Chronological
11 Kwak titayulmatit, tikmatit ka ijkia tay ne tikchiat wan ka tejkia tay ne inte tikitat, 2 ika muitak ka ne noymet yejyek ipanpa ne intayulmatilis.
3 Ipanpa tayulmatilis tikmatit ka muchijki muchi ne taltikpak ika ne Teut inak ma muchiwa, wan ijkiuni tay ne tejemet tikitat inte kiski tik sejse tay walmuneshtiat.
4 Ipanpa tayulmatilis Habel kalwikak se tetakulis ipal ne Teut mas yek que Kain wan muilwitij ka yaja yulmelawak. Tikmatit ka ijkia ipanpa ne itejtetakulis ne Teut, wan yajika yaja tanutza melka mikik.
5 Ipanpa tayulmatilis, ne Teut kiwikak Hanok iwan ma inte kita mikilis, wan te muajsi ika ne Teut kiwikak iwan, ika kwak inteuk kiwikak, inak ne Teut ka yaja kiwelitak. 6 Asu inte nemi tayulmatilis ne Teut inte weli techita yek, ika nemi pal tayulmati ká ne ajsi itech ne Teut ka Yaja nemi wan ka Yaja kintashtawia ne kitajtanit.
7 Ipanpa tayulmatilis Noa, kwak muneshtijket sejse tay inteuk muitztuyat, kitakamatki: kiekchijki se takukal pal mupalewia ne ikal, wan ijkiuni ne taltikpak muchijki juzgar, wan muchi muchijki ipal ika yaja yek wan tayulmatini.
8 Ipanpa tayulmatilis Abraham takamatki kwak kinutzket pal kisa pashalua hasta se kan yaja yawi kikwi ken ipalwan, wan kiski melka inte kimati kanka yasneki. 9 Ipanpa tayulmatilis yaja muchantij tik tepal tal, ijtik ne tal ipal ne promesaj, wan nemik ken ejkuni ijtik tajtawipanti iwan Itzak wan Yakob, ká nusan kikwit uni promesaj, 10 ika yaja kichia katka ne techan ne kipiatuya itetzilnaj, wan ká ne kitukak wan ká ne kiketzki, ne Teut.
11 Ipanpa tayulmatilis nusan Sara, ká inte welituya kipia, kikwij itajpal pal shinachkisa wan punik kwak yaja lamaj, ika yaja inak ka yek ká ne kichijki prometer. 12 Neka se ká achka miktuka kipishki pilawan ne mijmiak ken ne sitalmet tik ne ilwikak, wan te weli mupuat ken ne ashal ne muajsi iten ne weyat.
13 Iwan tayulmatilis mikiket muchi yejemet, kwak inte kikwijtuyat ne projpromesaj, sema tachishtuyat wan kitajpalujtuyat ikuni wejka, wan kishmattuyat ka yejemetsan ejkunimet wan muchantianimet ijpak ne tal. 14 Kwak sejse taketzat ijkiuni, mumati ka kitemuat se intechan: 15 wan asu kikejketzaskiat yajuni kanka kistiwit, anka welituskiat mukwepat ka né; 16 ashkan kielewiat se mas yek, se ipal ne ilwikak. Neka inte ishpinawa ne Teut ika munutza Teut inpal, ika yaja kinhajshitilijtuk se techan.
17 Ipanpa tayulmatilis Abraham kalwikak Itzak kwak muejekuj wan yaja ká kikwijtuya ne projpromesaj yajki kitakulia ne ipiltzin ne isel kipishtuya, 18 wan ne Teut kilwij ka "ne mushinach mupuas itech Itzak". 19 Tikishkejketzat ka ne Teut weli tayulkwiltia hasta kwak se miktuka, yajika nusan kalkwij, ma tinakan.
20 Ipanpa tayulmatilis, Itzak nusan kinteuchij Yakob wan Esaw ipal ne musta.
21 Ipanpa tayulmatilis, kwak Yakob yawi miki, kinteuchij muchi ne ipilawan Yosep wan mutankwaketzki ijpak itzun ne itupil. 22 Ipanpa tayulmatilis, kwak Yosep mikik, kielnamik ne ajkewilis ipal ne ipilawan Israel wan tatuktij ipanpa ne iujumiu.
23 Ipanpa tayulmatilis, kwak nesik Moshe, ne itejteku kinashket yey metzti ika ne kunetzin sujsul yektzin wan te mumutijket ipanpa ne itatuktilis ne tatuktiani. 24 Ipanpa tayulmatilis, kwak weytiak Moshe, inte kinekik ina ka yaja ipiltzin ne isiwapiltzin ne Parao; 25 kishpejpen mas yek taekua kenha ken ne itechan ne Teut, wan tesu ma mukwesu iwan ne tay inteyek ijtik se ratoj, 26 ika kishkejketzki ka ne ikwalan ne Mawaltijtuk mas wey que muchi ne tumin ipal Egipto; ika yaja kikejketza katka ne tashtawilis. 27 Ipanpa tayulmatilis yaja kiajkaw Egipto; inte majmawki ipanpa ne ikwalan ne tatuktiani, ika yaja achka kita katka ne ká inte weli muita, wan chikawayak.
28 Ipanpa tayulmatilis kichijki ne Paskwaj wan kishinij ne esti pal te kinmatuka ne ká kinmiktia katka ne ajachtupunijtuk. 29 Ipanpa tayulmatilis panuket sentapal ne Chiltik At ken su ijtik tal waktuk, wan kwak ne Egiptojtakamet kinekiket kichiwat kenha atukiket.
30 Ipanpa tayulmatilis wetzki ne tepanti ipal Yerijo kwak kiyawalujket chikume wipta. 31 Ipanpa tayulmatilis ne siwapala Rajab inte puliwik iwan ne inte tayulmatit kwak yaja kinkwij ne tachianimet iwan nejmachnemilis.
32 Wan taika niaw nina mas? Inte nechajsi ne tiempoj pal nitaneshtia tay ipal Gidon, Barak, Shamshon, Yepta, Dawid wan Shamuel wan ne taketzanimet. 33 Yejemet iwan tayulmatilis kinsunket tatuktianimet, kichijket tay yek, kiajsiket projpromesaj, kitzakket ijiten tekwanimet, 34 kisewijket itajpal tit, chulujket itech itan espadaj, kiajsiket intajpal kwak kutiatuyat, chikawayaket kwak musumat, kichulultijket tepal cuartel, 35 siwatket kikwijket ne miktiwit ika muyulkweptiwit.
Sejse muchijket torturar wan te kikwijket tamakishtilis pal kipiat se yek muyulkwepalis. 36 Sejseuk kiselijket taejekulis ipal ajkawetzkalis wan muwitekket wan hasta mutzakket wan muilpijket; 37 mutejteminket, mutekket tik tajtakutun, mikiket itan espadaj. Pashalujket kan welit ijtik ikwetash ichkat wan cabraj; inte kipiatuyat tatka, mupitzinijket, kinchiwilijket muchi tay inteyek; 38 yejemet sea yejyek ipal ini taltikpak. Nejnemit katka ijtik kojkojtan wan tejtepet wan ujustut wan ne shajshaput ipal ne tal. 39 Wan melka muchi yejemet muilwitijket ka yejyek, inte kikwijket ne promesaj: 40 ne Teut inak ka yawi techmaka seuk mas yek pal yejemet inte yekawit asu inte nemit tuwan.
12 Kiane tel, techyawaluat sujsul miak tay kilwitiat ka ijkiuni. Yajika tiktamutakan wejka muchi ne kijkimil wan ne tateyekchijtuk ne techkakasua, wan iwan tanejmachselilis timutalukan tik ne ujti tikpiat tuishpan. 2 Tikitakan ne ká iwan pewa wan tami ne tayulmatilis, Yeshu. Yajane, ipal ne pakilis nemi iishpan, kiejekuj ne cruz. Inte ishpinawak. Wan nemi muetztuk ka imayekkan ne ikuijpal ne Teut. 3 Shikishkejketzakan yajuni ká kiselij muchi uni najnankilis ipal ne tateyekchiwat ne kijilwiat, wan maka shikujkutiakan, wan ma inte majmatamikan anmuyujyulu. 4 Inteuk anmusuntiwit iwan ne tateyekchijtuk hasta ma shitemakakan anmuesyu.
5 Anka ankielkawtiwit ken metzinnutza ken se kinnutza ne ipilawan:
Nupiltzin, maka shikita teyek ken Tutajwan metziskalia
wan maka shimajmatami kwak metzajajwa,
6 ika ká ne Tutajwan kitasujta, yaja kimachtia;
kinwiteki muchi ipilawan ne kinkwi yek.
