Chronological

Li Hu li Quixtzˈi̱ba li San Pablo reheb laj Efeso

Laj Pablo quixtakla xsahil xchˈo̱leb

1  La̱in laj Pablo. La̱in x‑apóstol li Jesucristo xban nak joˈcan quiraj li Dios. Yo̱quin chixtzˈi̱banquil li hu aˈin e̱riqˈuin la̱ex laj pa̱banel li cuanquex Efeso. Yo̱quin chi tzˈi̱bac e̱riqˈuin che̱junilex la̱ex li nequeqˈue e̱chˈo̱l chixpa̱banquil li Jesucristo. ² Chicua̱nk taxak e̱riqˈuin li ruxta̱n ut li tuktu̱quil usilal li naxqˈue li Dios li kaYucuaˈ ut li naxqˈue li Ka̱cuaˈ Jesucristo.

Li Cristo na‑osobtesin ke

³ Lokˈoninbil taxak li Dios lix Yucuaˈ li Ka̱cuaˈ Jesucristo. Xban nak junajo chic riqˈuin li Cristo, li Dios naxqˈue chak ke chixjunil li kosobtesinquil li nachal chak saˈ choxa. ⁴ Nak toj ma̱jiˈ naxyi̱b chak li ruchichˈochˈ li Dios, ac sicˈbil chak ku xban saˈ xcˈabaˈ li Jesucristo, re nak ti̱cak li kayuˈam ut ma̱cˈaˈak chic kama̱c. ⁵ Xban nak nocoxra, joˈcan nak quixsicˈ chak ku re nak la̱ako chic li ralal xcˈajol saˈ xcˈabaˈ li Jesucristo. Quixba̱nu chi joˈcan xban nak joˈcan quiraj. ⁶ Joˈcan nak chikalokˈonihak ru li Dios xban nak yal chi ma̱tan quiruxta̱na ku nak quixtakla chak li Ralal li kˈaxal raro xban. ⁷ Kˈaxal numtajenak li rusilal li Dios li quixqˈue ke xban nak riqˈuin xcamic li Jesucristo, cuan kacolbal ut cuybil sachbil chic li kama̱c. ⁸ Li rusilal quixqˈue ke chi numtajenak xqˈuial ut quixqˈue kanaˈleb re nak takatau ru li xya̱lal. ⁹ Ut quixcˈutbesi chiku li naˈleb li mukmu nak quicuan chak junxil, aˈ li qui‑ala saˈ xchˈo̱l xba̱nunquil nak quixtakla chak li Jesucristo. ¹⁰ Ta̱cuulak xkˈehil nak ta̱tzˈaklok ru chixjunil joˈ naraj li Dios. Tixjunaji chixjunil li cˈaˈru cuan joˈ saˈ choxa joˈ saˈ ruchichˈochˈ. Ut aˈ chic li Cristo ta̱jolomi̱nk re chixjunil. ¹¹ La̱o aj judío sicˈbil ku xban li Dios chokˈ ralal xcˈajol saˈ xcˈabaˈ li Cristo. Aˈin qui‑uxman xban nak joˈcan quiraj li Dios ut xban nak aˈan yal re saˈ xbe̱n chixjunil. ¹² Quixba̱nu chi joˈcan re nak lokˈoninbilak ru kaban la̱o li co‑oybenin re li Cristo nak toj ma̱jiˈ nacˈulun saˈ ruchichˈochˈ. ¹³ Ut joˈcan ajcuiˈ la̱ex li ma̱cuaˈex aj judío. Nak xerabi li xya̱lal li colba‑ib, la̱ex xepa̱b li Cristo ut xecˈul li Santil Musikˈej, li quiyechiˈi̱c e̱re chokˈ retalil nak la̱ex chic li ralal xcˈajol. ¹⁴ Li Santil Musikˈej quiqˈueheˈ ke chokˈ retalil nak takacˈul chixjunil li yechiˈinbil ke xban li Dios ut ta̱tzˈaklok ru li kacolbal. Joˈcan nak lokˈoninbilak ru riqˈuin lix nimal xcuanquilal.

Laj Pablo natijoc chirixeb laj pa̱banel

¹⁵ La̱in xcuabi resil nak chi anchal e̱chˈo̱l nequepa̱b li Ka̱cuaˈ Jesucristo ut xcuabi resil nak nequera le̱ rech aj pa̱banelil. ¹⁶ Joˈcan nak junelic ninbantioxin chiru li Dios ut yo̱quin chi tijoc che̱rix. ¹⁷ Nintijoc chiru li nimajcual Dios, lix yucuaˈ li Ka̱cuaˈ Jesucristo, ut nintzˈa̱ma chiru nak tixqˈue e̱naˈleb re nak te̱tau ru chi tzˈakal lix naˈleb li Dios ut re nak te̱tau ru li xya̱lal chi us. ¹⁸ Nintzˈa̱ma chiru li Dios nak tixqˈue e̱naˈleb re nak te̱tau ru cˈaˈru le̱ lokˈlaj ma̱tan li yo̱quex chiroybeninquil xban nak sicˈbil e̱ru xban li Dios. Te̱cˈul le̱ ma̱tan e̱rochbeneb chixjunileb laj pa̱banel. ¹⁹ Ut nintzˈa̱ma ajcuiˈ chiru li Dios nak tixqˈue e̱naˈleb re nak te̱nau nak kˈaxal nim lix cuanquil saˈ kabe̱n la̱o li nocopa̱ban re. ²⁰ Ut aˈan ajcuiˈ lix nimal xcuanquil li quicuaclesin re li Cristo chi yoˈyo saˈ xya̱nkeb li camenak ut quixcˈojob saˈ xnim ukˈ li Dios aran saˈ li santil choxa ut quixqˈue xcuanquil. ²¹ Kˈaxal nim xcuanquil li Cristo saˈ xbe̱neb chixjunileb li ángel ut li ma̱us aj musikˈej ut saˈ xbe̱neb li cuanqueb xcuanquil chi takla̱nc saˈ choxa joˈ saˈ ruchichˈochˈ. Kˈaxal nim saˈ xbe̱n chixjunil li cˈaˈak re ru li cuanqueb xcuanquil anakcuan ut chi junelic kˈe cutan. ²² Li Dios quixqˈue chixjunil rubel xcuanquil li Cristo ut quixqˈue li Cristo chi jolomi̱nc reheb laj pa̱banel ut aˈan chic yal re saˈ xbe̱neb. ²³ Li Cristo aˈan li najolomin ke la̱o aj pa̱banel. Ut la̱o chanchano li rok rukˈ nak cuanco. Junak li tzˈejcualej moco tzˈakal ta re ru cui ma̱cˈaˈ lix jolom. Joˈcan ajcuiˈ junak li jolomej, cui ma̱cˈaˈ li rok rukˈ incˈaˈ tzˈakal re ru. Joˈcan nak tento nak li Cristo ta̱jolomi̱nk ke la̱o aj pa̱banel ut la̱o cua̱nko joˈ li rok rukˈ li Cristo.

Colbilo xban xnimal ruxta̱n li Dios

2  Junxil la̱ex li ma̱cuaˈex aj judío chanchan camenakex xban li ma̱usilal ut li ma̱c li xeba̱nu chak. ² Xeba̱nu chak li ma̱usilal saˈ ruchichˈochˈ ut xeqˈue e̱rib chi takla̱c xban laj tza li nataklan saˈ xbe̱neb li ma̱us aj musikˈej. Aˈan li nataklan saˈ xbe̱neb li nequeˈkˈetoc ra̱tin li Dios. ³ Joˈcan ajcuiˈ la̱o aj judío. Junxil xkaba̱nu chak li ma̱usilal li naxrahi ru li kachˈo̱l xba̱nunquil. Xkaba̱nu li incˈaˈ us li xkaj xba̱nunquil kajunes. Joˈcan nak tento raj takacˈul xtojbal li kama̱c joˈ eb chixjunileb li incˈaˈ nequeˈraj pa̱ba̱nc. ⁴ Abanan kˈaxal nim li ruxta̱n li Dios saˈ kabe̱n xban nak kˈaxal nocoxra. ⁵ Nak toj camenako chak saˈ li kama̱c, riqˈuin lix cuaclijic cuiˈchic chi yoˈyo li Cristo, li Dios quixqˈue ke jun acˈ yuˈam. Yal xban rusilal li Dios nak colbilo. ⁶ Li Dios corisi chak saˈ li najter yuˈam nak quixcuaclesi chi yoˈyo li Jesucristo ut coxqˈue chi tzˈako̱nc saˈ lix nimal xlokˈal saˈ li santil choxa xban nak reho chic li Cristo. ⁷ Chixjunil li usilal aˈin quilajxba̱nu ke saˈ xcˈabaˈ li Jesucristo re nak ta̱cˈutu̱nk chi junelic kˈe cutan nak kˈaxal nim li ruxta̱n. ⁸ Ya̱l nak xepa̱b li Jesucristo ut colbilex chic. Abanan yal xban rusilal li Dios nak colbilex. Ma̱cuaˈ xban e̱yehom e̱ba̱nuhom. Yal e̱ma̱tan ban xban li Dios. ⁹ Ma̱ ani chixnimobresi rib xban nak ma̱cuaˈ xban e̱yehom e̱ba̱nuhom nak colbilex. ¹⁰ Li Dios coxyoˈobtesi ut quixqˈue ke li acˈ yuˈam saˈ xcˈabaˈ li Jesucristo re nak cha̱bilak li kayuˈam xban nak ac joˈcan cˈu̱banbil chak xban li Dios junxil re nak cha̱bilak li kayehom kaba̱nuhom.

Junaj chic ku la̱o saˈ xcˈabaˈ li Cristo

¹¹ Chijulticokˈ e̱re chanru nak quexcuan chak junxil. La̱ex li ma̱cuaˈex aj judío tzˈekta̱nanbilex xbaneb laj judío li queˈxcˈul li circuncisión, ut eb aˈan queˈxye nak incˈaˈ tzˈakal e̱re e̱ru xban nak incˈaˈ quecˈul li circuncisión. ¹² Junxil moco cuan ta li Cristo e̱riqˈuin ut ma̱cuaˈex xcomoneb laj Israel. Incˈaˈ querabi resil li contrato li quiyehoc resil lix cˈulunic laj Colonel. Cuanquex arin saˈ ruchichˈochˈ chi ma̱cˈaˈ cˈaˈru yo̱quex chiroybeninquil ut chi ma̱cˈaˈ li Dios e̱riqˈuin. ¹³ Junxil li Dios ma̱cˈaˈ e̱riqˈuin. Abanan anakcuan rehex chic xban nak li Cristo quicam chiru li cruz saˈ e̱cˈabaˈ. ¹⁴ Li Cristo, aˈan li naqˈuehoc ke li tuktu̱quil usilal. Xban li Cristo junaj chic ku la̱o aj judío e̱riqˈuin la̱ex li ma̱cuaˈex aj judío. Xban nak quixmayeja rib saˈ kacˈabaˈ, li Cristo quirisi li kajoskˈil li naramoc re chiku li cua̱nc saˈ xya̱lal chi kibil kib. ¹⁵ Xban nak quixkˈaxtesi rib chi ca̱mc, li Cristo quirisi xcuanquil li najter chakˈrab. Quixba̱nu aˈan re nak tixjunajiheb ru laj judío riqˈuin li ma̱cuaˈeb aj judío ut junajakeb chic riqˈuin li Cristo ut cua̱nkeb chic saˈ xya̱lal chi ribileb rib. ¹⁶ Riqˈuin lix camic chiru li cruz li Cristo quirisi lix joskˈinquil kib chi kibil kib ut coxcˈam cuiˈchic saˈ usilal riqˈuin li Dios ut junaj chic ku. ¹⁷ Nak quicˈulun li Cristo saˈ ruchichˈochˈ quixchˈolob xya̱lal li colba‑ib li naqˈuehoc tuktu̱quil usilal. Quixchˈolob xya̱lal chiku la̱o aj judío li ac nakanau xya̱lal. Ut quixchˈolob ajcuiˈ xya̱lal che̱ru la̱ex li ma̱cuaˈex aj judío li toj ma̱jiˈ nequenau xya̱lal. ¹⁸ Anakcuan chikajunilo, usta la̱o aj judío usta ma̱cuaˈo aj judío, naru nococuan chi sum a̱tin riqˈuin li Yucuaˈbej Dios saˈ xcˈabaˈ li Cristo. Ut li junaj chi Santil Musikˈej natenkˈan ke. ¹⁹ Ut moco jalanex ta chic anakcuan riqˈuineb laj judío. La̱ex ban chic xcomoneb. Junaj chic e̱ru riqˈuineb. La̱ex chic ralal xcˈajol li Dios. ²⁰ La̱o aj pa̱banel chanchano li rochoch li Dios. Chanchano li pec li na‑oc saˈ xbe̱n li cimiento. Ut li cimiento, aˈaneb li apóstol ut li profeta. Abanan li tzˈakal xakxo cuiˈ li cab, aˈan li Jesucristo. ²¹ La̱o aj pa̱banel chanchano li rochoch li Dios. Junajo chic saˈ xcˈabaˈ li Jesucristo li tzˈakal xakxo saˈ kabe̱n re nak tzˈakalak ke ku ut kˈaxtesinbilo chiru li Dios. ²² Joˈcan ajcuiˈ la̱ex. Xban nak rehex chic li Cristo, junajex chic riqˈuineb laj pa̱banel. Ut la̱ex ajcuiˈ li rochoch li Dios xban nak li Santil Musikˈej cuan e̱riqˈuin.

Laj Pablo bokbil xban li Dios chi cˈanjelac saˈ xya̱nkeb li ma̱cuaˈeb aj judío

3  La̱in laj Pablo. Cuanquin chi pre̱xil xban nak nincˈanjelac chiru li Cristo, ut xban nak ninye resil li colba‑ib e̱re la̱ex li ma̱cuaˈex aj judío. ² Ac xerabi ta na resil nak tenebanbil saˈ inbe̱n xban li Dios xyebal e̱re nak li ruxta̱n li Dios e̱re ajcuiˈ la̱ex li ma̱cuaˈex aj judío. ³ Li Dios, aˈan quicˈutuc re chicuu li naˈleb aˈan, li mukmu nak quicuan chak junxil. Ac xintzˈi̱ba caˈchˈin resil e̱re chirix li naˈleb aˈin. ⁴ Nak te̱ril xsaˈ li hu li xintzˈi̱ba e̱riqˈuin, te̱nau nak ninnau chi tzˈakal li xya̱lal chirix li Cristo, li mukmu nak quicuan. ⁵ Junxil ma̱ ani nataˈoc ru lix ya̱lal li mukmu nak quicuan chak. Abanan anakcuan li Santil Musikˈej quixcˈut li xya̱lal chiruheb li profeta ut chiku ajcuiˈ la̱o lix apóstol. ⁶ Li xya̱lal li naˈleb li mukmu nak quicuan chak junxil, aˈan aˈin: nak la̱ex li ma̱cuaˈex aj judío, textzˈako̱nk li colba‑ib li naxqˈue li Dios kochben la̱o aj judío. La̱ex ralal xcˈajolex ajcuiˈ li Dios ut textzˈako̱nk ajcuiˈ riqˈuin li yechiˈinbil ke xban li Dios xban nak colbilex chic saˈ xcˈabaˈ li Cristo. ⁷ Yal rusilal li Dios nak quixqˈue saˈ inbe̱n xyebal resil li colba‑ib ut quixqˈue incuanquil re tinba̱nu lix cˈanjel. ⁸ La̱in li kˈaxal cubenak incuanquil saˈ xya̱nkeb chixjunileb li ralal xcˈajol li Dios. Abanan yal xban lix nimal ruxta̱n li Dios quixqˈue cue li cˈanjel aˈin re xchˈolobanquil che̱ru lix ya̱lal chirix lix nimal ruxta̱n li Cristo ut li lokˈlaj colba‑ib saˈ xcˈabaˈ aˈan. ⁹ Joˈcan nak tento tinchˈolob yalak bar li xya̱lal li naˈleb li mukmu nak quicuan chak junxil. Chalen chak saˈ xticlajic chixjunil li naˈleb aˈin mukmu chak xban li Dios li quiyi̱ban re chixjunil. ¹⁰ Li Dios quixba̱nu chi joˈcaˈin re xcˈutbal chiruheb li cuanqueb xcuanquil saˈ choxa nak numtajenak xnaˈleb li Dios. Teˈxnau nak numtajenak xnaˈleb nak teˈxqˈue retal nak quixjunaji ruheb laj judío riqˈuineb li ma̱cuaˈeb aj judío chokˈ ralal xcˈajol. ¹¹ Ac cˈu̱banbil chak junxil chi joˈcaˈin xban li Dios nak li Ka̱cuaˈ Jesucristo tixjunajiheb ru li ralal xcˈajol. ¹² Xban nak ac xkapa̱b li Cristo, junajo chic riqˈuin. Joˈcan nak nakanau chi tzˈakal nak naru chic tocua̱nk chi sum a̱tin riqˈuin li Dios. ¹³ Joˈcan nak nintzˈa̱ma che̱ru nak incˈaˈ ta̱chˈina̱nk e̱chˈo̱l xban nak yo̱quin chixcˈulbal li raylal xban xyebal e̱re xya̱lal li colba‑ib. Chisahokˈ ban e̱chˈo̱l xban nak re e̱tenkˈanquil xincˈul li raylal.

