Chronological
7 Kwakuni ne weypalej kitajtanilij:
—Ijkia?
2 Yaja inak:
—Nukniwan wan noymet, shinechkakikan: ne wey Teut kiski iishpan ne tutatanoy Abraham kwak nemituya tik Mesopotamia kwak inteuk yajtuk Haran, 3 wan kilwij:
"Shikisa ne mutal wan shikajkawa ne mukniwan wan shu ka né kan niaw nimetzilwitia."
4 Kwakuni kiski tik ne tal ipal Kaldaya wan yajki Haran, wan kiski ka né kwak mikik iteku, wan kichijki ka walejku ini tal kan ashan anmuchantiat. 5 Wan melka inte kimakak nian se chiupi tal kan taksaskia ka nikan, inak ka yawi kimaka ipal ne ishinach, kwak inte kipiatuya ipilawan. 6 Ini tay inak ne Teut: ka ne ishinach yawi muchantia tik tepal techan wan yawi muchiwa itekitini wan yawit kichiwat ma tajseli unpual shiwit.
7 "Wan ne techan ká ipal muchiwasket itejtekitini, naja niaw nikchiwa juzgar," inak ne Teut, "wan tipan walkisasket wan muchiwasket nutejtekitini nikansan."
8 Wan kimakak ne sentaketzat ipal tayawaltekilis, wan kienej nesik Itzak wan kiyawaltek tik ne tunal chikwey, wan Itzak kichijki kenhaya iwan Yakob, wan Yakob inwan ne majtakti-ume tatanoy.
9 Wan ne noymet, ipanpa inkwalan iwan ne Yosep, temakaket tik Egipto, wan ne Teut nemik iwan, 10 wan kalishtij tik muchi ne ipejpenaj wan kimakak tetasujtalis wan tamatilis iishpan Parao, ne tatuktiani ipal Egipto, wan kitalij tatuktia tik Egipto wan tik muchi ne ikal.
11 Walaj se mayan nujme Egipto wan Kanaan, sea uij katka wan ne tunoywan inte kiajsit takwal. 12 Kwak Yakob takakik ka nemi tawial tik Egipto, achtu kintuktij ne tunoywan, 13 wan kwak mukwepket yawit senpa, Yosep kinneshtilij ne ikniwan ká yaja, wan ne Parao kishmatki ne imiakwan Yosep. 14 Yosep tatuktij wan kalnutzki Yakob ne iteku itech, wan muchi ne ikniwan, yeshpual wan kashtul takat wan siwat, 15 wan Yakob yajki Egipto, wan né mikik yaja wan ne tunojnoywan. 16 Wan kinsajsakket ka Shekem wan kintalijket tik ne shaput ne kikujki Abraham iwan tumin itech ne ipilawan Hamor tik Shekem.
17 Kwak ajsik ne tunal ipal ne sentaketzat ne kimakak ne Teut Abraham, weyak ne techan wan tepewik tik Egipto, 18 hasta kwak muskalij ukse tatuktiani ká inte kishmati katka Yosep. 19 Yajuni kishijshikuj ne tutechan wan kichijki ka tajseliat ne tunoywan pal kichiwa ma kishtikan ne shujshulut ma inte muyulkwiltikan.
20 Kwakuni nesik Moshe, wan yaja yektzin ipal ne Teut, wan muskalij yey metzti ichan iteku. 21 Kwak kishtijket, ne isiwakunew ne Parao kiwikak ka ichan wan kiskalij ken ikunew. 22 Wan Moshe muskalij tik muchi ne tamatilis ipal Egipto, wan welituya taketza wan tekiti yek.
23 Kwak kipishki unpual shiwit, inak ka kinekituya yawi tachia ne Israeltekat, 24 wan kwak kitak tay kichiwiliat se yejemet, kipalewij wan pal kitzunkwi ne tateyekchiwilijtuk kichaluj ne Egiptotekat, 25 ika kikejketza ka ne ikniwan kimatit ka ne Teut kinmakaskia tamakishtilis itech ne ijimey. Wan yejemet inte kimatket.
26 Ne ukse tunal walaj kwak sejse yejemet musumat nemit, wan pejki kinnejmachsentepewa. Inak:
"Nukniwan, taika anmutateyekchiwiliat?"
27 Ne kitateyekchiwilia ne iiknew kishtupew, wan inak:
"Ká metztalijtuk titechtuktia wan titechchiwa juzgar? 28 Anka tikneki tinechmiktia ken yalua tikmiktij ne Egiptotekat?"
29 Chuluj Moshe kwak kikakik, wan yajki muchantia tik ne tal ipal Midyan, wan né kipishki ume ipiltzin, 30 wan kwak panuket unpual shiwit, kiski iishpan tik ne tepet ipal Sinay se tanawatiani ken tit tik se kwawit.
31 Ne Moshe ishpuyawik kwak kitak ne tachialis. Kwak tzinkiski, mukakik ne Tutajwan ina:
32 "Naja ne Teut ipal ne munoywan: ne Teut ipal Abraham wan Itzak wan Yakob."
Moshe pejki ijtzilika wan te tachia ika majmawi. 33 Ne Tutajwan kilwij:
"Shiktujtuma ne mukak tik mujmukshi, ika kan ne ejkatuk tinemi, ne tal ipal ne Teut. 34 Ijkia nikitztuk ken tajselia ne nutechan nemi tik Egipto, nikaktuk ijiumiki wan naltemutuk ma nalinhishti. Wan ashan, shiwi! Niaw nimetztitania ka Egipto!"
35 Uni Moshe ká inte kikwijket wan inaket "Ká metztalijtuk titechtuktia wan titechchiwa juzgar?", tel, yajasan ne kititanij ne Teut ken tatuktiani wan tamakishtiani itech imey ne tanawatiani ne kiski iishpan tik ne kwawit. 36 Yaja kinhishtij kwak tamik kichiwa miak tay tetekia pal muishmati ijtik unpual shiwit tik ne tal ipal Egipto wan tik ne Chiltik At wan ka kojtan.
37 Yajaya ne Moshe ká kinhilwij ne Israeltekat:
"Ne Teut yawi metzintalilia se taketzani, se anmuiknew ken naja."
38 Yajaya ká nemik tik ne kalsennemit tik ne kojtan iwan ne tanawatiani nemik kinutza tik ne tepet ipal Sinay, wan iwan ne tunoywan, ká kikwij ne palabraj yultuk pal techmaka. 39 Yajaya ká ne tunoywan inte kinekiket kikakit, wan kishtupejket wan muishkwepket ka Egipto tik inyujyulu, 40 wan kilwijket ne Aaron:
"Shikchiwa tupal teutzitzinmet ma yawikan ka tuishpan, ika inte tikmatit ken ijtuk iwan ini Moshe ká techishtij tik ne tal ipal Egipto",
41 wan tik uni tujtunal kichijket se wakashkunet wan kiwikaket se tetakulis ipal ne teutzin, wan tatwaket iwan ne itekiw inmejmey, 42 wan muishkwepki ne Teut wan kintemakak ma muchiwakan tekitinimet ipal muchi tik ne ilwikak, ken muijkwilujtuk ijtik ne iamaw ne taketzanimet:
"Anka ankimiktijket takwalmet pal nechtakuliat
ijtik unpual shiwit ka kojtan, Israel?
43 Wan ankisajsakket itawipan Molek
wan isital ne anmuteutzin Kewan,
fijfiguraj ankichijket pal anmutankwaketzat inhishpan;
wan naja nimetzinwikas mas wejka que Babelonia!"
44 Ne tunoywan kipiatuyat ne tawipanti ipal taneshtilis ka kojtan, ijkiunisan ken tatuktij ne kinutzki Moshe ma kichiwa, kenha ken yaja kitztuya, 45 tay ne nusan kianket wan kalkalaktijket ne tunoywan iwan Yeshu ken ipal ne tejtechan ká ne Teut kishtij tik intachialis tunoywan hasta ne tujtunal ipal Dawid, 46 ká ne Teut kitasujtak wan ká kitajtan kiajsi se tawipantzin ipal ne Teut ipal Yakob.
47 Shalomo kiketzki se kal ipal. 48 Melka uni, inte muchantia ne Wejkapan ijtik se tay kichijket ijimey aka, ken ina ne taketzani:
49 "N' ilwikak ne nukuijpal.
Ne tal ne petat itan ne nujnukshi.
Katiawel ne kal ankiketzaskiat nupal? ina Tutajwan,
wan katiawel ne kan nimusewiskia?
50 Anka inte kichijki muchi ini ne numey?"
51 Tzujtzuntet! Melka anmuyawaltektiwita, ne anmuyujyulu inte, nian ne anmutakakilis! Anmejemet senpa kilwiat ne Ijiutzin ka inte, ken ne anmunoywan anmejemet nusan. 52 Katiawel ipal ne taketzanimet inte kintalultijket ne anmunoywan? Wan kinmiktijket muchi ká inaket ka yawi witz ne Yek, wan ashan anmuchijtiwit itejtemakani wan itajtamiktiani, 53 ká ne kikwijket ne Tajtuli ken tatuktijket tanawatianimet, wan te ankishpelwijket.
54 Kwak takakket muchi ini, sujsul kwalanket inyujyulu wan tzalanket intajtan ipanpa. 55 Yaja nemituya tentuk iwan ne Ijiutzin wan tachishki ka ikajku wan kitak tzitzinaka ne Teut wan Yeshu ejkatuk ka iyekkan ne Teut, 56 wan inak:
—Ashan nikita ne ilwikak tapujtuk wan ne Itelpuch ne Takat ka iyekkan ne Teut.
57 Yejemet tzajtziket wey wan kitzakket ne innajnakas, wan muchi ken sesan mutalujket mutamutat ijpak; 58 wan kishtijket tik ne techan, wan kitejteminket. Wan ne kitaket kitamutaket ne inkwajkwach itech ne ijikshi se takapiltzin itukay Shaul. 59 Wan kitejteminket ne Estepano wan yaja kinutza:
—Tajtzin Yeshu, shikwi nuijiu!
60 Mutankwaketzki wan tzajtzik wey:
—Tajtzin, maka shikintajtani ipatiw tay kichijtiwit.
Wan kwak tamik ina ini, mikik.
8 Shaul kitak yek ne itemiktilis.
Kwakuni sujsul taekuj ne sennemit tik Yerushalem. Musentalujket muchi ijtik ne tajtal pal Yudaya wan Shamarea. Semaya ne tijtitanijtuk nakaket.
2 Musentepejket sejse yek takat wan kiwikaket ne Estepano wan kichijket se wey tetalpachulis.
3 Shaul kijtakuj ne sennemit. Kalak ijtik muchi ne kajkal, kintilan ne takamet wan ne siwatket wan kinwikaket tzajtzaktuk.
Pilipo tik Shamarea
4 Yejemet tel yajket nujme tamakat ne yeknawatilis ipal ne palabraj, 5 wan Pilipo ajsik ne techan ipal Shamarea kinnawatia ipanpa ne Mawaltijtuk 6 wan muchi kikejketzket tay ina katka Pilipo kwak kikakket wan kitaket muchi tay yaja kichiwa katka pal muishmati, 7 ika miak ká kipiatuyat nawalmet teyek tzajtzit katka wan walkisat; miak ká inte welituyat mijkwanit wan metzkelumet mupajtijket. 8 Muchijki wey pakilis tik uni techan.
9 Achtu, nemituya tik ne techan se takat itukay Shimon kichiwa katka magiaj wan ne techan ipal Shamarea ishpuyawi katka wan inat katka ka yaja se wey. 10 Muchi, chijchikitik wan wejwey, kikakit katka yajuni wan inat ka uni ne itajpal ne Teut ne muilwia wey. 11 Kichiwiliat katka casoj ika ikman ishpuyawit katka iwan ne imagiaj.
12 Kwak kiyulmatket ne Pilipo ká tayeknawatia katka ipanpa ne itatekimakalis ne Teut wan ne itukay Yeshu Mawaltijtuk, mumakaket ulyuj takamet wan siwatket. 13 Ini Shimon nusan kiyulmatki wan kwak mumakak ulyuj nakak iwan Pilipo. Wan kwak kita tay muchiwa pal muishmati wan ne itajtajpal wey, ishpuyawik.
14 Kwak takakket tik Yerushalem ka ne Shamarea kikwijtuk ne ipalabraj ne Teut, kititanijket Pedro wan Yojan ka né. 15 Yejemet ajsiket wan pejket kitajtanit ne Teut ma kikwikan ne Ijiutzin, 16 ika inteuk wetztuya ijpak aka, semaya mumakatiwit ulyuj tik itukay ne Tajtzin Yeshu. 17 Kwakuni kinteuchijket wan kikwijket ne Ijiutzin.
18 Kwak ne Shimon kitak ka kwak ne tijtitanijtuk kinteuchiwat mukwi ne Ijiutzin, kinekituya kinmaka tumin 19 wan inak:
—Naja nusan shinechmakakan ma niweli nikchiwa ma kikwikan ne Ijiutzin muchi ká nikteuchiwa!
20 Pedro kilwij:
—Ma puliwi ne mutumin muwan! Ika tikmatki ka weli mukua iwan tumin tay ne tatakulia ne Teut. 21 Taja inte tikpia nian se takutuntzin ipal ini, ika ne muyulu inte melawak iishpan ne Teut. 22 Yajika, shimuyulpata, shikajkawa tay tikpia inteyek, wan shimutajtaweli iwan ne Tajtzin ma kishtili ne muyulu uni taelewilis, 23 ika nikita ka taja tichichiktiatuk wan timusalujtuk tik tay inte yek.
24 Nankilij ne Shimon wan inak:
—Shimutajtawelikan nupanpa iwan ne Tajtzin ma inte yawi muchiwa nian se ipal tay tinatuk.
25 Wan kwak tamiket tanawatiat wan tanutzat ne ipalabraj ne Tajtzin, mukwepket ka Yerushalem wan tamakaket ne yeknawatilis nujme Shamarea.
Pilipo iwan se ipal Etiopia
26 Se tanawatiani ipal ne Tajtzin kinutzki Pilipo wan ina:
—Shimuketza wan shu ka tatzinu ijpak ne ujti ne kisa Yerushalem wan temu ka Gaza ijtik ne kojtan.
27 Wan muketzki wan yajki. Wan né nemituya se wey takat ipal Etiopia, se tekitini ipal ne Kandake ipal Etiopia (kineki ina ne siwatatuktiani) ká tatuktia katka ijpak muchi ne ichalchiw. Yajuni ajsituya Yerushalem mutankwaketza, 28 wan mukwepki walaj ijpak ne itawikani; né nemi muetztuk amatachia tik ne iamaw ne taketzani Yeshaya. 29 Ne Ijiutzin kilwij ne Pilipo:
—Shiajsi wan shimusalu tik uni tawikani.
30 Kwak ne Pilipo yajki mutalua itech, kikakik amataketza tik ne iamaw ne taketzani Yeshaya. Wan kitajtanilij:
—Ijkia tikmati tay ne tiamataketza?
31 Inak:
—Ken niweli tel, asu inte nechneshtilia ajaka?
Wan mutajtawelij iwan Pilipo ma tejku wan ma mutali iwan. 32 Ini ne takutun ne amataketza nemi ne takat:
"Kiwikaket ken se ichkat pal kimiktia
wan ken se ichkakunet itech ne tashimani
wan te mutenpelua.
33 Kishpinawaltijket wan kichijket juzgar.
Ká yawi taneshtia tay panutuk tik uni tunal,
ka kishtijket tik ne tal kwak nemik yultuk?"
34 Ne takat nankilij wan kilwij Pilipo:
—Nimetztajtani ma shinechilwi, ká ipanpa ina ini ne taketzani, ipanpa yajasan isel ush ipanpa seuk?
35 Mutenpeluj ne Pilipo wan pejki kineshtilia uni tay ijkwilujtuk wan kimakak ne yeknawatilis ipal ne Yeshu. 36 Kwak yawit tik ne ujti ajsiket se achin, wan ne takat inak:
—Nikan nemi at, taika inte tinechmaka ulyuj?
(37) 38 Wan tatuktij ma muketza ne tawikani, wan ne ujume, Pilipo wan ne wey takat, temuket hasta ne at wan kimakak ulyuj. 39 Kwak kisket ne at wan tejkuket, ne Ijiutzin kitzkij Pilipo wan ne takat intea kitak. Pajpakik yajki tel tik ne ujti. 40 Pilipo muajsik tik Ashdod, wan panuk yajki tayeknawatia tik muchi ne tejtechan hasta ajsik Kaysarea.
Ne Bibliaj Tik Nawat · © 2008, 2012 Jan Morrow