Chronological
Muyulkwi
24 Sujsul peyna tik ne achtu tunal pal ne semanaj, ne siwatket kiwikaket ne pajtipuputuka ne kiekchijtuyat, wan ajsiket ne shaput. 2 Kiajsiket ne tet ijkwantuk wejka ne iten ne shaput. 3 Kwak kalakket, inte kiajsiket ne imikini ne tajtzin Yeshu. 4 Ishpuyawit ipanpa uni, wan kwakuni kitaket ume takat nepa innawak. Ne inkwajkwach tzitzinakat ken takipini. 5 Ne siwatket mumutijket wan muishtapachujket talchi, wan ne takamet kinhilwijket:
—Ken ka ankitemuat ne yultuk itzalan ne miktiwit? 6 Inte nemi nikan asunte muketzki. Shikelnamikikan ken metzinhilwij kwak nemituyayuk tik Galilaya, 7 ina:
"Ne Itelpuch ne Takat nemi pal mutemaka iwan tateyekchiwanimet; yawit kicruzpiluat wan kwak panut yey tunal yawi muyulkwi."
8 Wan kielnamikket tay inatuya.
9 Wan kwak kisket tik ne shaput wan mukwepket, kinhilwijket ne majtakti-se wan muchi ne sejseuk tay panutuk. 10 Yejemet Maryam ne ipal Magdala, wan Yojana, wan Maryam ne inan Yakob, wan ne sekit inwan. Pejket kinhilwiat ne tijtitanijtuk, 11 wan yejemet inaket ka chachalakat wan te kinyulmatket. 12 Ne Pedro ajkewki wan kiski mutalua hasta ne shaput, muishpiluj wan sema kitak ne ikwenyu. Wan kwak kiski ka né, ishpuyawik tetekia sea.
Muneshtij tik Emaus
13 Wan kwakuni tik uni tunal ume pal yejemet yawit tik se techan achka majtakti kilometroj wejka Yerushalem kan itukay Emaus, 14 wan tajtaketzket yajket tik ne ujti ipanpa muchi ini tay panutuya. 15 Wan kwak tajtaketzat wan mutajtaniliat, intech ajsik se wan pejki nejnemi innakastan; wan yaja Yeshu. 16 Yejemet kipiat katka ne inhijish pajpachujtuk pal te kishmatit ká yaja. 17 Kinhilwij:
—Tay ipanpa antajtaketzat tik ne ujti wan anmutechtiat?
18 Nankilij se yejemet itukay Kleopas, kilwij:
—Anka taja tiejkuni tik Yerushalem wan te tikmati tay panutuk yewa.
19 Wan kinhilwij:
—Tajtaysan?
Yejemet kilwijket ken ijtuk iwan Yeshu ipal Nazaret, ken muchijki taketzani ipal ne Teut ne kichijki wejwey itejtekiw wan ipajpalabraj iishpan ne Teut wan muchi ne techan, 20 ken temakaket ne weypalejmet wan ne tutajtatuktiani ma kimiktikan, wan kicruzpilujket:
21 —Tejemet tikmatit katka ka yajaya ne yawi kichulultia Israel; wan ashan tinemit ne tunal yey ka ini panutuk. 22 Wan nusan sejse siwat ijtik tejemet techmutijket: muita ka nemiket itech ne shaput peyna 23 wan walajket techilwiat ka inte kiajsiket ne mikini, wan ka inhishpan kistuyat tanawatianimet wan kinhilwijket ka yaja yultuk. 24 Wan yajket sejse ipal tejemet kanka nemi ne shaput wan kiajsiket ijkiuni ken inatiwit ne siwatket. Inte kitaket ne Yeshu.
25 Wan yaja kinhilwij:
—Aj melemet ká ishtunat kimatit muchi tay inaket ne taketzanimet! 26 Uni nemituya pal muchiwa iwan ne Mawaltijtuk pal yekawi muchi wan ma inakan ka wey, 27 wan kinhilwij tay inaket Moshe wan muchi ne taketzanimet ipanpa tik ne ajamat!
28 Wan ajsiket ne techan kanka kinekituyat yawit, wan yaja kichijki ken ka yasneki mas wejka, 29 wan te kiajkawket yawi; kilwijket:
—Shinaka tuwan, ika teutaka, yawia tayuaki.
Wan nakak. 30 Wan kwak mutalij sentakwa inwan kikwij ne tamal wan kiteuchij, wan kipitzakuj wan kinmakak muchi. 31 Kwakuni yejemet muishpelujket wan kishmatket ka yaja. Wan intea kitaket. 32 Wan muilwijket:
—Tejkia ka tata katka ne tuyulu ijtik tejemet kwak technutza nemi tik ne ujti, kwak techneshtilia nemi tay inat ne ajamat?
