इ उ जगह अहइ जेका उ आपन भवन बरे चाहत रहा।
¹⁴ यहोवा कहे रहा, “इ मोर जगह सदा-सदा बरे होइ।
    मइँ एका आपन जगह पइ रहइ बरे चुनेउँ ह।”
¹⁵ भरपूर भोजन स मइँ इ सहर क आसीर्बाद देब,
    हिआँ तलक कि गरीब लोगन क लगे खाइ क भरपूर होइ।
¹⁶ ओकरे याजकन क उद्धार क मइँ ओढ़ना पहिराउब।
    मोर भगत बहोत खुस होइहीं।
¹⁷ इ जगह पइ मइँ हिआँ दाऊद क परिवार क सुदृढ करब।
    मइँ आपन चुने भए राजा क एक दीपक स्थापित करब।
¹⁸ मइँ दाऊद क दुस्मनन क लज्जा स ढाँपि देब।
    अउर दाऊद क राज्ज क चमकाउब।