A A A A A
Bible Book List

Roma 7Ne Bibliaj Tik Nawat (NBTN)

Achtu tinemit katka tik tunakayu, ashan tik ne Ijiutzin

Te ankimatit, nukniwan ká kishmatit ne tajtuli, ka ne tajtuli tatuktia ijpak ne takat sema kwak yaja yultuk? Ken se siwat munamiktijtuk: ne tajtuli ina ma nemi iwan ne ishulejyu hasta ma yaja miki. Su miki ne takat, ne tajtuli intea kilpia ne siwat. Yajika, kwak ne ishulejyu yultuk, inat ka mawiltia asu ukse takat kipia. Wan su ne ishulejyu mikik, ne tajtuli ina ka weli nemi iwan seuk wan te muilwia mawiltiani.

Kiane, nukniwan, anmejemet nusan anmiktiwit ipal ne tajtuli ipanpa ne iweyka ne Mawaltijtuk, ma shimuchiwakan ipal seuk ká muketzki kwak miktuk pal titakiltamakat ipal ne Teut. Ika kwak tinemituyat tik tunakayu, ne tajtaelewilis ipal ne tajtateyekchiwalis tay nemit itech ne tajtuli tekitit katka tik tuweyka pal titakiltamakat ipal ne mikilis. Ashan inte: ipal ne tajtuli timiktiwita wan tea weli techilpia. Intea tinemit tik ijimey, pal tiwelit titekitit tik tay yankwik ipal ne Ijiutzin, wan te tik tay palikman ipal ne ijkwilujtuk.

Ne tateyekchiwalis wan ne tajtuli

Tay tinasket tel? Anka ne tajtuli tateyekchiwalis? Intesu!

Sema ini, ka inte nikishmattuskia ne tateyekchiwalis asunte ipanpa ne tajtuli, nian nikmatiskia tay ne taelewilis su ne tajtuli inte inaskia: "Maka shitaelewi." Ipanpa ne tay tuktijtuk, ne tateyekchiwalis kichijki ka nesik ijtik naja wey taelewilis. Ika su te kanaj tajtuli, te tatka ne tateyekchiwalis.

Niakeman naja inte ninemik iwan tajtuli. Walaj ne tay tuktijtuk, wan muyulkwij ne tateyekchiwalis. 10 Naja nimikik, wan mumatki ka ne tay tuktijtuk, ne nemituya pal niyultuk, yaja ipal mikilis. 11 Ika ipanpa ne tay tuktijtuk nechshijshikuj ne tateyekchiwalis wan nechkwij pal nechmiktia.

12 Ijkiuni tel: ne tajtuli, tikmatit ka ipal Teut, wan ne tay tatuktijtuk ne Teut, yaja ipal Teut wan melaknaj wan yek. 13 Su ijkiuni, anka ne tay yek muchijki mikilis nupal? Tesu kiane! Nimikik ipanpa ne tateyekchiwalis. Melka uni, ne tateyekchiwalis, pal muita ka tateyekchiwalis, kikwij ne tay yek pal nechpulua, pal ma sujsul teyek ne tateyekchiwalis ipanpa ne tay tuktijtuk.

14 Tikmatit ka ne tajtuli kisa itech ne Ijiutzin. Naja ninakat, namakatuk itan ne tateyekchiwalis. 15 Ika te nikmati tay nikchiwa: ka te nikchiwa tay ne nikneki, nikchiwa tay ne nikishijia. 16 Su nikchiwa tay ne te nikneki, nina ka ijkia, ka ne tajtuli yek. 17 Ashan tea najasan nikchiwa, sute ne tateyekchiwalis ne nemi ijtik naja, 18 ika nikmatiaya ka ne yek te nemi ijtik naja, tik ne nunakayu. Ika melka ne tanekilis ijtik naja nemi, ma niweli nikchiwa tay yek te nemi, 19 ika te nikchiwa ne tay yek tay nikneki; nikchiwa ne tay teyek tay te nikneki. 20 Su nikchiwa tay ne te nikneki naja, tea naja nikchiwa sute ne tateyekchiwalis ne nemi ijtik naja. 21 Ijkini nikajsi ne tajtuli ka melka niknekiskia nikchiwa tay yek, nemi ne teyek ijtik naja, 22 ika melka ne itajtuli ne Teut sujsul nechajwiak, 23 nikita ukse tajtuli tik nuweyka, ne musuma iwan ne tajtuli ipal ne nutamatilis wan nechkwi wan nechilpia tik ne itajtuli ne tateyekchiwalis ne nemi tik ne nuweyka. 24 Ay! Nechkukua nuyulu! Ká weli kishtia itech ne nuweyka ini mikilis? 25 Nikmaka panpadiush ne Teut itech Yeshu Mawaltijtuk tutajtzin. Kiane tel, naja iwan nutamatilis nitekiti ipal ne itajtuli Teut, wan iwan ne nunakayu ipal ne itajtuli ne tateyekchiwalis.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes