A A A A A
Bible Book List

Roma 5Ne Bibliaj Tik Nawat (NBTN)

Ne mumelakchijtiwit

Yajika, timumelakchijtiwit ipanpa tutayulmatilis wan tinejmachnemit iwan ne Teut ipanpa ne tutajtzin Yeshu Mawaltijtuk, ika ipanpa yaja tikpishtiwit se ujti, iwan ne tayulmatilis, pal tikajsit ini tetasujtalis ne tikpiat wan timuweymatit ipanpa tejchialis ipal ne itawilyu ne Teut.

Inte sema uni: nusan timuweymatit tik ne tupejpenaj, ika tikmatit ka ne penaj kichiwa tanejmachselilis; ne tanejmachselilis techejekua wan techmachtia; ne taejekulis techmaka tejchialis; wan ne tejchialis inte tashijshikua, ika ne Ijiutzin ne techmakatiwit kikushinijtuk ne itetasujtalis ne Teut ijtik ne tuyujyulu.

Ika ne Mawaltijtuk, kenhayuk kwak inteuk tiwelituyat tatka, mikik ka imaku ne inte kitasujtat ne Teut. Ika uij ma miki se ka imaku se ká yulmelawak. Anka weli nemi se ká inte majmawi miki ka imaku se ká yek. Ne Teut kilwitia ka yek ne itetasujtalis tupanpa, ika kwak tejemet kenhayuk titateyekchiwanimet katka, ne Mawaltijtuk mikik ka tumaku.

Yajika, sujsul mas timumelakchijtiwit ashan iwan ne iesyu, wan san timupalewisket ipanpa iishpan ne kwalan, 10 ika su kwak timusumat katka timupataket ipal ne Teut ipanpa ne imikilis ne ikunew, ashan sujsul mas kwak timupatatiwita tiawit timupalewiat ika yaja yultuk. 11 Inte sema uni: nusan timuweymatit iwan ne Teut ipanpa ne tutajtzin Yeshu Mawaltijtuk, ika ipanpa yaja tiweliket timupatat ashan.

12 Yajika, kenha ken ipanpa se takat kalak ne tateyekchiwalis tik ne taltikpak, wan ipanpa ne tateyekchiwalis kalak ne mikilis, wan ijkiuni ne mikilis panuk itech muchi ne takamet ika muchi tateyekchijtiwit, 13 ika achtu ka ne tajtuli melka nemituya tateyekchiwalis tik ne taltikpak, te mupua katka ne tateyekchiwalis ika te kanaj tajtuli; 14 melka uni, pejki tatuktia ne mikilis iwan Adam wan hasta Moshe nusan ijpak ne takamet ne inte tateyekchijket ken Adam, ne kichijki tay te nemituya pal kichiwa, ká se figuraj ipal ne yawi witz.

15 Melka uni, ne tay muchijki teyek inte kenha ken ne tetakulis. Ika su ipanpa ne itateyekchiwalis se mikiket miak, sujsul mas tepewik ipal miak ne itetasujtalis ne Teut wan ne tetakulis ipanpa teutasujtalis, ipal sanse takat: Yeshu Mawaltijtuk. 16 Nusan ne tetakulis inte kenha ken su yaja ipanpa sema se ká tateyekchijtuk; ika kwak muchijki juzgar, yaja ipanpa tay kichijki sesan, wan muitak ka te yejyek; ne tetakulis, yaja ipanpa tay kichijket miak teyek, wan mumelakchijket. 17 Ika su iwan ne tateyekchiwalis ipal se tatuktij ne mikilis ipanpa sesan, sujsul mas ne kikwit muchi ne tetasujtalis wan ne tetakulis ipal ne tamelakchiwalis yawit tatuktiat yultuk ipanpa sesan: Yeshu Mawaltijtuk.

18 Kiane tel, ijkiuni ken ipanpa se tay teyek muitak ka muchi ne takamet te yejyek, kenhaya ipanpa se tay yek mumelakchijket muchi ne takamet pal yujyultuk. 19 Ika kenha ken ika se takat inte tetakamatki miak mukwepket tateyekchiwanimet, kenhaya ika sesan tetakamatki miak mukwepasket yejyek.

20 Walaj ne tajtuli pal ma tepewi ne tateyekchiwalis. Kan ne tepewik ne tateyekchiwalis, samawak mas ne tetasujtalis, 21 pal kiane, kenha ken ne tateyekchiwalis tatuktij tik ne mikilis, kenhaya ne tetasujtalis nusan tatuktia, ipanpa tamelakchiwalis, pal tiyujyultuk senpa ipanpa Yeshu Mawaltijtuk, ne tutajtzin.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes