A A A A A
Bible Book List

Yakob 5Ne Bibliaj Tik Nawat (NBTN)

Shitakaki yek: asu ankipiat wey, shichukakan shichukakan ipanpa ne tay yawi metzinkukua kwak Yaja witz! Ne anmupalwan palantiwit wan ne anmukwajkwach papalukwalutiwit; ne anmuteukwit wan ne anmutumin ijtakawtuk wan ne palantuk yawi metzinhijilwia wan kikwas ne anmunakayu ken tit: ankianket anmupalwan pal tijtipan tunal. Shikita, ne ipatiw ne tekitinimet tik ne anmumijmil, tay inte ankintashtawilij, tzajtzi wan ne itakakilis ne Tutajwan kinkaki tzajtzit ne tapishkanimet. Ankipishtiwit muchi galantzin tik ne tal, wan sema anpajpakitiwit. Antakwajtiwit wey tik se tunal ipal tamiktilis. Anhinatiwit ka kipia culpaj wan ankimiktijtiwit ne yulmelawak; yaja inte metzinsuntuk.

Shitejchiakan tel, nukniwan, hasta ma ajsi ne Tajtzin. Shikita ne talchiwani, kichia ne itakil yek ipal ne tal, yaja tejchia hasta wetzi ne achtu at wan nusan ne tipan at. Shitejchiakan anmejemet nusan. Ma chikawayakan ne anmuyujyulu ika yawi ajsi ne Tajtzin.

Maka kikinakakan anmutzalan, nukniwan, pal te anmuchiwat juzgar. Ne juez ikuni nemi ejkatuk tik ne tenkal. 10 Nukniwan, shikchiwakan ken ne taketzanimet ne tanutzket ipanpa ne Tutajwan kwak tajselijket wan tejchishket. 11 Tinat ka kipiat suertej ne kiseliat wey. Antakaktiwit ken Iob kipiatuya tanejmachselilis, nusan ankimatit ken tamik Tutajtzin, wan ka ne Tutajwan kipia wey yulkukulis wan taeknelilis.

12 Ini ne achtu pal muchi, nukniwan: maka shikchiwakan jurar ipanpa ne ilwikak, nian ne tal, nian ukseuk juramentoj. Kwak tina "Yek!" ma yek, kwak tina "Inte!" ma inte, pal te tiwetzi itan juicioj.

13 Su se anmutzalan kiekua se teyek, ma kitajtani Teut. Su yulchikawaya se, ma takwika ipal Teut. 14 Su se anmutzalan kukuya, ma kinnutza ne noymet ipal ne sennemit wan ma kitajtanikan Teut ka imaku wan ma kimawaltikan iwan tumakka tik itukay ne Tutajwan, 15 wan ne iteutajtanilis ne tayulmati yawi kipalewia ne kukuyani wan ne Tutajwan yawi kiketza, wan su yaja tateyekchijtuya mutapupulwis. 16 Yajika, shimuyulkwitikan ne se iwan ne seuk ipanpa tay ankichijtiwit tay teyek wan shiktajtanikan Teut ne se ipanpa ne seuk ma shimupajtikan. Kwak se yulmelawak kitajtani iwan muchi iyulu, weli wey. 17 Eliya katka se takat mumati kenha ken tejemet wan yaja kitajtan Teut iwan wey teutajtanilis ma inte wetzi ne at, wan te wetzki at ijpak ne tal ijtik yey shiwit wan chikwasen metzti. 18 Wan kitajtan senpa, wan ne ilwikak tashinij wan ne tal tamakak ne itakil.

19 Nukniwan, asu se anmejemet kipulua ne ujti yekkaya, wan seuk kikwepa tik ne ujti, 20 ma yaja kimati ka kwak se kikwepa se tateyekchiwa ne kipulujtuk ne ujti, yawi mupalewia ne ialmaj wan te yawi miki, wan kitzakwas miak teyek tay kichijtiwit.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes