Chronological
Ne ijishpejpentuk ipal Israel
11 Nina tel: anka ne Teut intea kineki ne itechan? Tesu keman! Su naja nusan ni Israeltakat, ipal ishinach Abraham wan itribuj Ben-Yamin! 2 Ne Teut kineki ne techan ne kishmatiaya. Anka te ankimatit tay ina ne ijkwilujtuk tik Eliya, ken yaja kitajtani ne Teut wan kitenewa Israel:
3 "Tajtzin, kinmiktijtiwit ne mutajtaketzani; kiwilejtiwit ne mutijtikash. Naja nusel ninaktuk wan nechtemuat pal nechmiktiat."
4 Wan tay kilwia ne tenankilis:
"Nikinhajkawtuk siete mil ka inkwaj ká inte mutankwaketztiwit iishpan Baal."
5 Ijkiuni tel, ashkan nusan muchijki se mukawtuk ishpejpentuk ipanpa tetasujtalis. 6 Asu ipanpa tetasujtalis, intea ipanpa tay kichijtiwit; su te, ne tetasujtalis intea tetasujtalis! 7 Tay kineki ina? Ka ne tay Israel kitemua katka, inte kiajsik. Sema ne ishpejpenka kiajsik, ne sekit takwawayaket, 8 ijkiunisan ken muijkwilujtuk:
"Ne Teut kichijki ka mutenket iwan yulkukulis;
kinmakak inhijish pal te tachiat
wan innajnakas pal te takakit hasta ini tunal."
9 Wan Dawid ina:
"Ne intepatznaj ma mukwepa tajpewal wan tapewilis, pal tatzunchaluat wan pal mutashtawiat. 10 Ma kunyuakisakan ne inhijish pal te tachiat! Shikinteputzkwelu!"
Maka shimuweymatikan
11 Naja nina tel: anka tatzunchalujket pal ma wetzikan? Intesu! Mas yek, ika yejemet kuwetzket mupalewijtiwit ne tejtechan pal kiane yejemet kwalanit. 12 Su muchi ne taltikpak kipia wey ika yejemet kuwetzket wan su ne tejtechan kipiat wey ipanpa tay yejemet kipulujket, keski mas kipiasket su yejemet tepewit!
13 Nimetzinhilwia ne tejtechan: naja nechtitanijtiwit ipal ne tejtechan, wan yajika nina ka wey ne nutekitilis 14 su weli nikwalantia sejse ipal nukniwan pal ma mupalewikan, 15 ika su ne taltikpak muyulpata kwak yejemet puliwit, keski mas yawi kikwi su muketzat kwak miktiwit?
16 Su yek ne achtu tapik, ne tishti muchi yek; nusan su yek ne nelwat, ne majtzal kenhaya. 17 Su sejse majtzal mukutunket wan taja, ká se kojtankwawit, timusaluj ijtik yejemet wan timuchijki ikunpa iwan ne inelwayu ne itumakkayu ne ikuyu olivaj, 18 maka shu-shimuweymati iwan ne majmajtzal: su timuweymati, shikelnamiki ka taja inte tikselia ne nelwat, sute yaja ne metzselia.
19 Taja tiaw tina: mukutunket majmajtzal pal naja nechsaluat! 20 Ijkia: mukutunket ika te tayulmatket. Taja tinemi ka né ipanpa tayulmatilis. Maka shimumati wejkapan, sute shimajmawi! 21 Ika su ne Teut kiwilej ne majmajtzal ne takatket achtu, weli metzinwilewa nusan! 22 Shikita tel ne iyekyu wan ne ikwalan Teut. Iwan ne wetztiwit, yaja kwalani. Muwan, ne Teut muwika yek su taja tinaka yek; su te, tiaw timukutuna nusan, 23 wan yejemet, su pewat tayulmatit, yawit musaluat, ika ne Teut weli kinsalua senpa. 24 Su taja timukutun itech ne kojtankwawit ne mupal katka wan timusaluj itech ne kwawit yektzin, keski mas yek welisket musaluat itech ne ikuyu olivaj ne majmajtzal ne ipal ne takatket achtu ijpak yaja.
