Chronological

Shikishtikan tatenpan ne kichiwat tay teyek

5 Nujme mukaki ka tatzinhejenchiwat anmutzalan, wan ka tatzinhejenchiwat ken nian ijtik ne tejtechan muchiwa, hasta se kipia ne isiwaw ne iteku, ² wan anmejemet muishpitztiwit! Taika te anmutechtiat mas yek pal muishtia tik anmutajku ká ne kichijtuk ijkiuni? ^3-5 Naja ká te ninemi né tik nuweyka, melka ninemi tik nuijiu, ninatuka ken su ninemiskia ma shimusentepewakan tik itukay ne tutajtzin Yeshu anmejemet, wan iwan ne nuijiu, pal antemakat ne ká ijkiuni kichijtuk iwan ne Tenewani ma wilewi ne iweyka, pal kiane ma mumakishti ne iijiu yajane tik ne tunal ipal ne Tajtzin.

⁶ Te yek ne anmumuweymatilis. Anka te ankimatit ka se chiupi shukutishti kichiwa ka kukukisa muchi ne chipusti ipal ne tishti? ⁷ Shikijkwanikan ne palantuk shukutishti pal anmuchiwat se yankwik chipusti ken te ankipiat shukutishti. Ne tupaskwaj, ne Mawaltijtuk, nusan mumiktij. ⁸ Yajika, tikchiwakan ne ilwit, te iwan shukutishti pal ikman nian iwan shukutishti ipal tay palantuk wan te yek, sute iwan ne tamal te kipia shukutishti, ne tamal ipal yulchipakayu wan tejkia.

⁹ Nimetzinhilwij tik nuamaw ma te shisennemikan iwan tatzinhejenchiwanimet. ¹⁰ Te niknekituya nina iwan ne tatzinhejenchiwanimet ipal ini taltikpak, nian iwan ne kielewiat tay tepal wan taitzkiat, nian iwan ne kitennamikit teutzitzinmet; su ijkiuni, munekiskia ma shikisakan ijtik ini taltikpak! ¹¹ Ashan nimetzinhilwia ma te shisennemikan iwan ne se ká munutza tuiknew su yaja tatzinhejenchiwani o kielewia tay tepal o kitennamiki teutzitzinmet o teijilwiani o tawanani o se taitzkia: iwan se ijkiuni, nian shisentakwakan. ¹² Ika tay nikneki iwan ne nemit tatenpan pal nina su yejemet yejyek o te? Shinakan su yejyek ne nemit kalijtik. ¹³ Ne Teut yawi ina su yejyek ne tatenpan nemit. Shikishtikan ijtik anmejemet ne ká teyek.

Maka shumet itech ne te tayulmatit pal metzinchiwat juzgar

6 Su se anmejemet kipia se pal muchiwa juzgar iwan seuk, ankinekit ma metzinchiwakan juzgar ne ká te yejyek mas yek que ne tayulmatit? ² Anka te ankimatit ka ne tayulmatit yawit kichiwat juzgar ne taltikpak? Wan su ijtik anmejemet yawi muchiwa juzgar ne taltikpak, anka anhinat ka te anyejyek pal inat ká yek tik chijchikitik tajtanilis? ³ Anka te ankimatit ka tiawit tikchiwat juzgar hasta tanawatianimet? Su ijkiuni, taika te welit inat ipanpa ne tay muneki pal timutekipanuat?

⁴ Su ankipiat tajtajtanilis ipanpa tay muneki pal mutekipanuat, ken ka ankintaliat sejse ká ijtik ne sennemit te kipiat inpatiw? ⁵ Nina ka yaja pal anhishpinawat! Kiane, anhinat ka te kanaj anmutzalan nian se kimati wey pal weli kichiwa juzgar ijtik ne ikniwan, ⁶ sute se tuiknew kitenewa ukse iiknew, wan te semaya uni, mutaliat ishpan ne te tayulmatit? ⁷ Kineki ina ka sujsul anpulijtiwita ika anmunekit muchiwat juzgar se iwan seuk. Mas yek taika te ankiajkawat ma metzinchiwilikan? Mas yek ma shimuajkawakan ma metzinshijshikukan! ⁸ Anmejemet tachiwiliat wan tashijshikuat, wan ankichiwat uni iwan anmukniwan.

