Beginning
Ishpan Pilatus
15 Wan nemanha, ka tapuyawa, sentajtaketzket ne weypalejmet iwan ne noymet, ne tajkwiluanimet wan muchi ne kalpuli pal kitat tay yawit kichiwat, wan kiwikaket ilpituk pal temakat iwan Pilatus. 2 Wan ne Pilatus kitajtanilij:
—Taja ne tatuktiani ipal ne Yudayujmet?
Wan kilwia:
—Taja tina!
3 Wan ne weypalejmet inaket miak tay kichiwtuk. 4 Pilatus kitajtanilia senpa, ina:
—Tesu tina tatka? Shikita keski inat ka tikchiwtuk!
5 Ne Yeshu te inak tatka, hasta ishpuyawik ne Pilatus.
6 Ikman kwak nemi katka se ilwit, ne tatuktiani kichulultia katka se ilpituk ká kitajtanit, 7 wan ijtik muchi ne ijilpituk nemituya se itukay Bar-Aba; yaja wan sejse ikunpa tasuntuyat wan tamiktijtuyat tik ne techan. 8 Wan waltejkuket wan pejket tajtanit ken senpa, 9 wan Pilatus kinhilwij:
—Ankinekit ma nikchululti ne tatuktiani ipal ne Yudayujmet?
10 Ika yaja kimati ka ne weypalejmet temakatiwit ne Yeshu ipanpa envidiaj. 11 Ne weypalejmet ne kikumuntijket ne takamet wan siwatket pal kilwiat ma kichululti ne Bar-Aba. 12 Ne Pilatus kinhilwij ukseujti:
—Tay niaw nikchiwa tel iwan yajini ká ankinutzat ne tatuktiani ipal ne Yudayujmet?
13 Yejemet tzajtziket senpa:
—Shikcruzpilu!
14 Ne Pilatus kinhilwij:
—Tay kichiwki?
Tzajtziket uksenpa:
—Shikcruzpilu!
15 Pilatus kitak yek ma muchiwa ken kielewia ne miaktal. Yajika, kichulultij ne Bar-Aba. Tatuktij ma kiwitekikan ne Yeshu wan ma kiwikakan pal kicruzpiluat.
Yeshu cruzpilujtuk
16 Ne tasumanimet kikalaktijket ijtik ne weykal itukay Praytorioj, wan kalnutzat muchi ne tasumanimet, 17 wan kitalilijket kwajkwachti galantzin, wan kipikit se yawal pal wijwitzti wan kitzunyawalujket, 18 wan pejket kitajpaluat wan kipakiliat, inat: "Oj! Tatuktiani pal ne Yudayujmet!" 19 wan kitasat ne itzuntekun iwan se uat, wan tachijchat ijpak, wan temut mutankwaketzat iishpan. 20 Wan kwak tamiket kipajpakiliat, kishtilijket ne ikwajkwach galantzin wan mukwepket kitaliliat ne ikwajkwach wan kishtiat pal kicruzpiluat.
21 Wan kituktijket se takat itukay Shimon pal Kurene, ne inteku Aleksandro wan Rufus. Yaja witz ne kojtan wan panu ka né, wan kituktijket kiwika ne icruz ne Yeshu, 22 wan kiwikat hasta ajsit kan itukay Golgota (tik Nawat kineki ina "kan nemi ne tzuntekumat"). 23 Kimakaket kushushaj chichik, pero yaja te kiunik tatka, 24 wan kipiluat tik ne cruz wan kitakutuntijket ne ikwajkwach wan kitamutaket chivos pal kitat ká ipal muchi. 25 Ka chiknawi horaj kicruzpilujket, 26 wan ka ijpak itzuntekun nemituya tawawasujtuk ne taika, wan ina: "Ne intatuktiani ne Yudayujmet." 27 Nusan kincruzpilujket ume techtekini inawak, ne se ka iyekkan wan ne se ka ukse ladoj. (28) . 29 Ne panut itech kukujtaketzat katka wan muishkekelutzat, inat:
—Ja! Taja, ne weli tiktajkali ne teupan wan tiketza senpa ijtik yey tunal, 30 ashan shimupalewi! Shaltemu tik mucruz!
31 Ijkiasan ne weypalejmet wetzkat muilwiat iwan ne tajkwiluanimet:
—Kinpalewij sejseuk, wan yajasan te weli mupalewia! 32 Ne Mawaltijtuk, ne tatuktiani ipal Israel, ashan ma waltemu tik ne cruz pal kiane tiawit tikitat wan tikmatit!
Nusan ne mucruzpilujtiwit inawak kijilwiat katka.
33 Wan ajsik tajkutunal wan kunyuakiski nujme ne tal hasta yey horaj ka teutak, 34 wan ka yey horaj ne Yeshu tzajtzik:
—Elohi Elohi, lema shebaktani?
ne kineki ina tik Nawat: Nuteut Nuteut, taika tinechajkaw? 35 Wan sejse pal ne nemituyat inawak kikakket wan inat:
—Shikita, kinutza Eliya!
36 Kiski mutalua ajaka kitema se esponjaj iwan yayushukuk wan kisaluj tik se uat wan pejki kimaka pal ati, wan ina:
—Tiawit tikitat asu witz Eliya kitemultia!
