Beginning

13  Quia joˈ tjo̱meintyja̱a̱ˈa nacjooˈ teiˈ ndaaluee ndoˈ ntyˈiaya cwii quiooˈ na cwajndii waa na macaluiˈ quiiˈ ndaaluee. Niom nqui ndeiˈjndyeeˈyoˈ ñequio ntquieeˈ xqueⁿyoˈ. Ndoˈ ticwii cwii tseiˈjndyeeˈyoˈ ñjom cwii cwii corona. Ndoˈ cjooˈ cwii cwii xqueⁿyoˈ teiljeii ñˈoom ntjeiⁿ na matseijnaaⁿˈnaˈ Tyˈo̱o̱tsˈom. ² Ndoˈ juu quiooˈjndiiˈñeeⁿ na ntyˈiaya, matseijomnaˈ juuyoˈ chaˈcwijom cwii catsiaⁿ ljeiiya, ndoˈ ncˈeeyoˈ chaˈcwijom ncˈee oso ndoˈ ˈndyooyoˈ chaˈcwijom ˈndyoo liom. Ndoˈ juu catsoomjndii tquiaaⁿ cantyja najneiⁿ nnom quiooˈjndiiˈñeeⁿ. Ndoˈ tquiaaⁿ na nncwacatyeeⁿyoˈ ndio ˈnaaⁿˈaⁿ ndoˈ nntsa̱ˈntjomyoˈ chaˈxjeⁿ na matsa̱ˈntjoom. ³ Mati ntyˈiaya na cwii xqueⁿyoˈ jeeⁿ nioom jnda̱ tquieeˈ, machˈeenaˈ tjaa chiuu cwii ya sa̱a̱ jnda̱ chii nˈmaⁿyoˈ. Ndoˈ chaˈtsoti nnˈaⁿ tsjoomnancue tyˈentyjo̱na naxeⁿˈ quiooˈjndiiˈñeeⁿ. Jeeⁿ tjaweeˈ nˈomna na nˈmaⁿyoˈ. ⁴ Tyolaˈtˈmaaⁿˈndye nnˈaⁿ juu catsoomjndii ncˈe na jnda̱ tquiaaⁿ cantyja najneiⁿ nnom quiooˈjndii. Mati quiooˈjndiiˈñeeⁿ tyolaˈtˈmaaⁿˈndyena juuyoˈ. Tyoluena:

—¿ˈÑeeⁿ juu cwiluiitˈmaⁿñe chaˈna quiooˈjndiimˈaaⁿˈ? Ndoˈ ¿ˈñeeⁿ juu nnda̱a̱ nnaⁿñe na nntsˈaa tiaˈ ñˈeⁿñeyoˈ?

⁵ Ndoˈ tquiaa Tyˈo̱o̱tsˈom na wanaaⁿ na catseineiⁿyoˈ ñˈoom ntjeiⁿ nacjoomˈm ñequio ñˈoom na matseitˈmaaⁿˈñe cheⁿnquiiyoˈ. Mati tquiaaⁿ na wanaaⁿ na caluiitˈmaⁿñeyoˈ wenˈaaⁿ nchooˈ we chiˈ. ⁶ Quia joˈ jnaⁿnaˈ na matseineiⁿyoˈ ñˈoom cwajndii na ntjeiⁿnaˈ nacjooˈ Tyˈo̱o̱tsˈom, ndoˈ seijnaaⁿˈyoˈ xueⁿˈeⁿ, ñequio cañoomˈluee yuu na macˈeeⁿ, ndoˈ ñequio chaˈtsondye joo na mˈaⁿ joˈ joˈ. ⁷ Mati tquiaaⁿ na wanaaⁿ na catsˈaayoˈ tiaˈ nacjoo nnˈaⁿ na laˈxmaⁿ cwentaaⁿˈaⁿ, ndoˈ nnaⁿñeyoˈ ñˈeⁿndyena. Ndoˈ tquiaaⁿ na wanaaⁿ na catsa̱ˈntjomyoˈ cwii cwii ndyuaa, ñequio cwii cwii nnom nnˈaⁿ na tjachuiiˈndye, ñequio cwii cwii nnom nnˈaⁿ na tjachuiiˈ ñˈoom na cwilaˈneiⁿ, ñequio nnˈaⁿ ticwii cwii tsjoomnancue. ⁸ Chaˈtso nnˈaⁿ tsjoomnancue na ticalaˈxmaⁿ cwentaaˈ Tyˈo̱o̱tsˈom jlaˈtˈmaaⁿˈndyena juuyoˈ. Naⁿˈñeeⁿ tîcwiljeii ncueena naquiiˈ libro cwentaaˈ Catsmaⁿ na jlaˈcueeˈ nnˈaⁿ. Ee cantyjati na tqueⁿ Tyˈo̱o̱tsˈom tsjoomnancue, waa libro ˈnaaⁿˈaⁿ na chuu ncuee nnˈaⁿ na ticantycwii na cwitaˈndoˈ.

⁹ ˈÑeeⁿ juu na ñeˈcandii, cwa candii. ¹⁰ Tsˈaⁿ na matseijndaaˈñê na ntˈueeⁿ nnˈaⁿ na ncjaachom joona ndyuaaⁿˈaⁿ, majoˈti nntjoom. Ndoˈ xeⁿ mˈaaⁿ ˈñeeⁿ juu na nntseicueeˈ xˈiaaˈ ñˈeⁿ xjo, mañˈeⁿ xjo nncueˈ. Ncˈe na luaaˈ waa macaⁿnaˈ na nquiee nnˈaⁿ na maqueⁿ Tyˈo̱o̱tsˈom cwentaaⁿˈaⁿ, cwintyjeeˈtyeⁿna cantyja na cwilaˈyuˈya nˈomna meiⁿ ticaˈndyencˈuaaˈndyena meiiⁿ wiˈ cwitjoomna.

¹¹ Jnda̱ joˈ ntyˈiaya cwiicheⁿ quiooˈjndii na jluiˈyoˈ quiiˈ tyuaa. Ntyjoo we ndeiˈjndyeeˈyoˈ chaˈna ndeiˈjndyeeˈ cwii catsmaⁿ chjoo, sa̱a̱ seineiⁿyoˈ chaˈna matseineiⁿ catsoomjndii. ¹² Ndoˈ chaˈtsoti najndeii na tyotseixmaⁿ juu quiooˈjndii najndyee, majoˈti matseixmaⁿ quiooˈjndii na jnda̱ we ncˈe ñˈoom ˈndyoo quiooˈjndii tquieeˈñeeⁿ. Ndoˈ ñequio na jndeiˈnaˈ machˈeeyoˈ na calaˈtˈmaaⁿˈndye chaˈtso nnˈaⁿ tsjoomnancue juu quiooˈjndii tquiee, tsaⁿ na jnda̱ nˈmaⁿ na jeeⁿ nioom tquieeˈ xqueⁿ. ¹³ Ndoˈ jndye tsˈiaaⁿ tyochˈeeyoˈ na xocanda̱a̱ nntsˈaa na cweˈ najndeii nquii tsˈaⁿ. Ñequio na jndooˈ nnˈaⁿ tyochˈeeyoˈ na cwiquiaa chom nomtyuaa na cwinaⁿnaˈ tsjo̱ˈluee. ¹⁴ Wanaaⁿ na catsˈaayoˈ na nmeiiⁿˈ ncˈe ñˈoom ˈndyoo quiooˈjndii tquiee. Joˈ chii tquiuˈnnˈaⁿnaˈ nnˈaⁿ na mˈaⁿ tsjoomnancue. Sa̱ˈntjomyoˈ na calˈana cwii na nluiˈtsjaaⁿˈñe quiooˈjndii tquiee, juu tsaⁿ na jeeⁿ nioom tquieeˈ xqueⁿ ñˈeⁿ xjo, sa̱a̱ ndicwaⁿ wandoˈ. ¹⁵ Ndoˈ toˈñomyoˈ na nnda̱a̱ nntsˈaayoˈ na juunaˈ na jluiˈtsjaaⁿˈñe quiooˈjndii tquiee nnda̱a̱ nncwja jndye ndoˈ nnda̱a̱ nntseineiⁿ. Ndoˈ hasta na nnda̱a̱ nntsa̱ˈntjomnaˈ na cwje nnˈaⁿ na ticalaˈtˈmaaⁿˈndye juunaˈ. ¹⁶ Ndoˈ juu quiooˈjndii na nda̱ we sˈaayoˈ na jndeiˈnaˈ na chaˈtso nnˈaⁿ nñom ljeii lueena ntyjaya oo cantaana. Luaaˈ sˈaayoˈ ñequio meiⁿnquia nnˈaⁿ, meiiⁿ nnˈaⁿ na cwiluiitˈmaⁿndye ndoˈ meiiⁿ nnˈaⁿ na cweˈ cwiˈoontyjo̱, oo meiiⁿ nnˈaⁿ na tyandye ndoˈ meiiⁿ nnˈaⁿ na ntyˈiaandye, oo meiiⁿ nnˈaⁿ na cwindyeˈntjomtyeⁿ ndoˈ meiiⁿ nnˈaⁿ na mˈaⁿ xjeⁿ ˈnaaⁿ. ¹⁷ Quia joˈ sˈaayoˈ na meiⁿcwii tsˈaⁿ xocanda̱a̱ na nntseijnda ˈnaⁿ oo na njnda̱a̱ ˈnaⁿ xeⁿ ticañoom ljeiiˈñeeⁿ nacjooˈ. Ee ljeiiˈñeeⁿ maˈmo̱ⁿnaˈ xueeˈ quiooˈjndii tquiee oo juu número na tseixmaⁿ xueeˈyoˈ. ¹⁸ Luaa macaⁿnaˈ na cˈoom tsˈaⁿ na jndo̱ˈ tsˈom. Cwii cwii tsˈaⁿ na matseiˈno̱ⁿˈ cwjiˈ cwenta cantyja ˈnaaⁿˈ númeroˈ na tseixmaⁿ quiooˈjndiiˈñeeⁿ ee maˈmo̱ⁿnaˈ xueeˈ tsˈaⁿ. Ndoˈ juu númeroˈñeeⁿ yom siaⁿnto waljooˈ ndyeenˈaaⁿ nchooˈ yom.

Na cwita nnˈaⁿ na jnda̱ jluiˈnˈmaaⁿndye

14  Jnda̱ joˈ ntyˈiaya na meintyjeeˈ Catsmaⁿ xqueⁿ ta Sión. Ndoˈ ñeⁿˈnaaⁿˈ nacañomˈm mˈaⁿ cwii tmaaⁿˈ nnˈaⁿ na jndyendye. Tueeˈ cwii siaⁿnto meiⁿ waljooˈ wenˈaaⁿ nchooˈ ñequiee meiⁿ joona. Ndoˈ cantaana jnda̱ teiljeii xueeˈ nquii Catsmaⁿ ñequio xueeˈ Tsotyeeⁿ. ² Ndoˈ jndiiya na cˈuaa nandye cañoomˈluee chaˈcwijom cˈuaa na macoˈnaˈ ndaa, oo chaˈcwijom najndeii matseixuaa tsuee. Joˈ joˈ jndiiya na jndye arpa cwitjo̱o̱ˈ nnˈaⁿ. ³ Cwitana cwii luantsa xco jo nnom tio na wacatyeeⁿ Tyˈo̱o̱tsˈom, ndoˈ jo nda̱a̱ ñequiee naⁿ na tandoˈ, ndoˈ jo nda̱a̱ ntquiuu nchooˈ ñequiee nnˈaⁿ na cwiluiitquiendye. Ndoˈ tjaa ˈñeeⁿ juu na nnda̱a̱ nntseiˈnaaⁿˈ luantsaˈñeeⁿ, macanda̱ nquiee nnˈaⁿ na cwii siaⁿnto waljooˈ wenˈaaⁿ nchooˈ ñequiee meiⁿndye. Ee quiiˈntaaⁿ nnˈaⁿ tsjoomnancue, macanda̱ joona na jnda̱ tjeiˈnˈmaaⁿñe Tyˈo̱o̱tsˈom. ⁴ Joo naⁿmˈaⁿ tyooˈndyena Tyˈo̱o̱tsˈom. Macanda̱ jom cwilaˈtˈmaaⁿˈndyena. Cwiˈoontyjo̱na naxeⁿˈ Catsmaⁿ meiⁿyuucheⁿ na wjaⁿ. Tiomlˈua Tyˈo̱o̱tsˈom jnaaⁿna na tjeiiˈñê joona quiiˈntaaⁿ nnˈaⁿ cha macanda̱ nlaˈxmaⁿna cwentaaⁿˈaⁿ ndoˈ cwentaaˈ juu na matseicajndyunaˈ Catsmaⁿ. ⁵ Meiⁿcwii ñˈoom na cweˈ cantu ticaljeiiˈ ndyueena. Ndoˈ meiⁿcwii tyoolaˈtjo̱o̱ndyena nnom Tyˈo̱o̱tsˈom.

Ñˈoom na cwilue ndyee ángeles

⁶ Quia joˈ ntyˈiaya cwiicheⁿ ángel na mantyja nandye cañoomˈluee. Mañequiaaⁿ ñˈoom naya na mˈaaⁿ ndoˈ mˈaaⁿnaˈ nda̱a̱ nnˈaⁿ tsjoomnancue. Matseicañeeⁿ nnˈaⁿ ticwii cwii tsjoomnancue, ñequio ticwii cwii ndyuaa nnˈaⁿ, ñequio nnˈaⁿ na ticwii cwii ñˈoom na cwichuiiˈ na cwilaˈneiⁿ, ñequio nnˈaⁿ na ticwii cwii nnom na tjachuiiˈndye. ⁷ Cˈuaa ˈñom matseineiiⁿ, tsoom:

—Calcwiˈyoˈ Tyˈo̱o̱tsˈom ñequio na nquiaˈyoˈ jom ee na jnda̱ tueˈntyjo̱ xjeⁿ na nncuˈxeeⁿ nnˈaⁿ. Calaˈtˈmaaⁿˈndyoˈ nqueⁿ na sˈaaⁿ cañoomˈluee ñequio tsjoomnancue, ñequio ndaaluee, ndoˈ ñequio chaˈtso nqueⁿljoˈ yuu na cwinaaⁿˈ ndaa.

⁸ Ndoˈ tjantyjo̱ cwiicheⁿ ángel na jnda̱ we naxeⁿˈ ángelˈñeeⁿ. Matso:

—Jnda̱ tyuiiˈ tsjoom Babilonia. Jnda̱ tyuiiˈ tsjoom tˈmaⁿˈñeeⁿ. Ee nnˈaⁿ tsjoomˈñeeⁿ jnda̱ jlaˈndaaˈna nˈom nnˈaⁿ ticwii cwii ndyuaa ñequio natia na cwilˈana na juu joˈ matseijomnaˈ chaˈcwijom cwilaˈcwena nnˈaⁿ winom cha candyee naⁿˈñeeⁿ.

⁹ Ndoˈ tjantyjo̱ cwiicheⁿ ángel na jnda̱ ndyee. Jndeii matseineiⁿ, matso:

—Ntyˈiaaˈndye joo nnˈaⁿ na cwilaˈtˈmaaⁿˈndye quiooˈjndii tquiee ñequio juu na jluiˈtsjaaⁿˈñeyoˈ. Ndoˈ ntyˈiaaˈndye joo nnˈaⁿ na tquiandye na tjacañoom ljeii cwentaaˈ quiooˈjndiiˈñeeⁿ cantaa oo luee. ¹⁰ Naⁿˈñeeⁿ maxjeⁿ jndeiˈnaˈ na nncwena winom ˈnaaⁿˈ Tyˈo̱o̱tsˈom na juu joˈ maˈmo̱ⁿnaˈ na matseiwˈiiyayaaⁿ joona. Nntseicatomˈm waso ñˈeⁿ winomˈñeeⁿ na meiⁿchjoo tjaa ljoˈ tjoomˈ ncˈe na tyeⁿ waa na matseiwˈeeⁿ. Ndoˈ tˈmaⁿ nlcoˈwiˈnaˈ joona naquiiˈ chom ñequio sufra̱ na cwico. Joo ángeles na ljuˈ nˈom ñequio Catsmaⁿ nntyˈiaana na wiˈ nntjoom naⁿˈñeeⁿ. ¹¹ Tixocjaameintyjeeˈ na cwiˈoowa ndioom na macoˈwiˈnaˈ naⁿˈñeeⁿ. Meiⁿchjoo tixocataˈjndyeena naxuee natsjom ee joona tyolaˈtˈmaaⁿˈndyena quiooˈjndii tquiee ñequio juu na jluiˈtsjaaⁿˈñeyoˈ ndoˈ joona jñoom ˈnaaⁿ cantaana na maˈmo̱ⁿnaˈ xueeˈyoˈ. ¹² Joˈ chii joo nnˈaⁿ na maqueⁿ Tyˈo̱o̱tsˈom na ljuˈ nˈom macaⁿnaˈ na tyeⁿ cwintyjeeˈna cantyja ˈnaaⁿˈaⁿ. Calaˈcanda̱na ñˈoom na matsa̱ˈntjoom, ndoˈ tyeⁿ calaˈyuˈya nˈomna ñˈeⁿ Jesús.

¹³ Quia joˈ jndiiya na teicˈuaa jndye na jnaⁿnaˈ cañoomˈluee. Tso no̱o̱ⁿ:

—Luaa catseiljeiˈ: “Juu xuee na cwiwjaanaˈ, matioˈnaaⁿñenaˈ joo nnˈaⁿ na mˈaⁿ cantyja ˈnaaⁿˈ Ta Jesucristo na quia nncwje.” Majoˈti matso Espírtu Santo, ee cañoomˈluee ntaˈjndyeena cantyja na ñejlaˈjnda̱na naquiiˈ tsˈiaaⁿ ˈnaaⁿˈ Tyˈo̱o̱tsˈom. Ndoˈ wjaañˈeⁿ ñˈoom ñˈeⁿndyena na maˈmo̱ⁿnaˈ cantyjati na ya na jnda̱ ñelˈana.

Na macoˈwiˈnaˈ nnˈaⁿ tsjoomnancue

¹⁴ Quia joˈ ntyˈianndaˈa ndoˈ ljei cwii nchquiu canchiiˈ. Nacjooˈ nchquiuˈñeeⁿ wacatyeeⁿ cwii na matseijomnaˈ tsˈaⁿ. Xqueeⁿ ñjom cwii corona na tuiinaˈ ñˈeⁿ sˈom cajaⁿ, ndoˈ tˈueeⁿ xjo carwato na ta̱a̱ ˈndyoo. ¹⁵ Jnda̱ joˈ jnaⁿ cwiicheⁿ ángel watsˈom cañoomˈluee. Jndeii seineiⁿ nnom nqueⁿ na wacatyeeⁿ nacjooˈ nchquiuˈñeeⁿ. Tso:

—Cwa, cˈoomˈ xjo carwato ˈnaⁿˈ, catyjeeˈ ntjommeiⁿˈ ee jnda̱ tueˈntyjo̱ xjeⁿ na nntuˈxeⁿndye nnˈaⁿ na mˈaⁿ tsjoomnancue. Ndoˈ joona matseijomnaˈ chaˈcwijom ntjom na jnda̱ tmaⁿ.

¹⁶ Quia joˈ jom na wacatyeeⁿ nacjooˈ nchquiuˈñeeⁿ, tjoomˈm xjo ˈnaaⁿˈaⁿ nnom tsjoomnancue chii tyjeeⁿ ntjom na niom nnom tsjoomnancue, joˈ joˈ nnˈaⁿ joˈ.

¹⁷ Ndoˈ jnaⁿ cwiicheⁿ ángel watsˈom cañoomˈluee. Mati juu ñˈoom xjo carwato na ta̱a̱ ˈndyoo. ¹⁸ Ndoˈ cwiicheⁿ ángel na tseixmaⁿ na mandoˈ chom na ntyjo nomtsˈom joˈ joˈ, juu jluiˈnom ndoˈ jndeii seineiⁿ nnom juu ángel na maleiñˈoom xjo carwato. Tso nnom ángelˈñeeⁿ:

—Cwa, cˈoomˈ xjo ta̱a̱ ˈnaⁿˈ, catyjeeˈ nˈeiiⁿ uva lˈo̱o̱ na meintyjeeˈ tsjoomnancue, ee jnda̱ jnda̱a̱ ta̱.

¹⁹ Quia joˈ to̱ˈ ángelˈñeeⁿ tjoomˈm xjo carwato ˈnaaⁿˈaⁿ nnom tsjoomnancue. Seitjoom nˈeiiⁿ uva lˈo̱o̱ na meintyjeeˈ joˈ joˈ. Tioom ta̱ˈñeeⁿ tsˈom cwii catsiuuˈ tsjo̱ˈ yuu na nluiiˈ ndaaˈnaˈ. Tsˈiaaⁿˈñeeⁿ maˈmo̱ⁿnaˈ cantyja na cwajndii nntjoom nnˈaⁿ na matseiwˈii Tyˈo̱o̱tsˈom joona. ²⁰ Jo nnom tsjoom tuii tsˈiaaⁿˈñeeⁿ na tyonchjeena uvaˈñeeⁿ. Joˈ joˈ jluiiˈ nioom nnˈaⁿ hasta seijomnaˈ chaˈcwijom cwii jndaa niomˈ. Njoom mˈaaⁿ niomˈ hasta tueˈcañoomnaˈ frenom ndyuee catso. Ndoˈ tquia tjanoomnaˈ, tueeˈnaˈ chaˈna ndyee siaⁿnto kilómetros.

Ntquieeˈ ntycu na cwilaˈquiaa ángeles

15  Quia joˈ ntyˈiaya cwiicheⁿ ˈnaaⁿ tˈmaⁿ cañoomˈluee na seicatyˈuenaˈ ja. Ntyˈiaya ntquieeˈ ángeles na cwileiˈcho ntquieeˈ nnom nawiˈ na nntjoom nnˈaⁿ. Joonaˈ laˈxmaⁿnaˈ nawiˈ na macanda̱ ee quia na jnda̱ teinom cantyja ˈnaaⁿ joonaˈ, mana cwintycwii na matseiwˈii Tyˈo̱o̱tsˈom nnˈaⁿ.

² Ndoˈ mati ntyˈiaya cwii na matseijomnaˈ ndaaluee na jeeⁿ caxuee chaˈna tsioo jndaˈjom chaˈcwijom tooˈ chom. Jndye nnˈaⁿ meintyjeeˈ ˈndyoo ndaalueeˈñeeⁿ, joˈ joˈ nquiee nnˈaⁿ na jnda̱ jnaⁿndye ñequio quiooˈjndii, ñequio juu na jluiˈtsjaaⁿˈñeyoˈ, ñequio númeroˈ na maˈmo̱ⁿnaˈ xueeˈyoˈ. Tooˈ arpa lueena na jnda̱ tquiaa Tyˈo̱o̱tsˈom. ³ Cwitana luantsa cantyja na tjeiˈnˈmaaⁿñe Tyˈo̱o̱tsˈom joona ñequio lˈo̱ Moisés, tsaⁿ na ñejndiˈntjom nnoom, ndoˈ mati tana luantsa na cwilaˈtˈmaaⁿˈndyena Catsmaⁿ na tjeiˈnˈmaaⁿñê joona. Matsonaˈ:

⁵ Jnda̱ teinom na nmeiiⁿˈ, quia joˈ ntyˈiaya watsˈom cañoomˈluee, na jnda̱ jnaⁿ nacañoomticheⁿ yuu na mˈaaⁿ nquii Tyˈo̱o̱tsˈom. Juu joˈ yuu na tyolaˈwe nnˈaⁿ Israel ljo̱ˈ na teiljeii ljeii naqui quia na tyoleiˈñˈomna watsˈomliaa. ⁶ Ndoˈ joˈ joˈ jluiˈ ntquieeˈ ángeles. Cwileiˈchona ntquieeˈ nnom nawiˈ na nntjoom nnˈaⁿ. Cweeˈna liaa lino na canchiiˈ, na jeeⁿ caxueenaˈ. Ndoˈ cwii cwiindyena chuˈtyeⁿ tseiˈjndya cwii ˈnaⁿ na tuii ñˈeⁿ sˈomcajaⁿ. ⁷ Quia joˈ cwii tsaⁿˈñeeⁿ na ñequiee na cwitaˈndoˈ tquiaa ntquieeˈ watso na tuiinaˈ sˈomcajaⁿ nda̱a̱ ángelesˈñeeⁿ. Joonaˈ tooˈcheⁿ ñjom nawiˈ na jeeⁿ cwajndii na nntjoom nnˈaⁿ ee juu Tyˈo̱o̱tsˈom na ñequiiˈcheⁿ na wandoˈ, matseiwˈeeⁿ nnˈaⁿ tsjoomnancue. ⁸ Ndoˈ ndiocheⁿ yuu na mˈaaⁿ Tyˈo̱o̱tsˈom seintyjanaˈ ndioom ncˈe na jeeⁿ neiⁿncooˈ caxueeñê ndoˈ tjacantyja najneiⁿ. Meiⁿ tjaa ˈñeeⁿ juu nnda̱a̱ nncjaaquieeˈ joˈ joˈ hasta na jnda̱ teinom ntquieeˈ nawiˈ na nntjoom nnˈaⁿ na cwileiˈcho ntquieeˈ ángelesˈñeeⁿ.

Ntquieeˈ watso na ñjom nawiˈ na nntjoom nnˈaⁿ

16  Quia joˈ jndiiya najndeii teicˈuaa naquiiˈcheⁿ cañoomˈluee, tso juu nda̱a̱ ntquieeˈ ángelesˈñeeⁿ:

—Nmeiiⁿ ntquieeˈ watso na ñjom na cwajndii na matseiwˈii Tyˈo̱o̱tsˈom nnˈaⁿ. Catsaˈyoˈ, catsatuˈnquioˈyoˈ joonaˈ nnom tsjoomnancue.

² Quia joˈ juu ángel najndyee tjaaⁿ, tjacuˈnquioom nawiˈ na ñjom waso ˈnaaⁿˈaⁿ nnom tsjoomnancue. Ndoˈ jnaⁿˈ ntyjeˈ nnˈaⁿ na cho ljeii cwentaaˈ quiooˈjndii tquiee, ñequio nnˈaⁿ na cwilaˈtˈmaaⁿˈndye na jluiˈtsjaaⁿˈñeyoˈ. Cwajndii ntyjeˈñeeⁿ ndoˈ tileicatsuunaˈ.

³ Quia joˈ juu ángel najnda̱ we tjacuˈnquioom nawiˈ na ñjom waso ˈnaaⁿˈaⁿ nnom ndaaluee. Ndoˈ seicwaqueⁿnaˈ ndaaluee chaˈcwijom ntycwe niomˈ. Ndoˈ tja̱ chaˈtsoti na tandoˈ naquiiˈ ndaalueeˈñeeⁿ.

⁴ Jnda̱ joˈ juu ángel na jnda̱ ndyee tjacuˈnquioom nawiˈ na ñjom waso ˈnaaⁿˈaⁿ nˈom candaa ñequio chaˈtso joo yuu na cwinaaⁿˈ ndaa. Ndoˈ seicwaqueⁿnaˈ joonaˈ niomˈ. ⁵ Quia joˈ jndiiya na matseineiⁿ ángelˈñeeⁿ na machˈee cwenta ndaa. Matsoom nnom Tyˈo̱o̱tsˈom:

—ˈU Ta cwiluiindyuˈ na ljuˈ tsˈomˈ, mˈaaⁿˈ ndoˈ mˈaaⁿˈ, ndoˈ nacjeeˈ na jnaⁿjndyeenaˈ maxjeⁿ mˈaaⁿˈ. Macheˈ cantyja na matyˈiomyanaˈ na laaˈtiˈ macuˈxeⁿˈ nnˈaⁿ na tîcatueeˈndyecje njomˈ. ⁶ Ee naⁿˈñeeⁿ jnda̱ jlaˈcwjeena nnˈaⁿ na tqueⁿˈljuˈ nˈom, mati profetas. Ndoˈ jeˈ jeˈ macheˈ na joona cwiwena niomˈ, ee matyˈiomyanaˈ na catjoomna na ljoˈ.

⁷ Ndoˈ jndiiya na matseineiⁿ ángel na machˈee cwenta chom na ntyjo nomtsˈom, matso:

—Mayuuˈ na ljoˈ, ˈU Ta Tyˈo̱o̱tsˈom na matseiˈxmaⁿˈñˈeⁿˈ chaˈtso nnom najnda̱, macheˈ cantyja na matyˈiomyanaˈ ndoˈ majoˈndyoˈ na macuˈxeⁿˈ nnˈaⁿ.

⁸ Jnda̱ joˈ juu ángel na jnda̱ ñequiee tjacuˈnquioom nawiˈ na ñjom waso ˈnaaⁿˈaⁿ nacjooˈ ñeˈquioomˈ. Ndoˈ tquiaanaˈ najndeii ñeˈquioomˈ na nntseiconaˈ nnˈaⁿ. ⁹ Nioom tcondye nnˈaⁿ ncˈe na jeeⁿ jmeiⁿˈ ñeˈquioomˈ. Sa̱a̱ tîcalcweˈ nˈomna, meiⁿ tîcalaˈtˈmaaⁿˈndyena Tyˈo̱o̱tsˈom. Yacheⁿ tyotjeiiˈna ñˈoom ntjeiⁿ na wiˈnaˈ nacjooˈ xueeˈ nqueⁿ na waa najneiⁿ na tjoomˈm chaˈtso nawiˈñeeⁿ nacjoona.

¹⁰ Jnda̱ joˈ juu ángel na jnda̱ ˈom tjacuˈnquioom nawiˈ na ñjom waso ˈnaaⁿˈaⁿ nacjooˈ tio yuu na wacatyeeⁿ quiooˈjndii tquiee. Ndoˈ seijaaⁿñenaˈ chaˈtso ndyuaa na mˈaⁿ nnˈaⁿ na matsa̱ˈntjoom. Ndoˈ joo nnˈaⁿˈñeeⁿ tyonda̱ˈna tsaana na jeeⁿ cwajndii tyoquiinaˈ joona. ¹¹ Sa̱a̱ meiⁿ na luaaˈ, tîcalcweˈ nˈomna natia na cwilˈana. Yacheⁿ tyoluena ñˈoom ntjeiⁿ na wiˈnaˈ nacjooˈ Tyˈo̱o̱tsˈom na mˈaaⁿ cañoomˈluee ncˈe na chona ntyjeˈñeeⁿ ndoˈ jeeⁿ maquiinaˈ joona.

