Beginning
Tay iwan mususulwia ne takat?
15 Kwakuni sejse Parishayuj wan tajkwiluani ipal Yerushalem ajsiket itech Yeshu, inat:
2 —Taika ne mumujmumachtiani inte kichiwat ken kichiwat katka tunoywan? Inte kipupuat inmejmey achtu ka takwat!
3 Yaja inak:
—Anmejemet taika inte kichiwat tay tatuktij ne Teut wan ankinekit ankichiwat ken katka? 4 Ka ne Teut inak: "Shiktakamati muteku wan munan", wan: "Ká kijilwia iteku wan inan, ma miki." 5 Anmejemet inat ka su se kilwia iteku wan ne inan "naja niktakulia ne Teut muchi tay nupal", ma intea ijkiuni; 6 intea kitakamati ne iteku. Wan ankichiwat ka tay ne tatuktij ne Teut inte tatka ipanpa ne tay ankichiwat katka. 7 Tensasalmet! Anmupanpa yek taketzki Ishaya, ina:
8 "Ini techan nechtakamati iwan itenshipal;
ne iyulu wejka nemi nupal!
9 Inte mutankwaketzat yek nuishpan
ika tamachtiat tay tatuktijket takamet."
10 Wan kalnutzki ne miaktal wan kinhilwij:
—Shinechkakikan wan shikmatikan tay antakakit: 11 inte ne tay kalaki itech iten kisusulwia ne takat, asunte tay kisa itech ne iten kisusulwia.
12 Kwakuni ajsiket ne mumachtianimet kilwiat:
—Taja tikmati ka ne Parishayujmet takakket uni wan mutekukujmatket?
13 Yaja inak:
—Muchi ne sajsakat ne inte kitukak Nuteku ipal ne ilwikak yawit muwiwitat. 14 Shikinhelkawakan! Pupuyumet wan kinekit kilwitiat ne ujti! Asu se pupuyut kilwitilia ne ujti ukse pupuyut, ne inhumeshtin ustuwetzit!
15 Ne Pedro kilwij:
—Shitechneshtili uni casoj.
16 Yaja inak:
—Inteuk ankimatit? 17 Anmejemet teuk ankimatit ka muchi tay kalaki itech iten se ajsi tik ne ielishku, kwakuni muishtia wan yawi tik ne mijkwitayan? 18 Wan tay witz itech ne iten kisa tik iyulu; yajane ne kisusulwia ne takat, 19 ika kisa tik iyulu tay inteyek ijtik iyulu, ken kwak tamiktia, mawiltia, tatzinhejenchiwa, techteki, ina ka se kichijki tay inte kichijki, wan kukujtaketza. 20 Uni tay iwan mususulwia ne takat. Inte mususulwia ika inte mumapaka pal takwa.
Ne siwat pal Kanaan
21 Wan Yeshu yajki ka senkak wan ajsik ne tajtal pal Tzor wan Tzidon, 22 wan né nemik se siwat pal Kanaan nepa chanej, wan tzajtzik walaj wan inak:
—Shinechpalewi, Tajtzin, itelpuch Dawid! Nusiwakunew kukuya iwan se nawal.
23 Yaja tesu nankilij tatka, wan ne mumachtianimet ajsiket kitajtanit, inat:
—Shikilwi ma yawi, ka tzajtzi witz tuipan.
24 Yaja inak:
—Sema nechtitanijket itech ne ichkamet pulijtiwit pal Israel.
25 Ne siwat walmutankwaketza, wan ina:
—Tajtzin, shinechpalewi!
26 Yaja inak:
—Inte yek ma tikwikan ne intamal ne kukunet pal tiktamutiliat ne pejpelutzitzinmet.
27 Ne siwat inak:
—Kiane Tajtzin; melka uni, ne pejpelutzitzinmet kikwat ne mumushu ne wetzi talchi kan mutaliat takwat intekuyu!
28 Kwakuni Yeshu kilwij:
—Siwat, wey ne mutayulmatilis! Muchijtuk tay tikneki.
Wan mupajtij ne isiwapiltzin.
Yeshu kitakwaltia se miaktal
29 Wan Yeshu kiski wan walmukwepki ne weyat pal Galilaya. Wan tejkuk pak se tapetat wan mutalij ikuni. 30 Wan ajsiket miak kalinwikat metzkelumet, pupuyumet, makutumet, sejse te welit taketzat, wan sejseuk; wan kintalijket itech ijikshi wan yaja kinpajtij. 31 Muchi ishpuyawiket kwak kitaket taketzat ká ne te welit katka taketzat, yejyek ne majmakutu wan nejnemit ne mejmetzkelu wan tachiat ne pujpupuyumet. Wan inaket ka wey ne Teut pal Israel.
32 Yeshu kalinnutzki ne mumachtianimet wan inak:
—Nechkukua nuyulu inpanpa muchi, ika kipiata yey tunal ka nemit nuwan wan te kipiat tatka pal kikwat. Te nikneki ma kiselikan mayan nian ma majmatamikan tik ne ujti.
33 Wan ne mumachtianimet kilwiat:
—Ka nikan te nemi tatka. Kan tikajsit tajtamal pal mutakwaltiat muchi?
34 Wan Yeshu kinhilwia:
—Keski tamal ankipiat?
Yejemet inaket:
—Chikume, wan chiupi michin.
35 Wan kintuktij ma mutalikan talchi muchi, 36 wan kikwij ne chikume tamal wan ne chiupi michin, wan kiteuchij wan kipitzakuj wan kinmakak ne mumachtianimet, wan ne mumachtianimet kinmajmakaket, 37 wan muchi takwajket wan ishwiket, wan kianket ne pusul ne nakak wan nakaket chikume chikiwit tejtentuk. 38 Nemituyat cuatro mil takat, wan nusan siwatket wan kukunet. 39 Wan kwak yajket muchi, kalak tik ne barcoj wan ajsik ne tajtal nepa Magadan.
Ne Parishayujmet kitajtanit se pal muishmati
16 Wan ne Parishayujmet wan ne Tzadukayujmet ajsiket kiejekuat. Kitajtanket ma kilwiti se pal muishmati pal ne ilwikak. 2 Yaja kinhilwij:
—[Kwak tayuaki anhinat: "Musta tachia ika chichiltia ka ikajku." 3 Wan kwak tatwi: "Ashan shupan witz ika chichiltia ka ikajku wan nemi tristej." Yek anwelit ne itachishka ne ilwikak; ken ka inte welit ankishmatit ne tujtunal tinemit?] 4 Ne takamet pal ashan inte yejyek! Mawiltianimet! Kitemuat se pal muishmati wan te kipiasket, sema ne ipal Yona.
Wan kinhajkaw wan yajki.
Cuidadoj iwan ne shukutishti!
5 Wan kwak ne mumachtianimet yajket sentapal ne at, kielkawket kiwikat pan pal takwat. 6 Yeshu kinhilwij:
—Shitachiakan wan shiktalikan cuidadoj iwan ne shukutishti pal ne Parishayujmet wan ne Tzadukayujmet!
7 Yejemet inat ka yaja inak "ika inte talkwijket ne pan". 8 Ne Yeshu kimatki wan inak:
—Tay anyultaketzat, anmejemet ká inte kipiat tayulmatilis? Anhinat ka ninak ika inte kanaj ne pan? 9 Inteuk ankimatit ne makwil tamal ipal ne cinco mil takat wan keski chikiwit ankianket, 10 nian ne chikume tamal pal ne cuatro mil takat wan keski ankianket? 11 Ken ka inte ankimatit ka inte nina ipanpa ne pan kwak naja nimetzinhilwij "Cuidadoj iwan ne shukutishti pal ne Parishayujmet wan ne Tzadukayujmet"?
12 Kwakuni yejemet kimatket ka inte kinekituya ina ma kitalikan cuidadoj iwan ne tishti pal ne pan asunte iwan ne tamachtilis pal ne Parishayujmet wan ne Tzadukayujmet.
Ká ne Itelpuch ne Takat?
13 Yeshu ajsik ne tajtal pal Kaysarea Pilipo wan kintajtan ne mumachtianimet:
—Ká inat ka ne Itelpuch ne Takat?
14 Yejemet inaket:
—Sejse inat ka yaja Yojan ne teulyujmaka, sejse ka Eliya, sejseuk ka Yeremiya wan su te, se pal ne taketzanimet.
15 Kinhilwia:
—Anmejemet ken inat? Ká naja?
16 Shimon Pedro inak:
—Taja ne Mawaltijtuk, ne itelpuch ne Teut yultuk.
17 Yeshu kilwij:
—Tikpia suertej, Shimon Bar-Yona, ika inte metzmachtij se ken tuweyka asunte Nuteku ka ikajku. 18 Wan naja nimetzilwia ka taja ti Pedro wan ijpak ini tesual niaw niketza nukalsennemit. Wan ne tejtentzakka pal ne miktanshaput inte welisket kichiwiliat tatka. 19 Niaw nimetzmaka ne iwan mutentzakwa wan mutentapua ne tatekimakalis ipal ne ilwikak. Wan muchi ká tikilpia pak ne tal, ilpituk nemis tik ne ilwikak; wan ká tiksutuma pak ne tal, sutuntuk nemis tik ne ilwikak.
20 Kwakuni kintuktij ne mumachtianimet ma inte kilwikan aka ka yaja ne Mawaltijtuk.
Asu aka kineki yawi nuipan...
21 Tipan Yeshu pejki kinmachtia ne mumachtianimet ka yaja nemi pal yawi tik Yerushalem pal taekua wey, ika ne noymet wan weypalejmet wan tajkwiluanimet yawit kijilwiat wan yawit kimiktiat wan yawi muyulkwi kwak panut yey tunal. 22 Wan Pedro kinutzki wan pejki kiajwa, ina:
—Tesu, Tajtzin, tesu; te yawi panu uni!
23 Yaja muishkwepki wan kiajwak Pedro, ina:
—Shiawa ka nuteputz, Tenewani, taja tinutatzunchaluas ika inte tikejketza tay ipal ne Teut asunte tay ipal ne takamet.
24 Kwakuni Yeshu kinhilwij muchi ne mumachtianimet:
—Asu aka kineki yawi nuipan, ma kielkawa muchi tay ipal wan ma kiana ne icruz wan ma yawi nuipan. 25 Ika ká tajpiaskia ne ialmaj yawi kipulua, wan ká kipuluskia ne ialmaj ka numaku yawi tajpia. 26 Ika ken kipalewia se asu muchi ne taltikpak ipal wan puliwi ne ialmaj? Wan tay weli tamaka se ipatka ialmaj? 27 Ika ne Itelpuch ne Takat yawi witz tik itawilyu ne Iteku itzalan ne tanawatianimet, wan kwakuni kintashtawasket muchi tay yejemet kichijtiwit. 28 Kia nimetzinhilwia ka ankakeski pal ne nikan nemit inte yawit mikit achtu ma kitakan ne Itelpuch ne Takat witz iwan itatekimakalis.
Ne weykapatalis
17 Wan kwak panuket chikwasen tunal, Yeshu kinwika Pedro wan Yakob wan Yojan iikaw wan tejkuket pak se kojtik tepet ka inkwaj, 2 wan muweykapatak tik intachialis wan tatawij ne iishkalyu ken ne tunal. Ne ikwajkwach istakisket ken ne tawil. 3 Wan né kisket inhishpan Moshe wan Eliya tajtaketzat iwan. 4 Pedro kilwij Yeshu:
—Tajtzin, yek ma tinemikan ka nikan. Su tikneki, nikchiwas yey tawipanti: se mupal, wan se ipal Moshe, wan se ipal Eliya.