7 Shikselikan ne tiskalilis ne metzinmaka ne Teut ken anhipilawan, ika katiawel ne kunet ká ne iteku inte kimaka? 8 Asu inte metzinwitektiwit ken muchiwa iwan muchi, kiane anmejemet tepal kukunet wan tesu ipilawan yekkaya. 9 Neman, tikpishtiwit tutejteku ipal tuweyka wan tiktakamatket melka techmakaket: keski mas tiawit timutaliat itan itatuktilis ne teteku ipal ne tuijiu wan tiawit tiyujyultuk? 10 Yejemet techmakaket ken kikejketzket yek ankakeski tunal; yaja techmakatuk pal techpalewia tikejekuat ne iteukayu. 11 Kwak techiskaliat, inte keman muita ka yaja pal tipakit kwak kichiwat, asunte pal techkukua; melka uni, tipan kinmaka nejmachnemilis ne ijkiuni muejekujtiwit wan ne itakil tamelakchiwalis.
12 Yajika, shikmelawakan ne anmumejmey wijwilantuk wan ne anmutejtewajka ne inte mijkwanit, 13 wan shikchiwakan ujujti melawak ipal anmujmukshi, pal te muishkwepa ne metzkelu, mas yek ma mupajti.
14 Shiktemukan nejmachnemilis iwan muchi, wan ne tateuchiwalis: inte aka kitas ne Tajtzin asu inte kipia; 15 wan shikpachiwi ma inte aka kichiwa faltar ne itetasujtalis ne Teut, pal te takati ikajku wan metzkakasua nian se inelwayu chichikayu wan ipanpa miak yawit mususulwiat; 16 nian se tatzinhejenchiwani o sé ká kichiwa tay inte muneki ken Esaw, ká ipatka chiupi takwal temakak ne iachtupunilis. 17 Ika ankimatit ka tipan, kwak kinekituya kipia ne teteuchiwalis, inte welik, ika inte kiajsik kan muyulpataskia melka kitajtan wan chukak sujsul.
18 Ika inte anhajsitiwit hasta ne kan muchijchimi wan mutatijtuk iwan tit wan takumia wan takunyua wan tapayawi, 19 wan tzalani se trompetaj wan mukakket pajpalabraj, wan ne kikakket kinekiket ma intea kinhilwikan tatka, 20 ika inte kiseliat ne tay mutuktijtuya:
Hasta asu se tekwani kimatukaskia ne tepet, mutejtemimas!
21 Wan sujsul tamujmutia tay ne kiski iishpan Moshe, hasta yaja inak:
Sujsul nimajmawi wan nijtzilika!
22 Melka uni, anhajsitiwit ka Tziontepet, wan itechan ne Teut yultuk Yerushalem ipal ne ilwikak ka ikajku, wan sujsul miak tanawatiani musenputzujtiwit, 23 wan ne sennemit ipal ne ajachtupunijtuk ne mupujtiwit tik ne ilwikak, wan ne Teut ne juez ipal muchi, wan inhijijiu yejyek yejyekajtuk, 24 wan Yeshu ne tajkutaketzani ipal ne yankwik sentaketzat, wan ne esti shinijtuk ne tanutza mas yek que ne tay ipal Habel.
25 Shiktalikan cuidadoj ma shikakikan ne tanutza. Ika asu inte weliket chuluat yejemet ká inte kikakket ne kinhilwijket ijpak ne taltikpak, keski mas tejemet inte welisket tichuluat asu inte tikakit yajane ká technutza tik ne ilwikak. 26 Yaja kitzejtzeluj ne taltikpak kwakuni; ashkan inatuk ka:
Ukseujti niaw nikumuntia inte isel ne tal, asunte ne ilwikak nusan.
27 Wan "ukseujti" kineki ina ka kishtis ne tzejtzelujtuk (yaja ken tinaskiat ne tay muchijtuk) ma naka ne tay inte weli mutzejtzelua. 28 Neka tejemet tikajsit se tatekimakalis inte mutzejtzelua. Tinakan tashtawi yajika, wan titekitikan ken ajwiak ipal ne Teut, iwan tetakamatilis wan pinawalis, 29 ika ne tuTeut nusan se tit tawilewani.