25 Ika niknekiskia ma shikmatikan ini ichtaka, nukniwan, ma te shinakan ka ankimatit wan te ankimatit: ka se takutun ipal Israel takwawakistuk hasta kwak yawit tepewit ne ká kalakisket ipal ne tejtechan, 26 wan ijkiuni muchi Israel yawi yektia, ken muijkwilujtuk:
"Kisas tik Tzion ne tamakishtiani
kishkwepa ne inteyek ipal ikal Yakob,
27 wan ini ne nusentaketzat inwan
kwak niaw nikinhishtilia ne tay kichijtiwit teyek."
28 Melka ipanpa ne yeknawatilis yejemet metzinhishijiat, ipanpa ne ishpejpenka yejemet yejyektasujtatuk ka imaku ne intekuwan, 29 ika ne Teut inte kipata iyulu kwak tetakulia wan kwak tanutza. 30 Ika kenha ken anmejemet niakeman te ankiyulmatket ne Teut, wan ashan anmupalewijtiwit melka katka te antayulmatit, 31 ijkiuni yejemet nusan ashan te tayulmattiwit wan yawit mupalewiat ipanpa anmutepalewilis. 32 Ika ne Teut kitzkijtuk muchi ijtik inte-tayulmatilis pal ma mupalewikan muchi.
Se takwikalis ipal ne Teut
33 Keski kimati ne Teut!
Wey itamatilis!
Te aka kimati n' iuj
nian n' itaelewilis!
34 Ká kimati iyultaketza?
Ká weli kinawatia?
35 Wan ká pejtuk kimaka se
pal yaja kitashtawia?
36 Muchi kiski itech,
muchi nemi ipanpa,
wan ipal muchiwa
ma tzitzinaka senpa!
Amen.
Ken nemi pal timuwikat
12 Yajika, nukniwan, ipanpa ne iekneli ne Teut nimetzintajtani ma shikishpanukan mujmuweyka ken se anmutetakulis yultuk ipal Teut ma ajwiak ipal ne Teut, ken yek ma anmutekitilis, 2 wan maka shimuchiwakan kenha ken ini taltikpak sute shimuweykapatakan wan shimuyulyankwilikan, pal antachiat ken ne itaelewilis ne Teut: ne yek, ne tay ipal ajwiak, ne ken muneki.
3 Naja nimetzinhilwia ipanpa ne teutasujtalis ne nikwijtuk, ma inte aka mumati mas wey que yaja muneki mumati, sema ma kipia itzuntekun yek, sejse ken ne Teut kimakak ne tayulmatilis ipal. 4 Tikmatit ka tik tuweyka tikpiat miak takutun, wan ne itejtekiw ne tajtakutun te kenhat. 5 Nusan tel, melka timijmiak, muchi tejemet ken se itech ne Mawaltijtuk, wan sejse tejemet ken se takutun. 6 Sejse tejemet tikpiat ne tutetakulisyu tekenha ne techmakak ne teutasujtalis, wan ijkiuni ne tutekiw: asu teutaketzalis, ma taketza ipal ne Teut ken kiajkawa ne itayulmatilis; 7 wan asu tekitilis, ma tekiti yek; wan asu tamachtilis, ma tamachti; 8 wan asu mutajtawelilis, ma mutajtaweli. Ne ká tamaka, ma tamaka tay weli; ne ká tatuktia, ma kita ken; ne ká tapalewia, iwan pakilis.
9 Ne tutetasujtalis, ma tejkia; tikijiakan ne tay teyek, timusalukan itech ne yek. 10 Shiiknitasujtakan sejse wan sejse hasta kita ne se wan ne seuk ká ne achtu pal kitasujta ne iiknew. 11 Tik anmutekiw maka shitatziwikan; ma kwakwalaka anmuyulu; wan shitekitikan ipal ne Teut. 12 Shipajpakikan iwan tejchialis; kwak uij, shikselikan; shimutalikan tajtanit ne Teut. 13 Kwak munekit sejse ipal Teut, shikpalewikan; shimuwikakan yek iwan ne ejkuni. 14 Su aka metzintalultia, shikteuchiwakan, maka shikchiwakan maldictar. 15 Iwan ne pajpakit, shipajpakikan; iwan ne chukat, shichukakan. 16 Shisennemikan yek ijtik anmejemet. Ma te metzinhajwiak tay wejkapan, mas yek ne kajkanawak. Maka shimumatikan ka ankimatit muchi.