Cˈajoˈ nocoxra li Cristo

¹⁴ Nak nincˈoxlac chirix lix naˈleb li Dios riqˈuin chixjunil li quixba̱nu, nincuikˈib cuib ut ninbantioxin chiru li Acuabej Dios. ¹⁵ Li Acuabej Dios aˈan xyucuaˈeb chixjunil li cuanqueb saˈ choxa, joˈ ajcuiˈ saˈ ruchichˈochˈ. ¹⁶ Kˈaxal nim li rusilal li Dios. Joˈcan nak nintzˈa̱ma chiru nak li Santil Musikˈej chiqˈuehok e̱cuanquilal ut xcacuilal e̱chˈo̱l saˈ le̱ pa̱ba̱l. ¹⁷ Ut nintzˈa̱ma ajcuiˈ chiru nak chicua̱nk le̱ pa̱ba̱l re nak cua̱nk li Cristo e̱riqˈuin chi tzˈakal. Te̱tau taxak xcacuil le̱ chˈo̱l riqˈuin xra̱bal li Dios joˈ eb ajcuiˈ le̱ ras e̱ri̱tzˈin. ¹⁸ Nintzˈa̱ma chiru li Dios nak chetauhak taxak ru, joˈ ajcuiˈ chixjunileb laj pa̱banel, nak kˈaxal nim li kara̱bal xban li Cristo. Numtajenak lix rahom li Cristo. Ma̱cˈaˈ xbisbal ut ma̱ ani ta̱taˈok ru lix lokˈal lix rahom li Cristo. ¹⁹ Ma̱ jokˈe ta̱ru̱k takatau ru chi tzˈakal lix rahom xban nak ma̱cˈaˈ rosoˈjic ut kˈaxal lokˈ. Nintzˈa̱ma chiru li Dios nak tixcˈut che̱ru nak cˈajoˈ nequexra li Cristo, ut chinujak taxak le̱ chˈo̱l riqˈuin xnimajcual xcuanquil. ²⁰ Lokˈoninbil taxak li Dios li kˈaxal nim xcuanquil chixba̱nunquil nabal chiru li nakatzˈa̱ma. Riqˈuin xnimal xcuanquil nacˈanjelac saˈ li ka̱m ut kˈaxal nim xcuanquil chixba̱nunquil nabal chiru li nakoybeni. ²¹ Lokˈoninbil taxak li Dios anakcuan ut chi junelic kˈe cutan kaban la̱o aj pa̱banel xban nak junajo chic riqˈuin li Cristo. Joˈcan taxak.

Saˈ xcˈabaˈ li Cristo junajo chic la̱o aj pa̱banel

4  La̱in cuanquin chi pre̱xil xban xyebal resil li Ka̱cuaˈ Jesucristo. La̱in xintijoc che̱rix ut anakcuan nintzˈa̱ma che̱ru nak cha̱bilak le̱ yuˈam joˈ xcˈulubeb li ralal xcˈajol li Dios. ² Checubsihak e̱rib ut chexcua̱nk saˈ tu̱lanil ut cha̱bilakex. Checuyak e̱rib chi ribil e̱rib ut cherahak e̱rib chiribil e̱rib. ³ Junajak chic e̱ru xban li Santil Musikˈej. Joˈcan nak qˈuehomak e̱chˈo̱l chi cua̱nc saˈ usilal chi ribil e̱rib re nak chexcua̱nk chi junaj e̱ru. ⁴ La̱o li ralal xcˈajol li Dios chanchan nak jun chi tzˈejcualej nak cuanco ut jun ajcuiˈ li Santil Musikˈej naberesin ke. Jun ajcuiˈ li kama̱tan li nakayoˈoni saˈ comonil, la̱o li sicˈbil ku. ⁵ Jun ajcuiˈ li Ka̱cuaˈ cuan ut jun ajcuiˈ li kapa̱ba̱l cuan ut jun ajcuiˈ li cubi haˈ nakacˈul saˈ xcˈabaˈ li Cristo. ⁶ Jun ajcuiˈ li Dios cuan ut aˈan li kaYucuaˈ chikajunilo. Aˈan li cuan saˈ kabe̱n chikajunilo. Aˈan li nacˈanjelac saˈ li ka̱m chikajunilo ut aˈan ajcuiˈ li cuan kiqˈuin chikajunilo. ⁷ Abanan jalan jala̱nk li kalokˈlaj ma̱tan li naqˈueheˈ ke chikaju̱nkal xban li Cristo, aˈ yal chanru naraj aˈan. ⁸ Aˈin qui‑uxman joˈ tzˈi̱banbil saˈ li Santil Hu, li naxye chi joˈcaˈin:

⁹ ¿Cˈaˈru xya̱lal nak naxye nak li Ka̱cuaˈ quitakeˈ saˈ choxa? Naraj naxye nak xbe̱n cua quicube takˈa saˈ li ruchichˈochˈ. ¹⁰ Quicube saˈ ruchichˈochˈ ut quitakeˈ ajcuiˈ toj saˈ li Santil Choxa re nak ta̱cua̱nk xcuanquil saˈ xbe̱n chixjunil saˈ choxa joˈ ajcuiˈ saˈ ruchichˈochˈ. ¹¹ ¿Cˈaˈru xya̱lal nak tzˈi̱banbil nak quixqˈue xma̱taneb li ralal xcˈajol li Dios? Naraj naxye nak cuan li quiqˈueheˈ xma̱taneb chi cˈanjelac joˈ apóstol. Cuan li quiqˈueheˈ xma̱taneb chi cˈanjelac joˈ profeta. Cuan li quiqˈueheˈ xma̱taneb chixyebal resil li colba‑ib. Cuan li quiqˈueheˈ xma̱taneb chi cˈamoc be chiruheb laj pa̱banel ut cuan ajcuiˈ li quiqˈueheˈ xma̱taneb chixcˈutbal lix ya̱lal chiruheb laj pa̱banel. ¹² Quiqˈueheˈ xma̱taneb re nak tzˈakalakeb ru saˈ xpa̱ba̱leb ut re nak teˈcˈanjelak chiru li Dios ut re nak teˈxtenkˈaheb laj pa̱banel chi qˈui̱c saˈ xpa̱ba̱leb. ¹³ Qˈuebil ke li kama̱tan re nak takatenkˈaheb laj pa̱banel chi cacuu̱c saˈ lix pa̱ba̱leb toj ta̱cuulak xkˈehil nak ta̱tzˈaklok ke ku riqˈuin lix cuanquil li Cristo ut junajak chic ku xban nak nakapa̱b li Ralal li Dios. Tzˈakalak ke ku joˈ li Cristo tzˈakal re ru. ¹⁴ Moco joˈcakex ta chic li cocˈal. Li cocˈal nequeˈxpa̱b li cˈaˈak re ru nequeˈyeheˈ re. La̱ex ma̱cuaˈex chic cocˈal. Joˈcan nak me̱qˈue e̱rib chi balakˈi̱c xbaneb li nequeˈbalakˈin riqˈuin jalanil tijleb. ¹⁵ Ut chixjunil li nakaba̱nu, chikaba̱nu xban nak nocorahoc. Ut junajak chic ku riqˈuin li Cristo. ¹⁶ Li Cristo, aˈan najolomin ke la̱o aj pa̱banel ut la̱o joˈ li rok rukˈ. Li Cristo, aˈan nacˈamoc be chiku ut junajo chic. Chikajunilo chikatenkˈa kib chi kibil kib re nak toqˈui̱k saˈ li kapa̱ba̱l xban nak nakara kib chi kibil kib. ¹⁷ Aˈan aˈin li tento tinye e̱re. Saˈ xcˈabaˈ li Ka̱cuaˈ ninye e̱re nak me̱ba̱nu chic joˈ nequeˈxba̱nu li incˈaˈ nequeˈpa̱ban. Eb aˈan nequeˈxqˈue xchˈo̱l chirix li ma̱cˈaˈ na‑oc cuiˈ. ¹⁸ Incˈaˈ nequeˈxtau xya̱lal. Ma̱cˈaˈ riqˈuineb li junelic yuˈam li naxqˈue li Dios xban nak incˈaˈ nequeˈraj xnaubal li xya̱lal ut kˈaxal cauheb xchˈo̱l. ¹⁹ Incˈaˈ nequeˈxnau xuta̱nac ut nequeˈxqˈue rib chixba̱nunquil li ma̱usilal. Nequeˈxba̱nu chixjunil li joˈ ma̱joˈil aj naˈleb. ²⁰ Abanan la̱ex aj pa̱banel ma̱cuaˈ li naˈleb aˈan li xetzol riqˈuin li Cristo. ²¹ La̱ex xerabi li quixye li Cristo ut xetzol li xya̱lal li quixcˈut che̱ru. ²² Joˈcan nak chetzˈekta̱na chi junaj cua le̱ najter naˈleb. Me̱qˈue chic e̱rib chi balakˈi̱c xban li ma̱usilal li quixrahi ru le̱ chˈo̱l junxil. ²³ Ut acˈobresinbilak taxak le̱ ra̱m ut le̱ cˈaˈux. ²⁴ Acˈobresinbilak le̱ yuˈam ut chexcua̱nk taxak joˈ naraj li Dios. Santakex ut cha̱bilakex xban nak nequenau chic li xya̱lal. ²⁵ Incˈaˈ chic chexticˈtiˈik. Saˈ xya̱lal ban tex‑a̱tinak chi ribil e̱rib xban nak junaj chic ku ut kachaˈal chic kib chi kibil kib. ²⁶ Cuan nak nequexjoskˈoˈ. Abanan me̱numsi li cutan chi toj cuan le̱ joskˈil saˈ le̱ chˈo̱l re nak incˈaˈ texma̱cobk xban. ²⁷ Moco yal xban ta le̱ joskˈil nak te̱qˈue e̱rib chi a̱le̱c xban laj tza. ²⁸ Li ani na‑elkˈac incˈaˈ chic chi elkˈac. Chi cˈanjelac ban saˈ xya̱lal re nak cua̱nk li cˈaˈru tixsi reheb li ma̱cˈaˈ cuanqueb re. ²⁹ Mex‑a̱tinac yibru aj a̱tin. Riqˈuin ban cha̱bil a̱tin tex‑a̱tinak re nak teˈxqˈue retal li ani yo̱quex cuiˈ chi a̱tinac ut te̱tenkˈaheb. ³⁰ Me̱ba̱nu chic li incˈaˈ us re nak incˈaˈ ta̱rahokˈ xchˈo̱l li Santil Musikˈej e̱ban. Li Dios quixqˈue e̱re li Santil Musikˈej chokˈ e̱retalil nak rehex chic aˈan toj saˈ li cutan nak tixtzˈakobresi le̱ colbal. ³¹ Isihomak saˈ le̱ chˈo̱l chi junaj cua li cˈahi̱nc, li joskˈil, ut li poˈoc ib. Joˈcan ajcuiˈ li choki̱nc ib ut li majecua̱nc. Checanabak chi junaj cua chixjunil li ma̱usilal. ³² Cha̱bilakex che̱ribil e̱rib. Cheruxta̱na e̱ru chi ribil e̱rib. Ut checuyak e̱ma̱c chi ribil e̱rib joˈ nak li Dios quixcuy e̱ma̱c saˈ xcˈabaˈ li Cristo.