33 Wan tik uni horaj ajkewket wan mukwepket ka Yerushalem, wan kinhajsiket sejsenputzujtuk ne majtakti-se wan ne nemituyat inwan, 34 wan yejemet inat katka:
—Tejkia, ne Tajtzin muyulkwijtuk wan kiski iishpan Shimon.
35 Wan pejket taneshtiat ken ijtuk tik ne ujti wan ken kishmatket kwak kipitzakua nemi ne tamal.
Yeshu kiski ishpan ne majtakti-se
36 Yejemet taketzat kenhayuk kwak yaja kiski intzalan wan kinhilwia:
—Shinemikan yek!
37 Muishmutijket wan inat katka ka nemituyat kitat se kujkul, 38 wan yaja kinhilwij:
—Taika anmukakasujtiwit? Wan taika annemit mutajtaniliat tik anmuyujyulu? 39 Shikitakan nujnumey wan nujnukshi! Ika naja né! Shinechchijchimikan, wan shitachiakan, ika se kujkul nian inakayu nian iujumiu inte kipia ken ankitat ka naja nikpia.
40 Wan tami, kinhilwitilij ne ijimey wan ne ijikshi, 41 wan inteuk kimatket ka tejkia ika sea pakit wan ishpuyawit. Kinhilwij:
—Ankipiat takwal ka nikan?
42 Yejemet kimakaket chiupi michin ishkatuk 43 wan kikwij wan kikwaj ishpan yejemet.
44 Kinhilwij:
—Ini ne nupajpalabraj nimetzinhilwij kwak ninemituyayuk anmuwan: ka nemi pal yekawi muchi tay nemi tajkwilujtuk tik ne tajtuli ipal Moshe wan ne taketzanimet wan sajsalmoj nupanpa.
45 Kwakuni kipeluj ne intamatilis ma kimatikan tay kineki ina tay nemi ijkwilujtuk, 46 wan kinhilwij:
—Ijkiuni nemi tajkwilujtuk, ma taeku ne Mawaltijtuk wan kwak miktuka ma muyulkwi kwak panutiwit yey tunal, 47 wan ma munajnawati yulpatalis tik tetapupulwilis ipal ne tajtateyekchijtuk tik itukay ijtik muchi ne tejtechan wan achtu tik Yerushalem. 48 Ankimatit ini anmejemet. 49 Wan ashan naja nimetzinmaka ne ipalabraj ne Nuteku. Shinemikan tik ini techan hasta anmutakentiat tik anmutajpal ipal ne ajku.
50 Kinhishtij tik ne kal wan kinwikak hasta ajsit Bet-Anya, wan kiajkukij ijimey wan kinteuchijki. 51 Wan kwak nemituya kinteuchiwa, kinhajkaw wan tejkuk yajki ka ilwikak. 52 Wan yejemet, kwak tamik mutankwaketzat, mukwepket tik Yerushalem iwan wey pakilis 53 wan né itech ne teupan nemituyat senpa inat ka wey ne Teut.
Muyulkwi
20 Tik ne achtu tunal pal ne semanaj, Maryam ipal Magdala ajsi peyna tik ne shaput, kwak uk kunyua, wan kita ka mijkwantuk ne tet ipal ne shaput. 2 Kwakuni kisa mutalua wan ajsi itech Shimon Pedro, wan itech ne ukse mumachtiani ká ne Yeshu sujsul kitasujta katka, wan kinhilwia:
—Kishtijtiwit ne Tajtzin ijtik ne shaput wan te tikmatit kan kitalijket.
3-4 Kisket mutaluat tel ne Pedro wan ne ukse mumachtiani wan ajsit tik ne shaput nemanhachin, wan ken ne ukse mumachtiani yajki mas talul ajsik tik ne shaput achtu, 5 wan kwak muishpiluj, kitak ne ikwenyu pak ne tal. Melka uni, intesu kalak. 6 Kwakuni ajsik Shimon Pedro iipan wan kalak tik ne shaput wan kita ne ikwenyu pak ne tal, 7 wan ne ikwach ne nentuya ijpak ne itzuntekun inte nemituya iwan ne ikwenyu asunte kimilujtuk ka ikwaj. 8 Kwakuni kalak nusan ne ukse mumachtiani ne achtu ajsituk ne shaput, wan tachishki wan kimatki, 9 ika inteuk kimatit ka muijkwilujtuk ka yaja nemi pal muyulkwi kwak miktuka. 10 Ne mumachtianimet mukwepket ka inchan; 11 Maryam nakak iten ne shaput chuka. Kwak chuka nemi, muishpiluj tachia ijtik ne shaput, 12 wan kita ume tanawatiani ijistatakentijtuk muetztuk ne sé itech ne itzuntekun wan ne seuk itech ne ijikshi kan ne mutekatuya ne iweyka Yeshu, 13 wan kilwiat:
—Siwat, taika tichuka?
Kinhilwia:
—Ika kiwikatiwit ne Nutajtzin wan te nikmati kan kitalijket.
14 Kwak tamik ina uni, muishkwepki wan kita ne Yeshu ejkatuk ka iipan, wan te kimatki ka yaja ne Yeshu. 15 Yeshu kilwia:
—Siwat, taika tichuka? Ká tiktemua?
Yajane kimati ka yaja ne milpiani wan kilwia:
—Tajtzin, asu taja tikwikak, shinechilwi kan tiktalijtuk wan niaw nalkwi.
16 Yeshu kilwia:
—Maryam!
Yaja muishkwepa wan kilwia tik itaketzalis ne Yudayujmet:
—Rabuni!
Kineki ina "nutamachtiani!" 17 Yeshu kilwia:
—Maka shu-shinechmatuka, ika inteuk nitejkutuk itech Nuteku. Shu shikinhilwi ne nukniwan ka nitejku kan nemi ne Nuteku wan Anmuteku wan Nuteut wan Anmuteut.
18 Ajsi Maryam ipal Magdala kinnawatia ne mumachtianimet ka nikitztuk ne Tajtzin, wan ini tay kilwijtuk.
19 Kwakuni ka teutak tik uni achtu tunal ipal ne semanaj, ne tentzakka kan nemituyat ne mumachtianimet nemituya tzaktuk ipanpa ne mawi kipiatuyat ipal ne Yudayujmet. Wan ajsik ne Yeshu wan nakak tatajku wan kinhilwia:
—Shinemikan yek!
20 Kwak tamik ina ini, kilwitij ne ijimey wan ne iumiskwil. Kwakuni kwak kitaket ne Tajtzin pakiket ne mumachtianimet. 21 Ne Yeshu kinhilwij senpa:
—Shinemikan yek! Ijkiunisan ken nechtitanij ne Teteku, naja nusan nimetzintuktia.
22 Wan kwak inatuya ini, kinpitzki wan kinhilwia:
—Shikwikan Ijiutzin. 23 Mutapupulwisket ne intajtateyekchijtuk ká ne ankintapupulwiat. Ká ne ankinpachuat, mupachusket.
24 Tomas, se pal ne majtakti-ume ne muilwia chachawat, inte nemituya inwan kwak walaj Yeshu. 25 Kwakuni ne uksejse mumachtiani kilwiat:
—Tikitztiwit ne Tajtzin.
Yaja kinhilwij:
—Asu inte nikita ne kuyuntuk kan nemituyat ne clajclavoj tik imejmey wan niktalia numapipil ijtik ne kuyuntuk pal ne tejtepusti wan niktalia ne numey tik ne iumiskwil, tesu nikmattuskia!
26 Wan ukseujti kwak panutiwit chikwey tunal, ne mumachtianimet nemituyat kalijtik wan Tomas nemituya inwan. Witz ne Yeshu melka nemituya tzaktuk ne tentzakka, wan nakak tatajku wan inak:
—Shinemikan yek!
27 Neman kilwia Tomas:
—Shiktali ka nikan ne mumapipil wan shikita ne nujnumey, wan shiktali ne mumey wan shikmatuka ne nuumiskwil, wan shikmatiaya!
28 Nankilij Tomas wan kilwij:
—Nutajtzin wan Nuteut!
29 Ne Yeshu kilwia:
—Ika tinechitztuk tikmatki. Suertej kipiat ne inte kitat wan kimatit!
30 Kiane tel, ne Yeshu kichijki miak pal muishmati tik intachialis ne mumachtianimet tay inte muijkwilujtiwit tik ini amat. 31 Ini muijkwilujtuk pal ma shikmatikan tik anmuyulu ka Yeshu yaja ne Mawaltijtuk, ne Itelpuch ne Teut, wan ma shiyujyultuk tik itukay ika antayulmatit.
Ukse muneshtilis
21 Tipan, muneshtij ne Yeshu ukseujti ishpan ne mumachtianimet itech ne weyat ipal Tiberias. Walmuneshtij ijkini:
2 Sennemituyat Shimon Pedro wan Tomas ne chachawat wan Natanel ne ipal Kana pal Galilaya wan ne ipilawan Zabday wan uk ume ipal ne mumachtianimet. 3 Kinhilwia Shimon Pedro:
—Niawa nikitzkia michin.
Kilwiat:
—Tejemet nusan tiwitzet muwan.
Kisket wan kalakket ijtik ne barcoj, wan tik uni tayua nian tatka kitzkijket. 4 Kwak tanesik, Yeshu nemituya ejkatuk iten ne at, melka ne mumachtianimet inte kishmatket. 5 Kwakuni ne Yeshu kinhilwij:
—Kukunetzitzin, inte ankipiat taiwan antakwaskiat?