13 Maka shikajkawakan ne iknitasujtalis; 2 maka shikelkawakan ma shimuwikakan yek iwan ne ejkuni, ika ijkiuni sejse kitakejtiwit tanawatianimet wan te kimatket.
3 Shikinkejketzakan ne ijilpituk ken su anmuilpijtuskiat inwan, wan ká ne kinchiwilijtiwit muchi tay inteyek ken nusan anmejemetsan tik iweyka.
4 Kwak munamiktiat, ma muchi yek, wan ne tapech ma inte susul, ika ne Teut kintenewa ne tatzinhejenchiwat wan ne mawiltianimet.
5 Shimuwikakan ken su inte ankitasujtat ne tumin; ma metzinhajsi iwan tay ankipiat, ika yaja inatuk:
Naja inte nimetzkashanis, inte nimetznaktis.
6 Kiane pal tichikawayat wan tinat:
Ne tajtzin nutepalewiani wan te nechmutis tay ne nechchiwilia takat.
7 Shikinhelnamikikan ne metzintuktiat ne metzinhilwijtiwit ne ipalabraj ne Teut; shitajtachiakan tay kiski tik inmuwikalis wan shitayulmatikan ken yejemet.
8 Yeshu Mawaltijtuk kenha yalua wan ashkan wan senpa. 9 Maka shimuajkawakan muwikat iwan tajtamachtilis te kenhat wan yajyankwik, ika yektzin ma tiyulchikawayakan iwan tetasujtalis, intesu iwan takwal ne inte kinpalewij ne muwikat ijkiuni.
10 Tikpiat se tikashit, wan tay nemi kalijtik ne tekitinimet ipal ne tawipanti inte welit kikwat; 11 ne weypalej kikalaktia ne inhesyu takwalmet tik ne teupan ipanpa ne tay tikchijtiwit , wan ne inweyka uni takwalmet mutatiat tatenpan ne cuartel. 12 Neka Yeshu nusan, pal kiteuchiwa ne techan iwan ne iesyu, taekuj tatenpan ne tentzakka. 13 Yajika tiajsikan itech tatenpan wan tikselikan ma techajajwa, 14 ika inte tikpiat nikan se techan ne naka, asunte tiktemuat ne tay yawi witz. 15 Ika, talwikakan senpa ne tetakulis ipal tayektenewalis ipal ne Teut: itakil tutejtenshipal ne inat ka yek ne itukay.
16 Maka shikelkawakan ankichiwat tay yek wan ansennemit ken tekniwan, ika tejtetakulis ijkiuni ajajwiak ipal ne Teut.
17 Shiktakamatikan ne anmutajtatuktiani wan shinakakan ka inhitan, ika yejemet inte kuchit pal kipachiwiat ne anmuajalmaj wan tamakat cuentaj inpanpa. Ma welikan kichiwat uni iwan pakilis wan tesu iwan ijiumikilis, ika uni inte yawi metzinpalewia.
18 Shitajtanikan iwan ne Teut ka tumaku, ika tikmatit ka tikpiat yek tasenmatilis wan tiknekit timuwikat yek tik muchi, 19 wan sujsul nimetzintajtani ma shikchiwakan kiane pal niweli nimukwepa anmutech nemanhachin.
20 Ne Teut ipal nejmachnemilis, ne kiajkukij kwak miktuya ne wey tajpiani ipal ne ichkatal iwan ne esti ipal ne sentaketzat pal senpa, ne tutajtzin Yeshu, 21 ma metzinpalewi iwan muchi tay yek pal kichiwa ne itaelewilis ijtik tejemet ken kita yek, itech Yeshu Mawaltijtuk, wan ma inakan ka wey senpa, amen.
22 Nimetzintajtani, nukniwan, ma shikselikan ma nimetzinhilwi ini, wan hasta se amat chikitik nimetztitanijtuk.
23 Shikmatikan ka kichulultijtiwit ne tukniwan Timoteo, wan su witz nemanhachin san nimetzinhitas iwan.
24 Shikintajpalukan muchi ne anmutajtatuktiani wan muchi ne tayulmatit.
Metzintajpaluat ne tukniwan tik Italia.
25 Ma nemi ne teutasujtalis iwan muchi anmejemet.
Ne Bibliaj Tik Nawat · © 2008, 2012 Jan Morrow