Chronological
Tay inak ipanpa ne munamiktijtiwit ne muajkawat
19 Wan kwak Yeshu tamik taketza, kiajkaw Galilaya wan yajki ne tajtal nepa Yudaya iten ne apan Yarden, 2 wan miak yajket iipan, wan kinpajtij ka ikuni. 3 Wan sejse Parishayuj ajsiket kiejekuat wan kitajtanilijket asu nemi yek ma kiajkawa se isiwaw. 4 Yaja nankilij, inak:
—Inte ankimatit ka ká ne kinketzki kwak pejki muchi, kinchijki takat wan siwat?
5 Wan inak:
—Neka ne takat kiajkawas iteku wan ne inan wan musalua itech isiwaw, wan ne ujume mukwepasket sesan innakayu, 6 ijkiuni yejemet intea ujume asunte se. Yajika, tay ne kisenputzuj ne Teut, ma inte kikupewa takat.
7 Kilwiat:
—Asu ijkiuni, Moshe taika tatuktij ma tamaka se amat ina ka muajkawtiwit, wan ma kiajkawa?
8 Kilwia:
—Ika anmejemet yujyultakwaknaj, wan yajika Moshe metzinhajkaw ankiajkawat anmusiwawan. Kwak pejki muchi, inte ijkiuni. 9 Nimetzinhilwia ka ká ne kiajkawa isiwaw wan te ika isiwaw tatzinhejenchij, mawiltia asu munamiktia iwan ukse siwat.
10 Ne mumachtianimet kilwiat:
—Asu ijkiuni nemi itzalan se takat wan isiwaw, mas yek ma inte munamikti!
11 Yaja kinhilwij:
—Inte muchi welit ini asunte semaya ankakeski, 12 ika sejse inte munamiktiat ika nesket tik iijti ne innan ijkiuni, wan sejse inte munamiktiat ika ne tajtakamet kichijket ijkiuni, wan sejseuk inte munamiktiat ika yejemet muchiwat ijkiuni insel ipanpa ne tatekimakalis ipal ne ilwikak. Ma weli ká weli.
Ne shujshulut
13 Kwakuni kalinwikaket kukunetzitzin pal ma kitali ijimey inhijpak wan ma kinujnutza ne Teut. Ne mumachtianimet kinhajwaket. 14 Ne Yeshu inak:
—Maka shikinhajwakan wan shikajkawakan walajsit ne kukunetzitzin, ika ne tatekimakalis ipal ne ilwikak nemi ipal sejse ken yejemet.
15 Wan kintalilij ijimey wan yajket.
Uij ma kalaki se kipia wey tik ne itatekimakalis ne Teut!
16 Wan né ajsik se inak:
—Tamachtiani, tay niweli nikchiwa tay yek pal ma niyultuk senpa?
17 Yaja kilwij:
—Taika tinechtajtani tay ne yek? Sema nemi se yek. Asu tikneki tiyultuk senpa, shiktajpia tay nemi tuktijtuk.
18 Kilwia:
—Katiawel?
Yeshu inak:
—Maka shitamikti; maka shimawilti; maka shitechteki; maka shina ka ukse kichijki tay inte kichijki; 19 shikintakamati muteku wan munan, wan shiktasujta muiknew ken timutasujta.
20 Ne pipil kilwia:
—Nikishpelwija muchi uni. Tay kinekiuk?
21 Ne Yeshu kilwij:
—Asu tikneki titami timuchiwa yek, shu-shiknamaka muchi ne mupalwan wan shikinmaka ne munekit, wan tikpias muchalchiw tik ne ilwikak, wan shiwi nikan nuipan.
22 Kwak ne pipil kikakik, yajki tristej ika sujsul wejwey ne ipalwan. 23 Yeshu kinhilwij ne mumachtianimet:
—Kia nimetzinhilwia ka ipal se kipia wey tumin uij ma kalaki ijtik ne tatekimakalis ipal ne ilwikak. 24 Nimetzinhilwia senpa: achtu yawi kalaki se camelloj ijtik ne kuyuntuk ipal se agujajchin, wan mas uij ma kalaki se kipia wey tumin ijtik ne itatekimakalis ne Teut!
25 Kwak ne mumachtianimet kikakket, ishpuyawit sea inat:
—Asu ijkiuni, ká weli mupalewia?
26 Ne Yeshu kinhitak wan ina:
—Ne takamet inte welit; ne Teut weli muchi.
27 Kwakuni Pedro nankilij, inak:
—Tejemet muchi tikajkawtiwit wan nikan tiwalajtiwit muwan. Tay tiawit tikpiat?
28 Yeshu kinhilwij:
—Kia nimetzinhilwia ka anmejemet ká walajtiwit nuipan, tik ne tunal pal muyulkwepat muchi kwak ne Itelpuch ne Takat yawi mutalia ijpak ikuijpal tzitzinaka, nusan anyawit mutaliat ijpak majtakti-ume kuijpal pal ankintuktiat ne majtakti-ume tribuj pal Israel. 29 Wan muchi ká ne kiajkawtuk ikajkal, iikawan, ieltiwan, iteku, inan, ikukunew o imijmil ka imaku nutukay asu kiajkaw sé yawi kikwi sentzunti wan yawi yultuk senpa. 30 Miak ká ajachtu katka yasnekit tijtipan, wan ne tijtipan ajachtu.
Tay inak ipanpa ne munamiktijtiwit wan muajkawat
10 Wan muketzki wan kiski, wan yawi nepa Yudaya wan iten ne apan Yarden, wan ken achtu, miak yawit katka iwan, wan yaja kinmachtia ken senpa. 2 Wan sejse Parishayuj ajsiket wan kitajtanilijket su nemi yek ma kiajkawa isiwaw se, pal kiejekuat. 3 Yaja kinhilwij:
—Tay metzintuktia Moshe?
4 Yejemet inaket:
—Moshe inak ka weli mutawawasua se amat ina ka muajkawtiwit wan weli kiajkawa.
5 Ne Yeshu kinhilwij:
—Metzinmakak uni tatuktilis ika anmejemet yujyultakwaknaj. 6 Kwak ne Teut pejki kichiwa muchi, kinchiwki takat wan siwat; 7 neka ne takat kiajkawas iteku wan ne inan 8 wan ne ujume mukwepasket sanse innakayu; ijkiuni intea ume asunte se. 9 Yajika, tay ne kisenputzuj ne Teut, ma inte kikupewa takat.
10 Wan kwak mukweptiwita ichan, ne mumachtianimet kitajtanilijket tay kinekituya ina, 11 wan kinhilwia:
—Ká ne kiajkawa isiwaw wan munamiktia iwan ukse siwat, kiawiltia, 12 wan asu ne siwat kiajkawa ishulejyu wan munamiktia iwan seuk, mawiltia.
Ne shujshulut
13 Wan kalinwikaket kukunetzitzin itech pal kinmatuka. Ne mumachtianimet kinhajwaket. 14 Kwak ne Yeshu kitak kwalanik wan kinhilwij:
—Shikajkawakan walajsit ne kukunetzitzin, maka shikinhajwakan; ika ne itatekimakalis ne Teut yawi pal sejse kiane. 15 Kia nimetzinhilwia: ká te kikwi ne itatekimakalis ne Teut ken se kunetzin inte kalakis.
16 Wan kinnapaluj, wan kitalij ijimey inhijpak wan kinteuchiwki.
Uij ma kalaki se kipia wey tik ne itatekimakalis ne Teut!
17 Wan kwak pejki nejnemi tik ne ujti, ajsik mutalua se itech mutankwaketza wan kitajtanilij:
—Yek tamachtiani, tay weli nikchiwa pal niyultuk senpa?
18 Yeshu kilwij:
—Taika tinechnutza yek? Inte kanaj yejyek asunte sema se wan yaja ne Teut. 19 Tikmatiaya tay nemi tuktijtuk: maka shitamikti; maka shimawilti; maka shitechteki; maka shina ka ukse kichiwki tay inte muchiwki; maka shitashijshiku; shikintakamati muteku wan munan.
20 Yajuni kilwij:
—Tamachtiani, nikishpelwija muchi uni senpa.
21 Ne Yeshu kitak wan kitasujtak, wan kilwij:
—Kinekiuk se: shu-shiknamaka muchi tay tikpia wan shikinmaka ne munekit, wan tikpias muchalchiw tik ne ilwikak, wan shiwi nikan nuipan.
22 Yajuni yajki tristej ipanpa tay inak, ika tetekia wejwey ne ipalwan. 23 Yeshu tajtachiak wan kinhilwia ne mumachtianimet:
—Ne kipiat wey, uij ma kalakikan ijtik ne itatekimakalis ne Teut!
24 Ishpuyawit ne mumachtianimet ipanpa tay inak. Ne Yeshu kinhilwia senpa:
—Kia nupilawan, sea uij ma kalakikan tik ne itatekimakalis ne Teut! 25 Uij ma kalaki se camelloj ijtik ne kuyuntuk ipal se agujajchin, mas uij ma kalaki se kipia wey ijtik ne itatekimakalis ne Teut!
26 Yejemet sujsul ishpuyawit, wan muilwiat:
—Wan ká weli mupalewia?
27 Ne Yeshu kinhitak wan ina:
—Ne takamet te welit, ne Teut kia ika ne Teut weli muchi.