⁹ Anka te ankimatit ka ne te yejyek te yawit kipiat ne itatekimakalis ne Teut? Maka shimushijshikukan: nian ne tatzinhejenchiwat, nian ne kitennamikit teutzitzinmet, nian mawiltianimet, nian yajyamanik, nian ne senkuchit iwan se ukich, ¹⁰ nian techtekinimet, nian ne kielewiat tay tepal, nian tawananimet, nian teijilwianimet, nian taitzkianimet kipiasket ne itatekimakalis ne Teut, ¹¹ wan sejse anmejemet muchi uni katka. Melka uni, anmuishpaktiwit, anmuteuchijtiwit, anmuchijtiwit yejyek tik itukay ne tajtzin Yeshu Mawaltijtuk, wan tik ne iijiutzin ne tuTeut.

Shichulukan wejka ne tatzinhejenchiwalis

¹² Niweli muchi; melka uni, te muchi yek. Niweli muchi; melka uni, te weli nechtuktia aka.

¹³ Ne takwal nemi ipal ne tuijti wan ne tuijti ipal ne takwal. Ne Teut yawi kipulua ne se wan ne seuk. Ne tuweyka te pal titatzinhejenchiwat sute ipal ne Tajtzin, wan ne Tajtzin ipal ne tuweyka. ¹⁴ Ne Teut kiskalij ne Tajtzin wan tejemet yawi techiskalia iwan ne itajpal.

¹⁵ Te ankimatit ka ne anmuwejweyka tajtakutun ipal ne Mawaltijtuk? Anka niaw nikwi ne tajtakutun ipal ne Mawaltijtuk wan niaw nikwepa tajtakutun ipal se siwapala? Tesu kiane! ¹⁶ Te ankimatit ka ká ne musalua itech se siwapala muchiwa sanse iweyka iwan? Ika ina: "ne ujume mukwepasket sanse innakayu". ¹⁷ Ká ne musalua itech ne Tajtzin muchiwa sanse iijiu. ¹⁸ Shichulukan wejka ne tatzinhejenchiwalis! Muchi tay weli tateyekchiwa se nemi tatenpan ne iweyka, wan ne tatzinhejenchiwalis te, yaja kichiwilia teyek ne tuweyka. ¹⁹ Anka te ankimatit ka ne anmuweyka iteupantzin ne Ijiutzin ijtik anmejemet, ne ankipiat ika ne Teut metzinmakak wan te anmupal? ²⁰ Ika metzinkujket ipatka anmupatiw: yajika, shikilwitikan ka wey ne Teut tik ne anmuweyka.

Tay inak ipanpa ne munamiktiat

7 Ipanpa tay ne annechilwijket: yek nemi ma se takat te kitali ne imey ijpak isiwaw. ² Semaya ipanpa ne tatzinhejenchiwalis, sejse takat ma kipia isiwaw wan sejse siwat ma kipia ishulejyu. ³ Ne takat ma kikwepili ne isiwaw tay ne kiwikilia, wan ne siwat kenhaya iwan ne ishulejyu. ⁴ Ne siwat te tatuktia ijpak ne iweyka, tatuktia ne takat; wan kenhaya, ne takat te tatuktia ijpak ne iweyka sute ne siwat. ⁵ Maka shimuilwikan te, wan su ankichiwat, semaya su ne ujume kinekit ijkiuni ijtik se tiempoj ma shimusewikan ipal teutajtanilis, wan shipewakan senpa pal te ankiejekuat ne Tenewani ipanpa ne anmutaelewilis. ⁶ Ini tay nina se tay weli muchiwa, te se tay nemi tuktijtuk. ⁷ Melka niknekiskia su muchi kenhat ken naja, sejse kipia tay kimakatuk ne Teut, ne se ijkiuni, ne seuk ijkiuni.

⁸ Nikilwia ne te munamiktijtiwit wan ne tea kipiat inshulejyu ika mikik ka yek nemi su nakat ijkiuni; ⁹ melka uni, su te kipiat intajpal pal inat te, ma munamiktikan, ika mas yek ma munamiktikan que su tatat.

