Beginning

1 Tejemet, Pawlo wan Silvanus wan Timoteo, tiktuktiat ini tajkwilul itech ne sennemit ipal ne Tesalonika chanejket ijtik tuteku Teut wan tajtzin Yeshu Mawaltijtuk. ² Ma metzinmaka tetasujtalis wan nejmachnemilis ne Teut, tuteku, wan ne tajtzin Yeshu Mawaltijtuk.

³ Senpa tinemit pal tikilwiat ne Teut padiush anmupanpa, nukniwan, ika sea weytia ne anmutayulmatilis wan tepewi ne itetasujtalis muchi anmejemet ipal ne se iwan ne seuk, ⁴ hasta tejemetsan timuweymatit ijtik ne sejsennemit ipal ne Teut ipanpa ne anmutanejmachselilis wan anmutayulmatilis tik muchi ne anmutajtaejekulis wan ne ujuijkayu ne ankiseliat.

⁵ Yaja techilwitia ka ne Teut kichiwa ken muneki ipanpa tay yek pal anmuitat yejyek ipal ne itatekimakalis ne Teut, ika antaekuat ipanpa. ⁶ Ika nemi yek ipal Teut ma kintashtawi ne metzinpitziniat iwan tapitzinilis, ⁷ wan anmejemet, ká anmupitzinijtiwit, ma metzinhajkawa anmusewiat tuwan tik ne itaneshtilis ne tajtzin Yeshu tik ne ilwikak iwan tanawatianimet welit wey. ⁸ Ijtik tit yaja yawi kintzunkwi ne te kishmatit Teut wan te kitakamatit ne iyeknawatilis ne tutajtzin Yeshu. ⁹ Yejemet yawit muchiwat juzgar wan yawit wilewit pal senpa, wejka itachialis ne Teut wan ne itzitzinakalis ne itajpal, ¹⁰ kwak tzitzinaka witz iwan ne itajtayulmatini wan muchi ne tayulmatit yawit ishpuyawit ipanpa, ika muyulmatki tay tikikinakaket anmuishpan, tik uni tunal.

¹¹ Yajika senpa tiktajtanit ne Teut anmupanpa ma metzinhita yek pal metzinnutza wan ma yekawi muchi tay yek ipal ne iyekkayu wan ne tekit ipal tayulmatilis iwan itajpal, ¹² pal kiane ma tzitzinaka ne itukay tutajtzin Yeshu anmutech, wan anmejemet itech yaja, iwan ne itetasujtalis ne Teut wan tutajtzin Yeshu Mawaltijtuk.

Keman walas ne Tajtzin

2 Nukniwan, sejse mutajtaniliat keman yawi witz ne tutajtzin Yeshu Mawaltijtuk wan tiawit timusenputzuat iwan. Timetzintajtanit ² ma inte metzinyultzejtzelukan talul, wan ma inte shimajmawikan ipanpa se iijiu, nian se tay inat, nian se amat ken titajkwilujtuskiat tejemet, ne metzinhilwia ka walajsituk ne tunal ipal ne Tajtzin. ³ Ma inte aka kichiwa tatka pal metzinshijshikua, ika inte ijkiuni su achtu miak te kiajkawat ne Teut wan te muneshtia ne teyektakat, ne ikunew ne tapululis, ⁴ ne muchi kitejtenewa wan muajkukia ijpak muchi tay muilwia Teut o mutankwaketzalis, hasta yajasan yawi mutalia ka iteupantzin ne Teut muilwitia ken yajaya Teut.

⁵ Anka te ankielnamikit ka kwak ninemik anmutech nimetzinhilwij uni? ⁶ Wan ashan ankimatit tay ne inte kiajkawa kisa, ma muneshti tik ne tunal kwak muneki; ⁷ ika ne ichtaka ipal ne teyek kichiwaya itekiw, sema hasta ma muishti tatajku ne ká ashan te kiajkawa, ⁸ wan tipan yawi naka neshtijtuk ne teyek, ne tajtzin Yeshu yawi kiwilewa iwan ne iijiu ipal ne iten wan yawi kipulua kwak yaja muneshtia witz. ⁹ Yaja ajsi ika tekiti ne Tenewani iwan muchi ne itajpal wan sejse tetekia pal muishmati, wan te tejkia, ¹⁰ wan tashijshikua wan kinchiwilia tay teyek ne ká puliwit, ika te kinekituyat kitasujtat ne tejkia pal mumakishtiat, ¹¹ wan yajika ne Teut kituktia intech tashijshikulis pal yejemet kiyulmatit ne sanka, ¹² pal kiane yawit muchiwat juzgar muchi ne ká te kimatit ne tejkia wan kitat yek ne tay te yek.

Ne Teut metzinhishpejpen pal anmumakishtiat

¹³ Tejemet tinemit pal tikilwiat ne Teut padiush senpa anmupanpa, nukniwan tajtasujtatuk ipal ne Tajtzin, ika metzinhishpejpentuk ne Teut achtu wan kineki ma muchiwa anmuijiu ipal Teut wan ma shikyulmatikan ne tejkia pal anmumakishtiat. ¹⁴ Yajika nusan metzinnutztuk iwan ne tuyeknawatilis ma shikpiakan ne itzitzinakalis wey ne tutajtzin Yeshu Mawaltijtuk. ¹⁵ Kiane tel, nukniwan, shiyulchikawikan wan shikpachukan ne tay anmumachtijket ika ninatuk tik anmutakakilis wan ika nitajkwilujtuk tik tuamaw.

¹⁶ Ne tutajtzin Yeshu Mawaltijtuk yajasan, wan ne Teut ne tuteku ne techtasujtatuk wan techmakatuk itepalewilis pal senpa wan yek tejchialis ipanpa itetasujtalis, ¹⁷ ma kipalewi ne anmuyujyulu wan ma metzmaka fuerzaj tik muchi ne yejyek tekit wan palabraj.

Shiktajtanikan ne Teut

3 Pal titamit, nukniwan, shiktajtanikan ne Teut tupanpa pal ne ipalabraj ne Tajtzin mutalua wan muweychiwa kenha ken anmutech, ² wan pal timumakishtiat itech ne takamet ipal inteyek, ika te muchi kipiat tayulmatilis. ³ Yek ne Tajtzin ká kichiwa ka tichikawayat wan techishpelwia ma te techchiwili tatka ne inteyek. ⁴ Tikyulmatit ne Tajtzin anmupanpa, ika tikmatit ka ne tay titatuktiat ankichiwat wan ankichiwasket. ⁵ Ma kiwika ne Tajtzin ne anmuyujyulu itech ne itetasujtalis ne Teut wan ne itanejmachselilis ne Mawaltijtuk.

Shimutekipanukan anmejemetsan

⁶ Timetzintuktiat, nukniwan, tik itukay ne tutajtzin Yeshu Mawaltijtuk, ma shimukawakan wejka ne anmuiknew ká te kichiwa tatka wan te muwika ken tuwan anmumachtijtiwit. ⁷ Anmejemet kimatit ken muneki muchiwa ken tejemet, ika te tikchijket ijkiuni anmuwan: ⁸ nusan te tikwajket tamal takulijtuk ipal aka, sute titekitket wan tikutiaket ne tayua wan ne tunal pal kiane te timuchiwat se kimil ipal sejse anmejemet. ⁹ Inte ika te tiwelituskiat, sute pal tejemetsan timetzinmakat se pal antachiat wan ankichiwat kenha ken tejemet.

¹⁰ Nusan kwak tinemiket anmutech, timetzintuktijket ka su aka te kineki tekiti, ma te takwa. ¹¹ Ika titakaktiwit ka sejse muajsit ijtik anmejemet ká te kichiwat tatka nian tekitit, semaya muishtukat. ¹² Ne sejse ijkiuni, tikintuktiat wan tikintajtanit ipanpa ne tajtzin Yeshu Mawaltijtuk ma tentatziwikan wan ma mutekipanukan insel.

Tami

¹³ Anmejemet, nukniwan, maka shikutiakan kichiwat tay yek. ¹⁴ Asu aka te kitakamati tay tinatiwit tik ini amat, shikitakan yek ká yaja wan maka shimusenputzukan iwan, pal yaja ishpinawa, ¹⁵ wan maka shimumatikan ken se kineki metzinhijtakua, sute ma shiknawatikan ken anmuiknew.

¹⁶ Ne Tajtzin ipal nejmachnemilis ma metzinmaka ne nejmachnemilis nujme wan iwan muchi taiwan weli metzinmaka. Ma nemi ne Tajtzin anmuwan muchi!

¹⁷ Naja Pawlo nikijkwilua ini iwan ne numey pal nimetzintajpalua, ma shikishmatikan; ijkiuni nikchiwa tik muchi ne ajamat kwak nitajkwilua.

¹⁸ Ma nemi ne teutasujtalis ipal tutajtzin Yeshu Mawaltijtuk anmuwan muchi.