Tento teˈcua̱nk saˈ xya̱lal li ralal xcˈajol li Dios

5  La̱ex chic li ralal xcˈajol li Dios ut raro̱quex xban. Joˈcan nak chetzolak e̱rib riqˈuin li Dios re nak te̱ba̱nu joˈ naraj aˈan. ² Cherahak e̱rib chi ribil e̱rib joˈ nak coxra la̱o li Cristo ut quixmayeja rib chiru li cruz re kacolbal. Ut li Dios quisahoˈ xchˈo̱l riqˈuin xban nak chanchan li sununquil ban chiru. ³ La̱ex chic li ralal xcˈajol li Dios. Joˈcan nak incˈaˈ chic chi cua̱nk li coˈbe̱tac yumbe̱tac saˈ e̱ya̱nk chi moco tex‑a̱tinak chirix. Incˈaˈ ta̱cua̱nk li ma̱usilal saˈ e̱ya̱nk. Ut incˈaˈ te̱rahi ru li jalan aj e. Moco xcˈulub ta chic laj pa̱banel xba̱nunquil aˈan. ⁴ Incˈaˈ ta̱yema̱nk saˈ e̱ya̱nk li yibru aj a̱tin chi moco li to̱ntil a̱tin chi moco cheye li ma̱yehecˈ naraj xban nak incˈaˈ us. Chexbantioxi̱nk ban chiru li Dios. ⁵ Te̱nau chi tzˈakal nak li nequeˈxba̱nu ma̱usilal incˈaˈ teˈtzˈako̱nk saˈ lix nimajcual xcuanquilal li Cristo ut li Dios. Chi moco eb laj coˈbe̱t ut eb laj yumbe̱t chi moco li nequeˈxrahi li jalan aj e xban nak li ma̱c aˈan juntakˈe̱t riqˈuin xlokˈoninquil li jalanil dios. ⁶ Me̱qˈue e̱rib chi balakˈi̱c xbaneb li nequeˈa̱tinac ut nequeˈxye nak moco nimla ma̱c ta xba̱nunquil li cˈaˈak re ru aˈin, xban nak nachal xjoskˈil li Dios saˈ xbe̱neb li nequeˈkˈetoc re li ra̱tin. ⁷ Me̱junaji e̱rib riqˈuineb aˈan xban nak incˈaˈ useb xnaˈleb. ⁸ Junxil quexcuan chak saˈ xkˈojyi̱nal ru li ma̱c. Abanan, anakcuan rehex chic li Ka̱cuaˈ ut cuanquex chic saˈ xcutan saken. Joˈcan nak chexcua̱nk saˈ xya̱lal. ⁹ Li ani quicutanobresi̱c lix chˈo̱l xban li Dios naxnau lix ya̱lal ut nacuan saˈ cha̱bilal ut saˈ ti̱quilal. ¹⁰ Chetauhak xya̱lal li cˈaˈru naraj li Ka̱cuaˈ. ¹¹ Me̱junaji chic e̱rib riqˈuineb li incˈaˈ nequeˈxnau xya̱lal ut nequeˈxba̱nu li cˈaˈak re ru ma̱cˈaˈ na‑oc cuiˈ. La̱ex ban chic texchˈoloba̱nk re li xya̱lal chiruheb nak incˈaˈ us yo̱queb. ¹² Xuta̱nal chokˈ ke la̱o a̱tinac chirix li incˈaˈ us li nequeˈxba̱nu chi mukmu. ¹³ Nak ta̱chˈoloba̱k li xya̱lal chiruheb na‑el chi cutanquil nak incˈaˈ us li yo̱queb ut nequeˈxqˈue ajcuiˈ retal eb aˈan nak incˈaˈ us li nequeˈxba̱nu. ¹⁴ Nak ta̱cutanobresi̱k lix chˈo̱leb cutan saken chic chanru nak cuanqueb. Joˈcaˈin tzˈi̱banbil saˈ li Santil Hu: Ajsi a̱cuu, la̱at li yo̱cat chi cua̱rc. Matcana chi camenak saˈ la̱ ma̱c, ut li Cristo tixcutanobresi la̱ cˈaˈux. ¹⁵ Cheqˈuehak retal chanru le̱ yuˈam. Me̱ba̱nu joˈ nequeˈxba̱nu li incˈaˈ useb xnaˈleb. Cheba̱nuhak ban joˈ nequeˈxba̱nu li cuanqueb xnaˈleb. ¹⁶ Me̱numsi li cutan chi ma̱cˈaˈ xya̱lal. Cheba̱nu ban li us nak ta̱ru̱k te̱ba̱nu xban nak chˈaˈaj li cua̱nc saˈ eb li cutan aˈin. ¹⁷ Joˈcan nak moco joˈcakex ta li ma̱cˈaˈeb xnaˈleb. Chetauhak ban ru li cˈaˈru naraj li Ka̱cuaˈ. ¹⁸ Mexcala chic xban nak napoˈoc chˈo̱lej. Chinujak ban le̱ chˈo̱l riqˈuin li Santil Musikˈej. ¹⁹ Cheserakˈi chi ribil e̱rib lix lokˈal li Dios, ut te̱ye li salmos ut texbicha̱nk re xlokˈoninquil li Ka̱cuaˈ. Chexbicha̱nk ut chelokˈoni li Ka̱cuaˈ chi anchal e̱chˈo̱l. ²⁰ Ut junelic chexbantioxi̱nk chiru li Acuabej Dios saˈ xcˈabaˈ li Ka̱cuaˈ Jesucristo riqˈuin chixjunil li cˈaˈru nequecˈul.

Chepa̱bak e̱rib chi ribil e̱rib

²¹ Chepa̱bak e̱rib chi ribil e̱rib re xqˈuebal xlokˈal li Cristo. ²² Ex ixakilbej, chepa̱bak le̱ be̱lom joˈ nak nequepa̱b li Ka̱cuaˈ Jesucristo. ²³ Chexpa̱ba̱nk chiru xban nak aˈan li najolomin re li rixakil joˈ nak li Cristo najolomin reheb laj pa̱banel. Abanan li Cristo, aˈan ajcuiˈ laj Colol reheb laj pa̱banel ut eb laj pa̱banel joˈ li rok rukˈ li Cristo. ²⁴ Joˈ nak nequeˈpa̱ban laj pa̱banel chiru li Cristo, joˈcan ajcuiˈ nak li ixakilbej teˈpa̱ba̱nk chiruheb lix be̱lom riqˈuin chixjunil. ²⁵ Joˈcan ajcuiˈ la̱ex be̱lomej, cherahak le̱ rixakil joˈ nak li Cristo quixraheb laj pa̱banel nak quixkˈaxtesi rib chi ca̱mc re xcolbaleb. ²⁶ Li Jesucristo quixmayeja rib re xsantobresinquileb laj pa̱banel riqˈuin nak teˈxcˈul li cubi haˈ saˈ xcˈabaˈ li Cristo ut riqˈuin li ra̱tin li Dios. ²⁷ Li Cristo quixba̱nu aˈan re nak tixcˈuleb li ralal xcˈajol chi kˈaxal nim xlokˈal, chi ma̱cˈaˈ xma̱c ut chi ma̱cˈaˈ xpaltil chiru. ²⁸ Joˈcan ajcuiˈ eb li be̱lomej, tento nak teˈxra li rixakil joˈ nak nequeˈxra ribeb aˈan. Li ani naxra li rixakil, naxra ajcuiˈ rib aˈan. ²⁹ Ma̱ ani xicˈ naril rib. Naxra ban rib ut naxchˈolani rib joˈ nak li Cristo naxra ut naxchˈolani li ralal xcˈajol. ³⁰ Nocoxra ut nocoril xban nak la̱o joˈ rok rukˈ li Cristo. La̱o joˈ lix quiqˈuel ut joˈ lix bakel. ³¹ Li be̱lomej ut li ixakilbej junaj chic ruheb joˈ tzˈi̱banbil saˈ li Santil Hu li naxye chi joˈcaˈin: Nak ta̱sumla̱k, li cui̱nk tixcanab lix naˈ xyucuaˈ re nak tixlakˈab rib riqˈuin li rixakil. Ut junajak chic ruheb chi xcaˈbichaleb. ³² Kˈaxal lokˈ li xya̱lal li naˈleb aˈin. Abanan la̱in ninye e̱re nak naxcˈut ajcuiˈ chiku nak la̱o aj pa̱banel junajo chic riqˈuin li Cristo. ³³ Joˈcan nak tinye cuiˈchic e̱re nak li be̱lomej chixrahak li rixakil joˈ nak naxra rib aˈan. Ut li ixakilbej chix‑oxlokˈi lix be̱lom.

6  Joˈcan ajcuiˈ la̱ex, alalbej. Chex‑abi̱nk chiru le̱ naˈ e̱yucuaˈ saˈ xcˈabaˈ li Ka̱cuaˈ xban nak aˈan kˈaxal us xba̱nunquil. ² Che‑oxlokˈi le̱ naˈ e̱yucuaˈ. Aˈan aˈin lix be̱n kataklanquil cuan cˈaˈru yechiˈinbil ke cui takaba̱nu aˈan. ³ Ut li yechiˈinbil ke, aˈan aˈin: Cui neque‑oxlokˈi le̱ naˈ e̱yucuaˈ, kˈaxal us tex‑e̱lk ut ta̱najtokˈ ru le̱ yuˈam li tixqˈue li Dios arin saˈ ruchichˈochˈ. ⁴ Ex naˈbej ex yucuaˈbej, me̱chikˈ xjoskˈileb le̱ ralal e̱cˈajol chi ma̱cˈaˈ rajbal. Cheqˈuiresihakeb ban saˈ xya̱lal riqˈuin xkˈusbaleb ut riqˈuin xtijbaleb saˈ xcˈabaˈ li Ka̱cuaˈ Jesucristo. ⁵ Ex aj cˈanjel, chex‑abi̱nk chiruheb le̱ patrón arin saˈ ruchichˈochˈ. Chexcˈanjelak chiruheb chi anchal e̱chˈo̱l ut saˈ xya̱lal joˈ nak nequexcˈanjelac chiru li Cristo. ⁶ Moco toj yo̱keb ta che̱rilbal nak te̱ba̱nu le̱ cˈanjel re nak sahak xchˈo̱l le̱ patrón e̱riqˈuin. Chexcˈanjelak ban chiru le̱ patrón joˈ nak yo̱kex chi cˈanjelac chiru li Cristo. Chi anchal e̱chˈo̱l cheba̱nuhak li naraj li Dios. ⁷ Chexcˈanjelak chi anchal e̱chˈo̱l joˈ nak yo̱quex chi cˈanjelac chiru li Ka̱cuaˈ ut ma̱cuaˈ chiruheb li cui̱nk. ⁸ La̱ex nequenau nak cui cha̱bil te̱ba̱nu che̱junju̱nkal aˈan ajcuiˈ li re̱kaj te̱cˈul riqˈuin li Ka̱cuaˈ usta cuan e̱patrón usta ma̱cˈaˈ. ⁹ Joˈcan ajcuiˈ la̱ex patrón, joˈ nak laj cˈanjel nacˈanjelac chi anchal xchˈo̱l che̱ru, joˈcan ajcuiˈ nak la̱ex te̱taklaheb saˈ xya̱lal. Canabomak xtaklanquileb saˈ joskˈil. Nequenau nak la̱ex cuan e̱patrón saˈ choxa joˈ ajcuiˈ eb aˈan. Li patrón, aˈan li Ka̱cuaˈ Dios ut aˈan moco jun ta sa ta̱ril ut jun ta xicˈ ta̱ril.

