Chronological
Maka shimuchiwakan ken ne Parishayujmet!
23 Kwakuni Yeshu kinnutzki ne miaktal wan ne mumachtianimet, 2 ina:
—Ne tajkwiluanimet wan ne Parishayujmet mutalijtiwit ijpak imutalijka Moshe, 3 yajika shikchiwakan wan shiktajpiakan muchi tay metzinhilwiat. Melka uni, ken kichiwat yejemet maka shikchiwakan anmejemet, ika yejemet inat wan te kichiwat. 4 Kipikit kijkimil sujsul ejetek ne inte aka weli kisajsaka wan kintaliliat takamet pal kikechtanuat, wan yejemet inte kinekit kikekelutzat nian iwan sechin pal inmajmapil. 5 Muchi tay kichiwat, kichiwat pal tikitat: ika ne tepilin ne kitaliat ijpak inweyka kipatawat, wan ne ikpat ka iten ne intaken kiweyakiliat. 6 Sujsul kinhajwiak mutaliat kan nemit ne wejweymet ijtik yujyualu wan tik ne ajachtu mutalijka tik ne kalsennemit, 7 wan ma kintajpalukan tik ne tiankis, wan ma muchi kinhilwikan "tajtzin". 8 Anmejemet tel maka shimunutzakan "tajtzin", ika sema sechin ne anmutamachtiani, wan muchi anmejemet antekniwan. 9 Wan maka shiknutzakan aka "Nuteku" tik ne tal, ika sechin ne Anmuteku ka ikajku. 10 Nusan maka shimunutzakan "ne techtekimaka", ika sechin ne metzintekimaka, wan yaja ne Mawaltijtuk. 11 Ne achtu anmupal muchiwas anmutekitini. 12 Ká ne isel muajkukia, yawi mutemultia, wan ká ne isel mutemultia, yawi muajkukia.
Ay anmejemet...!
13 [Wan inak:]
—Ay anmejemet, tajkwiluanimet wan Parishayujmet: antensasalmet, ika ankitentzakwat ne tatekimakalis ipal ne ilwikak pal muchi, ka nian ankalakit anmejemet, nian ankiajkawat kalakit ne kalakit. (14) .
15 Ay anmejemet, tajkwiluanimet wan Parishayujmet: antensasalmet, ika anpanut at wan tal pal ma walmupata se, wan kwak walmupata, ankikwepat miktankunet mas que anmejemet!
16 Ay anmejemet! Melka anpupuyumet ankinekit kilwitiat ne seki ne ujti! Anhinat:
"Ká ne kichiwa jurar ipanpa ne teupantzin, inte tatka kichijki; asu kichiwa jurar ipanpa ne teukwit ipal ne teupantzin, ma tashtawi."
17 Anmelemet, anpupuyumet! Ika katiawel nemi achtu, ne teukwit o ne teupantzin ne kiteuchiwa ne teukwit? 18 Wan nusan anhinat:
"Ká ne kichiwa jurar ipanpa ne tikashit inte tatka kichijki; asu kichiwa jurar ipanpa ne tay mutakulijtuk ijpak ne tikashit, ma tashtawi."
19 Pupuyumet! Ika katiawel nemi achtu, ne tetakulis ipal ne Teut o ne tikashit ne kiteuchiwa ne tetakulis? 20 Yajika asu aka kichiwa jurar ipanpa ne tikashit, kichiwa jurar ipanpa yaja wan muchi tay nemi ijpak, 21 wan asu kichiwa jurar ipanpa ne teupantzin, kichiwa jurar ipanpa yaja wan tay nemi kalijtik, 22 wan asu kichiwa jurar ipanpa ne ilwikak, kichiwa jurar ipanpa ne ikuijpal ne Teut wan ne nemi muetztuk ijpak.
23 Ay anmejemet, tajkwiluanimet wan Parishayujmet: antensasalmet, ika ankimakat ne teupan ne majtaktakutun ipal ne yerbabuenaj wan ne anisilloj wan ne cominoj, wan ankielkawat ne mas etek ipal ne tajtuli: tamelakchiwalis, tetasujtatakulis wan tayulmatilis. Yaja tay nemituya pal ankichiwat, wan ma inte muelkawakan ne sejseuk. 24 Anpupuyumet wan ankinekit kilwitiat ne seki ne ujti! Anmejemet melka ankishtiat ne sayulin iwan se kwachtzin, ankituluat se camelloj!
