A A A A A
Bible Book List

Roma 9Ne Bibliaj Tik Nawat (NBTN)

Ken ijtuk iwan Israel

Nina ne tejkia itech ne Mawaltijtuk, te nitashijshikua, ijkiuni ina ne nutasenmatilis itech ne Ijiutzin: nina ka sujsul wey ne numutechtilis wan te tami nechkukua nuyulu, ika nitajtaniskia ma najasan nimuchiwa maldictar itech ne Mawaltijtuk ka inmaku nukniwan ká nuechkawan itech tunakayu, ne Israeltakamet. Yejemet kipiat ne kunetalilis, wan ne wey tzitzinakalis, wan ne sejsentaketzat, wan ne tajtulmakalis, wan ne tekitilis, wan ne projpromesaj. Israeltakamet ne tetekuwan, wan ijtik yejemet ne Mawaltijtuk itech inakayu. Yektenejtuk pal senpa ne ká nemi ijpak muchi, ne Teut, amen!

Inte kineki ina ka inte yekawtuk ne ipalabraj ne Teut, ika inte Israel muchi ne kistiwit itech Israel. Nusan ika ishinach Abraham, yaja inte muchi ipilawan, asunte "itech Itzak munutzas mushinach". Kineki ina tel, inte ne ikukunew ne inakayu yejemetsan ikukunew ne Teut; sema ne ikukunew ne ká ne sentaketzat muishketzat ipal ishinach, ika ne sentaketzat ina: "Tik ini metzti niwalas, wan ne Sara kipias se ipiltzin." 10 Inte yaja isel, nusan Rebeka sema se wipta muteleksak iwan Itzak tuteku; 11 kwak inteuk takattiwit ne ujume tik ne iijti wan teuk kichijtiwit tatka, nian yek nian teyek, pal kiane ma naka ken itajshitilis ne Teut itech ishpejpenka — 12 inte ipanpa itejtekiw asunte ipanpa ne kinutza — kilwijket ka ne achtu yawi tekiti ipal ne chinpe, 13 kenha ken muijkwilujtuk:

    "Ne Yakob niktasujtak, ne Esaw nikishijishki."

14 Tay inasket tel? Weli kisa itech ne Teut se tay inte melawak? Intesu! 15 Ika kilwia ne Moshe:

    "Nikpalewis ká nikpalewis, wan nechkukus nuyulu ká ipanpa nechkukus."

16 Kiane tel, inte ká ne kineki, nian ká ne muishtemua, asunte ne Teut ká techpalewia. 17 Ika ne ijkwilujtuk kilwia ne Parao:

    "Ini taika nimetzketztuk, ma nikilwiti mutech ne nutajpal wan ma munajnawati ne nutukay nujme ne tal."

18 Ijkiuni tel, kipalewia ne ká kineki wan kichiwa ka takwawaya ne ká yaja kineki.

19 Tiaw tinechilwia: "Tay kineki tel? Su te aka welituk kichiwa tatka su yaja te kielewia!" 20 Takat! Shina: ká taja, ma shinajnankili iwan ne Teut? Anka ne kumal weli kitajtanilia ne ká kichijki: "Taika tinechchijki ijkiuni?"

21 Anka ne kumalchiwani inte kipia tatuktilis ijpak ne isukiw, pal ma kichiwa iwan sanse chipusti, su kineki, se kumit wey ipatiw wan seuk chiupi ipatiw? 22 Ken ijtuk su ne Teut, pal kilwitia ne ikwalan wan pal kineshtia keski weli yaja, kiselij iwan weytejchialis kujkumit ipal kwalan ne nemit pal puliwit, 23 wan nusan, pal kilwitia ne itzitzinakalis wey, kujkumit ipal tetasujtalis ne kiekchijtuk pal tzitzinakat? 24 Yaja technutztuk, te sema ijtik ne Yudayujmet, nusan ijtik ne tejtechan, 25 ken ina tik Hoshea:

    "Niknutzas ne inte nukniwan nukniwan,

    wan ne inte tasujtatuk tasujtatuk;

26     wan ikuni, kan kinhilwijket: Inte annukniwan!

    san anmunutzasket ipilawan ne Teut yultuk."

27 Ishaya tzajtzi ipanpa Israel:

    "Melka tepewisket ne ipilawan Israel ken ne iashal ne weyat, yawit muyulpatat ne mukawat,

28     ika Tutajwan kitamis wan kikutunas itekiw ijpak ne tal."

29 Wan kenha inak Ishaya tay yawi panu:

    "Asu inte techajkawilijtuskia Tutajwan chiupi tushinach,

    ken Sodom timuchijtuskiat, ken Gomora timukweptuskiat."

30 Tay tinasket tel? Ka tejtechan ne inte kitemuat tamelakchiwalis kiajsitiwit tamelakchiwalis: tamelakchiwalis kistuk tik tayulmatilis, 31 wan Israel, ká kikwi ne tajtuli ipal tamelakchiwalis, inte weli kitema ne tajtuli. 32 Taika? Ika inte tik tayulmatilis asunte tik tay kichijket. Mukshitasket ijpak ne tet tik ne ujti, 33 ken muijkwilujtuk:

    "Né tik Tzion niktalia se tet kan mukshichaluat, se tatzunchaluas,

    wan ne ká kiyulmati inte yawi mushijshikua."

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes