A A A A A
Bible Book List

Taneshtilis 1Ne Bibliaj Tik Nawat (NBTN)

Ne taneshtilis ipal Yeshu Mawaltijtuk ne kimakak ne Teut, pal kinhilwitia ne itejtekitini tay nemi pal muchiwa nemanha. Wan pal taneshtia kititanij ne itanawatiani itech Yojan itekitini, ká inatuk ka tejkia muchi tay kitztuk: ne ipalabraj ne Teut wan ne tay inak Yeshu Mawaltijtuk. Kipia suertej ne kita ini amat wan ne takakit ne pajpalabraj ipal ne teutaketzalis wan ne tajpiat tay nemi ijkwilujtuk ijtik yaja, ika ne tunal witzaya.

Naja, Yojan, nikintajpalua ne chikume sennemit ne nemit tik Asia: ma metzinmaka tetasujtalis wan nejmachnemilis yajane ká nemi wan nentuk wan yawi witz, wan ne chikume nawal nemit tik itachialis ne ikuijpal, wan Yeshu Mawaltijtuk ne ina tay tejkia, ne achtupunijtuk ipal ne miktiwit wan ne achtu ipal ne tatuktianimet ipal ne taltikpak.

Ne techtasujta wan techishtilia ne tutajtateyekchijtuk iwan ne iesyu wan techchijki se tatekimakalis wan palejmet ipal Teut, wan ne iteku, ma inakan ka wejwey wan ma kipiakan intajpal senpa wan senpa, amen.

Uni witz iwan ne mijmishti

wan n' ijish muchi kitasket,

wan yejemet ká kikuyunijket,

wan ipanpa chukasket muchi

ne trijtribuj ipal ne tal.

Ijkia, amen.

"Naja ne A wan ne Z" ina ne tajtzin Teut, ne nemik wan ne nemi wan ne witz, ne weli muchi.

Naja, ne anmuiknew Yojan, wan ikunpa ijtik ne uijkayu wan tatekimakalis wan tanejmachselilis iwan Yeshu, ninemik tik ne islaj itukay Patmos ipanpa ne ipalabraj ne Teut wan ne itaneshtilis Yeshu. 10 Nimuchijki iwan iijiu tik ne tunal ipal ne Tajtzin wan nikakik ka nuipan se tzajtzi wey ken se trompetaj, 11 ina: "Shitajkwilu tay ne tikita tik se amat wan shiktukti itech ne chikume sennemit: Epesos, Smurna, Pergamos, Tuateyra, Sardis, Piladelpia wan Laodikea."

12 Wan nimuishkwepki nitachia pal nikita ká nechnutza, wan kwak nimuishkwepki nikitak chikume tawilkal ipal teukwit, 13 wan tatajku ne tajtawilkal se kenha ken ne Itelpuch ne Takat, takentijtuk tik ikwajkwach ne ajsit ne ijikshi, wan yawalujtuk ne ielpan iwan se cinchoj ipal teukwit. 14 Ne itzuntekun wan ne itzunkal ijistak ken ne ichkat, istak ken ne nievej, wan ne iijish ken ne tit, 15 wan ne ijikshi kenha ken tumin wey ipatiw, ken tatatuk ijtik se hornilloj, wan kwak taketza mukaki ken wey at, 16 wan kipia ijtik imayekkan chikume sital, wan tik ne iten kisa se espadaj tzuntamej kipia ume itan, wan ne ishkalyu ken ne tunal tajtawia iwan itajpal.

17 Wan kwak nikitak nimutamutak itech ne ijikshi ken nimiktuk, wan kitalij ne imayekkan nujpak wan ina:

—Maka shimajmawi. Naja ne achtu wan ne tipan, 18 wan ne niyultuk wan nimiktuk, wan ashan niyultuk pal senpa wan senpa, wan nikpia ne tejtepusti ne iwan mutentzakwat ne mikilis wan ne miktan.

19 Shitajkwilu, tel, tay tikitztuk wan tay nemi wan tay yawi muchiwa tipan: 20 ne ichtaka ipal ne chikume sital ne tikitak ijpak ne numayekkan, wan ne chikume tawilkal ipal teukwit. Ne chikume sital tanawatianimet ipal ne chikume sennemit, wan ne chikume tawilkal ne chikume sennemit.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes