Beginning

Ang mga Pagpakamaayo nga Nabaton ni Job Sadto

29 Nagpadayon pa gid si Job sa paghambal, ² “Kon mabalik lang kuntani ang mga nagligad nga mga inadlaw sang ginabantayan pa ako sang Dios, ³ sang ginasanagan pa niya ang akon dalanon samtang nagalakat ako sa madulom. ⁴ Sadtong tion nga maayo pa ang akon kahimtangan, ang Dios amo ang akon suod nga abyan, kag ginapakamaayo niya ang akon panimalay. ⁵ Ginaupdan pa ako sadto sang Makagagahom nga Dios, kag kaupod ko pa ang akon mga anak. ⁶ Sadto nga tion, ang akon mga baka nagahatag sang madamo gid nga gatas, kag ang akon mga talamnan sang olibo nagahatag sang madamo gid nga lana. ⁷ Kon magkadto gani ako sa puwertahan sang banwa, kag mag-upod sa mga manugdumala sang banwa kon magmiting sila, ⁸ nagapahigad ang pamatan-on nga mga lalaki kon makita nila ako, kag ang mga tigulang nagatindog sa pagtahod sa akon. ⁹ Nagahipos bisan ang mga pangulo ¹⁰ kag ang dungganon nga mga tawo pagkakita nila sa akon. ¹¹ Ang bisan sin-o nga nakakita sa akon ukon nakabati sa akon maghambal, nagadayaw sa akon. ¹² Kay ginabuligan ko ang mga imol nga nagapangayo sang bulig kag ang mga ilo nga wala sing dalangpan. ¹³ Ginapakamaayo ako sang tagumatayon nga mga tawo nga akon ginbuligan, kag nalipay gid ang mga balo nga babayi nga akon man ginbuligan. ¹⁴ Ginahimo ko permi ang matarong kag husto; daw bayo kag turban ini nga akon ginasuksok. ¹⁵ Nangin pareho ako sang mata sa tawo nga bulag kag tiil sa tawo nga piang. ¹⁶ Nangin pareho ako sang isa ka amay sa mga imol, kag bisan ang mga estranghero ginbuligan ko sa ila mga kaso. ¹⁷ Gindula ko ang gahom sang malaot nga mga tawo kag ginluwas ang ila mga biktima.

¹⁸ “Naghunahuna ako nga magakabuhi ako sing malawig kag mapatay nga ginalibutan sang akon pamilya. ¹⁹ Kay pareho ako sadto sang mabakod nga kahoy nga nagapangalapkap ang mga gamot sa tubig kag permi ginatun-ogan ang mga sanga. ²⁰ Ginadayaw ako permi sang mga tawo kag permi ako mabaskog. ²¹ Nagahipos ang mga tawo kag nagapamati sing maayo sa akon mga laygay. ²² Pagkatapos ko hambal, wala na sila sang may idugang pa kay kontento sila sa akon ginhambal. ²³ Ginahandom nila ang akon mga pulong pareho sang ila paghandom sa ulan. Gusto gid nila ini nga pamatian. ²⁴ Daw indi sila makapati kon magyuhom ako sa ila;^[a] ang akon malipayon nga nawong nakapabaskog sa ila. ²⁵ Ginatudluan ko sila sang ila himuon pareho sa isa ka pangulo. Ginadumalahan ko sila pareho sa isa ka hari nga nagadumala sa iya mga soldado. Ginalipay ko sila kon nagakasubo sila.

30 “Pero karon ginayaguta ako sang mga tawo nga bata pa sang sa akon, nga ang ila mga amay indi gid masaligan. Mas masaligan pa gani ang akon mga ido nga nagabantay sang akon mga karnero. ² Ano gid bala ang makuha ko sa sini nga mga tawo nga mga maluya kag wala sing kusog? ³ Puwerte sa ila kaniwang sa sobra nga kinawad-on kag kagutom. Nagakitkit na lang sila sang mga kararuton^[b] sa kamingawan bisan kon gab-i. ⁴ Ginapanggabot nila kag ginakaon ang mga tanom sa kamingawan, bisan pa ang malas-ay nga gamot sang kahoy nga enebro. ⁵ Ginatabog sila palayo sa ila mga kasimanwa kag ginasinggitan nga daw sa mga kawatan. ⁶ Nagaestar na lang sila sa mamala nga mga ililigan sang tubig, sa mga guhab sang mga bato, kag sa mga buho sa duta. ⁷ Daw sa mga sapat sila nga nagauwang sa kagulangan, kag nagadas-ukanay sila sa puno sang mga kahoy-kahoy. ⁸ Wala sila sing pulos kag wala gani sing may nakakilala sa ila, kag gintabog sila sa ila duta.