Li kacˈanjeleba̱l qˈuebil ke xban li Dios

¹⁰ Toj cuan cˈaˈru nacuaj xyebal e̱re ut aˈan aˈin: Cheˈcacuubresi̱k le̱ chˈo̱l saˈ le̱ pa̱ba̱l riqˈuin lix nimal xcuanquilal li Ka̱cuaˈ li cuan e̱riqˈuin. ¹¹ Joˈcan ut chetikibak e̱rib riqˈuin chixjunil lix cˈanjeleba̱l li Dios re nak xakxo̱kex chi tzˈakal ut yo̱kex chixcolbal e̱rib chiru laj tza nak yo̱k che̱balakˈinquil. ¹² Moco yo̱co ta chixyalbal kakˈe riqˈuin cui̱nk. Yo̱co ban chi pletic riqˈuin qˈuila pa̱y ru chi ma̱us aj musikˈej li cuanqueb xcuanquil saˈ eb li cutan aˈin, li nequeˈtaklan saˈ ikˈ ut saˈ li ruchichˈochˈ li cuan saˈ xkˈojyi̱nal ru li ma̱c. ¹³ Xban nak nocopletic riqˈuin li ma̱us aj musikˈej, joˈcan nak cua̱nk e̱riqˈuin chixjunil le̱ cˈanjeleba̱l li qˈuebil e̱re xban li Dios re nak cauhak e̱rib chixcolbal e̱rib chiru laj tza yalak jokˈe tixyal e̱ra̱lenquil. ¹⁴ Xakxo̱kex biˈ chi cau. Aˈan aˈin li ta̱cˈanjelak che̱ru re xcolbal e̱rib chiru laj tza. Li ya̱l ta̱cˈanjelak joˈ xcˈa̱mal e̱saˈ ut li ti̱quil chˈo̱lej ta̱cˈanjelak joˈ li chˈi̱chˈ naramoc re le̱ chˈo̱l. ¹⁵ Cauresinbilakex re xyebal resil li colba‑ib ut aˈan ta̱cˈanjelak e̱re joˈ e̱xa̱b che̱rok. ¹⁶ Chirix chixjunil aˈin chicua̱nk ajcuiˈ le̱ pa̱ba̱l. Ut aˈan ta̱cˈanjelak e̱re joˈ le̱ ramleb chˈi̱chˈ. Le̱ pa̱ba̱l ta̱cˈanjelak re xcolbal e̱rib chiru laj tza nak tixyal e̱ra̱lenquil. Riqˈuin aˈin ta̱ru̱k te̱chup xxamlel lix tzimaj laj tza. ¹⁷ Li colba‑ib ta̱cˈanjelak e̱re joˈ nak nacˈanjelac re li soldado lix tzˈapbal xjolom. Li Santil Musikˈej tixcˈut che̱ru li ra̱tin li Dios. Aˈan ta̱cˈanjelak che̱ru joˈ nak nacˈanjelac li chˈi̱chˈ chiru li soldado. ¹⁸ Ut yoˈon cua̱nkex. Junelic chextijok joˈ naxcˈut che̱ru li Santil Musikˈej. Junelic chextzˈa̱ma̱nk chiru chi anchal e̱chˈo̱l nak li Dios ta̱tenkˈa̱nk e̱re. Ut chetzˈa̱ma chiru nak tixtenkˈaheb chixjunileb li ralal xcˈajol li Dios. ¹⁹ Ut chextijok ajcuiˈ chicuix la̱in re nak chixqˈue taxak cua̱tin li Dios re xyebal resil li colba‑ib ut chixqˈue taxak xcacuilal inchˈo̱l chixyebal resil nak li colba‑ib reheb ajcuiˈ li ma̱cuaˈeb aj judío. ²⁰ Taklanbilin xban li Dios chixyebal li resilal aˈan. Ut xban xyebal resil li colba‑ib nak cuanquin chi pre̱xil anakcuan. Chextijok chicuix re nak tinchˈolob xya̱lal li colba‑ib chi cau inchˈo̱l joˈ qˈuebil cue xba̱nunquil xban li Dios.

Laj Pablo naxqˈue xsahil xchˈo̱leb

²¹ Nincˈoxla nak te̱raj te̱nau chanru cuanquin ut cˈaˈru yo̱quin chixba̱nunquil. Joˈcan nak yo̱quin chixtaklanquil laj Tíquico e̱riqˈuin. Aˈan jun li herma̱n kˈaxal raro kaban, ut cha̱bil aj cˈanjel chiru li Dios. Aˈan tixye e̱re chanru cuanquin. ²² Yo̱quin chixtaklanquil laj Tíquico e̱riqˈuin re xserakˈinquil e̱re chanru cuanco arin. Ut nak te̱nau chanru cuanco, chicˈojla̱k taxak e̱chˈo̱l riqˈuin aˈan. ²³ Aˈ taxak li tuktu̱quil usilal li naxqˈue li Acuabej Dios ut li naxqˈue li Ka̱cuaˈ Jesucristo chi cua̱nk e̱riqˈuin la̱ex che̱junilex aj pa̱banel. Ut chi cua̱nk taxak e̱riqˈuin li rahoc ib ut lix cacuilal e̱chˈo̱l saˈ le̱ pa̱ba̱l. ²⁴ Chi cua̱nk taxak li rusilal li Dios e̱riqˈuin che̱junilex la̱ex li nequexrahoc re li Ka̱cuaˈ Jesucristo chi anchal e̱chˈo̱l ut chi junelic. Joˈcan taxak.