25 Ay anmejemet, tajkwiluanimet wan Parishayujmet: antensasalmet, ika ankipupuat tatenpan ne atiluni wan ne kashit, wan kalijtik mupusuniat iwan techtekilis wan taelewilis. 26 Parishayuj pupuyut, achtu shikpupu ne atiluni ka ijtik pal ma mupupu nusan tatenpan!
27 Ay anmejemet, tajkwiluanimet wan Parishayujmet: antensasalmet, ika kenhat ken shajshaput nejneshpaktuk ne muitat ijishyektzin tatenpan melka kalijtik nemit tejtentuk wan ujumit pal mijmiktuk wan muchi tay nemi susul. 28 Ijkiuni tel anmejemet nusan ka anmutenpan anmuitat yejyek, melka ka ijtik annemit tejtentuk wan teshijshikulis wan muchi tay inte yek.
29 Ay anmejemet, tajkwiluanimet wan Parishayujmet: antensasalmet, ika ankiketzat ne shajshaput pal ne taketzanimet wan ankiekchiwat ne shajshaput pal ne yejyek, 30 wan anhinat:
"Asu tinentuskiat tik ne tujtunal pal tunoywan, tejemet inte timusentepejtuskiat inwan kwak kishinijket ne inhesyu ne taketzanimet"
31 Anmejemetsan inat ka tejkia ka anmejemet ne inpilawan ne kinmiktijket ne taketzanimet! 32 Shiktamikan tel tay kitzintijket anmunoywan! 33 Kuatal! Ken anyawit chuluat kwak yawi muita ká ne yasnekit ka miktanshaput?
34 Neka nikintitania anmutech taketzanimet wan tamatinimet wan tajkwiluanimet, wan sejse yejemet ankinmiktisket wan ankincruzpilusket, wan sejse yejemet ankinwitekisket tik ne kajkalsennemit wan ankintalultisket tik se techan hasta ukse techan, 35 hasta ma wiki anmujpak muchi ne inhesyu ne yejyek tay mukushinijtuk pak ne tal, nusan ne iesyu ne yek Habel wan nusan ne iesyu Zakarya ikunew Berekya, ne kimiktijket itzalan ne teupantzin wan ne tikashit. 36 Kia nimetzinhilwia ka walas muchi uni pak ne takamet pal ashan.
Yerushalem, Yerushalem!
37 [Wan inak:]
Yerushalem, Yerushalem! Yaja kinmiktia ne taketzanimet wan kintejtemima ne mutitanijtiwit. Ken niknekiskia nikinsenputzua mupilawan ken se tijlan ipujpuyuj itan iejtapal, wan te tiknekik! 38 Shikita, isel mukawa ne anmukal! 39 Ika nimetzinhilwia: intea annechitasket hasta kwak anhinasket: "Teutasujtatuk ne witz tik itukay Tutajwan."
Ká kituktia Yeshu?
20 Wan tik se pal uni tujtunal kwak yaja nemituya kinmachtia ne chinamit itech ne teupan wan tamaka ne yeknawatilis, kisket ne weypalejmet wan ne tajkwiluanimet iwan ne noymet, 2 wan kilwiat:
—Shitechilwi katiawel ne tatuktilis pal tiweli tikchiwa muchi uni, wan ká ne metzmaka uni tatuktilis.
3 Yaja nankilij, kinhilwij:
—Naja nusan nikpia se pal nimetzintajtanilia, shinechilwikan: 4 ne teulyujmakalis ipal Yojan walkiski ka ilwikak ush itech takamet?
5 Yejemet kikejketzket tik inyujyulu, inat:
"Asu tinat ka ilwikak, yawi ina: Taika inte ankiyulmatket? 6 Asu tinat itech takamet, muchi ne chinamit yawit techtejtemimat ika kimatit ka Yojan se taketzani."