5 Kwak yaja taketzayuk se mishti tajtawilua kinkimiluj wan mukakik tik ne mishti se ina:
—Yajini nutelpuch yektasujtatuk, yajini nikita yek. Shikakikan tay ina!
6 Wan kwak ne mumachtianimet kikakket mutamutaket talchi iwan mawi. 7 Wan Yeshu ajsik wan kinmatukak wan inak:
—Shimuketzakan, maka shimajmawikan.
8 Kwak ajkutachishket, inte kitaket aka, semaya Yeshu isel. 9 Wan kwak temut yawit katani, Yeshu kintuktij ina:
—Maka shikilwikan aka tay ankitztiwit hasta muyulkwi ne Itelpuch ne Takat.
10 Wan kitajtanilijket:
—Taika inat ne tajkwiluanimet ka Eliya nemi pal witz achtu?
11 Yaja inak:
—Kiane, Eliya yawi witz kiektalia muchi. 12 Nimetzinhilwia ka Eliya walaja wan te kishmatket, wan kichijket iwan tay kielewijket. Ijkiuni nemit pal kichiwat ka taekua ne Itelpuch ne Takat nusan.
13 Kwakuni ne mumachtianimet kimatket ka kinekituya ina Yojan ne teulyujmaka.
Kipajtia se mijmiki
14 Wan kwak ajsiket kan nemituyat muchi, se takat ajsik itech mutankwaketza 15 wan ina:
—Tajtzin, shikpalewi nupiltzin, ika mijmiki wan sujsul kukuya, wan seujseujti wetzi tik ne tit, wan seujseujti tik ne at. 16 Wan nalwikak itech mumujmumachtiani wan te weliket kipajtiat.
17 Yeshu inak:
—Ay, ashan inte kanaj tayulmatilis, muchi kwejkwelnaj! Hasta keman nemi pal ninaka anmutzalan nimetzinselia? Shalwika tel.
18 Wan Yeshu kiajwak ne nawal wan kiski itech, wan ne piltzin mupajtij tipan. 19 Kwakuni ajsiket itech ka ikwaj ne mumachtianimet wan inaket:
—Taika tejemet inte tiweliket?
20 Yaja kinhilwia:
—Ika inte antayulmatit. Kia nimetzinhilwia ka asu antayulmatiskiat se chiupichin, ankilwiskiat uni tepet: "Shu ikuni!" wan yaskia, wan te tatka uij anmupal. (21) .
Yeshu inak tay yawi panu
22 Kwak musenputzuat tik Galilaya, Yeshu kinhilwij:
—Yawit temakat ne Itelpuch ne Takat ijtik inmejmey takamet, 23 wan yawit kimiktiat, wan kwak panut yey tunal yawi muyulkwi.
Wan sujsul mutechtijket.
Ne pejpesoj ipal ne teupan
24 Kwak mukwepket Kaparnajum, ne kianat ne pejpesoj pal ne teupan ajsiket itech Pedro wan kitajtanilijket:
—Ne anmutamachtiani inte kitashtawia ne pesoj?
25 Ina:
—Kitashtawia.
Wan kwak yaja ajsik inchan, Yeshu taketzki achtu, ina:
—Tay tina taja, Shimon: ká itech kikwit tumin ne tatuktianimet pal ne tal, intech inkukunew o ne sejseuk?
26 Inak:
—Intech ne sejseuk.
Wan Yeshu kilwij:
—Yek tel, ne inkukunew inte nemit pal tashtawiat. 27 Melka uni, pal ma inte kwalanikan tuwan, shu itech ne at, shiktamuta se kutishi wan shikwi ne achtu michin tikitzkia wan shiktapu ne iten wan tiaw tikajsi se coraj. Shikwi wan shikinmaka nupanpa wan mupanpa!
Ne Bibliaj Tik Nawat · © 2008, 2012 Jan Morrow