¹² Jnda̱ joˈ juu ángel na jnda̱ yom tjacuˈnquioom nawiˈ na ñjom waso ˈnaaⁿˈaⁿ tsˈom jndaa tˈmaⁿ Eufrates. Mana seicaaⁿnaˈ jndaaˈñeeⁿ, cha nntseicanaaⁿñenaˈ cwii nato ndyuaaˈñeeⁿ na nncwinom ntˈom nnˈaⁿ. Naⁿˈñeeⁿ cwiluiindye nnˈaⁿ na cwitsa̱ˈntjom ndyuaa jo ndoˈ na mandyowa ñeˈquioomˈ.

¹³ Quia joˈ ntyˈiaya ndyee espíritu na cwajndiindye. Cwii jluiˈnom naquiiˈ ˈndyoo juu catsoomjndii, cwiicheⁿ jluiˈnom ˈndyoo quiooˈjndii tquiee, ndoˈ cwiicheⁿ jluiˈnom ˈndyoo tsaⁿ na mañequiaa ñˈoom cantu. Matseijomnaˈ espírituˈñeeⁿ chaˈcwijom quiooˈ candaa. ¹⁴ Joo espírituˈñeeⁿ cwiluiindyena naⁿjndii. Jndye nnom ˈnaaⁿ cwilˈana na xocanda̱a̱ nntsˈaa na cweˈ tsˈaⁿ. Cwiˈoontyjaaˈna nnˈaⁿ na cwitsa̱ˈntjom chaˈwaati tsjoomnancue, na nlaˈtjomna naⁿˈñeeⁿ na nlˈana tiaˈ nacjooˈ Tyˈo̱o̱tsˈom, nqueⁿ na matseixmaⁿñˈeeⁿ chaˈtso nnom najnda̱, jnda̱ tqueⁿ xuee na nncuaa tiaˈ. ¹⁵ Matso nquii Jesucristo: “Queⁿˈyoˈ cwenta, majndeiito manncua̱caño̱o̱ⁿya ˈo chaˈna quichˈee tsaⁿcanchˈue. Jeeⁿ neiiⁿˈ juu tsˈaⁿ na mˈaaⁿcˈeeñe xjeⁿˈñeeⁿ na cwee liaaˈ, ee xocaluiˈjnaaⁿˈñê na ñecaseiˈñê.” ¹⁶ Quia joˈ ndyee naⁿjndiiˈñeeⁿ jlaˈtjomna chaˈtso nnˈaⁿ na cwitsa̱ˈntjom cwii joo yuu na jndyu Armagedón ñequio ñˈoom hebreo. Joˈ joˈ nlˈana tiaˈ nacjooˈ Tyˈo̱o̱tsˈom.

¹⁷ Jnda̱ joˈ juu ángel na jnda̱ ntquieeˈ tjacuˈnquioom nawiˈ na ñjom waso ˈnaaⁿˈaⁿ nacjooˈ jndye. Ndoˈ naquiiˈcheⁿ watsˈom cañoomˈluee teicˈuaa jndyeeˈ nqueⁿ na wacatyeeⁿ tio ˈnaaⁿˈaⁿ. Tsoom:

—Chaˈtso jnda̱ tuii.

¹⁸ Quia joˈ teitquiooˈ chom ntsuee, jndeii teicˈuaa, ndoˈ jeeⁿ tyolaˈxuaa ntsuee. Jndeii tyotsˈeii. Cantyjati na mˈaⁿ nnˈaⁿ tsjoomnancue, tijoom ñesˈeii chaˈna sˈeii luaaˈ. ¹⁹ Seityuiiˈñˈeⁿnaˈ tsjoom tˈmaⁿ Babilonia, ndoˈ seiˈndaaˈnaˈ jndye njoom chaˈwaa tsjoomnancue. Ee Tyˈo̱o̱tsˈom ticatsuuˈ tsˈoom nnˈaⁿ na laˈxmaⁿ cwentaaˈ tsjoom tˈmaⁿ Babilonia na nnjoom cantyja na ñelˈana. Sˈaaⁿ na jndeiˈnaˈ cweñˈeⁿna na ñjom waso ˈnaaⁿˈaⁿ na jeeⁿ matseiwˈeeⁿ joona. ²⁰ Quia joˈ macanda̱ tsuu chaˈtso ndyuaaxeⁿncwe, ndoˈ meiⁿ cwii sjo̱ tatquiooˈ. ²¹ Tquiaa tsaaⁿ tˈmaⁿ cjoo nnˈaⁿ na jnaⁿnaˈ tsjo̱ˈluee. Jaaˈnaˈ chaˈna wenˈaaⁿ kilos na cwiinaˈ. Ndoˈ jnaaⁿˈ joˈ tyolue nnˈaⁿ ñˈoom wiˈ na ntjeiⁿ nacjooˈ Tyˈo̱o̱tsˈom.