Beginning

Quiteneba̱c ca̱mc saˈ xbe̱n li Jesús

19  Laj Pilato quixtakla li Jesús chi saqˈuecˈ riqˈuin tzˈu̱m. ² Eb li soldado queˈxyi̱b jun li corona riqˈuin qˈuix ut queˈxqˈue saˈ xjolom li Jesús. Ut queˈxqˈue jun li caki tˈicr chirix xcomon li nequeˈrocsi li rey. ³ Ut queˈxye re: ―¡Sahak taxak saˈ a̱chˈo̱l, at xreyeb laj judío! chanqueb re. Ut queˈxsacˈ riqˈuin rukˈeb. ⁴ Laj Pilato co̱ cuiˈchic riqˈuineb laj judío ut quixye reheb: ―Xincˈam chak arin chirix cab re nak te̱nau nak ma̱ jun xma̱c xintau, chan. ⁵ Ut li Jesús qui‑el chirix cab. Cuan saˈ xjolom li corona li yi̱banbil riqˈuin qˈuix ut cuan li caki tˈicr chirix. Laj Pilato quixye reheb: ―Cueˈ li cui̱nk. Ilomak, chan. ⁶ Eb li nequeˈcˈacˈalen saˈ li templo ut eb li xbe̱nil aj tij queˈril li Jesús ut queˈxjap reheb ut queˈxye: ―¡Qˈue chiru cruz! ¡Qˈue chiru cruz! chanqueb. Ut laj Pilato quixye reheb: ―Cˈamomak la̱ex ut qˈuehomak chiru cruz cui te̱raj. La̱in ma̱ jun lix ma̱c xintau, chan. ⁷ Abanan eb laj judío queˈxye: ―La̱o cuan kachakˈrab ut li kachakˈrab naxye nak ta̱camsi̱k xban nak aˈan quixqˈue rib chokˈ Ralal li Dios.― ⁸ Nak quirabi li queˈxye, kˈaxal cuiˈchic quixucuac laj Pilato. ⁹ Qui‑oc cuiˈchic saˈ cab rochben li Jesús ut quixye re: ―Ye cue bar xatchal chak.― Abanan li Jesús ma̱ jun li a̱tin quixye. ¹⁰ Laj Pilato quixye re: ―¿Cˈaˈut nak incˈaˈ nacatchakˈoc? ¿Ma incˈaˈ nacanau nak cuan incuanquil cha̱qˈuebal chiru cruz ut cuan incuanquil cha̱cuachˈabanquil? chan re li Jesús. ¹¹ Li Jesús quixye re: ―Ma̱cˈaˈ raj a̱cuanquil saˈ inbe̱n cui ta incˈaˈ qˈuebil a̱cue xban li Dios. Ut li jun li xkˈaxtesin cue saˈ a̱cuukˈ re nak tatrakok a̱tin saˈ inbe̱n, aˈan kˈaxal cuiˈchic nim xma̱c cha̱cuu la̱at, chan. ¹² Ut chalen aˈan laj Pilato yo̱ chixsicˈbal chanru nak ta̱rachˈab li Jesús. Abanan eb laj judío queˈxjap reheb ut queˈxye: ―Cui nacacuachˈab li cui̱nk aˈan, la̱at ma̱cuaˈakat chic rami̱g li Acuabej César. Li ani naraj xqˈuebal rib chokˈ rey, li jun aˈan xicˈ chic naril li Acuabej, chanqueb. ¹³ Nak laj Pilato quirabi li queˈxye, quixcˈam li Jesús chirix cab. Quicˈojla saˈ li naˈajej li narakoc cuiˈ a̱tin. Li cˈojleba̱l aˈan cuan saˈ xbe̱n li tusbil pec. Cˈajoˈ xchˈinaˈusal. Gabata xcˈabaˈ li naˈajej aˈan saˈ li a̱tinoba̱l hebreo. ¹⁴ Cuaˈleb na re cutan nak quicˈulman aˈin. Li tenamit yo̱queb chixcauresinquil li ninkˈe Pascua, li ta̱ticla̱k saˈ li cutan jun chic. Laj Pilato quixye reheb: ―Cueˈ le̱ rey, chan. ¹⁵ Queˈxjap cuiˈchic reheb chixyebal: ―¡Qˈueomak chiru cruz! ¡Qˈuehomak chiru cruz! Ut laj Pilato quixye reheb: ―¿Ma te̱raj nak tinqˈue chiru cruz le̱ rey? chan. Eb li xbe̱nil aj tij queˈxye: ―Jun ajcuiˈ li karey cuan. Aˈan li Acuabej César, chanqueb. ¹⁶ Laj Pilato quixkˈaxtesi li Jesús saˈ rukˈeb li soldado re nak ta̱qˈuehekˈ chiru cruz. Ut queˈxcˈam li Jesús.

Joˈcaˈin nak quiqˈueheˈ li Jesús chiru cruz

¹⁷ Li Jesús yo̱ chixpakonquil lix cruz nak co̱ saˈ li naˈajej Xbakel Xjolom Camenak xcˈabaˈ. Saˈ li a̱tinoba̱l hebreo Gólgota xcˈabaˈ. ¹⁸ Ut aran queˈxqˈue chiru cruz. Ut queˈxqˈue cuib chic li cui̱nk chiru cruz rochben. Jun queˈxqˈue saˈ xnim ukˈ ut li jun chic queˈxqˈue saˈ xtzˈe. Li cruz li queˈxqˈue cuiˈ li Jesús quicana saˈ xyi. ¹⁹ Laj Pilato quixtzˈi̱ba jun li retalil ut queˈxqˈue saˈ xjolom li cruz li quiqˈueheˈ cuiˈ li Jesús. Li retalil aˈan quixye: Li Jesús aj Nazaret, aˈan lix reyeb laj judío. ²⁰ Nabaleb laj judío queˈril li retalil li quitzˈi̱ba̱c, xban nak li naˈajej li quiqˈueheˈ cuiˈ chiru cruz li Jesús nachˈ cuan riqˈuin li tenamit. Li retalil tzˈi̱banbil saˈ eb li a̱tinoba̱l hebreo, griego ut latín. ²¹ Incˈaˈ quicuulac chiruheb lix xbe̱nil aj tij li quixtzˈi̱ba. Queˈxye re laj Pilato: ―Ma̱tzˈi̱ba nak aˈan xreyeb laj judío. Tzˈi̱ba ban nak aˈan xyehoc re, “La̱in xreyeb laj judío”, chanqueb. ²² Ut laj Pilato quixye reheb: ―Li cˈaˈru xintzˈi̱ba, xintzˈi̱ba. Incˈaˈ chic ta̱jalma̱nk, chan. ²³ Nak ac xeˈxqˈue chiru cruz li Jesús, eb li soldado queˈxcˈam li rakˈ chokˈ reheb. Ca̱hib e̱chal queˈrisi, jun re li junju̱nk chi soldado. Ut queˈxcˈam ajcuiˈ li rakˈ li ma̱cˈaˈ xbojbal. Junaj ru lix quembal. ²⁴ Queˈxye chi ribileb rib: ―Incˈaˈ takapeji. Us takabu̱li rix re rilbal ani ta̱e̱chani̱nk re, chanqueb. Joˈcan queˈxba̱nu re nak ta̱tzˈaklok ru li tzˈi̱banbil saˈ li Santil Hu li naxye chi joˈcaˈin: Queˈxjeqˈui chirixeb lin tˈicr ut queˈxbu̱li rix li cuakˈ. ²⁵ Nachˈ riqˈuin li cruz xakxo li xnaˈ li Jesús rochben lix María li ras. Aˈan li rixakil laj Cleofas. Ut cuan ajcuiˈ aran lix María, Magdala xtenamit. ²⁶ Li Jesús quiril lix naˈ ut quiril ajcuiˈ lix tzolom li raro xban. Li Jesús quixye re lix naˈ: ―At innaˈ, li cui̱nk aˈin, aˈan chic la̱ yum.― ²⁷ Ut quixye re lix tzolom: ―Li ixk aˈin, aˈan chic la̱ naˈ.― Ut chalen aˈan lix tzolom quixcˈul lix naˈ li Jesús riqˈuin saˈ li rochoch.

Joˈcaˈin nak quicam li Jesús

²⁸ Chirix chic aˈan quixnau li Jesús nak ac xtzˈakloc ru chixjunil. Re nak ta̱tzˈaklok ru li tzˈi̱banbil saˈ li Santil Hu, li Jesús quixye: ―Ta̱chakik cue, chan. ²⁹ Cuan aran jun secˈ nujenak chi vinagre. Queˈxtzˈa saˈ li vinagre jun li esponja ut queˈxtaksi saˈ ruˈuj jun li rukˈ cheˈ hisopo xcˈabaˈ ut queˈxqˈue saˈ re. ³⁰ Li Jesús quirucˈ li vinagre ut quixye: ―Anakcuan xtzˈakloc ru chixjunil.― Quixxulub lix jolom ut quicam. ³¹ Eb li nequeˈtaklan saˈ xya̱nkeb laj judío queˈxtzˈa̱ma chiru laj Pilato re nak tixtakla xtokbal xbakel li raˈeb li queˈqˈueheˈ chiru cruz re nak teˈca̱mk chi junpa̱t. Queˈraj nak teˈisi̱k chiru cruz xban nak cuulac re li hiloba̱l cutan. Yo̱queb chixcauresinquil ribeb re li ninkˈe Pascua xban nak aˈan li kˈaxal lokˈ chiruheb. ³² Queˈchal eb li soldado ut queˈxtok xbakel li raˈeb li cuib chi cui̱nk li queˈqˈueheˈ chiru cruz rochben li Jesús. ³³ Abanan nak queˈcuulac cuan cuiˈ li Jesús, queˈril nak ac xcam ut incˈaˈ queˈxtok xbakel li raˈ. ³⁴ Jun li soldado quixhop xcˈatk xsaˈ riqˈuin lix chˈi̱chˈ ut saˈ junpa̱t qui‑el li quicˈ ut qui‑el ajcuiˈ li haˈ. ³⁵ La̱in quin‑iloc re chi tzˈakal li cˈaˈru quicˈulman ut li cˈaˈru yo̱quin xyebal e̱re tzˈakal ya̱l. Yo̱quin chixyebal e̱re aˈin re nak te̱pa̱b nak tzˈakal ya̱l nak quicˈulman chi joˈcan. ³⁶ Quicˈulman chi joˈcan re nak ta̱tzˈaklok ru li tzˈi̱banbil saˈ li Santil Hu: Ma̱ jun lix bakel ta̱tokma̱nk. ³⁷ Ut tzˈi̱banbil ajcuiˈ saˈ li Santil Hu: Eb aˈan teˈril li ani quihopeˈ chi chˈi̱chˈ.

Joˈcaˈin nak quimukeˈ li Jesús

³⁸ Jun li cui̱nk aj José xcˈabaˈ Arimatea xtenamit quicuulac riqˈuin laj Pilato chixtzˈa̱manquil chiru nak tixqˈue lix tzˈejcual li Jesús re, re tixmuk. Laj José, aˈan jun reheb li nequeˈpa̱ban re li Jesús. Abanan incˈaˈ quixye xban nak quixucuac xbaneb li nequeˈtaklan saˈ xbe̱neb laj judío. Laj Pilato quixye re nak ta̱ru̱k tixmuk, ut laj José co̱ chixcˈambal li camenak. ³⁹ Laj Nicodemo li quicuulac riqˈuin li Jesús chi kˈek, co̱ rochben laj José. Quixcˈam na oˈcˈa̱lak (100) libra li sununquil ban yi̱banbil riqˈuin mirra ut áloes. ⁴⁰ Li cuib chi cui̱nk queˈxcˈam lix tzˈejcual li Jesús ut queˈxlan riqˈuin li cha̱bil tˈicr lino ut queˈxqˈue li sununquil ban joˈ cˈaynakeb chi mukuc eb laj judío. ⁴¹ Saˈ li naˈajej li quiqˈueheˈ cuiˈ li Jesús chiru cruz cuan jun si̱r li acui̱mk. Aran cuan jun li mukleba̱l toj acˈ. Toj ma̱ ani mukbil aran. ⁴² Aran queˈxmuk li Jesús xban nak nachˈ cuan li naˈajej aˈan ut queˈraj ru xmukbal chi junpa̱t xban nak cuulac re li hiloba̱l cutan.