17 Maka shikwepilikan aka ne teyek iwan ne teyek. Shikitakan ken ankichiwaskiat tay yek tik itachialis muchi. 18 Su weli, shikchiwakan tay anmupal pal ansennejmachnemit iwan muchi. 19 Maka shimutzunkwikan anmusel, nuyejyektasujtatuk, shikajkawilikan ne ikwalan ne Teut, ika muijkwiluj:
"Ne tetzunkwilis nupal; najasan nitashtawis, ina ne Tajtzin."
20 Mas yek, su mayana ne metzishijia, shiktakwalti; su amiki, shikmaka pal ati; ika su tikchiwa ijkiuni, tiaw tiktepewilia tejtekunal ijpak itzuntekun. 21 Maka shikeluni ipanpa ne teyek, shikeluna ne teyek iwan ne yek.
Shiktakamatikan ne tatekimakat
13 Ma kitakamatikan muchi ne kintekimakat, ika te nemi nian se tatekimaka su te nemi itan Teut, wan muchi ne nemit, itan itatuktilis Teut nemit. 2 Kiane, ne ká te kitakamati ne kitekimaka nemi musuma iwan ne tay tatuktijtuk ne Teut. Ne musumat yawit muchiwat juzgar. 3 Ika ne tatuktianimet te kimakat mawi ne kichiwa tay yek, semaya ne kichiwa tay teyek. Te tikneki timajmawi ipanpa ne metztekimaka? Su ijkiuni, shikchiwa tay yek, wan yawit inat ka tiyek. 4 Yaja tekiti ipal Teut ipal tay yek. Su tikchiwa tay teyek, shimajmawi, ka yaja kipiaya se taika kiwika ne espadaj. Ika yaja tekiti ipal Teut ken tetzunkwini pal kwalani iwan ne kichiwat tay teyek. 5 Neka anmunekit kitakamatit, te semaya ipanpa ne kwalan, nusan ipanpa ne tasenmatilis. 6 Yajika antashtawiat ne tumin kwak kitepewat, ika yejemet tekitinimet ipal Teut wan uni intekiw. 7 Shitashtawikan muchi tay antawikiliat: su ne tumin ipal ne tatuktianimet, ne tumin; su sejseuk pal mutashtawiat, ne sejseuk; ne ká nemi pal tiktakamatit, shiktakamatikan; ne ká nemi pal tinat ka wey ipatiw, shinakan.
Iknitasujtalis
8 Maka shikwikilikan tatka aka, sute ma shiktasujtakan ne sekit, ika su tiktasujtat ne tuiknew tiktentiwit ne tajtuli. 9 Ika ne "maka shimawilti", ne "maka shitamikti", ne "maka shitechteki", ne "maka shikelewi tay tepal" wan muchi ne uksejse tajtuli welit tinat iwan ini pajpalabraj: "Tiktasujtas ne muiknew ken tajasan timutasujta." 10 Ne iknitasujtalis te kichiwa tatka teyek. Yajika, ne tetasujtalis ne tepewilis ipal ne tajtuli.
11 Wan uni, ka ashan tikmatit ka nemia ne horaj pal tisat, ika melka tikmatit katka ka teuk tiawit timumakishtiat, chiupi kineki. 12 Ne tayua panu yawi, ne tapuyawa witzaya: yajika, tiktamutakan wejka ne itekitilis ne takumi, timutzakwakan iwan ne tajtaiwan ipal ne tawil. 13 Timuwikakan yek ken tikchiwat ka tunal; inte ken tawananimet tik se yualu iwan muteleksalis wan ne tay susulnaj, musujsumalis wan kwalan; 14 sute shimutzakwakan iwan ne tajtzin Yeshu Mawaltijtuk, wan maka shikitakan ken anyawit muyulkwesuat iwan ne tajtaelewilis.
Ne Bibliaj Tik Nawat · © 2008, 2012 Jan Morrow