⁹ “Kag karon ginatamay ako sang ila mga anak paagi sa kanta. Nangin kaladlawan ako sa ila. ¹⁰ Ginakangil-aran nila ako kag nagalikaw sila sa akon. Wala sila natahap sa pagdupla sa akon guya. ¹¹ Karon nga ginapaluya kag ginapaantos ako sang Dios, ginhimo nila ang ila gusto nga himuon sa akon. ¹² Ginasalakay ako sang sining malaot nga grupo. Nagabutang sila sang siod sa akon dalanon, kag ginatinguhaan gid nila ako nga laglagon. ¹³ Ginabalabagan nila ang akon alagyan sa paglaglag sa akon. Nagmadinalag-on sila bisan wala sing may nagabulig sa ila. ¹⁴ Ginasalakay nila ako pareho sa mga soldado nga nagaagi sa dako nga buho sang pader nga gin-guba. ¹⁵ Puwerte ang akon kahadlok, kag nadula ang akon dungog kag manggad pareho sa panganod nga ginpalid sang mabaskog nga hangin. ¹⁶ Kag karon daw sa mapatay na ako; wala untat ang akon pag-antos. ¹⁷ Kon gab-i nagangutngot ang akon mga tul-an; ang kasakit nga akon ginabatyag wala nagauntat. ¹⁸ Sa puwerte nga kusog sang Dios, ginliab niya ako. Gin-uyatan niya ako sa kuwelyo ¹⁹ kag ginhaboy sa lunang. Daw pareho na lang ako sa yab-ok kag abo.

²⁰ “Nagapanawag ako sa imo, O Dios, pero wala ka nagasabat. Nagatindog ako sa imo presensya, pero ginatulok mo lang ako. ²¹ Nangin mapintas ka sa akon. Gin-gamit mo ang imo puwerte nga gahom sa pagpaantos sa akon. ²² Daw pareho lang nga ginapapalid mo ako sa hangin kag ginapabulubaliskad sa bagyo. ²³ Nahibaluan ko nga ginadala mo ako sa lugar sang mga patay, sa lugar nga gintalana mo nga kadtuan sang tanan nga tawo.

²⁴ “Wala gid ako sing may ginhalitan nga tawo nga nagaantos kag nagapakitluoy tungod sa kalisod. ²⁵ Naghibi gani ako sa mga tawo nga nalisdan. Naluoy gid ako sa mga imol. ²⁶ Pero sang naglaom ako nga himuan ako sang maayo, malain ang ginhimo sa akon. Nagpangita ako sang kasanag, pero kadulom ang nag-abot sa akon. ²⁷ Wala untat ang kasakit sang akon balatyagon. Adlaw-adlaw nagaabot ang pag-antos sa akon. ²⁸ Nag-ilitom ang akon panit indi tungod sa kainit sang adlaw kundi sa balatian. Nagatindog ako sa katilingban kag nagapangayo sang bulig. ²⁹ Ang akon tingog daw pareho sa uwang sang talunon nga ido ukon huni sang bukaw. ³⁰ Nag-itom ang akon panit kag nagkalahulog ang kugan. Puwerte gid ang akon hilanat. ³¹ Nangin masubo ang sunata sang akon arpa kag plawta.”

31 “Nagpromisa ako sa akon kaugalingon nga indi gid magtulok nga may kailigbon sa mga dalaga. ² Kay ano nga balos ang ihatag sang Makagagahom nga Dios sa langit sa ginahimo sang tawo? ³ Indi bala kalaglagan kag kalalat-an para sa mga nagahimo sang kalautan? ⁴ Nahibaluan sang Dios ang tanan ko nga ginahimo. ⁵ Kon nagabinutig ako kag nagapangdaya, ⁶ kabay pa nga hukman ako sang Dios. Kay siya ang nakahibalo kon nakasala ako. ⁷ Kon wala ako magsunod sa husto nga dalan kag ginsunod ko ang kailigbon sang akon mga mata, kag gindagtaan ko ang akon kaugalingon, ⁸ kabay pa nga magkalapierdi ang akon mga tanom ukon kaunon ini sang iban. ⁹ Kon naganyat ako sang babayi ukon nagapangaluyag ako sa asawa sang akon kaingod, ¹⁰ kabay pa nga kuhaon ukon huliran sang iban nga lalaki ang akon asawa. ¹¹ Kay ang pagpanginbabayi makahuluya nga sala, kag dapat gid nga silutan ang nagahimo sina. ¹² Pareho ini sa makahalalit nga kalayo nga makalaglag sang tanan ko nga pagkabutang.

