Beginning
Zakay
19 Wan kalak wan panuk ijtik Yerijo. 2 Wan nemik se takat itukay Zakay, yaja ne tumintepewani wey wan kipiatuya wey tumin. 3 Kinekituya kita ne Yeshu pal kimati ká yaja, wan te welituya ipanpa ne miaktal, ika chapachin. 4 Wan kiski mutalua wan kutejkuk ijpak se puchut ka iishpan pal weli kita kan yawi panu. 5 Wan kwak ajsik né, tachishki ikajku wan kilwij:
—Zakay, shijisiwi, shaltemu, ashan niaw nikuchi tik ne mukal.
6 Wan ijisiwki, kutemuk wan kinamik iwan pakilis. 7 Wan kwak kitaket, muchi pejket kikinakat wan inat ka kalakik ichan se takat tateyekchiwa. 8 Zakay muketzki wan kilwij ne Tajtzin:
—Shikita Nutajwan, nikinmaka ne tajku ipal ne nupalwan ne munekit. Wan asu nikshijshikuj aka wan nikishtilij tatka, niaw niktashtawia nawpa.
9 Ne Yeshu kilwij:
—Tik ini tunal, muchijki tamakishtilis tik ini kal, ika nusan ikunew Abraham! 10 Ika walaj ne Itelpuch ne Takat pal kitemua wan kipalewia ká ne pulijtuk.
Majtakti dolar
11 Kwak nemituyat kikakit muchi ini, kinhilwij ukse casoj ika inte nemituya wejka Yerushalem wan yejemet inat katka ka yawi muneshtia ne itatekimakalis ne Teut nemanhachin. 12 Inak tel:
—Se tajtzin wey yajki ka se tal sujsul wejka pal muchiwa tatuktiani ka né wan walmukwepa. 13 Kinnutzki majtakti pal ne itejtekitini wan kinmakak majtakti dolar, wan kinhilwij:
"Shikpiakan hasta ma niwiki."
14 Ne techantakamet kishijiat katka wan kintuktijket noymet ka iipan inat:
"Inte tiknekit ma techtukti yajini."
15 Wan kwak kikwijtuk ne tatuktilis wan walejkuk ichan, inak ma kalinnutzakan uni tekitinimet ká kinmakatuk ne tumin pal kimati tay kichijtiwit iwan. 16 Ajsik ne achtu wan ina:
"Tajtzin, ne mudolar kalwikatuk uk majtakti dolar!"
17 Wan kilwij:
"Yeka! Tiyek tekitini, ika iwan se chiupi tikchijki tay yek; yajika shikpia tatuktilis ijpak majtakti techan."
18 Wan walaj seuk, ina:
"Tajtzin, ne mudolar kichijki makwil dolar."
19 Nusan kilwij:
"Taja nusan shikpia makwil techan."
20 Wan walaj ne seuk, ina:
"Tajtzin, nikan nemi ne mudolar. Nikanki ijtik se kwachti, 21 ika nimajmawi ika taja titakat takwawak: tikitzkia ne tay inte tiktalij wan tikpishka ne tay inte tiktukak."
22 Wan kilwia:
"Titekitini teyek! Taja tinak, wan ijkiuni niaw nimetzchiwa juzgar: tikmatiaya ka naja nitakat takwawak, ka nikitzkia tay inte niktalij wan nikpishka tay inte niktukak, 23 wan asu ijkiuni, taika te tikwikak ne tumin kan nemi ne kalpia, pal kiane, kwak niwitz, ma nikana ne nutumin iwan ne talilijtuk?"
24 Wan kinhilwij ne nemituyat ka né:
"Shikishtilikan ne dolar wan shikmakakan ne kipia majtakti dolar."
25 Wan kilwijket:
"Tajtzin, kipiaya majtakti dolar!"
26 [Wan inak:]
"Nimetzinhilwia ka kimakasket ká ne kipia; wan ká ne inte kipia, kishtilisket hasta tay ne kipia. 27 Saman ká ne nechishijiat katka wan te kinekituyat ma nitatukti inhijpak, shalinwikakan nikan wan shikinmiktikan tik nutachialis."
Kalaki tik Yerushalem
28 Wan kwak inatuk ini, tejkuk tik ne ujti ka Yerushalem, 29 wan kwak tzinkiski Bet-Page wan Bet-Anya né kan itukay Olivajtepet, kintuktij ume pal ne mumachtianimet, 30 ina:
—Shumet uni techan né anmumelawka, wan kwak anhajsit ka né anyawit kiajsit se burrojchin ilpituk ne ijpak inte keman mutalij aka: shiksutumakan wan shalwikakan. 31 Wan su aka metzintajtanilia taika ankisutumat, shinakan ika ne itekuyu muneki.
32 Wan ne mutuktijtiwit yajket wan kiajsiket ken kinhilwij. 33 Kwak kisutumat nemit ne burrojchin, ne itejtekuyu kinhilwijket:
—Taika ankisutumat ne burrojchin?
