Book of Common Prayer

Corneliomi Pedrota cayaj cachashca

10 Cesareapica, Cornelio shuti shuj soldadomi causarca. Paica Italiano nishca patsaj soldadocunata mandajmi carca. ² Cornelioca, paipaj huasi ucupuracunandij Diosta yuyarij, Taita Diosta manchaj, Diosta mañarashpa causajcunami carca. Israelcunapajpish achca allicunatami rurajcuna carca. ³ Shuj punllaca, quimsa horas chaupi chishitami, Dios cachashca shuj angelca, ñapish muscuipi shina paiman ricurishpa:

–¡Cornelio!– nirca.

⁴ Chashna nijpi Cornelioca, manchaihuan chujchushpa, chai angelta ricurashpaca:

–Amito, ¿imatataj nihuangui?– nircami. Chashna nijpi angelca, cashnami nirca:

–Can imalla mañashcatamari Taita Dios uyashca. Can tucui imalla cushcatapish Diosca ricushcami. ⁵ Jopemanta Pedro nishca Simonta cunantaj pushanaman cachai. ⁶ Paica, carata c'acushpa ñutujllata ruraj Simonpaj huasipimi poźacun. Chai huasica, mama cucha c'uchupimi. Pai shamushpami, can imalla rurana cashcataca huillanga– nircami.

⁷ Ña chai ángel rijpica, Cornelioca cullqui jahua paita servij ishqui runacunatapish, Diosta yuyarij, pai alli c'uyashca soldadotapishmi cayarca. ⁸ Chai quimsa runacunatami, tucui imalla ricushcata parlashpa, Jopeman cacharca.

Pedromi mana micuna animalcuna muscuipi shina ricushca

⁹ Cayandij punllaca chai runacunaca, ñallami Jopeman chayagricurcacuna. Ña chaupi punlla shina cajpimi, Pedroca pai poźacun huasi jahuaman huichiyashpa, Diosta mañacurca. ¹⁰ Huasiyujca micunata yanucurcami. Pedroca achcata yaricachishpa, ima micunata micuiman yuyacushpami, muscucuj shina ricui callarirca. ¹¹ Jahua pacha pascarijtami ricurca. Chaipica, chuscu puntapi huatashca, shuj jatun linso shinami paipajman uriyamurca. ¹² Chai jatun linsopica, chaqui maquihuan purijcuna, huijsahuan llucashpa purijcuna, pajarocunapishmi ricurirca. ¹³ Chaicunata ricucujpimi, shuj rimashca uyarishpaca:

–Pedro, jatari, caicunata huañuchishpa micui– nirca.

¹⁴ Shina nijpi Pedroca: –Mana, Apu Jesús, ñucaca mana micuna mapacunataca, manataj imata micushcanichu– nircami. ¹⁵ Shina nijpipish chai Rimajllatajmi, cutinllataj:

–Taita Dios chuyayachishcataca, ama ‘Mapami’ nichu– nirca.

¹⁶ Chai jatun linsoca, quimsa cutinmi chashna ricurirca. Chai huashaca, cutin jahua pachallamantaj tigrarcallami.

Huauquicunapish Jesustaca mana crishcachu

7 Chai q'uipaca, Jesusca Galileapimi yachachishpa puricurca. Judiocuna ima shinapish huañuchishun yuyacushcamantami, Judeapica ña mana purisha nirca. ² Ñami judiocuna yura ramacunahuan chugllata rurana fiestapish chayamucurca. ³ Chaimantami Jesuspaj huauquicunaca, cashna nircacuna:

–Cambaj yachacujcunapish Can imalla ruracushcata ricuchunca, Judeaman riari. ⁴ Tucuicuna rijsishca tucusha nishpaca, pipish imata mana pacalla ruranchu. Can ruracushca milagrocunataca tucuicunapaj ricuipi ruraiari– nircacunami.

⁵ Paipaj quiquin huauquicunapish mana crishcamantami, Jesustaca chashna nircacuna. ⁶ Chashna nijpimi, Jesusca cashna nirca:

–Ñuca chaiman rina horasca manaraj pajtamunchu. Ashtahuanpish cancunapajca, ima horaspish rinallamari. ⁷ Cancunataca cai pachapaj cajcunaca, ¿imamantataj p'iñangapish? Ashtahuanpish Ñucataca, paicuna mana allita ruracujpi jarcashpa rimashcamantami, p'iñancuna. ⁸ Cancunaca fiestamanca huichiyaichijlla. Ñucaca, chai fiestapi canapajca manaraj horas pajtashcachu, manaraj huichiyanichu– nircami.

⁹ Chashna nishpaca, Galileallapitajmi saquirirca.

¹⁰ Jesusca, Paipaj huauquicuna fiestaman huichiyashca q'uipami, pi mana ricujllapi, Paipish pacalla huichiyarca. ¹¹ Mandaj judiocunaca, chai fiestapi Jesusta mashcacushpaca: «¿Maipishi chai runaca?» ninacurcami.

¹² Fiestaman tandanacushcacunaca, achcacunami Paimantaca parlanacurcacuna. Shujcunaca: «Chai runaca allimari» nircacunami. Cutin maijancunaca: «Mana allichu, ashtahuanpish tucuicunata umacunllamari» ninacurcami. ¹³ Chashna ninacushpapish, judiocunata manchashcamantami, paicunapuralla parlanacurcacuna.