Nankilijket ka inte. 6 Yaja kinhilwij:
—Shiktamutakan ne matat ka imayekkan ne barcoj wan san ankiajsisket.
Kitamutaket tel, wan te welituyat kaltilanat ika ne michin sujsul mijmiak. 7 Kwakuni ne mumachtiani ká ne sea kitasujta katka ne Yeshu kilwij Pedro:
—Yajane ne Tajtzin!
Kwak Shimon Pedro kikakik ka yaja ne Tajtzin, kitalij ne icoton, ika nemituya petztituk, wan mutamutak ijtik ne weyat. 8 Ne sejseuk mumachtiani walajket iwan ne barcojtzin, ka inte nemituyat wejka ne tenhat, semaya achka sentzunti metroj. Kitilanat witzet ne matat iwan muchi ne mijmichin. 9 Kan walejkuket ne tal, né kitaket tejtekunal tajtalijtuk wan michin talijtuk ijpak, wan tajtamal. 10 Ne Yeshu kinhilwia:
—Shalwikakan sejse pal ne mijmichin ne ankitzkijtiwit.
11 Tejkuk Shimon Pedro, wan kitilan ne matat hasta ne tal tentuk iwan sentzunti-unpual-majtakti-yey tumak michin, wan melka mijmiak, inte tzayanik ne matat. 12 Ne Yeshu kinhilwia:
—Shiwikikan, shitakwakan!
Nian se ipal ne mumachtianimet kitajtanilij "Ká taja?" ika majmawit; kimatit ka yaja ne Tajtzin. 13 Witz Yeshu wan kikwi ne tajtamal wan kinmajmaka, wan nusan ne michin.
14 Iwan ini, yey wipta kichiwa ka muneshtij Yeshu ishpan ne mumachtianimet kwak miktuka wan muyulkwija.
15 Kwakuni, kwak takwajtiwit, ne Yeshu kilwia Shimon Pedro:
—Shimon ikunew Yojan, tinechtasujta mas que yejemet?
Kilwia:
—E tajtzin, taja tikmati ka nimetztasujta.
Kilwia:
—Shiktajpia ne nuijichkakunetzizin!
16 Kilwia uksenpa:
—Shimon ikunew Yojan, tinechtasujta?
Kilwia:
—E tajtzin, taja tikmati ka nimetztasujta.
Kilwia:
—Shiktakwalti ne nuichkatal!
17 Nusan uksenpa kilwia:
—Shimon ikunew Yojan, tinechtasujta?
Ne Pedro mutechtij ika kilwij yeshpa "Tinechtasujta?", wan kilwia:
—Tajtzin, muchi tikmati; taja tikmati ka nimetztasujta.
Ne Yeshu kilwia:
—Shiktajpia ne nuichkatal! 18 Ini tay nimetzilwia: kwak tipiltzin katka, tiktalia katka mukwajkwach musel wan tinejnenki katka kanka tikelewia. Kwak tiaw tishulejtia, tiaw tikmelawa ne mujmumey pal seuk metztalilia mukwajkwach wan yawi metzwika kanka inte tikelewia.
19 Inak uni pal taneshtia iwan katiawel mikilis yawi kiweychiwa ne Teut, wan kwak inatuk, kilwia:
—Shiwi nuipan.
20 Muishkwepki ne Pedro wan kita ne mumachtiani ká ne Yeshu kitasujta, nejnemi witz ka ipan. Yajaya ne ká tzinkiski inakastan ne Yeshu kwak takwat nemit wan inak: "Tajtzin, ká ne yawi metztemaka?" 21 Ne Pedro kitak yajuni wan kilwia ne Yeshu:
—Tajtzin, ken ijtuk iwan yajini?
22 Ne Yeshu kilwia:
—Asu nikelewia ma naka yaja hasta niwitz, tay tikneki tikchiwa? Taja nikan nuipan naja!
23 Kwakuni pejket inat ijtik ne tukniwan ka uni mumachtiani inte yawi miki. Wan ne Yeshu inte kilwij: "Inte yawi miki." Semaya kilwij: "Asu nikelewia ma naka yaja hasta niwitz, tay tikneki tikchiwa?" 24 Uni ne mumachtiani ne taneshtia ipanpa muchi ini wan tajkwiluj, wan tikmatit ka tejkia tay ne taneshtijtuk.
25 Nusan nemit miak sejseuk tajtay kichijki ne Yeshu: asu muijkwiluskia muchi uni, nina ka inte ajsiskia muchi ne taltikpak ipal ne ajamat kan muijkwiluskia.
Ne Bibliaj Tik Nawat · © 2008, 2012 Jan Morrow