34 Yejemet inaket ika ne itekuyu muneki. 35 Wan kalwikaket wan ajsiket kan nemituya Yeshu, wan kitamutilijket inkwajkwach ne burrojchin, wan kitalijket ne Yeshu ijpak ne burroj. 36 Ijpak ne ujti kan yajki, kichayawket inkwajkwach talchi. 37 Né tik ne Olivajtepet kwak yawit ajsit kan pewat temut katani, muchi ne mumachtianimet pejket pajpakit wan inat ka wey ne Teut wan tzajtzit wey ipanpa muchi ne itajtajpal ne kitztiwit, 38 wan inat:
—Teutasujtatuk ne witz, ne tatuktiani tik itukay Tutajwan; ma nejmachnemikan ka ilwikak wan ma inakan ka wey tik ne ajku!
39 Wan sejse pal ne Parishayujmet itzalan ne miaktal kilwijket:
—Tamachtiani, shikinhajwa ne mumujmumachtiani!
40 Wan yaja inak:
—Nimetzinhilwia ka asu tzitzikayaskiat yejemet, tzajtziskiat ne tejtet!
41 Wan kwak waltzinkiski wan kitak ne techan, chukak 42 wan ina katka:
—Asu taja tikmatituskia tik ini tunal tay ipal nejmachnemilis! Ashan minashtuk mupal wan te weli tikita! 43 Ika walasket tujtunal wan ne kinekit metzijtakuat san metztzakwasket iwan se tepanti wan nujme metzyawalusket, 44 wan metztajkalisket talchi, wan ne mupilawan nusan ijtik taja, wan te kiajkawasket ijtik taja nian se tet ijpak seuk, ika inte tikishmatki ne tunal kwak ne Teut metzpachiwij walaj.
Ajsik ne teupan
45 Kwak ajsik itech ne teupan pejki kishtia ne tanamakanimet, 46 wan kinhilwia:
—Nemi tajkwilujtuk: "Ne nukal se kal ipal teutajtanilis", wan anmejemet kichijtiwit ka mukweptuk se ustut pal techtekinimet!
47 Wan tamachtia nemi katka mujmusta tik ne teupan. Ne weypalejmet wan ne tajkwiluanimet pejket tatejtemuat ken kipuluskiat, wan ne achtumet ipal ne techan kenhaya, 48 wan te kiajsit tay kichiwaskiat, ika muchi ne chinamit kikaki katka yek tay yaja tamachtia.
Ká kituktia Yeshu?
20 Wan tik se pal uni tujtunal kwak yaja nemituya kinmachtia ne chinamit itech ne teupan wan tamaka ne yeknawatilis, kisket ne weypalejmet wan ne tajkwiluanimet iwan ne noymet, 2 wan kilwiat:
—Shitechilwi katiawel ne tatuktilis pal tiweli tikchiwa muchi uni, wan ká ne metzmaka uni tatuktilis.
3 Yaja nankilij, kinhilwij:
—Naja nusan nikpia se pal nimetzintajtanilia, shinechilwikan: 4 ne teulyujmakalis ipal Yojan walkiski ka ilwikak ush itech takamet?
5 Yejemet kikejketzket tik inyujyulu, inat:
"Asu tinat ka ilwikak, yawi ina: Taika inte ankiyulmatket? 6 Asu tinat itech takamet, muchi ne chinamit yawit techtejtemimat ika kimatit ka Yojan se taketzani."
7 Wan nankilijket ka inte kimatit kanka witz. 8 Wan Yeshu kinhilwij:
—Naja nusan inte nimetzinhilwia katiawel ne tatuktilis pal nikchiwa uni.
Ne talchiwanimet tik ne shukumekamil
9 Pejki kinhilwia ne chinamit ini casoj:
—Se takat kitukak se shukumekamil wan kiajkaw ne mil tik inmejmey talchiwanimet wan yajki wejka wan né nakak miak metzti. 10 Kwak ajsik ne tunal, kituktij se tekitini ka né ma kimakakan sejse pal ne itakil ipal ne mil. Uni talchiwanimet kiwitekket wan kishtijket wan te kimakaket tatka. 11 Wan senpa kituktij ukse tekitini. Yaja nusan kiwitekket wan kitzuntekket wan kishtijket, wan te kimakaket tatka. 12 Wan senpa kituktij seuk, wan nusan kichalujket wan kishtijket. 13 Ne itekuyu pal ne shukumekamil inak:
"Nikmati tay niaw nikchiwa: niaw niktuktia ne nutelpuch yektasujtatuk; anka yaja kitakamatisket."
14 Kwak kitaket, ne talchiwanimet muilwijket:
"Muchi yawi ipal ini kwak miki ne tutekuyu. Tiawit tikmiktiat yajini wan muchi yawi tupal!"
15 Wan kishtijket tik ne shukumekamil wan kimiktijket. Tay yawi kichiwa inwan ne itekuyu ipal ne mil? 16 Yawi witz wan yawi kinwilewa uni talchiwanimet wan yawi kinmaka sejseuk ne mil.