37 Ne Yeshu tzajtzik wey, wan sewik. 38 Wan tzayanik itajku ne kwachtzakka tik ne teupantzin. 39 Ne sentzuntuktiani ne nemituya inawak, kwak kitak ka sewik, inak:
—Tejkia ka ini takat Itelpuch ne Teut!
40 Unisan nemituyat sijsiwatket tajtachiat nusan. Ijtik yejemet nemituya Maryam ne ipal Magdala, wan Maryam ne innan Yakob Chikitik wan Yose, wan Shalome — 41 yejemet katka ne senyajtiwit kwak yaja nemik tik Galilaya wan kitekipanuat katka — wan sejseuk ká tejkutiwit iwan hasta Yerushalem.
Ne shaput
42 Nemituyat ne tunal ipal tajshitilis achtu ka pewa ne sewilis, wan kwak tayuakik 43 walaj Yosep pal Ramatay, se yek takat ipal ne kalpuli ká nusan tejchia ma wiki ne itatekimakalis ne Teut. Yaja yajki kita Pilatus pal kitajtani ne mikini. 44 Pilatus ishpuyawik ka yaja miktuka wan kalnutzki ne sentzuntuktiani pal kitajtanilia su tejkia ka miktuya, 45 wan kimatki itech ne sentzuntuktiani ka kiane, wan temakak ne mikini iwan Yosep. 46 Wan kikujki se ikwenyu pal kikimilua wan kikutemultij ne Yeshu wan kitakentij wan kitalij ijtik se shaput ne muwawantuk tik ne tesual, wan kimimiluj se tet wan kalkwij ne iten ne shaput. 47 Ne Maryam pal Magdala wan Maryam ne inan Yose nakaket tachiat kan nemituya tekatuk.
Muyulkwi
16 Wan kwak tamik ne sewilis, Maryam pal Magdala wan Maryam ne innan Yakob wan Shalome kikujket pajtipuputuka pal ajsit kimajmawaltiat, 2 wan sujsul peyna tik ne achtu tunal ipal ne semanaj walejkut ne shaput kwak tanesi 3 wan muilwiat:
—Ká yawi kijkwani ne tet tupal pal kitapua ne iten ne shaput?
4 Wan kwak tachiaket kitat ka mijkwantuka ne tet, wan yaja sujsul tumak! 5 Wan kalakket ijtik ne shaput wan kitaket se pipil muetztuk ka imayekkan tik se weyak wipil istak, wan ishpuyawket. 6 Yaja kinhilwia:
—Maka shishpuyawikan! Anwalajtiwit ankitemuat Yeshu pal Nazaret, ne cruzpilujtuk. Muyulkwij, inte nemi nikan. Shikitakan kan ne kiajkawket. 7 Shumet shikilwikan ne mumachtianimet wan ne Pedro ka yawia anmuishpan ka Galilaya. San ankitasket ka ikuni ken metzinhilwij.
8 Wan kisket mutaluat tik ne shaput ijtzilikat wan ishpuyawit, wan te kilwijket tatka aka ika majmawit.
Ken inat sejse ka tami ini amat
[[9 Yeshu muyulkwij peyna tik ne achtu pal ne semanaj wan achtu kiski ishpan Maryam pal Magdala, ká yaja kishtilijtuya chikume nawal teyek; 10 yajuni yajki kinhilwia ne iwan nejnentiwit kan ne chukat, 11 wan yejemet kwak kikakket ka nemituya yultuk wan muneshtijtuk iishpan ne Maryam, inte kiyulmatket.
12 Nemanha muneshtij iwan ukse iweyka ishpan ume nemituyat pashaluat tik ne kojtan, 13 wan yajket kinhilwiat muchi, wan yejemet nusan te kiyulmatket.
14 Tipan kiski ishpan ne majtakti-se kwak nemituyat sentakwat wan kinhajwak ika te kipiatuyat tayulmatilis wan yujyultakwaknaj ika te kinyulmatket ne kitztiwit kwak tamik muyulkwi. 15 Wan kinhilwij:
—Shumet nujme ne taltikpak, shikinnajnawatikan muchi ne yeknawatilis. 16 Ká ne tayulmati wan mumaka ulyuj yawi mupalewia, wan ká ne inte tayulmatit inte yejyek. 17 Pal ne tayulmatit, ini tay yawi pal muishmati: tik nutukay yawit kishtiat nawalmet teyek; yawit tanutzat tik yajyankwik taketzalis; 18 yawit welit kianat kujkuat tik inmejmey wan kiunit tay tamiktia, wan te yawit kukuyat; kwak kitaliat ijimey ijpak kukuyanimet yawit yektiat.
19 Kiane tel ne tajtzin Yeshu, kwak tamik kinnutza, mukwij ka ikajku wan mutalij ka imayekkan ne Teut. 20 Wan yejemet kisket tanajnawatiat nujme, wan ne Tajtzin kinpalewia wan kichiwa sejse pal muishmati pal tailwitia ka tejkia.]]
Ne Bibliaj Tik Nawat · © 2008, 2012 Jan Morrow