Chronological
Muyulkwi
28 Ne tunal ipal sewilis ka teutak, kwak yawi pewa ukse semanaj, Maryam pal Magdala wan ne seuk Maryam ajsiket ne shaput tachiat 2 wan né ulinik sujsul ika waltemuk se itanawatiani ne Teut ká kiski tik ne ilwikak, wan kijkwan ne tet wan mutalij ijpak yaja. 3 Ne itachishka ken kwak takipini, wan ne ikwajkwach puru ijistak. 4 Ne nemituyat tajpiat ijtzilikaket iwan mawi wan nakaket ken asu miktiwit. 5 Ne tanawatiani kinhilwij ne siwatket:
—Anmejemet maka shimajmawikan, ika nikmati ka ankitemuat witzet Yeshu ne cruzpilujtuk. 6 Inte nemi nikan, muyulkwij ken inatuya. Shiwikikan, shikitakan kan ne nentuk tekatuk. 7 Shimunelwikan yawit kilwiat ne mumachtianimet ka muyulkwijtuk wan yawia né anmuishpan ka Galilaya. Ka ikuni ankitasket. Nimetzinhilwija!
8 Kiajkawket ne shaput wan munelwijket, majmawit, wan nusan sea pajpakit; kisat mutaluat kinhilwiat ne mumachtianimet.
9 Wan né kinnamik ne Yeshu wan kintajpaluj. Yejemet tzinkisket wan kinapalujket ne ijikshi wan mutankwaketzket. 10 Kwakuni ne Yeshu kinhilwia:
—Maka shimajmawikan. Shumet shikilwikan nukniwan ma yawikan Galilaya; ka ikuni yawit nechitat.
11 Yajket.
Wan né tik ne techan ajsiket sejse pal ne guardiaj kinhilwiat ne weypalejmet muchi tay panuk, 12 wan musentepewket iwan ne noymet wan sentajtaketzket pal kitat tay kichiwaskiat. Wan kikwijket wey tumin wan kinmakaket ne tasumanimet, 13 inat:
—Shinakan: "Ajsiket ne imujmumachtiani tayua wan kichtekket kwak tejemet tikuchket." 14 Wan su takaki ne tatuktiani, tejemet tiawit tiknutzat wan tiawit tikchiwat ma inte shikpiakan yulkakasiwilis.
15 Yejemet kikwijket ne tumin wan kichijket ken kintuktijket, wan yajaya tay tamachtijket intzalan ne Yudayujmet hasta ini tunal.
16 Ne majtakti-se mumachtiani yajket ka Galilaya wan ajsiket ne tepet kan Yeshu inatuya, 17 wan kwak kitaket mutankwaketzket. Sejse inte tayulmatket 18 wan Yeshu waltzinkiski wan kinhilwij:
—Nechmakatiwit ka naja niweli muchi tik ne ilwikak wan pak ne tal. 19 Yajika, shumet shikinchiwakan mumachtianimet pal muchi ne tejtechan wan shikinmakakan ulyuj tik itukay ne Teteku wan ne Itelpuch wan ne Ijiutzin, 20 wan shikinmachtikan ma kitajpiakan muchi tay nimetzintuktij. Wan nikan anmuwan ninemis muchi ne tujtunal hasta tami muchi.
Muyulkwi
16 Wan kwak tamik ne sewilis, Maryam pal Magdala wan Maryam ne innan Yakob wan Shalome kikujket pajtipuputuka pal ajsit kimajmawaltiat, 2 wan sujsul peyna tik ne achtu tunal ipal ne semanaj walejkut ne shaput kwak tanesi 3 wan muilwiat:
—Ká yawi kijkwani ne tet tupal pal kitapua ne iten ne shaput?
4 Wan kwak tachiaket kitat ka mijkwantuka ne tet, wan yaja sujsul tumak! 5 Wan kalakket ijtik ne shaput wan kitaket se pipil muetztuk ka imayekkan tik se weyak wipil istak, wan ishpuyawket. 6 Yaja kinhilwia:
—Maka shishpuyawikan! Anwalajtiwit ankitemuat Yeshu pal Nazaret, ne cruzpilujtuk. Muyulkwij, inte nemi nikan. Shikitakan kan ne kiajkawket. 7 Shumet shikilwikan ne mumachtianimet wan ne Pedro ka yawia anmuishpan ka Galilaya. San ankitasket ka ikuni ken metzinhilwij.
8 Wan kisket mutaluat tik ne shaput ijtzilikat wan ishpuyawit, wan te kilwijket tatka aka ika majmawit.
Ken inat sejse ka tami ini amat
[[9 Yeshu muyulkwij peyna tik ne achtu pal ne semanaj wan achtu kiski ishpan Maryam pal Magdala, ká yaja kishtilijtuya chikume nawal teyek; 10 yajuni yajki kinhilwia ne iwan nejnentiwit kan ne chukat, 11 wan yejemet kwak kikakket ka nemituya yultuk wan muneshtijtuk iishpan ne Maryam, inte kiyulmatket.
12 Nemanha muneshtij iwan ukse iweyka ishpan ume nemituyat pashaluat tik ne kojtan, 13 wan yajket kinhilwiat muchi, wan yejemet nusan te kiyulmatket.
14 Tipan kiski ishpan ne majtakti-se kwak nemituyat sentakwat wan kinhajwak ika te kipiatuyat tayulmatilis wan yujyultakwaknaj ika te kinyulmatket ne kitztiwit kwak tamik muyulkwi. 15 Wan kinhilwij:
—Shumet nujme ne taltikpak, shikinnajnawatikan muchi ne yeknawatilis. 16 Ká ne tayulmati wan mumaka ulyuj yawi mupalewia, wan ká ne inte tayulmatit inte yejyek. 17 Pal ne tayulmatit, ini tay yawi pal muishmati: tik nutukay yawit kishtiat nawalmet teyek; yawit tanutzat tik yajyankwik taketzalis; 18 yawit welit kianat kujkuat tik inmejmey wan kiunit tay tamiktia, wan te yawit kukuyat; kwak kitaliat ijimey ijpak kukuyanimet yawit yektiat.
19 Kiane tel ne tajtzin Yeshu, kwak tamik kinnutza, mukwij ka ikajku wan mutalij ka imayekkan ne Teut. 20 Wan yejemet kisket tanajnawatiat nujme, wan ne Tajtzin kinpalewia wan kichiwa sejse pal muishmati pal tailwitia ka tejkia.]]
Ne Bibliaj Tik Nawat · © 2008, 2012 Jan Morrow