Kikakket wan inaket:
—Tesu keman!
17 Yaja kinhitak wan inak:
—Tay kineki ina ini tel tay nemi tajkwilujtuk?
"Ne tet ne kitejtenejket ne kalketzanimet
mukwepki ne itzinteu kal!"
18 Ká wetzi pak uni tet yawi keluni, wan ká ijpak wetzi ne tet yawi kikwechua.
19 Wan ne tajkwiluanimet wan ne weypalejmet tatejtemujket pal kitzkiat tik uni horaj wan majmawit katka ipanpa ne chinamit, ika kimatket ka inpanpa yejemetsan inatuya ini casoj.
Shikmakakan ne tatuktiani tay ipal ne tatuktiani
20 Wan kintitanijket tachianimet pal kipachiwiat, ká muitat katka ken yejyek pal tashijshikuat, ma kitzkikan ne Yeshu ipanpa se ipalabraj pal temakat iwan ne tatuktiani. 21 Wan kitajtanilijket:
—Tamachtiani, tikmatit ka sema tay tejkia tina wan sema ne ujti yek ipal ne Teut titamachtia. 22 Nemi yek ma tiktashtawakan tumin ne taltikpaktuktiani ipal Roma ush inte?
23 Yaja kishketzki ne intajpewal wan kinhilwij:
24 —Shinechilwitilikan se tumin. Ká ipal ini tachialis?
Inaket:
—Ipal ne taltikpaktuktiani.
25 Yaja kinhilwij:
—Yek, shikmakakan ne taltikpaktuktiani tay ipal ne taltikpaktuktiani wan shikmakakan ne Teut tay ipal ne Teut.
26 Wan te weliket kitzkiat ipanpa ipajpalabraj ishpan muchi, wan ishpuyawket ipanpa tay nankilij wan te inaket tatka.
Ne miktiwit yawit walmukwepat?
27 Walajsiket sejse Tzadukayuj, ne ká inat katka ka ne miktiwit inte yawit muyulkwit, wan kitajtanilijket:
28 —Tamachtiani, Moshe techilwij ijtik iamaw: "Asu miki ne iechkaw se wan kipiatuya isiwaw wan te kipiatuya ipilawan, ne iikaw nemi pal kikwi ne isiwaw ne miktuk pal kiketza ne ishinach ne iechkaw." 29 Nemiket tel chikume takat ká muchi tekniwan wan ne achtu munamiktij wan mikik wan te kipiatuya ipilawan, 30 ne ume nusan, 31 wan ne yey munamiktij iwan, wan muchi yejemet kenhaya inte kiajkawket inpilawan wan mikiket muchi, hasta ne chikume. 32 Tipan nusan ne siwat mikik. 33 Kwak yawit muyulkwepat, katiawel ne ishulejyu uni siwat? Ika ne chijchikume munamiktijtiwit iwan!
34 Wan Yeshu kinhilwij:
—Ne takamet pal ini taltikpak munamiktiat wan tanamiktiat. 35 Ne yejyek ká nemisket ipal uni taltikpak wan yawit muyulkwepat kwak miktiwit, nian yawit munamiktiat nian yawit tanamiktiat, 36 ika intea welit mikit senpa, yejemet ken tanawatianimet, wan muchiwat ipilawan ne Teut muyulkweptiwit. 37 Moshe nusan, ishpan ne kwawit mimilaka, taneshtij ka ne miktiwit muyulkwepat kwak ina ka Tutajwan yaja ne Teut ipal Abraham wan ne Teut ipal Itzak wan ne Teut ipal Yakob: 38 ne Teut inte ipal ne miktiwit asunte ipal ne yujyultuk, ika muchi yejemet yujyultuk ipal.
39 Ankakeski pal ne tajkwiluanimet inaket:
—Tamachtiani, tinak yek.
40 Wan tea kitajtanilijket mas ika majmawit.
41 Kinhilwij:
—Ken ka inat ka ne Mawaltijtuk ne itelpuch Dawid? 42 Ne Dawid ina tik ne amat ipal ne Sajsalmoj:
"Ne Nuteku kilwij ne nutajtzin: shimutali ka nuyekkan 43 hasta ma niktali ká ne kinekit metzijtakuat ken se petat ka itan mujmukshi."
44 Asu Dawid kilwia "nutajtzin", ken weli ma ikunew?
45 Né muchi ne chinamit kikakit, wan yaja kinhilwij ne mumachtianimet:
46 —Shiktalikan cuidadoj wan ne tajkwiluanimet ne kinekit pashaluat tik wijwipil weyak wan ma muchi kintajpalukan tik ne tiankis, wan kinekit ne ajachtu mutalijka tik ne kalsennemit wan ma nemikan itzalan ne weymet tik yujyualu, 47 ne kalakit inchan lajlamajtzitzinmet wan muchi kikwat, wan taketzat wey pal kinutzat ne Teut. Yejemet sujsul yawit muchiwat juzgar!
Ne Bibliaj Tik Nawat · © 2008, 2012 Jan Morrow