Chronological
Ken tamik Yuda
27 Ka tapuyawa muchi ne weypalejmet wan ne noymet ipal ne techan sentajtaketzket pal kitat ken yawit kichiwat pal kimiktiat Yeshu. 2 Kiwikaket ilpituk pal temakat iwan Pilatus ne tatuktiani.
3 Kwakuni Yuda ne temakak kitak ka yawit kimiktiat Yeshu wan muyulpatak. Kinkwepilij ne senpual-majtakti tumin ne weypalejmet wan ne noymet, 4 ina:
—Nikchijki tay inte yek, ika nitemakak ne iesyu se inte kichijtuk tatka.
Yejemet inaket:
—Inte tiknekit tikmatit. Taja tikitas tay tikchiwa.
5 Kitamin ne tumin ijtik ne teupan wan kiski, wan mukechpiluj. 6 Ne weypalejmet kikwijket ne tumin, wan inaket:
—Ini inte weli mutalilia ne cajaj pal ne teupan ika yaja ipatiw iesyu se inte kichijtuk tatka.
7 Sentajtaketzket pal kitat tay kichiwaskiat iwan ne tumin, wan kikujket ne tal ipal se kichiwa kujkumal pal mutalpachuat ne ejkunimet ka né. 8 Yajika uni tal munutza hasta ashan Esmil. 9 Kwakuni yekawik tay kijkwiluj ne taketzani Yeremiya, ina:
"Wan kikwijket ne senpual-majtakti tumin, ken ne takamet pal Israel kitalilijket ipatiw, 10 wan kimakaket ipatka ne imil ne kumalchiwani ken inak ne Nuteku ma nikchiwa."
Yeshu iishpan Pilatus
11 Ne Yeshu nakak iishpan ne tatuktiani, wan yaja kitajtanilij:
—Taja ne tatuktiani pal ne Yudayujmet?
Yeshu inak:
—Taja tina.
12 Wan kwak ne weypalejmet wan ne noymet inaket tay kichijtuk, yaja inte inak tatka. 13 Kwakuni ne Pilatus kilwia:
—Inte tikaki muchi tay inat ka tikchijtuk?
14 Wan nian tatka nankilij, hasta sujsul ishpuyawik ne tatuktiani.
15 Kwak nemi katka se ilwit, ne tatuktiani senpa kichulultia katka se pal ne ijilpituk ne kinekituyat ma mumakishti. 16 Nemituya se ilpituk ne muchi kishmatit katka, itukay Yeshu Bar-Aba. 17 Kiane tel, kwak musentepewtiwit, ne Pilatus kinhilwij:
—Ká ankinekit ma nikchululti: Yeshu Bar-Aba o Yeshu ne muilwia Mawaltijtuk?
18 Ika kimati katka ka temakaket ipanpa envidiaj. 19 Kwak yaja nemituya muetztuk ijpak ne tepatznaj, ne isiwaw tatuktij ma yawit kilwiat: "Maka shikchiwili tatka uni yek takat, ika niktemikik wan nitajselij tetekia sea ipanpa."
20 Wan ne weypalejmet wan ne noymet kinhilwijket muchi ne takamet wan siwatket ka né ma kitajtanikan ma kichululti Bar-Aba wan ma kimikti Yeshu. 21 Nankilij ne tatuktiani, kinhilwij:
—Katiawel pal ne ujume ankinekit ma nikchululti?
Yejemet inaket:
—Bar-Aba.
22 Ne Pilatus kinhilwia:
—Wan tay niaw nikchiwa iwan Yeshu ne muilwia Mawaltijtuk?
Muchi inat:
—Ma mucruzpilu!
23 Yaja inak:
—Tay kichijki?
Yejemet tzajtziket uksenpa:
—Ma mucruzpilu!
24 Ne Pilatus kitak ka inte welituya kipalewia, mas yek semaya ukchiupi kumunit. Yaja kikwij ne at wan mumapakak tik intachialis muchi, ina:
—Naja inte nikpia culpaj ipal ne iesyu ini takat! Anmejemetsan shikitakan tay ankichiwat!
25 Wan muchi ne techan nankilij, inaket:
—Ma nemi ne iesyu tujpak wan inhijpak tupilawan!