7 Wan nankilijket ka inte kimatit kanka witz. 8 Wan Yeshu kinhilwij:
—Naja nusan inte nimetzinhilwia katiawel ne tatuktilis pal nikchiwa uni.
Ne talchiwanimet tik ne shukumekamil
9 Pejki kinhilwia ne chinamit ini casoj:
—Se takat kitukak se shukumekamil wan kiajkaw ne mil tik inmejmey talchiwanimet wan yajki wejka wan né nakak miak metzti. 10 Kwak ajsik ne tunal, kituktij se tekitini ka né ma kimakakan sejse pal ne itakil ipal ne mil. Uni talchiwanimet kiwitekket wan kishtijket wan te kimakaket tatka. 11 Wan senpa kituktij ukse tekitini. Yaja nusan kiwitekket wan kitzuntekket wan kishtijket, wan te kimakaket tatka. 12 Wan senpa kituktij seuk, wan nusan kichalujket wan kishtijket. 13 Ne itekuyu pal ne shukumekamil inak:
"Nikmati tay niaw nikchiwa: niaw niktuktia ne nutelpuch yektasujtatuk; anka yaja kitakamatisket."
14 Kwak kitaket, ne talchiwanimet muilwijket:
"Muchi yawi ipal ini kwak miki ne tutekuyu. Tiawit tikmiktiat yajini wan muchi yawi tupal!"
15 Wan kishtijket tik ne shukumekamil wan kimiktijket. Tay yawi kichiwa inwan ne itekuyu ipal ne mil? 16 Yawi witz wan yawi kinwilewa uni talchiwanimet wan yawi kinmaka sejseuk ne mil.
Kikakket wan inaket:
—Tesu keman!
17 Yaja kinhitak wan inak:
—Tay kineki ina ini tel tay nemi tajkwilujtuk?
"Ne tet ne kitejtenejket ne kalketzanimet
mukwepki ne itzinteu kal!"
18 Ká wetzi pak uni tet yawi keluni, wan ká ijpak wetzi ne tet yawi kikwechua.
19 Wan ne tajkwiluanimet wan ne weypalejmet tatejtemujket pal kitzkiat tik uni horaj wan majmawit katka ipanpa ne chinamit, ika kimatket ka inpanpa yejemetsan inatuya ini casoj.
Shikmakakan ne tatuktiani tay ipal ne tatuktiani
20 Wan kintitanijket tachianimet pal kipachiwiat, ká muitat katka ken yejyek pal tashijshikuat, ma kitzkikan ne Yeshu ipanpa se ipalabraj pal temakat iwan ne tatuktiani. 21 Wan kitajtanilijket:
—Tamachtiani, tikmatit ka sema tay tejkia tina wan sema ne ujti yek ipal ne Teut titamachtia. 22 Nemi yek ma tiktashtawakan tumin ne taltikpaktuktiani ipal Roma ush inte?
23 Yaja kishketzki ne intajpewal wan kinhilwij:
24 —Shinechilwitilikan se tumin. Ká ipal ini tachialis?
Inaket:
—Ipal ne taltikpaktuktiani.
25 Yaja kinhilwij:
—Yek, shikmakakan ne taltikpaktuktiani tay ipal ne taltikpaktuktiani wan shikmakakan ne Teut tay ipal ne Teut.
26 Wan te weliket kitzkiat ipanpa ipajpalabraj ishpan muchi, wan ishpuyawket ipanpa tay nankilij wan te inaket tatka.
Ne miktiwit yawit walmukwepat?
27 Walajsiket sejse Tzadukayuj, ne ká inat katka ka ne miktiwit inte yawit muyulkwit, wan kitajtanilijket:
28 —Tamachtiani, Moshe techilwij ijtik iamaw: "Asu miki ne iechkaw se wan kipiatuya isiwaw wan te kipiatuya ipilawan, ne iikaw nemi pal kikwi ne isiwaw ne miktuk pal kiketza ne ishinach ne iechkaw." 29 Nemiket tel chikume takat ká muchi tekniwan wan ne achtu munamiktij wan mikik wan te kipiatuya ipilawan, 30 ne ume nusan, 31 wan ne yey munamiktij iwan, wan muchi yejemet kenhaya inte kiajkawket inpilawan wan mikiket muchi, hasta ne chikume. 32 Tipan nusan ne siwat mikik. 33 Kwak yawit muyulkwepat, katiawel ne ishulejyu uni siwat? Ika ne chijchikume munamiktijtiwit iwan!
34 Wan Yeshu kinhilwij:
—Ne takamet pal ini taltikpak munamiktiat wan tanamiktiat. 35 Ne yejyek ká nemisket ipal uni taltikpak wan yawit muyulkwepat kwak miktiwit, nian yawit munamiktiat nian yawit tanamiktiat, 36 ika intea welit mikit senpa, yejemet ken tanawatianimet, wan muchiwat ipilawan ne Teut muyulkweptiwit. 37 Moshe nusan, ishpan ne kwawit mimilaka, taneshtij ka ne miktiwit muyulkwepat kwak ina ka Tutajwan yaja ne Teut ipal Abraham wan ne Teut ipal Itzak wan ne Teut ipal Yakob: 38 ne Teut inte ipal ne miktiwit asunte ipal ne yujyultuk, ika muchi yejemet yujyultuk ipal.
39 Ankakeski pal ne tajkwiluanimet inaket:
—Tamachtiani, tinak yek.
40 Wan tea kitajtanilijket mas ika majmawit.
41 Kinhilwij:
—Ken ka inat ka ne Mawaltijtuk ne itelpuch Dawid? 42 Ne Dawid ina tik ne amat ipal ne Sajsalmoj:
"Ne Nuteku kilwij ne nutajtzin: shimutali ka nuyekkan 43 hasta ma niktali ká ne kinekit metzijtakuat ken se petat ka itan mujmukshi."
44 Asu Dawid kilwia "nutajtzin", ken weli ma ikunew?
45 Né muchi ne chinamit kikakit, wan yaja kinhilwij ne mumachtianimet:
46 —Shiktalikan cuidadoj wan ne tajkwiluanimet ne kinekit pashaluat tik wijwipil weyak wan ma muchi kintajpalukan tik ne tiankis, wan kinekit ne ajachtu mutalijka tik ne kalsennemit wan ma nemikan itzalan ne weymet tik yujyualu, 47 ne kalakit inchan lajlamajtzitzinmet wan muchi kikwat, wan taketzat wey pal kinutzat ne Teut. Yejemet sujsul yawit muchiwat juzgar!
Ne tetakulis ipal ne inte kipia tatka
21 Ajkutachishki wan kinhitak ká ne kipiat wey kitakuliat tumin tik ne cajaj ipal ne teupan kan musentepewa tumin. 2 Kitak nusan se lamajtzin te kipia tatka kitamutilia ume centavojchin, 3 wan inak:
—Kia nimetzinhilwia: uni lamajtzin ne inte kipia tatka kitakulij mas que muchi 4 ika muchi kishtijtiwit ijtik tay kipiat pal kitakuliat, wan tepewi ne intumin. Yaja inte, yaja tamakak muchi tay kipia pal mutekipanua.
Muchi ini yawi tami
5 Wan kwak sejse inat ken ne teupan nemituya ekchijtuk iwan yejyektzin tet wan tajtakulis, inak:
6 —Ini tay ankitat, san walasket tujtunal kwak inte mukawas nian se tet ijpak seuk ne inte mutajkali.
7 Wan kitajtanilijket:
—Tamachtiani, keman yawi panu uni, wan ken yawi muishmati ka yawia muchiwa muchi?
8 Wan yaja inak:
—Shiktalikan cuidadoj ma inte metzinshijshikukan, ika miak walasket tik nutukay inat "Naja ne!" wan "Nemia ne horaj!" Maka shumet inhipan! 9 Kwak antakakit ka musumat wan kumunit, maka shimuishmutikan ika muchi uni nemi pal panu achtu; inteuk tami muchi.
10 Kwakuni kinhilwij:
—Yawit musumat itzalan ne tejtechan wan itzalan ne talmet; 11 yawi ulini nujme wan yawit mayanat wan kukuyat; yawit muitat tik ne ilwikak sejse pal taishmutiat wan sejse pal muishmati.
