Chronological
Pewa tanawatia tik ne tapetat
5 Wan kwak kitak ne wey miaktal, tejkuk pak ne tapetat wan mutalij, wan ne imujmumachtiani ajsiket itech, 2 wan mutenpeluj wan kinmachtij, ina:
3 —Suertej kipiat ne munekit tik inyulu, ika inpal ne tatekimakalis ipal ne ilwikak.
4 Suertej ne mutechtiat, ika yejemet walmunutzasket.
5 Suertej ne yujyulyamanik, ika ne tal yawi inpal.
6 Suertej ne mayanat wan amikit ma muchiwa ne tay yek, ika yejemet yawit ishwit.
7 Suertej ne kinpalewiat sejseuk, ika yejemet mupalewisket.
8 Suertej ne kipiat inyulu yek, ika yejemet yawit kitat ne Teut.
9 Suertej ne nejmachchiwanimet, ika yejemet yawit munutzat ikukunew ne Teut.
10 Suertej ne ká kintalultiat ipanpa ne tay yek, ika inpal ne tatekimakalis ipal ne ilwikak.
11 Suertej ankipiat kwak metzinhijilwisket wan metzintalultiat wan inasket sanka ka numaku: 12 shipajpakikan ika anmupatiw wey tik ne ilwikak, ika kenhaya kintalultijket ne taketzanimet pal ikman.
13 Anmejemet ne iistayu ne tal. Su ne istat intea ajwiak, ken tikistawisket? Intea yek pal tatka, semaya pal tiktamutat ma taksakan ijpak.
14 Anmejemet ne itawilyu ne taltikpak. Inte welit tikinayat se techan ijpak se tepet, 15 nian kitatiat tawil wan kitaliat itan se wajkal asunte ijpak ne tawilkal pal kintajtawilua muchi tik ne kal. 16 Ijkiuni ma tatawi ne anmutawil ishpan muchi pal kitat tay ankichiwat yek wan pal inat ka wey ne Anmuteku ka ikajku.
17 Maka shikejketzakan ka niwalaj pal niktajkali ne tajtuli nian ne taketzanimet; niwalaj pal ma yekawi: 18 ika naja kia nimetzinhilwia ka hasta tamit ne ilwikak wan ne tal, nian se I nian se U ipal ne tajtuli yawi panu hasta muchiwa muchi. 19 Yajika, ká inte kitajpia se chiupichin pal muchi tay nemi tuktijtuk wan ijkiuni kinmachtia sejseuk, yaja munutzas te-tatka tik ne tatekimakalis ipal ne ilwikak. Wan ká kichiwa wan tamachtia, yajaya munutzas wey tik ne tatekimakalis ipal ne ilwikak. 20 Ika nimetzinhilwia ka su inte ankichiwat mas yek que ne tajkwiluanimet wan ne Parishayujmet, inte ankalakisket ijtik ne tatekimakalis ipal ne ilwikak!
21 Antakaktiwita ka ikman inatiwit "Maka shitamikti"; ká ne tamiktia welit kichiwat juzgar. 22 Yek, naja nimetzinhilwia ka muchi ká kwalani iwan ne iiknew welit kichiwat juzgar. Ká ne kilwia ne iiknew: "Tzuntet!", welit kiwikat ishpan kalpuli; ká ne kilwia: "Mele!", welit kitamutat tik ne tit pal ne miktanshaput. 23 Yajika, asu talwika se pal tiktakulia pak ne tikashit, wan ikuni tikelnamiki ka kwalantuk ne muiknew mupanpa, 24 shikajkawa ishpan ne tikashit ne mutetakulis wan shu achtu shimukawa yek iwan ne muiknew, wan kwakuni shalmukwepa wan shalwika tay tiaw tiktakulia. 25 Shimunelwi timutalia yek iwan ká metztenewa kwak tinejnemiuk iwan ijtik ne ujti; shiktali cuidadoj ma yaja inte yawi metztemaka iwan ne juez, wan ne juez iwan ne tatuktiani wan yawi metzilpia tzaktuk. 26 Naja nimetzilwia: inte tiaw tikisa hasta ma shiktashtawa ne tipan centavoj!
27 Antakaktiwita ka inatiwit "Maka shimawilti." 28 Yek, naja nimetzinhilwia ka muchi ká kita se siwat munamiktijtuk wan kielewia, yaja kiawiltija tik iyulu. 29 Asu ne se muish metztekukujmati, shikwiwita wan shiktamima wejka, ika mas yek ma shikpulu se mutakutun wan tesu ma kitamutakan muchi muweyka ka miktanshaput. 30 Wan asu ne se mumey metztekukujmati, shikutuna wan shiktamuta wejka, ika mas yek ma shikpulu se mutakutun wan tesu ma puliwi tik miktanshaput muchi muweyka.
31 Nusan inatiwit, ká kiajkawa ne isiwaw, ma kimaka se amat kan ina ka muajkawtiwit. 32 Naja nimetzinhilwia ka su aka kiajkawa ne isiwaw, kwak te ika yaja mawiltia, kichiwa ka yaja mawiltia, wan ká munamiktia iwan ne muajkawtuk nusan mawiltia.
33 Senpa antakaktiwit ka ikman inatiwit: Maka shina tay inte yawi muchiwa, asunte shiktashtawi ne Muteku muchi tay tikchiwtuk jurar. 34 Yek, naja nimetzinhilwia semaya ini: maka shikchiwakan jurar tatka; inte ipanpa ne ilwikak, ika ne imutalijka ne Teut; 35 nian ipanpa ne tal, ika ne petat itan ijikshi ne Teut; nian ipanpa Yerushalem, ika ne itechan ne wey tatuktiani; 36 wan ipanpa ne mutzuntekun nusan maka shikchiwa jurar ika te tiweli tikchiwa ma istak o ma tiltik nian sechin pal mutzujtzunkaltzitzin. 37 Shina sema "yek, yek; te, te", ika muchi ukseuk tay tina yawi ipal ne inteyek.
38 Antakaktiwit ka inatiwit ma mutashtawa ipanpa se tuish iwan se iish ne seuk wan ipanpa se tutan iwan se itan. 39 Yek, naja nimetzinhilwia: maka shiksuma ne inteyek, asunte asu metzmaka tik se mukamak, shikishkwepili ne seuk nusan, 40 wan ne kineki metztenewa ipanpa tay tikchijtuk wan metzishtiliskia ne muwipil, shikajkawili nusan ne mutaken, 41 wan asu aka metzilwia ka nemi pal tinejnemi se kilometroj iwan, shinejnemi ume. 42 Shikmaka ká ne metztajtani, wan ne kineki ma shikajkawili maka shikilwi inte.
43 Antakaktiwit ka inatiwit: shiktasujta ne muiknew wan shikishijia ne metzishijia. 44 Yek, naja nimetzinhilwia: shiktasujtakan ne kinekit metzinhijtakuat, wan shiktajtanikan ne Teut ma kinpalewi ne metzintalultiat, 45 pal kiane anmuchiwat ipilawan Anmuteku ka ikajku, ika yaja kichiwa ka kisa ne tunal inhijpak ne inte yejyek wan ne yejyek, wan kichiwa ka wetzi ne at ijpak ne kichiwat tay yek wan ijpak ne inte kichiwat tay yek. 46 Ika su ankintasujtat ne metzintasujtat, tay ipatiw uni tay ankichijtiwit? Anka ne tumintepewanimet inte kichiwat kenha? 47 Wan asu semaya ankintajpaluat ne anmukniwan, tay uni? Anka muchi ne tejtechan inte kichiwat ijkiuni? 48 Anmejemet tel shimuchiwakan yejyek ken Anmuteku ka ikajku ká semaya yek.
Ken nemi pal tiknutzat ne Teut
6 (Wan Yeshu inak:)
—Shiktalikan cuidadoj ma inte shikchiwakan tay yek ishpan muchi pal ma metzinhitakan, ika asu ijkiuni inte ankikwisket anmupatiw itech Anmuteku ka ikajku.
2 Yajika, kwak titasujtatakulia maka shu-shitatzutzuna muishpan ken kichiwat ne tensasalmet tik ne kalsennemit wan tik ne ujti pal muchi kimatit; kia nimetzinhilwia ka yejemet kipiata ne inpatiw. 3 Taja kwak titasujtatakulia, ma inte kimati ne se mumey tay kichiwa nemi ne seuk, 4 pal ma shitasujtatakuli ichtaka, wan ne Muteku ne kita muchi yawi metztashtawia.
5 Wan kwak ankinutzat ne Teut, maka shipanukan ken ne tensasalmet ne kinhajwiak tanujnutzat tik ne kalsennemit wan tik ne ujujti pal muchi tachiat. Kia nimetzinhilwia, kipiata ne inpatiw. 6 Taja kwak tiknutza ne Teut, shimutentzakwa ijtik ne mucuartoj wan shiknutza ichtaka Muteku ka ikajku, wan Muteku ne kita muchi yawi metzmaka tay tiktajtani. 7 Kwak ankinutzat ne Teut maka shitenpupulukakan kenha ken muchi ne tejtechan ika inat ka asu taketzat wey ne Teut yawi kinkaki. 8 Maka shipanukan ken yejemet tel, ika Anmuteku kimatiaya tay anmunekit achtu ka ankitajtanit. 9 Yajika, ijkini shiktajtanikan ne Teut:
"Tuteku ka ikajku,
ma inakan ka wey mutukay,
10 ma wiki mutatekimakalis,
ma muchiwa mutaelewilis,
ken tik ilwikak, nusan tik ne tal;
11 shitechmaka tik ini tunal tutamal pal timutekipanuat;
12 wan shitechtapupulwi tujajjaranaj
ken tejemet nusan tikelkawat ká techwikiliat;
13 wan maka shikajkawa ma techejekukan,
wan shitechmakishti itech tay te yek."
14 Ika asu ankielkawat tay kichijtiwit ne seki tay inteyek, Anmuteku pal ikajku nusan kielkawas tay ankichijtiwit. 15 Asu inte ankielkawat tay kichijtiwit ne seki, ne Anmuteku nusan inte yawi kielkawa tay ankichijtiwit.
16 Kwak ankisejseliat mayan, ma inte muita ne anmutachialis pobrejchin ken ne tensasalmet, ne mutaliat ishshujshupilnaj pal kilwitiat ka majmayanat nemit. Kia nimetzinhilwia ka yejemet kipiata ne inpatiw. 17 Taja kwak tikselia mayan, shiktzikwasti mutzunkal wan shimuishpaka 18 pal te mumati ka timayana, sema ne Muteku ká inte tikitat yawi kimati wan Muteku ne kita muchi metztashtawis.
19 Maka shikanakan chajchalchiwit ijpak ne tal kan mayat wan kwilin kipuluat wan kan techtekinimet kaltapanat wan kichtekit; 20 shikanakan chajchalchiwit tik ne ajku kan nian mayat nian kwilin kipuluat, wan kan techtekinimet inte kaltapanat nian techtekit, 21 ika kan nemi anmuchalchiw, unisan nemi anmuyulu.
22 Ne itawilyu ne muweyka ne muish. Yajika asu ne muish tachia yek, muchi ne muweyka nusan mutawilua. 23 Asu ne muish inte tachia yek, muchi ne muweyka yawi kunyua. Asu ne tawil ijtik taja kunyua, ne kunyua keski tel!
Ne Teut kintakwaltia ne tujtutut wan kintakentia ne shujshuchit
24 (Wan inak:)
—Inte aka weli tekiti pal ume itekuyu, ika kishijias ne se wan kitasujtas ne seuk, wan asu inte, kitajpias ne se wan kijilwis ne seuk. Inte welit antekitit ipal ne Teut wan ipal ne tumin.
25 Yajika nimetzinhilwia: ma inte metzinyulkakasu tay anyawit kikwat wan kiunit nian taiwan anyawit mutzakwat: weli mas tualmaj que ne takwal, wan weli mas tuweyka que tukwajkwach.
26 Shikitakan ne tujtutut patanit ka ikajku: yejemet inte tatukat nian tapishkat nian tatepewat tik shajkal, wan ne Anmuteku ka ikajku kintakwaltia. Wan mas anmupatiw anmejemet que yejemet! 27 Wan melka yaja sujsul yulkakasiwiskia, katiawel pal anmejemet weli kipetewa ne iweyka nian se chiupichin?
28 Wan taika metzinyulkakasua anmukwajkwach? Shimumachtikan tech ne shujshuchit pal ne kojtan. Shikitakan ken mutiskaliat: nian kujkutiat, nian ichmalinit; 29 nimetzinhilwia ka nian ne wey Shalomo mutakentij galantzin ken se yejemet! 30 Asu ne Teut kitakentia ijkiuni hasta se sakat ipal ne taweykan ne ashan nemi wan musta yasneki tik tit, ken ka inte yawi metzintakentia sujsul mas? Anmejemet inte ankipiat tayulmatilis!
31 Yajika, maka shimuyulkakasukan, maka shinakan: "Tay tiawit tikwat?" wan "Tay tiawit tikunit?" wan "Tay tiawit tiktaliat ijpak tuweyka?" 32 ken muishtemuat muchi ne tejtechan, ika kimatiaya Anmuteku ka ikajku ka anmunekit muchi uni. 33 Shiktemukan achtu ne itatekimakalis ne Teut wan ne tay yek, wan muchi uni yawi metzintalilia. 34 Yajika, ma inte metzinyulkakasu ne musta, ka ne musta isel yulkakasiwis! Techajsi iwan ne pejpenaj ipal ne tunal pal ashan!