28 Ne Pedro pejki taketza, kilwia:
—Tejemet nikan muchi tikajkawket wan tiwalajtiwit muwan.
29 Inak ne Yeshu:
—Naja kia nimetzinhilwia: muchi ká ne kiajkawtuk ikal wan iikawan wan ieltiwan wan inan wan iteku wan ipilawan wan itajtal nupanpa wan ipanpa ne yeknawatilis 30 yawia kipia, asu kiajkaw sé, sentzunti kal wan iikawan wan ieltiwan wan inajnan wan ipilawan wan tajtal, melka yawit kiejekuat; wan tik ne tay witz yawi yultuk senpa. 31 Miak ká ajachtu yawit tijtipan, wan tijtipan ajachtu.
Tay yawi muchiwa tik Yerushalem
32 Tejkuket yajket ka Yerushalem wan ne Yeshu yawi katka inhishpan, wan ishpuyawit wan ne yawit iwan majmawit. Wan yaja kinnutzki ne majtakti-ume senpa wan pejki kinhilwia tay yawi panu:
33 —Nikan titejkut ka Yerushalem, wan yawit temakat ne Itelpuch ne Takat iwan ne weypalejmet wan ne tajkwiluanimet, wan tatuktisket ma miki, wan kintemakasket iwan ne tejtechan, 34 wan yawit ajkawetzkat, yawit tachijchat ijpak, yawit kiwitekit wan yawit kimiktiat, wan kwak panutiwit yey tunal yawi muyulkwi.
Ne ipilawan Zabday
35 Wan ajsit Yakob wan Yojan ne ipilawan Zabday kilwiat:
—Tamachtiani, timetztajtanit ma shitechchiwili se.
36 Wan kinhilwij:
—Tay ankinekit ma nikchiwa?
37 Yejemet kilwijket:
—Ma mutali ne se tejemet ka mumayekkan wan ne seuk ka ukse ladoj muejmuetztuk kan tiaw titzitzinaka.
38 Ne Yeshu kinhilwij:
—Inte ankimatit tay antajtanit! Tay anhinat, ka welit anhatit tik ne atiluni kan niaw niati naja wan welit anmumakat ne ulyuj ne niaw nimumaka?
39 Yejemet kilwijket:
—Tiwelit.
Wan Yeshu kinhilwij:
—Melka anhatisket tik ne atiluni kan niati wan ne ulyuj ne naja nimumaka anmumakasket, 40 inte niweli nimetzinhilwia ma shimutalikan né, asunte semaya ká ipal muajshitilijtuk.
41 Wan kwak ne majtakti takakket, pejket mukwalantiat iwan Yakob wan Yojan, 42 wan ne Yeshu kalinnutzki wan kinhilwia:
—Ankimatit ka ne mumatit ka tatuktiat tik sejse techan muchiwat tajtzitzinmet wan ne weymet kipiat tatuktilis ijpak muchi. 43 Inte yawi ijkiuni ijtik anmejemet: ká anmutzalan kielewiskia muchiwa wey, yawi tekiti anmupal, 44 wan ká muchiwaskia ne achtu, muchiwas anmutekitini, 45 ika nusan ne Itelpuch ne Takat inte walaj pal tatekimaka asunte pal kintekipanua sejseuk wan pal temaka ne ialmaj pal kiane welit mumakishtiat muchi.
Kipajtij ume pupuyut tik Yerijo
46 Wan ajsiket Yerijo, wan kwak kisat yawit tik Yerijo yaja wan ne mumachtianimet wan se wey miaktal, se pupuyut itukay Bar-Timay (ne ikunew Timay) nemituya tajtani muetztuk itech ne ujti; 47 wan kwak takakik ka yaja Yeshu pal Nazaret, pejki tzajtzi, ina:
—Ikunew Dawid, Yeshu, shinechpalewi!
48 Wan melka miak kiajwat ma takaktu, yaja tzajtzi mas:
—Ikunew Dawid, shinechpalewi!
49 Wan Yeshu muketzki wan inak:
—Shalnutzakan yajuni!
Wan kinutzat ne pupuyut, kilwiat:
—Yek nemi, shimuketza, yaja metznutza.
50 Kikutaminki talchi ne ikwenyu wan ijisiwki muketza wan yajki itech Yeshu, 51 wan Yeshu taketzki iwan ne pupuyut, inak:
—Tay tikneki ma nikchiwa mupal?
Wan ne pupuyut kilwij:
—Nutamachtiani, ma nitachia!
52 Wan Yeshu kilwij:
—Shiawa. Ne mutayulmatilis metzpalewtuk.
Wan tachishki nemanha wan yajki iwan tik ne ujti.
Ne Bibliaj Tik Nawat · © 2008, 2012 Jan Morrow