Li Jesús quicuacli cuiˈchic chi yoˈyo saˈ xya̱nkeb li camenak

20  Saˈ li xbe̱n li cutan re li xama̱n nak toj ma̱jiˈ nasake̱u co̱ lix María Magdala xtenamit saˈ li mukleba̱l. Nak quicuulac cuan cuiˈ li mukleba̱l, quixqˈue retal nak ac isinbil chic li nimla pec li queˈxqˈue chire li mukleba̱l. ² Co̱ saˈ a̱nil riqˈuin laj Simón Pedro ut riqˈuin li jun chic xtzolom li Jesús li raro xban, ut quixye reheb: ―Xeˈrisi li Ka̱cuaˈ saˈ li mukleba̱l ut incˈaˈ nakanau bar ta xeˈxqˈue, chan. ³ Co̱eb saˈ li mukleba̱l laj Pedro rochben li jun chic xtzolom li Jesús. ⁴ Co̱eb saˈ a̱nil xcabichaleb. Ut lix tzolom jun chic kˈaxal cau quia̱linac chiru laj Pedro ut aˈan xbe̱n cua quicuulac saˈ li mukleba̱l. ⁵ Quixcˈutzub rib chi iloc chi saˈ. Quiril li tˈicr li queˈxlan cuiˈ li Jesús. Abanan incˈaˈ qui‑oc toj chi saˈ. ⁶ Quicuulac laj Pedro toj chi ixbej. Ticto qui‑oc chi saˈ li mukleba̱l ut quiril li tˈicr sokˈso aran. ⁷ Cuan ajcuiˈ aran li tˈicr li queˈxbacˈ cuiˈ lix jolom li Jesús. Moco cuan ta saˈ xya̱nk li tˈicr. Jalan basbo cuiˈ xjunes. ⁸ Ut qui‑oc ajcuiˈ chi saˈ li mukleba̱l li tzolom li quicuulac xbe̱n cua. Quiril li tˈicr aran ut quixpa̱b nak ac xcuacli cuiˈchic chi yoˈyo li Jesús. ⁹ Toj ma̱jiˈ queˈxtau ru chi tzˈakal li tzˈi̱banbil saˈ li Santil Hu li naxye nak tento ta̱cuacli̱k cuiˈchic chi yoˈyo saˈ xya̱nkeb li camenak. ¹⁰ Ut eb lix tzolom queˈsukˈi cuiˈchic saˈ li cab li cuanqueb cuiˈ.

Li Jesús quixcˈutbesi rib chiru lix María, Magdala xtenamit

¹¹ Lix María cuan chire li mukleba̱l. Yo̱ chi ya̱bac. Quixcˈutzub rib chi iloc chi saˈ li mukleba̱l. ¹² Quiril cuib li ángel sak li rakˈeb. Cˈojcˈo̱queb aran bar quicuan cuiˈ li Jesús. Jun cuan saˈ xjolom ut jun cuan chi rok. ¹³ Queˈxye re: ―At ixk, ¿cˈaˈut nak yo̱cat chi ya̱bac?― Lix María quixye reheb: ―Yo̱quin chi ya̱bac xban nak xeˈrisi li Ka̱cuaˈ arin ut incˈaˈ ninnau bar xeˈxqˈue.― ¹⁴ Saˈ li ho̱nal aˈan, lix María qui‑iloc chirix ut quiril li Jesús xakxo aran, abanan incˈaˈ quixnau nak aˈan ta li Jesús. ¹⁵ Li Jesús quixye re: ―At ixk, ¿cˈaˈut nak yo̱cat chi ya̱bac? ¿Ani nacasicˈ? chan. Saˈ xchˈo̱l lix María nak aˈan aj ilol acui̱mk ut quixye re: ―Ka̱cuaˈ, cui la̱at xatcˈamoc re, ba̱nu usilal, ye cue bar xaqˈue re nak tincˈam, chan. ¹⁶ Li Jesús quixye re: ―¡María!― Quixsukˈisi rib lix María ut quixye saˈ ra̱tinoba̱l aj hebreo: ―Raboni.― (Chi jalbil ru naraj naxye aj tzolonel). ¹⁷ Li Jesús quixye re: ―Mina̱bay. Canabin chi xic. Tento nak tinxic riqˈuin lin Yucuaˈ. Ayu ut ye reheb lin herma̱n nak xic cue riqˈuin lin Yucuaˈ. Aˈan ajcuiˈ le̱ yucuaˈ la̱ex. Aˈan lin Dios ut aˈan ajcuiˈ le̱ Dios la̱ex, chan li Jesús. ¹⁸ Co̱ lix María ut quixye reheb lix tzolom li Jesús nak quiril ru li Ka̱cuaˈ Jesús ut quixye ajcuiˈ reheb chixjunil li quiyeheˈ re xban.

