A A A A A
Bible Book List

Taneshtilis 8Ne Bibliaj Tik Nawat (NBTN)

Tatzutzunat ne tanawatianimet

Wan kwak kitapuj ne tipan sajti, ne chikume, tzitzikayak nujme ne ilwikak achka tajku horaj.

Wan nikitak ne chikume tanawatiani ne nemituyat iishpan ne Teut, wan kinmakaket chikume trompetaj.

Wan ukse tanawatiani ajsik wan mutalij itech ne tikashit. Kipiatuya se pupuchkumit ipal teukwit wan kimakaket wey tapupuch pal kitatia iwan ne teujteutajtanilis ipal muchi ne tayulmatit ijpak ne tikashit ipal teukwit ne nemi iishpan ne kuijpal. Wan ne ipukyu ne tapupuch iwan ne teujteutajtanilis ipal ne tayulmatit kiski tik imey ne tanawatiani wan tejkuk tik itachialis ne Teut. Wan ne tanawatiani kikwij ne pupuchkumit wan kiten iwan ne tit ipal ne tikashit wan kitamutak talchi. Wan tikwinik wan tzalanik wan takipinik wan ulinik.

Wan ne chikume tanawatiani ne kipiatuyat ne chikume trompetaj kiajshitijket pal tatzutzunat.

Wan tatzutzun ne achtu wan tepewket ne tejtesijkwil wan shinik tit malijtuk iwan esti wan mutamin ijpak ne tal, wan muchichinuj ne yeshtakutun ipal ne taltikpak wan mutatijket ne yeshtakutun ipal ne kwajkwawit, wan tatak muchi ne sakat shushuik.

Wan tatzutzun ukse tanawatiani wan ken se tepet wey chichinujtuk tik tit mutamutak ijtik ne weyat, wan ne yeshtakutun ipal ne weyat muchijki esti, wan mikik ne yeshtakutun ipal muchi tay muchijtuya yultuk tik ne weyat, wan ne yeshtakutun ipal ne bajbarcoj pulijket.

10 Wan tatzutzun ukse tanawatiani, ne yey, wan kiski ka ikajku wan wetzki talchi se wey sital ken se ukut tata, wan wetzki ijpak ne yeshtakutun ipal ne ajapan wan ijpak ne ijishat kan punit ne ajat. 11 Wan ne sital itukay ne Chichikwawit, wan ne yeshtakutun ipal ne ajat mukwepket chichikwawit wan ne takamet mikiket ipanpa ne at ika muchijki achichik.

12 Wan tatzutzun ukse tanawatiani, ne nawi, wan kwaluk ne yeshtakutun ipal ne tunal, ne yeshtakutun ipal ne metzti wan ne yeshtakutun ipal ne sitalmet. Kunyuakisket ne yeshtakutun inpal, wan ne tunal inte tajtawij se yeshtakutun, wan ne tayua kenhaya.

13 Wan nitachishki wan nikakik se kwawti tik itajku ne ilwikak tzajtzi wan ina: "Ay, ay, ay, ne taltikpak chanejket, kwak yawi mukaki ne intrompetaj ne uksejse yey tanawatiani ne yawit tatzutzunat!"

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes