Chronological
Jesusca huahuacunatami bendiciashca
15 Jesuspajmanca huahuacunatami, maquicunahuan paicunata tuparichun pushamurcacuna. Ashtahuanpish yachacujcunaca, sinchita rimashpami jarcarcacuna. 16 Chaimantami Jesusca, yachacujcunata cayashpa cashna nirca: «¿Ima nishpataj jarcacunguichij? Ñucapajman huahuacuna shamuchun saquipaichij. Taita Dios mandacunca chashnacunapajmi. 17 Maijanpish Taita Dios mandacunta mana shuj huahua shina chasquijca, chaimanca mana yaicui tucungachu, chashnatajmi canga» nircami.
Charij mosomi Jesushuan parlashca
18 Chai q'uipami shuj mandajca, Jesustaca:
–Alli Yachachij, huiñai causaita charingapajca, ¿imatataj rurana cani?– nishpa tapurca.
19 Chashna tapujpi Jesusca, cashnami nirca:
–¿Ima nishpataj Ñucataca alli ningui? Taita Diosllamari allica. 20 Mandashcataca yachanguillatajca: “Ama huainayangui, ama huañuchingui, ama shuhuangui, ama llullangui, yaya mamata c'uyangui” ninmi– nircami.
21 Chashna nijpimi, chai runaca:
–Ñucaca huahuapachamantamari, tucui caicunataca pajtachicuni– nirca.
22 Shina nijpimi, Jesusca cashna nirca:
–Chashnapish shuj illanrajmari. Tucui imalla charishcacunata c'atushpa, huajchacunaman cugri. Chashna rurashpaca, jahua pachapi achcata charijyanguimi. Ñucata catilla– nircami.
23 Shina nijpi chai runaca, achcata charij cashcamanta achcatami llaquirirca. 24 Chaita ricushpami, Jesusca cashna nirca:
–Achcata charijcuna Taita Dios mandacunman yaicunaca, yallitaj sinchimi. 25 Achcata charijcuna Taita Dios mandacunman yaicunaca, auja rinrinta shuj camello yaicusha nicushcatapish yalli sinchimari– nircami.
26 Chaita uyajcunaca:
–Shinashpaca, ¿pitaj quishpiri tucungari?– nircacunami.
27 Chashna nijpi, Jesusca:
–Pi mana rurai tucushcatapish, Taita Diosca ruranllami– nircami.
28 Shina nijpimi, Pedroca:
–Ñucanchijca canta catingaraicumi tucui imalla charishcacunata saquishcanchij– nirca.
29 Chashna nijpi Jesusca, cashnami nirca:
–Dios mandacunpi yaicusha nijca, huasita, yaya mamata, huauquicunata, huarmita, saquishcami. 30 Paica, cai pachapipish ashtahuan charingami, shamuj punllapipish huiñai causaita japingami, chaica chashnatajmi– nircami.
Jesusca cutinmi Paita huañuchinata huillashca
31 Chai q'uipami Jesusca, Paipaj chunga ishqui yachacujcunallata pushashpa cashna nirca: «Cunanca, Jerusalenmanmi huichiyanchij. Chaipimi Dios ima nishcata huillajcuna, Runa Aichayuj Ñucamanta imallata quillcashcaca pajtanga. 32 Ñucataca, mana israelcunapaj maquipimi churangacuna. Paicunami Ñucataca pugllashpa asingacuna, c'amingacuna, ch'ucangacuna. 33 Macashca huashami, huañuchingacuna. Huañuchijpipish, quimsa punllapica causarishallami» nircami.
34 Chashna nijpipish yachacujcunaca, Jesús imata nisha nishcata mana entendircacunachu. Mana yachai tucuipajlla cashcamantami, ima yuyaita mana japircacuna.
Jesusca mana ricuj runatami Jericopi alliyachishca
35 Jericoman Jesús chayagricujpica, ñan c'uchupimi mana ricuj runa mañashpa tiyacurca. 36 Chai runaca, achca gentecunata uyashpami: “¿Imataj tiyan?” nishpa tapurca. 37 Pai tapujpica: “Nazaretmanta Jesusmari caita pasacun” nishpami huillarcacuna. 38 Chaita uyaihuanmi:
–¡Davidpaj Churi Jesús, ñucata llaquihuaiari!– nishpa caparirca.
39 Shina nijpica, ñaupashpa ricujcunami:
–Upalla, ama caparichu– nircacuna.
Chashna nicujpipish:
–¡Davidpaj Churi Jesús, ñucata llaquihuai!– nishpami, ashtahuan sinchita caparirca.
40 Chaimantami Jesusca shayarishpa, Paipaj ñaupajman pushamuchun cacharca.
Ña chayamujpica:
41 –¿Imatataj rurachun ningui?– nishpami tapurca.
Shina nijpi, chai runaca:
–Apu, ñuca ñahuita alliyachihuai– nircami.