Li Jesús quixcˈutbesi rib chiruheb lix tzolom

¹⁹ Saˈ li xbe̱n cutan re li xama̱n, nak ac oc re li kˈojyi̱n, queˈxchˈutub ribeb lix tzolom li Jesús. Tzˈaptzˈo chi us lix puertil li cab li chˈutchˈu̱queb cuiˈ xban nak queˈxucuac xbaneb li nequeˈtaklan saˈ xbe̱neb laj judío. Xaka̱mil li Jesús chiruheb ut quixye reheb: ―Chicua̱nk taxak li tuktu̱quil usilal e̱riqˈuin, chan reheb. ²⁰ Ut quixcˈut chiruheb li rukˈ ut lix cˈatk xsaˈ li quihopeˈ. Cˈajoˈ nak queˈsahoˈ saˈ xchˈo̱leb lix tzolom nak queˈril cuiˈchic ru li Ka̱cuaˈ. ²¹ Li Jesús quixye cuiˈchic reheb: ―Chicua̱nk taxak li tuktu̱quil usilal e̱riqˈuin. Joˈ nak xinixtakla chak lin Yucuaˈ la̱in, joˈcan ajcuiˈ nak texintakla la̱ex, chan. ²² Ut nak quixye aˈan, quirapuheb ut quixye reheb: ―Cˈulumak li Santil Musikˈej. ²³ Li ani te̱cuy xma̱c la̱ex, ta̱cuyekˈ ajcuiˈ xma̱c xban li Dios. Ut li ani incˈaˈ te̱cuy xma̱c la̱ex, incˈaˈ ajcuiˈ ta̱cuyekˈ xma̱c xban li Dios, chan li Jesús.

Nak quiril li retalil li claux saˈ rukˈ li Jesús, laj Tomás quixpa̱b nak yoˈyo chic

²⁴ Laj Tomás, aˈan jun reheb lix tzolom cablaju, li nequeˈxye ajcuiˈ lut re. Aˈan ma̱ ani saˈ xya̱nkeb nak quixcˈutbesi rib li Jesús chiruheb. ²⁵ Li rech aj tzolonelil queˈxye re: ―Xkil ru li Ka̱cuaˈ, chanqueb re. Abanan laj Tomás quixye reheb: ―Cui incˈaˈ tincuil li retalil li claux saˈ rukˈ ut cui incˈaˈ tinqˈue li ruˈuj cuukˈ saˈ xnaˈaj li claux ut cui incˈaˈ tinchˈic li cuukˈ saˈ xcˈatk xsaˈ, la̱in incˈaˈ tinpa̱b nak xcuacli cuiˈchic chi yoˈyo, chan laj Tomás. ²⁶ Ac xnumeˈ chic cuukub cutan nak queˈxchˈutub cuiˈchic ribeb lix tzolom li Jesús. Laj Tomás cuan saˈ xya̱nkeb. Tzˈaptzˈo̱queb lix puertil li cab chi us. Nak queˈril ac xaka̱mil li Jesús chiruheb ut quixye reheb: ―Chicua̱nk taxak li tuktu̱quil usilal e̱riqˈuin, chan. ²⁷ Tojoˈnak quixye re laj Tomás: ―Il chi us li cuukˈ. Chˈic li ruˈuj la̱ cuukˈ arin saˈ xnaˈaj li claux. Ut chˈic la̱ cuukˈ saˈ xcˈatk lin saˈ. Chatpa̱ba̱nk. ¿Cˈaˈut nak incˈaˈ xapa̱b nak xincuacli cuiˈchic chi yoˈyo?― ²⁸ Ut laj Tomás quixye re: ―¡At Ka̱cuaˈ, at inDios!― ²⁹ Li Jesús quixye re: ―La̱at toj xacuil cuu, tojoˈnak xina̱pa̱b. Abanan la̱in ninye a̱cue, us xak reheb li nequeˈpa̱ban cue chi incˈaˈ xeˈril cuu, chan li Jesús re.

Li hu aˈin tzˈi̱banbil re nak te̱nau nak li Jesús, aˈan li Cristo li Ralal li Dios

³⁰ Nabal chic li milagro quixba̱nu li Jesús chiruheb lix tzolom li incˈaˈ tzˈi̱banbil retalil saˈ li hu aˈin. ³¹ Abanan li joˈ qˈuial tzˈi̱banbil retalil saˈ li hu aˈin, quitzˈi̱ba̱c re nak te̱pa̱b nak li Jesús, aˈan li Cristo. Aˈan li Ralal li Dios. Quitzˈi̱ba̱c re nak riqˈuin xpa̱banquil ta̱cua̱nk e̱yuˈam chi junelic saˈ xcˈabaˈ aˈan.

Li Jesús quixcˈutbesi rib chiruheb cuukub lix tzolom

21  Mokon chic quixcˈutbesi cuiˈchic rib li Jesús chiruheb lix tzolom chire li palau Tiberias. Joˈcaˈin nak quixcˈut rib chiruheb: ² Chˈutchˈu̱queb laj Simón Pedro ut laj Tomás li nayeheˈ lut re, ut laj Natanael, Caná xtenamit li cuan saˈ xcue̱nt Galilea. Cuanqueb ajcuiˈ aran li ralal laj Zebedeo ut cuibeb chic lix tzolom li Jesús. ³ Laj Simón Pedro quixye reheb: ―La̱in xic cue chi caribc, chan. ―Toxic ajcuiˈ la̱o cha̱cuix, chanqueb re. Ut queˈoc saˈ jun li jucub ut queˈxnumsi li kˈojyi̱n chi caribc. Abanan ma̱ jun li car queˈxchap. ⁴ Nak ac yo̱ chic chi sake̱uc, li Jesús quixcˈutbesi cuiˈchic rib chiruheb chire li palau. Abanan eb lix tzolom incˈaˈ queˈxnau nak aˈan li Jesús. ⁵ Quixye li Jesús reheb: ―Ex cualal incˈajol, ¿ma xechap li car? chan. Eb aˈan queˈchakˈoc ut queˈxye: ―Ma̱ jun xkachap.― ⁶ Li Jesús quixye reheb: ―Cutumak le̱ yoy chixcˈatk li jucub, saˈ le̱ nim re nak te̱chap li car, chan. Ut queˈxcut lix yoy saˈ li haˈ ut incˈaˈ chic queˈxcuy risinquil xban xqˈuial li car li queˈxchap. ⁷ Ut lix tzolom li Jesús, li raro xban, quixye re laj Pedro: ―¡Aˈan li Ka̱cuaˈ!― Ut laj Pedro, nak quirabi nak aˈan li Ka̱cuaˈ, quixqˈue cuiˈchic li rakˈ chirix xban nak quirisi nak qui‑oc chi caribc, ut quixcut rib saˈ li haˈ re ta̱xic riqˈuin li Jesús. ⁸ Ut eb lix comon queˈchal saˈ li jucub. Yo̱queb chixquelonquil lix yoy nujenak chi car. Moco najt ta cuanqueb chire li palau, yal ocˈa̱l metro tana. ⁹ Nak queˈel saˈ li jucub queˈril nak cuan jun li xam cˈubcˈu. Li Jesús yo̱ chixpombal jun li car saˈ xbe̱n li ru xam ut cuan ajcuiˈ caxlan cua riqˈuin. ¹⁰ Li Jesús quixye reheb: ―Cˈamomak chak cuib oxibak li car li xechap.― ¹¹ Laj Simón Pedro qui‑oc saˈ li jucub ut quixquelo li yoy chi chˈochˈel nujenak chi ni̱nki car. Jun ciento riqˈuin oxlaju roxcˈa̱l (153) li car cuan saˈ li yoy. Usta kˈaxal nabaleb li car cuan chi saˈ, abanan incˈaˈ quipejeˈ li yoy. ¹² Li Jesús quixye reheb: ―Quimkex ut cuaˈinkex.― Ut ma̱ jun reheb lix tzolom quiraj xpatzˈbal re ma aˈan li Ka̱cuaˈ xban nak ac nequeˈxnau nak aˈan li Ka̱cuaˈ. ¹³ Ut li Jesús quixchap li caxlan cua ut quixqˈue reheb. Ut quixqˈue ajcuiˈ li car. ¹⁴ Aˈin li rox sut nak quixcˈutbesi cuiˈchic rib li Jesús chiruheb lix tzolom nak ac xcuacli cuiˈchic chi yoˈyo saˈ xya̱nkeb li camenak.

Li Jesús quixye re laj Pedro nak ta̱rileb lix carner

¹⁵ Nak ac xeˈcuaˈac, li Jesús quixye re laj Simón Pedro: ―At Simón, ralalat laj Jonás, ¿ma kˈaxal niquina̱ra chiruheb aˈin?― Laj Pedro quixye re: ―Ka̱cuaˈ, la̱at nacanau nak nacatinra, chan. Ut li Jesús quixye re: ―Chacuilakeb li cualal incˈajol li toj kˈuneb xchˈo̱l saˈ lix pa̱ba̱leb joˈ jun li pastor narileb lix cocˈ carner.― ¹⁶ Ut li Jesús quixye cuiˈchic re: ―At Simón, ralalat laj Jonás, ¿ma niquina̱ra?― Laj Pedro quixye: ―Ka̱cuaˈ, la̱at nacanau nak nacatinra.― Ut li Jesús quixye re: ―Chacuilakeb li cualal incˈajol joˈ jun li pastor narileb lix carner, chan. ¹⁷ Ut li Jesús quixpatzˈ cuiˈchic re rox sut: ―At Simón, ralalat laj Jonás, ¿ma niquina̱ra?― Ut quirahoˈ saˈ xchˈo̱l laj Pedro xban nak li Jesús quixpatzˈ re rox sut “¿ma niquina̱ra?”. Joˈcan nak quixye re li Jesús: ―Ka̱cuaˈ, la̱at nacanau chixjunil li cˈaˈak re ru. ¡La̱at nacanau nak nacatinra!― Ut li Jesús quixye cuiˈchic re: ―Chacuilakeb li cualal incˈajol joˈ jun li pastor narileb lix carner. ¹⁸ Relic chi ya̱l ninye a̱cue nak toj sa̱jat, nacabacˈ a̱saˈ a̱junes ut nacatxic yalak bar nacacuaj xic. Abanan nak ac ti̱xakat chic, ta̱yeˈ la̱ cuukˈ ut jalan ta̱bacˈok re ut tatxcˈam bar incˈaˈ nacacuaj xic, chan. ¹⁹ Riqˈuin li a̱tin aˈin li quixye li Jesús, yo̱ chixyebal chanru nak ta̱camsi̱k laj Pedro. Ut riqˈuin xcamic tixqˈue xlokˈal li Dios. Nak ac xye aˈin, li Jesús quixye re laj Pedro: ―China̱ta̱ke, chan re.

Laj Pedro quixpatzˈ cˈaˈru tixcˈul li tzolom li raro xban li Jesús

²⁰ Laj Pedro quixsukˈisi rib ut quiril lix tzolom li Jesús, li raro xban, yo̱ chi xic chirixeb. Aˈan lix tzolom li quipatzˈoc re li Jesús nak yo̱queb chi cuaˈac, “¿Ani ta̱kˈaxtesi̱nk a̱cue, at Ka̱cuaˈ?” ²¹ Nak laj Pedro quiril aˈan, quixpatzˈ re li Jesús: ―Ut li cui̱nk aˈan, Ka̱cuaˈ, ¿ma tixcˈul joˈ tincˈul la̱in? chan. ²² Li Jesús quixye re: ―Cui la̱in tincuaj nak yoˈyo̱k aˈan toj tincˈulu̱nk cuiˈchic, ¿cˈaˈru ta̱cuaj re la̱at? La̱at qˈue a̱chˈo̱l chinta̱kenquil, chan li Jesús re laj Pedro. ²³ Joˈcan nak qui‑el resil saˈ xya̱nkeb laj pa̱banel nak li jun aˈan incˈaˈ ta̱ca̱mk. Abanan ma̱cuaˈ joˈcan quixye li Jesús. Incˈaˈ quixye nak incˈaˈ ta̱ca̱mk. Caˈaj cuiˈ quixye, “Cui la̱in tincuaj nak yoˈyo̱k toj tincˈulu̱nk, ¿cˈaˈru ta̱cuaj re la̱at?” ²⁴ Ut li tzolom aˈan, aˈan la̱in laj Juan. La̱in quin‑iloc re li cˈaˈru quicˈulman ut xinchˈolob xya̱lal saˈ li hu aˈin. Ut la̱o nakanau nak tzˈakal ya̱l li cˈaˈru xintzˈi̱ba saˈ li hu aˈin. ²⁵ Toj cuan chic nabal li cˈaˈak re ru quilajxba̱nu li Jesús. Cui ta tzˈi̱banbil retalil chi xjunju̱nkal, la̱in ninye nak ma̱ jokˈe raj ta̱tzˈaklok li ruchichˈochˈ chokˈ xnaˈaj li hu li ta̱tzˈi̱bama̱nk cuiˈ retalil. Joˈcan taxak.