Sejseuk tay inak
7 (Wan Yeshu inak:)
—Maka shiktenewakan aka ipanpa tay kichijtuk, ma inte aka yawi metzintenewa! 2 Ika kenha ken ankichiwat juzgar, ijkiunisan yawit metzinchiwat juzgar, wan taiwan antatamachiwat yawit tatamachiwat anmupal. 3 Ken ka tikita ne sakatzin tik ne iish ne muiknew? Wan ne taketzal nemi tik ne muish inte tikita? 4 Wan ken tiaw tikilwia ne muiknew: "Shikajkawa ma nikishti ne sakatzin ijtik muish," wan shikita ne taketzal tikpia tik ne muish! 5 Tensasal! Shikishti achtu ne taketzal tik ne muish; wan kwakuni tiaw titachia yek pal weli tikishtia ne sakatzin nemi tik ne iish ne muiknew!
6 Maka shumet shikintakulikan ne pejpelumet tay ipal Teut, nian shikintamutilikan kujkusti ne kujkuyamet, su inte ankinekit ma kipachanakan iwan ne inhijikshi wan ma muishkwepakan pal metzintapanat.
7 Shitajtanikan wan metzinmakasket; shitatemukan wan ankiajsisket; shitatujtunwikan wan kitapusket ne tenkal. 8 Ika muchi ká tajtanit kikwit, wan muchi ká taishtemuat kiajsit, wan pal muchi ká tatujtunwiat yawi mutentapua. 9 Katiawel ne takat, su ne anmukunew kitajtani tamal, kimakaskiat se tet, 10 wan su ne anmukunew metzintajtanilia se michin, kimakaskiat se kuat? 11 Yajika, su anmejemet ká inte yejyek kinmakat ne anmupilawan tay yek, keski mas Anmuteku ka ikajku yawi kinmaka tay yek muchi ne kitajtaniliat.
12 Yajika, muchi tay ankielewiat ma metzinchiwilikan, shikinchiwakan ijkiuni anmejemetsan, ika yaja tay ina ne tajtuli wan ne taketzanimet.
13 Shikalakikan tik ne uchulnaj tentzakka; ika kuyawak ne tentzakka wan patawak ne ujti techwika hasta ne puliwis, wan miak ne kalakit! 14 Uchulnaj ne tentzakka wan uij ne ujti techwika kanka welit tiyujyultuk, wan sujsul chiujchiupi ne welit ajsit!
15 Shiktalikan cuidadoj inwan ne tashijshikuanimet walejkut anmutech tajtakentijtuk iwan ikwetashyu masat, melka kalijtik yejemet kuyumet ne muishtemuat pal metzinhitzkiat. 16 Ipanpa intajtakil ankinhishmatisket: itech ne witzkilit inte mululuat shujshukut nian itech ne witztumat tzajtzaput. 17 Ijkiuni, ne yek kwawit yejyek itakil tamaka; ne kwawit inte tatka ipatiw itajtakil inte tamaka yejyek. 18 Inte weli tamaka se yek kwawit itajtakil inte yejyek; nusan se kwawit inte yek inte weli tamaka yejyek itakil. 19 Ne kwawit ne inte tamaka itakil yek mutzinewa wan mutamuta tik tit. 20 Neka nina ka ipanpa intajtakil anyawit ankinhishmatit.
21 Te muchi ká nechilwiat "tajtzin, tajtzin!" yawit kalakit tik ne tatekimakalis ipal ne ilwikak asunte semaya ne kichiwat tay kielewia ne Nuteku ka ikajku. 22 Miak yawit nechilwiat tik uni tunal: "Tajtzin tajtzin shikita! Titamachtijket tik mutukay, wan tik mutukay tiktajkalket najnawal inteyek, wan tik mutukay tikchijket miak wejwey!" 23 wan niaw nikinhilwia: "Inte nimetzinhishmati! Shinechajkawakan, tekitinimet pal inteyek!"
24 Yajika tel, ká kikaki ini pajpalabraj wan kichiwa ken nina, ninaskia ka yaja ken se kimati yek ne kiketzki ne ikal ijpak ne tesual, 25 wan chachapakak ne shupan wan walaj ne tepeat wan kishpitzki ne ejekat wan kiwitek uni kal wan te walkuwetzki ika kipia itetzilnaj ijpak tesual. 26 Wan ká kikaki ini pajpalabraj wan te kichiwa tatka, ninaskia ka yaja muchiwas ken ne mele ne kiketzki ne ikal ijpak ne ashal, 27 wan chachapakak ne shupan wan walaj ne tepeat wan kishpitzki ne ejekat wan kitaski uni kal wan walkuwetzki wan wilewik muchi.
28 Wan kwak Yeshu tamik taketza, ne miaktal ishpuyawik ipanpa itamachtilis, 29 ika tamachtia katka ken tatuktiskia, tesu ken ne tajkwiluanimet.
Ne Bibliaj Tik Nawat · © 2008, 2012 Jan Morrow