12 Achtu ka panu muchi uni, metzinhitzkisket wan metzintalultisket pal metzintemakat tik ne sejsennemit wan pal metzintzakwat; metzinwikasket ishpan tatuktianimet wey wan chikitik ipanpa nutukay. 13 Kwakuni yawit welit anhinat ne tejkia tay ankimatit. 14 Shikmatikan tik anmuyujyulu ka inte anyawit mutajtaniliat tay anyawit inat anmupanpa, 15 ika naja niaw nimetzinmaka anmuten wan anmutamatilis, wan muchi ne metzintejtenewat inte welisket nankiliat tatka. 16 Yawit metzintemakat anmutejteku wan anmuechkawan wan anmukniwan wan anmukujkunpawan, wan yawit kinmiktiat ankakeski anmejemet, 17 wan yawit metzinhishijiat ipanpa nutukay. 18 Wan te puliwis nian se tzunkaltzin ipal ne anmutzuntekun. 19 Antejchiasket nejnejmach wan ankianasket anmuyujyulu.
20 Kwak ankitat ejejercitoj kiyawaluat Yerushalem, kwakuni shikmatikan ka yawi muwilewa. 21 Kwakuni, ká nemit tik Yudaya ma chulukan ka tepet, wan ká nemit tatajku ma kisakan, wan ká nemit tik ne kojtan ma inte kalakikan, 22 ika uni ne tujtunal ipal tetzunkwilis kwak yawi yekawi muchi tay nemi ijkwilujtuk. 23 Tik uni tujtunal, ay pobrejchichin ne wejweyijti wan ne tachichit, ika nemis wey tapachulis tik ne tal wan wey kwalan ipal ini techan, 24 wan wetzisket itan espadaj wan mukwisket ijilpituk wan muwikasket ka muchi ne tejtechan, wan ijpak Yerushalem ne tejtechan taksasket hasta yekawit ne tujtunal ipal ne tejtechan.
25 Wan nemisket miak pal muishmati ijtik ne tunal wan metzti wan sitalmet, wan ijpak ne tal ne tejtechan mupitzinisket wan ne ajat ka alamal tzalanisket wan inte kimatisket tay kichiwaskiat; 26 miak majmatamisket iwan mawi wan tejchialis ipal tay ejku witz itech ne taltikpak, ika ne itajtajpal ipal ne ilwikak mutzejtzelusket. 27 Wan kwakuni yawit kitat witz ne Itelpuch ne Takat ijpak mishti iwan itajpal wan tzitzinaka sea. 28 Kwak pewa muchiwa muchi ini, shikajkukikan anmutzujtzuntekun wan shiajkutachiakan ika ajsi witz ne anmutamakishtilis.
29 Wan kinhilwij se casoj:
—Shikitakan ini kwawit wan muchi ne kwajkwawit: 30 kwak pewat mulinit, ankimatit ka witzaya ne shupan. 31 Kenhaya, kwak ankitat ka muchiwa muchi tay ninatuk, shikmatikan ka witzaya ne itatekimakalis ne Teut. 32 Kia nimetzinhilwia: inte yasnekit itan tal ne takamet pal ashan hasta ma muchiwa muchi uni. 33 Ne ilwikak wan ne tal san panusket, wan ne nupajpalabraj inte!
34 Shiktalikan cuidadoj, ma inte mutakimiltikan anmuyujyulu iwan ishwilis wan mutawantilis wan mukakasulis pal anmutekipanuat wan kwak inte antejchiat ma ajsi anmutech uni tunal 35 ika ken se tajpewal yawi wetzi ijpak muchi nujme ne taltikpak.
36 Maka shikukuchikan; shiktajtanikan ne Teut senpa ma shiwelikan anchuluat melka yawi panu muchi uni wan ma shinakakan iishpan ne Itelpuch ne Takat.
37 Ka tunal yaja tamachtia katka tik ne teupan, wan ne tayua panu katka kan itukay Olivajtepet, 38 wan muchi ne chinamit muketzat katka peyna pal yawit kikakit tik ne teupan.
Ne Bibliaj Tik Nawat · © 2008, 2012 Jan Morrow