Da Two Wild Animal

13 Den, jalike one dream, I wen see one Wild Animal coming outa da water. He get ten horn an seven head, wit ten crown on top da horns. On top da heads, each one get one name dat tell any kine stink stuff bout God. ² Da Wild Animal I wen see look like one leopard, but he get feet jalike da bear, an da mout jalike da lion. Da Dragon wen give da Wild Animal his power, an his throne, an da right fo take charge a da peopo wit him.

³ One head a da Wild Animal wen look like was bus up real bad an he litto mo mahke, but den he wen stay alive. All da peopo all ova da world wen blow dea minds, an dey wen stick wit da Wild Animal. ⁴ All da peopo wen go down an pray to da Dragon, cuz he wen give da Wild Animal da right fo take charge a da peopo wit him. An dey go down an pray to da Wild Animal too. Den dey tell, “No mo nobody ova hea get mo power den da Wild Animal! No mo nobody can go fight one war agains him an win!”

⁵ Da Wild Animal wen get da mout fo talk big an talk stink bout God, an fo take charge a da peopo wit da Dragon fo three an a half year. ⁶ Da Wild Animal stay talking any kine an talking stink bout God an da place wea God stay, an everybody dat stay dea in da sky too. ⁷ He wen get da power fo fight one war agains da peopo dat stay spesho fo God, an win, an fo take charge all da ohanas, all da diffren peopos, all da languages, an all da country all ova da world. ⁸ Everybody on top da earth goin go down an pray to da Wild Animal. Ony da peopo dat get dea name inside da Book Dat Tell Who Get Godʼs Kine Life, dey no goin go down an pray to da Wild Animal. Cuz dey da peopo dat stick wit Godʼs Baby Sheep Guy. From da time wen God wen make da world, God wen make plan fo let da peopo kill his Baby Sheep Guy.

So dass why, Godʼs spesho peopo, dey gotta hang in dea an listen to God an trus him!

¹¹ Den I wen see one nodda Wild Animal coming outa da earth. He get two horn jalike one baby sheep, but he talk jalike one dragon. ¹² Dis Wild Animal, he da numba one guy fo da first Wild Animal, an he stay use all da power dat da odda Wild Animal get fo take charge a da peopo. He stay make all da peopo all ova da world go down an pray to da first Wild Animal, da one dat wen get bus up real bad, an litto mo mahke, but still yet wen stay alive.

¹³ Da Numba Two Wild Animal wen do all kine awesome stuff fo show wat kine him. He even wen make da fire come down from da sky to da earth in front everybody. ¹⁴ Da Numba Two Wild Animal wen get da power fo do all kine awesome stuff in front da first Wild Animal. Az why he wen bulai all da peopo dat stay on top da earth. He wen tell da peopo fo make one statue fo da first Wild Animal, fo show respeck fo him. Dass da one dat wen get bus up wit da sword, an litto mo mahke, but still yet wen stay alive.

¹⁵ Da Numba Two Wild Animal wen get da power fo make da statue a da first Wild Animal come alive, so dat da statue can talk. An anybody dat no like go down an pray to da statue, dey goin kill um. ¹⁶ Da Wild Animal wen make everybody, da big an da small peopo, da rich peopo an da poor peopo, da slave guys an da peopo dat not slaves, he wen make um get his mark on top dea right hand o on top dea forehead. ¹⁷ So dat anybody who no mo da Wild Animalʼs name o da numba dat tell wat his name on top dem, dey no can buy o sell notting.

¹⁸ Fo know dis, gotta be sharp! Whoeva get good head, dey gotta figga wat mean da Wild Animalʼs numba, cuz da numba show one guyʼs name. His numba, az 666.