¹³ “Kon ginbaliwala ko ang kinamatarong sang akon mga suluguon sang magreklamo sila sa akon, ¹⁴ ano ang himuon ko kon hukman ako sang Dios? Ano ang isabat ko kon usisaon niya ako? ¹⁵ Indi bala nga ang Dios nga naghimo sa akon amo man ang naghimo sa akon mga suluguon?

¹⁶ “Kon wala ako nagbulig sa mga imol kag sa mga balo nga babayi nga nalisdan, ¹⁷ kag kon gindalukan ko sang pagkaon ang mga ilo, kabay pa nga silutan ako sang Dios. ¹⁸ Pero halin pa sang bataon ako ginaatipan ko na ang mga ilo; sa bug-os ko nga kabuhi wala ako nagpabaya sa mga balo nga babayi. ¹⁹ Kon may makita ako nga tawo nga nagaantos sa katugnaw tungod nga kulang siya sang bayo, ²⁰ ginahatagan ko siya sang bayo nga pangtugnaw nga hinimo halin sa bulbol sang akon mga karnero. Dayon nagapasalamat siya sa akon sing tinagipusuon. ²¹ Kon ginsakit ko sang akon kamot ang ilo, tungod kay nahibaluan ko nga may impluwensya ako sa korte, ²² kabay pa nga mautod ang akon butkon. ²³ Indi ko mahimo ina nga mga butang kay nahadlok ako sa silot kag sa gahom^[c] sang Dios.

²⁴ “Wala ako nagsalig sa akon manggad ukon naghunahuna nga makahatag ini sa akon sang seguridad. ²⁵ Wala ako nagpabugal sa akon madamo nga manggad kag sa tanan nga pagkabutang nga naangkon ko. ²⁶ Wala ako nagsimba sa adlaw nga nagasilak sing masanag, ukon sa bulan nga nagalakat sing matahom. ²⁷ Wala man naganyat sing sekreto ang akon tagipusuon sa pagsimba sini. ²⁸ Kon matuod nga ginhimo ko ini nga mga sala dapat ako silutan, kay nagluib ako sa Dios nga ara sa langit.

²⁹ “Wala ako nagkalipay sang nalaglag ang akon mga kaaway ukon sang nag-abot sa ila ang kalisod. ³⁰ Wala ako nagpakasala paagi sa pagpakamalaot sa ila. ³¹ Nahibaluan sang akon panimalay nga ginpakaon ko sing maayo ang mga nagbisita sa akon. ³² Wala ko ginpabay-an nga magtulog ang mga dumuluong bisan diin kay permi bukas ang akon puwertahan para sa ila. ³³ Wala ko gintago ang akon mga sala pareho sang ginahimo sang iban. ³⁴ Wala ako naghipos-hipos lang ukon nagpakuribong tungod sa kahadlok kon ano ang isiling sang mga tawo.

³⁵ “Kon may magpamati lang kuntani sa akon! Karon, handa ako sa pagpirma sa pagpamatuod nga wala ako sing sala. Kon may iakusar ang Makagagahom nga Dios sa akon, ginapangabay ko siya nga ihambal niya sa akon, kon indi gani isulat niya. ³⁶ Kay ikabit ko ini sa akon abaga ukon ibutang sa akon ulo nga daw sa korona sa pagpakita nga handa ako sa pag-atubang sini. ³⁷ Sugiran ko ang Dios sang tanan ko nga ginahimo. Magaatubang ako sa iya pareho sa pangulo nga wala nahuya.

³⁸ “Kon ginaabusuhan ko ang akon duta ukon ginkawat ko ini sa iban,^{[d] 39} ukon ginpalain ko ang buot sang mga nagaobra sa akon duta tungod nga ginkuha ko ang mga patubas nga wala sila pagbayari, ⁴⁰ kabay pa nga magtubo sa akon duta ang tunukon nga mga kahoy-kahoy kag ang mga hilamon sa baylo sang trigo kag barley.”

Diri natapos ang hambal ni Job.