42 Shina nijpi Jesusca:
–Shinashpaca ricuilla. Alliyachinata crishcamanta, alliyailla– nircami.
43 Jesús chashna nijpi, paipaj ñahui ña ricujpimi chai runaca, Taita Diosta jatunyachishpa, Jesusta catishpa rirca. Chashna alliyachijta ricujcunapish, tucuicunami Taita Diostaca alabarcacuna.
Zaqueohuanmi Jesús parlanacushca
19 Jesusca ña Jericoman yaicushpami, chai pueblo chaupita ricurca. 2 Chai pueblopica impuestota japij, Zaqueo shuti, achcata charij runami causarca. 3 Paica uchilla cashcamantami, Jesusta rijsisha nishpapish achca gentecuna jarcajpi, mana ricui tucurca. 4 Chaimantami Jesús rina ñanta callpashpa ñaupashpaca, Paita ricungapaj sicómoro yuraman huichiyarca. 5 Jesusca, Zaqueo tiyacun yura c'uchuta ricushpaca, huichilla ricushpami:
–Zaqueo, utca uriyamui. Ñucaca, cambaj huasipimari cunanca poźasha nini– nirca.
6 Chashna ninca, callpashpa uriyamushpami, Zaqueoca cushicushpa Jesusta paipaj huasiman pusharca. 7 Chaita ricushpaca, tucuicunami:
–¿Cai runaca, juchayujpaj huasipichu poźanaman yaicun, imamí?– nishpa rimai callarircacuna.
8 Chai q'uipaca Zaqueoca, shayarishpami:
–Riqui, Apu Jesús, ñuca charishcacunamanta chaupitami huajchacunaman cusha. Maijancunapajta umashpa shuhuashcataca, chuscu cutihuanmi tigrachisha– nircami.
9 Chashna nijpimi, Jesusca cashna nirca:
–Cunan punllami, cai huasipi causajcunataca quishpichishca. Cai runapish, ñaupa yaya Abrahampaj huahua huahuamari. 10 Runa Aichayuj Ñucaca, chingarishcacunata mashcashpa quishpichingapajmari shamurcani– nircami.
Cullquita mingashcahuan ch'imbapurashpa yuyachishca parlomi
11 Jesusca, ñami Jerusalenman chayagricurca. Paita uyacuj gentecunapish, ‘Taita Dios mandanaca, ñami chayamucun’ yuyacurcacunami. Chaimantami, yuyachij cai parlota cashna parlarca: 12 «Achcata charij shuj alli runami, jatun mandaj cachun churajpi, mandanata chasquishpa tigramungapaj shujtaj llajtaman rirca. 13 Chai runaca manaraj rishpami, paipaj runacunapuramanta chunga runacunata cayashpaca: ‘Jaicachij, cai cullquihuanca ñuca tigramungacama, randishpa, c'atushpa cullquita mirachicuichij’ nishpa, chunga cullquita saquirca. 14 Chai runa ña rijpica, chai llajtapi causaj paita p'iñajcunami: ‘Cai runataca, ñucanchijta mandaj cachun mana churachun ninchijchu’ nichun, paipaj shuj huillajcunata catichishpa cacharcacuna. 15 Chashna huashalla jarcacujpipish, chai runaca mandaj tucushpatajmi tigramurca. Ña tigramushpaca, pai saquishca cullquita, mashnata mirachishcata yachangapajmi, tucui chunga runacunata cayaj cacharca. 16 Punta shamuj runaca: “Amito, ñucaman saquishca minataca chungahuanmi mirachircani” nircami. 17 Chashna nijpi chai jatun mandajca: “Canca alli runami cangui, allitami rurashcangui. Ashallata chasquishpapish alli mirachishcamantaca, chunga pueblocunatami mandangui” nircami. 18 Cutin caishuj shamushpaca: “Amito, can ñucaman cushpa saquishca minataca pichcahuanmi mirachircani” nirca. 19 Chai runatapish chai mandajca: “Canca pichca pueblocunatami mandangui” nircami. 20 Cutin shujtaj chayamushpaca, cashnami nirca: “Amito, jaica cambaj minataca shuj linsopimi alli huaquichircani. 21 Canca manapish cushcata mañaj, manapish tarpushpa tandaj, p'iña amo cajpimari, canta manchashpa chashna rurarcani” nircami. 22 Chashna nijpica, chai mandajca cashnami nirca: “Q'uilla servij, cambaj quiquin shimi rimashcallahuantajmi, cantaca juchachini. Ñucataca, manapish cushcata mañaj, manapish tarpushcata tandaj, p'iña amo cashcataca yachashcanguitajmari. 23 Chaita yachashpacarin, ¿ima nishpataj ñuca cushca cullquitaca, mana bancopi churarcanguiari? Chaipi churashca cajpica, ñuca tigramushpaca, huahua cullquindijmi japiman carcani” nircami. 24 Chashna nishpaca, shujtaj chaipi cajcunata: “Cai runapaj minata quichushpa, chai chunga minata charijman cuichij” nircami. 25 Shina nijpica chai runacunaca: “Amito, paica ñamari chunga minata charin” nircacunami. 26 Chashna nijpimi, chai mandajca cashna nirca: “Charijmanmi ashtahuan cuna. Mana charijtaca, ashallata charishcatapish quichunami. 27 Ñuca mana mandaj cachun nishpa p'iñajcunataca caiman pushamushpa, ñuca ñaupajpi cungata p'itichij” nircami» nishpami parlarca.
Jesusca Jatun Mandaj shinatajmi Jerusalenman yaicushca
28 Chaita parlashca q'uipaca Jesusca, Jerusalenman huichiyashpa catircallami. 29 Betfagé shuti, Betania shuti pueblocuna c'uchullapi caj Olivos urcuman chayashpami, Jesusca Paipaj yachacujcunamanta ishquita cacharca. 30 Paicunataca: «Ch'imba ashalla huasicuna tiyanman richij. Chaiman chayashpaca, pi manaraj tiyarishca shuj burrotami ricunguichij. Chai burrotaca cacharishpa pushamunguichijlla. 31 Pushamucujpi maijan, “¿Imapajtaj pushacunguichij?” nijpica: “Apunchij Jesusmari cai burrotaca pushanaman cacharca” ninguichijlla» nishpami cacharca.
32 Jesús cachashca yachacujcuna rishpaca, Jesús nishca shinallatajmi burro shayacujta japircacuna. 33 Chai burrota ña cacharicujpica:
–¿Imapajtaj burrota cacharicunguichij?– nishpami, burroyujcunaca tapurca.
34 Chashna nijpica:
–Apunchij Jesús ‘Pushamui’ nijpimari pushacunchij– nircacunami.
35 Jesuspajman chayachishpaca, paicunapaj jahua churanacunata burropaj jahuapi churashpami, Jesusta tiyachircacuna. 36 Burropi tiyarishca ricujpica, Jesushuan ricujcunaca ñanpimi paicunapaj jahua churanacunata mantarcacuna. 37 Olivos urcuta Jesús uriyagrijpica, catishpa ricuj gentecunaca Jesús achca milagrocunata rurajta ricushcamantami, cushicushpa Diosta alabashpa, cashna caparircacuna:
38 –¡Mandaj Diospaj shutipi shamucuj Jatun Mandajca, alli nishca cachun! ¡Jahua pachapipish alli sumaj cachun! ¡Taita Diostapish, sumajyachishca cachun!– nirircacunami.
39 Chashna caparinacujpimi, chai catimucujcunapuramanta maijan fariseocunaca Jesustaca:
–Yachachij, Cambaj yachacujcunataca rimashpa jarcaiari– nircacuna.
40 Chashna nijpi, Jesusca:
–Caicuna upallajpica, rumicunami caparinman– nirca.
Diospaj huasipi c'atujcunatami Jesusca llujshichishca
41 Jerusalenman ña chayagrishpami, chai pueblota ricushpaca, llaquishpa huacarca. 42 Cashna nishpami huacarca:
–¡Cunan punlla cancunaman sumaj causaita cungapaj shamushcata yachashpaca, allichari canguichijman! Ashtahuanpish cancunapaj ñahuimantaca pacashcamari. 43 Cancunata p'iñajcuna patacunata shayachishpa, muyundijta jarcashpa, jatunta llaquichina punllacuna chayamucunmi. Cancunataca, chaupipi churashpami llaquichingacuna. 44 Cantaca tucui urmachishpami, canpi causajcunataca tucuicunata huañuchingacuna. Shuj rumillatapish pircashcata mana saquingacunachu. Dios cancunata cunan ricuj shamujpi mana crishcamantami, chashna llaqui tucunguichij– nishpami huacarca.
45 Jerusalenman ña chayashpaca, Diospaj huasiman yaicushpami, tucui chaipi c'atujcunata randijcunata llujshichishpa cacharca.
46 «Dios Quillcachishcapica: “Ñuca huasica, Ñucata mañana huasimi” ninmi. Ashtahuanpish cancunaca, shuhuacuna miticuna jutcutamari rurashcanguichij» nircami.
47 Jesusca, punllantami Diospaj huasipi yachachirca. Chashna yachachicujpipish, curacunata pushaj curacunapish, Mandashcata yachachijcunapish, llajtata mandajcunapish Jesustaca huañuchinatami yuyacurcacuna. 48 Chashna yuyacushpapish, tucuicuna Paita alli sumajta uyacujpimi, imata mana rurai tucurcacuna.
Mushuj Testamento Diospaj Shimi (Quichua‐Chimborazo New Testament) Copyright © 2010 by Biblica, Inc.™ Used by permission. All rights reserved worldwide.