26 Kwakuni kichulultij ne Bar-Aba, wan kiwitekket ne Yeshu wan kiwikaket pal mucruzpilua.
Yeshu cruzpilujtuk
27 Kwakuni ne tasumanimet ipal ne tatuktiani kikalaktijket Yeshu tik ne Praytorioj wan kitepewket muchi ne tasumanimet inawak, 28 wan kipetztilijket wan kiyawalujket iwan se itaken chiltik, 29 wan kipikket se yawal pal wijwitzti wan kitalijket ijpak ne itzuntekun, wan kishtukaket se uat tik ne imey, wan ajkawetzkaket mutankwaketzat wan inat: "Oj! Tatuktiani pal ne Yudayujmet!" 30 wan tachijchaket ijpak wan kitzkijket ne uat wan kitasket ne itzuntekun. 31 Wan kwak tamiket kipajpakiliat, kishtilijket ne itaken chiltik wan mukwepket kitaliliat ne ikwajkwach wan kiwikaket pal kicruzpiluat.
32 Kwak kisat nemit ka né, kinamikket se takat pal Kurene itukay Shimon; kituktijket ma kiwika ne icruz ne Yeshu. 33 Wan kwak ajsiket ne kan itukay Golgota, kineki ina Ne Tzuntekumat, 34 kimakaket kushushaj malijtuk iwan achichik pal ati, wan kiejekuj achi wan te kinekik kiuni. 35 Kicruzpilujket wan kitakutuntijket ne ikwajkwach wan kitamutaket chivos pal kitat ká ipal, 36 wan mutalijket ka ikuni kitajpiat, 37 wan kijkwilujket ne taika wan kitalijket ijpak itzuntekun: "Ini Yeshu ne intatuktiani ne Yudayujmet". 38 Kwakuni kincruzpilujket ume techtekini itech, ne se ka iyekkan wan ne se ka seuk ladoj.
39 Ne panut inawak kukujtaketzat katka wan muishkekelutzat katka, 40 wan inat:
—Anka taja inte yajuni ká kitajkali ne teupan wan kiketza senpa ijtik yey tunal? Ashan shimupalewi tajasan tel, shaltemu tik mucruz!
41 Ijkiasan ne weypalejmet ajkawetzkat katka muilwiat wan ne tajkwiluanimet:
42 —Kinpalewij sejseuk, wan yaja isel te weli mupalewia! Yaja ne tatuktiani pal Israel: ma waltemu ashan tik ne cruz wan tikmatisket! 43 Yaja kiyulmati katka ne Teut! Ma kimakishti ashan ne Teut asu kielewia, ika ina katka ka yaja ne itelpuch ne Teut.
44 Nusan ne techtekinimet ne mucruzpilujtiwit inawak kijilwiat katka kenha.
45 Ka tajkutunal kunyuakiski nujme ne tal hasta yey horaj ka teutak. 46 Achka yey horaj, ne Yeshu tzajtzik wey, ina:
—Eli Eli, lema shebaktani?
Kineki ina: Teut, Teut, taika tinechajkaw? 47 Sejse pal ne nemituyat inawak kikakket wan inat:
—Yajini kinutza Eliya!
48 Wan se pal yejemet kiski mutalua nemanha kikwi se esponjaj wan kiajwilij iwan yayushukuk wan kisaluj tik se uat wan pejki kimaka pal ati. 49 Sekit inat katka:
—Tiawit tikitat asu witz Eliya kipalewia!
50 Ne Yeshu tzajtzik wey senpa, wan sewik.
51 Tik ne teupantzin tzayanik itajku ne kwachtzakka, wan ulinik ne tal wan mutapanket ne tejtesual, 52 wan mutenpelujket ne shajshaput wan muketzket ne inwejweyka pal miak kuchini pal ne Teut 53 wan kwak Yeshu muyulkwij, kisket tik ne shajshaput wan kalakket tik ne techan pal ne Teut wan kisket ishpan miak techanchanej.
54 Ne sentzuntuktiani wan ne ikunpawan ne tajpiat nemit ne Yeshu, kwak kitaket ka ulinik wan muchi tay panuk, majmawket tetekia wan inat katka:
—Ijkia Itelpuch ne Teut!
55 Uni nemituyat miak siwat tajtachiat wejka; yejemet ne senyajtiwit iwan Yeshu kwak walaj ka Galilaya wan kitekipanuat katka. 56 Né ijtik yejemet nemituya Maryam ne ipal Magdala wan Maryam ne innan Yakob wan Yosep wan nusan nemituya ne innan ne ipilawan Zabday.