¹⁰ Ini tay nikinhilwia ne munamiktijtiwit; tesu naja nitatuktia sute ne Tajtzin: ma te kiajkawa se siwat ishulejyu, ¹¹ wan su kiajkawa ma naka kiane, ma te munamikti, wan su te, ma mukwepa itech ishulejyu; wan se takat ma te kiajkawa isiwaw.

¹² Ne sejseuk nikinnutza naja, tesu ne Tajtzin: su se tuiknew kipia se isiwaw te tayulmati wan su ne siwat kita yek ma naka iwan, ma te kiajkawa, ¹³ wan su se siwat kipia se ishulejyu te tayulmati wan yajini kineki naka iwan, ma te kiajkawa ne ishulejyu. ¹⁴ Ika muteuchijtuk ne ishulejyu ne te tayulmati ipanpa ne siwat, wan muteuchijtuk ne isiwaw ne te tayulmati ipanpa ne takat ká tuiknew. Su tesu kiane, ne anmupilawan muchiwaskiat sujsusul; ashkan yejemet yejyek. ¹⁵ Su ne te tayulmati metzinhajkawa, ma yawi. Su ijkiuni, te muilpijtuk ne takat o ne siwat ká tuiknew; ne Teut metzinnutztuk ma shinejmachnemikan. ¹⁶ Ika tay tikmati, siwat, su tiaw tikpalewia ne mushulejyu, wan tay tikmati, takat, su tiaw tikpalewia ne musiwaw?

¹⁷ Mas yek, sejse ken kimajmakak ne Tajtzin, sejse ken kinutztuk ne Teut, ijkiuni ma nejnemi. Tik muchi ne sejsennemit nitatuktia kiane. ¹⁸ Nemituya yawaltektuk se kwak munutzki? Ma te muajkewa. Kipiatuya itzuntepul? Ma te muyawalteki. ¹⁹ Ne tayawaltekilis te tatka wan ne tzuntepul te tatka: semaya ma mupachiwia tay tatuktijtuk Teut. ²⁰ Ma naka sejse ken nemituya kwak munutzki. ²¹ Munutzki kwak tekitini? Tesu panu tatka yajika! Melka uni, su tiweli timumakishtia, shikchiwa. ²² Ika ne tekitini ká munutztuk itech ne Tajtzin, yaja makishtijtuk ipal ne Tajtzin. Wan kenhaya, ne munutztuk ne te nemi itan aka, yaja itekitini ne Mawaltijtuk. ²³ Metzinkujtiwit ipatka se anmupatiw; maka shimuchiwakan itekitini takamet. ²⁴ Ken nemituya sejse kwak munutzki, nukniwan, ijkiuni ma naka ipal Teut.

²⁵ Ipanpa ne teuk munamiktijtiwit, te nikpia tatuktilis ipal ne Tajtzin. Melka uni, nikpia se pal nimetzinhilwia, ken ne Tajtzin nechpalewijtuk nitaketza iwan tayulmatilis. ²⁶ Nina tel ka uni yek ipal tay muneki ashan; nina ka yek ma naka se ijkiuni. ²⁷ Su tikpia se musiwaw, maka shimutatemuili timusutuma. Su timusutuntuk itech siwat, maka shiktejtemu siwat. ²⁸ Melka timunamiktia, te tikchijki tay teyek, wan su munamiktia se siwapil, te kichijki tay teyek. Ne kichiwat kiane, yawi kinpitzinia tik inweyka; naja nimetzinpalewia pal tesu.

²⁹ Ini tay nina, nukniwan: ne tunal te nemi wejka. Tik ne tay naka, ká ne kipiat insiwawan, ma muchiwakan ken su te kipiaskiat, ³⁰ wan ká ne chukat ken su te chukaskiat, wan ká ne pajpakit ken su te pajpakiskiat, wan ká ne takuat ken su te kipiaskiat tatka, ³¹ wan ká ne kikwit tay ipal ne taltikpak, ken su te, ika panu nemi muchi tay kipia ini taltikpak.

³² Nikneki ma te nemi tatka tay ne metzinkakasua. Ne ká te munamiktijtuk yulkakasiwi ipanpa ne Tajtzin, wan ken weli kipaktia ne Tajtzin. ³³ Ne ká munamiktijtuk yulkakasiwi ipanpa ne taltikpak, ken weli kipaktia ne isiwaw. ³⁴ Wan ne siwat ne te munamiktijtuk nusan nemi yulkakasujtuk, wan yulkakasiwi ne siwapil, ipanpa tay ipal ne Tajtzin wan muchi ipal Teut iwan ne iweyka wan ne iijiu. Ne siwat munamiktijtuk yulkakasiwi ipanpa ne taltikpak, ken weli kipaktia ne ishulejyu. ³⁵ Nina ini pal yaja yek anmupal, tesu pal nimetzinhilpia sute pal ma yaja melawak wan pal welit tekitit ipal ne Tajtzin wan ma te shikpiakan tatka taika yujyulmakaskiat.

³⁶ Su aka ina ka te nemi yek ken muwika iwan ne siwapil, su yajini sea uksituk wan nemi pal muchiwa ijkiuni, ma kichiwa ken kielewia: tesu tateyekchiwa; ma munamiktikan. ³⁷ Ká ne inatuk tik iyulu wan kimati yek, tesu ika muneki sute weli kituktia ne itaelewilis wan kitztuk yek tik iyulu ma naka ijkiuni wan ma te munamikti, yek kichiwas. ³⁸ Kiane, ká ne kinamiktia ne isiwapil, yek kichiwa, wan ká ne te kinamiktia, mas yek kichiwas.

³⁹ Se siwat muilpijtuk muchi ne tujtunal ne yultuk ne ishulejyu. Su miki ne ishulejyu yaja weli munamiktia iwan ká kineki, semaya tik ne Tajtzin. ⁴⁰ Naja nina ka mas yek su ijkiuni naka. Nina ka naja nusan nikpia iijiu ne Teut.

Ne tay mutakulijtuk ne teujteutzitzin

8 Tay tinat ipanpa ne tay mutakulijtuk ne teujteutzitzin?

Tikmatit ka muchi tikpiat tamatilis. Ne tamatilis techishpitza; ne tetasujtalis techketza. ² Su se ina ka kimati se, teuk kimati ken muneki kimati. ³ Su se kitasujta ne Teut, ne Teut kishmati yajane.

⁴ Tay tinat ipanpa ne takwal ne mutakulijtuk ne teujteutzitzin?

Tikmatit ka nujme te kanaj teutzin nian Teut sute sesan, ⁵ melka nemit sejse ne muilwiat teujteutzitzin, anka tik ilwikak, anka ijpak tal, ken nemit miak teutzin wan miak tajtzin, ⁶ pero tupal sanse Teut, ne teteku ne itech kistuk muchi, wan tejemet ijtik yaja; wan nusan sanse tajtzin, ne Mawaltijtuk Yeshu, ká muchi ipal, wan tejemet ipanpa.

⁷ Pero te nemi ne tamatilis ijtik muchi. Sejse ká kiyulmatit katka ne teutzin, hasta ashan kenhayuk kikwat ken se tay mutakulijtuk se teutzin, wan ken chikitik ne itamatilis, yaja mususulwia. ⁸ Ne takwal te techtzinkishtia itech ne Teut: nian wey tupatiw su titakwat, nian chiupi tupatiw su te titakwat. ⁹ Melka uni, shiktalikan cuidadoj iwan uni anmutatuktilis ma te yawi mukwepa se kan mukshichaluat ne melemet, ¹⁰ ika su se metzita taja ká tikpia tamatilis kan timutalia titakwa tik ne iteupan, ken yaja kimati chiupi, anka yawi ina ka yaja nusan yawi kikwa ne tay mutakulijtuk ne teutzin, ¹¹ wan wilewi ne mele ipanpa ne mutamatilis, ne tuiknew ká ne Mawaltijtuk mikik ka imaku!

¹² Ijkiuni, ankichiwiliat tay teyek ne tukniwan wan ankitasat ne intamatilis ika yejemet melemet; su ankichiwat ijkiuni, antateyekchiwat iwan ne Mawaltijtuk. ¹³ Yajika, su se takwal kichiwa ka wetzi nuiknew, te keman niaw nikwa nakat pal te nikchiwa ka wetzi nuiknew.