Ne shaput
57 Kwak tayuakik, né ajsik se takat pal Ramatay kipia wey tumin, itukay Yosep. Yaja nusan se imumachtiani Yeshu. 58 Yajki itech Pilatus kitajtani ne mikini. Kwakuni ne Pilatus tatuktij ma kimakakan, 59 wan Yosep kikwij ne mikini wan kitakentij tik se ikwenyu pupujtik, 60 wan kitalij ijtik ne yankwik shaput yaja kiwawantuk tik ne tesual, wan kimimiluj se wey tet hasta iten ne shaput, wan yajki. 61 Unisan nemituyat imelawka ne shaput Maryam pal Magdala wan ne seuk Maryam.
62 Panuk ne tunal ipal tajshitilis, wan ne weypalejmet wan ne Parishayujmet mutepewket peyna iishpan Pilatus 63 inat:
—Tajtzin, tikelnamikketa ka uni tashijshikuani ina katka yultuk:
"Kwak panut yey tunal niaw nimuyulkwi."
64 Yajika, shitatukti ma mutentzakwa yek ne shaput hasta ma panukan yey tunal pal inte welit witzet ne imujmumachtiani kichtekit ne mikini ika asu inte ijkiuni, welit kinhilwiat muchi ka yaja muyulkwij wan tipan yawit kinshijshikuat mas que achtu!
65 Ne Pilatus kinhilwij:
—Shikwikakan ne guardiaj wan shumet shiktentzakwakan ken ankimatit.
66 Yajket kitentzakwat ne shaput, wan kitetilijket yek ne tet iwan ne guardiaj.
Ishpan Pilatus
15 Wan nemanha, ka tapuyawa, sentajtaketzket ne weypalejmet iwan ne noymet, ne tajkwiluanimet wan muchi ne kalpuli pal kitat tay yawit kichiwat, wan kiwikaket ilpituk pal temakat iwan Pilatus. 2 Wan ne Pilatus kitajtanilij:
—Taja ne tatuktiani ipal ne Yudayujmet?
Wan kilwia:
—Taja tina!
3 Wan ne weypalejmet inaket miak tay kichiwtuk. 4 Pilatus kitajtanilia senpa, ina:
—Tesu tina tatka? Shikita keski inat ka tikchiwtuk!
5 Ne Yeshu te inak tatka, hasta ishpuyawik ne Pilatus.
6 Ikman kwak nemi katka se ilwit, ne tatuktiani kichulultia katka se ilpituk ká kitajtanit, 7 wan ijtik muchi ne ijilpituk nemituya se itukay Bar-Aba; yaja wan sejse ikunpa tasuntuyat wan tamiktijtuyat tik ne techan. 8 Wan waltejkuket wan pejket tajtanit ken senpa, 9 wan Pilatus kinhilwij:
—Ankinekit ma nikchululti ne tatuktiani ipal ne Yudayujmet?
10 Ika yaja kimati ka ne weypalejmet temakatiwit ne Yeshu ipanpa envidiaj. 11 Ne weypalejmet ne kikumuntijket ne takamet wan siwatket pal kilwiat ma kichululti ne Bar-Aba. 12 Ne Pilatus kinhilwij ukseujti:
—Tay niaw nikchiwa tel iwan yajini ká ankinutzat ne tatuktiani ipal ne Yudayujmet?
13 Yejemet tzajtziket senpa:
—Shikcruzpilu!
14 Ne Pilatus kinhilwij:
—Tay kichiwki?
Tzajtziket uksenpa:
—Shikcruzpilu!
15 Pilatus kitak yek ma muchiwa ken kielewia ne miaktal. Yajika, kichulultij ne Bar-Aba. Tatuktij ma kiwitekikan ne Yeshu wan ma kiwikakan pal kicruzpiluat.
Yeshu cruzpilujtuk
16 Ne tasumanimet kikalaktijket ijtik ne weykal itukay Praytorioj, wan kalnutzat muchi ne tasumanimet, 17 wan kitalilijket kwajkwachti galantzin, wan kipikit se yawal pal wijwitzti wan kitzunyawalujket, 18 wan pejket kitajpaluat wan kipakiliat, inat: "Oj! Tatuktiani pal ne Yudayujmet!" 19 wan kitasat ne itzuntekun iwan se uat, wan tachijchat ijpak, wan temut mutankwaketzat iishpan. 20 Wan kwak tamiket kipajpakiliat, kishtilijket ne ikwajkwach galantzin wan mukwepket kitaliliat ne ikwajkwach wan kishtiat pal kicruzpiluat.
21 Wan kituktijket se takat itukay Shimon pal Kurene, ne inteku Aleksandro wan Rufus. Yaja witz ne kojtan wan panu ka né, wan kituktijket kiwika ne icruz ne Yeshu, 22 wan kiwikat hasta ajsit kan itukay Golgota (tik Nawat kineki ina "kan nemi ne tzuntekumat"). 23 Kimakaket kushushaj chichik, pero yaja te kiunik tatka, 24 wan kipiluat tik ne cruz wan kitakutuntijket ne ikwajkwach wan kitamutaket chivos pal kitat ká ipal muchi. 25 Ka chiknawi horaj kicruzpilujket, 26 wan ka ijpak itzuntekun nemituya tawawasujtuk ne taika, wan ina: "Ne intatuktiani ne Yudayujmet." 27 Nusan kincruzpilujket ume techtekini inawak, ne se ka iyekkan wan ne se ka ukse ladoj. (28) . 29 Ne panut itech kukujtaketzat katka wan muishkekelutzat, inat:
—Ja! Taja, ne weli tiktajkali ne teupan wan tiketza senpa ijtik yey tunal, 30 ashan shimupalewi! Shaltemu tik mucruz!
31 Ijkiasan ne weypalejmet wetzkat muilwiat iwan ne tajkwiluanimet:
—Kinpalewij sejseuk, wan yajasan te weli mupalewia! 32 Ne Mawaltijtuk, ne tatuktiani ipal Israel, ashan ma waltemu tik ne cruz pal kiane tiawit tikitat wan tikmatit!
Nusan ne mucruzpilujtiwit inawak kijilwiat katka.
33 Wan ajsik tajkutunal wan kunyuakiski nujme ne tal hasta yey horaj ka teutak, 34 wan ka yey horaj ne Yeshu tzajtzik:
—Elohi Elohi, lema shebaktani?
ne kineki ina tik Nawat: Nuteut Nuteut, taika tinechajkaw? 35 Wan sejse pal ne nemituyat inawak kikakket wan inat:
—Shikita, kinutza Eliya!
36 Kiski mutalua ajaka kitema se esponjaj iwan yayushukuk wan kisaluj tik se uat wan pejki kimaka pal ati, wan ina:
—Tiawit tikitat asu witz Eliya kitemultia!
37 Ne Yeshu tzajtzik wey, wan sewik. 38 Wan tzayanik itajku ne kwachtzakka tik ne teupantzin. 39 Ne sentzuntuktiani ne nemituya inawak, kwak kitak ka sewik, inak:
—Tejkia ka ini takat Itelpuch ne Teut!
40 Unisan nemituyat sijsiwatket tajtachiat nusan. Ijtik yejemet nemituya Maryam ne ipal Magdala, wan Maryam ne innan Yakob Chikitik wan Yose, wan Shalome — 41 yejemet katka ne senyajtiwit kwak yaja nemik tik Galilaya wan kitekipanuat katka — wan sejseuk ká tejkutiwit iwan hasta Yerushalem.
Ne shaput
42 Nemituyat ne tunal ipal tajshitilis achtu ka pewa ne sewilis, wan kwak tayuakik 43 walaj Yosep pal Ramatay, se yek takat ipal ne kalpuli ká nusan tejchia ma wiki ne itatekimakalis ne Teut. Yaja yajki kita Pilatus pal kitajtani ne mikini. 44 Pilatus ishpuyawik ka yaja miktuka wan kalnutzki ne sentzuntuktiani pal kitajtanilia su tejkia ka miktuya, 45 wan kimatki itech ne sentzuntuktiani ka kiane, wan temakak ne mikini iwan Yosep. 46 Wan kikujki se ikwenyu pal kikimilua wan kikutemultij ne Yeshu wan kitakentij wan kitalij ijtik se shaput ne muwawantuk tik ne tesual, wan kimimiluj se tet wan kalkwij ne iten ne shaput. 47 Ne Maryam pal Magdala wan Maryam ne inan Yose nakaket tachiat kan nemituya tekatuk.
Ne Bibliaj Tik Nawat · © 2008, 2012 Jan Morrow