A A A A A
Bible Book List

Roma 4Ne Bibliaj Tik Nawat (NBTN)

Tay ina ipanpa Abraham

Kiane tel, tay tiawit tinat ka kiajsik Abraham, ne tuachtuteku itech tunakayu? Ika asu Abraham yek ipanpa tay kichijki, melka kipia taika muweymatiskia, iishpan Teut inte! Ika tay ina ne ijkwilujtuk?

    "Abraham kiyulmatki ne Teut, wan mupujki ken tamelakchiwalis."

Inte tinat ka mutashtawia ne ipatiw ne itekiw se ipanpa tetasujtalis, asunte ken jaranaj. Su se inte kichiwa tatka wan kiyulmati ne ká ina ka yek ne inte kitasujta ne Teut, tikpuat ne itayulmatilis ken tamelakchiwalis. Tikmatit ka Dawid nusan ina ka kipia suertej yajane ká ne Teut ina ka yek melka inte kichiwa tatka:

    "Kipiat suertej yejemet ká mutapupulwijtuk tay inte nemituyat pal kichiwat wan minashtuk tay tateyekchijtiwit.

    Kipia suertej ne takat ká ne Tajtzin inte kishketza ka tateyekchijtuk."

Kwakuni, uni suertej ipal ne yajyawaltektuk, o nusan ipal ne tzuntepulmet? Ika tinat ka ne itayulmatilis Abraham mupujki ken tamelakchiwalis. 10 Ken mupujki ijkiuni? Kwak muyawaltektuka? O kwak tzuntepul katka? Inte kwak muyawaltektuka asunte kwak tzuntepul. 11 Wan kikwij tayawaltekilis pal muishmati, ken se selloj ipal ne itamelakchiwalis ne tayulmatilis kwak tzuntepul katka, ma muchiwa inteku muchi ká tayulmatit melka tzuntepulmet, pal mupuat yejemet nusan tik tamelakchiwalis, 12 wan iteku ne tayawaltekilis ipal ká inte sema muyawaltektiwit asunte nusan taksat kan taksak tuteku Abraham kwak yaja inteuk muyawaltek wan tayulmatki.

13 Ne Teut tamakak ipromesaj ka muchi ne tal yawi ipal Abraham wan ne ishinach inte ipanpa ne tajtuli asunte ipanpa ne tamelakchiwalis ipal tayulmatilis, 14 ika asu yawi inpal ipanpa ne tajtuli, ne tayulmatilis te tatka ipatiw, wan ne promesaj pulijtuskia, 15 ika ne tajtuli kalwika kwalan. Kan te kanaj tajtuli, te aka weli mutenewa ika kichijki tay ina ne tajtuli ka te weli muchiwa. 16 Yajika, ipanpa tayulmatilis, pal kiane ipanpa tetasujtalis. Wan kiane, yek ne promesaj ipal muchi ne ishinach: te sema ipal ne kipiat ne tajtuli, nusan ne kipiat ne itayulmatilis Abraham, ne tuteku ipal muchi tejemet. 17 Ken nemi ijkwilujtuk:

    "Nimetztalijtuk inteku miak techan."

Wan Abraham kiyulmatki, ika ne Teut kinyulkwepa ne miktiwit wan kinutza ne te kanaj wan nemia. 18 Abraham tejchishki kwak te welituya muita ken weliskia tejchia. Tayulmatki ka yaja yawi muchiwa inteku miak techan, ika inatuya:

    "Yawi ijkiuni ne mushinach."

19 Wan ipanpa itayulmatilis kimatki, melka yaja chulet, ne iweyka achka miktuka ka kipiaya sentzunti shiwit, wan melka ne ishinach Sara nusan palantuya. 20 Kwak ne Teut kichijki uni promesaj, yaja te inak ka te weli, nian ka te kimati ka ijkiuni: chikawayak ipanpa itayulmatilis wan inak ka wey ne Teut; 21 temik iyulu wan kimati katka ka weli muchiwa ken ne Teut kilwij. 22 Neka mupujki ipal Abraham ken tamelakchiwalis.

23 Inte muijkwiluj ka mupujki ken tamelakchiwalis semaya ipal Abraham. 24 Nusan muijkwiluj tupanpa, ka nusan yawi mupua tupal su tejemet tikmatit ka Yeshu, ne tutajtzin, muketzki kwak miktuk, 25 ka mutemakak ipanpa tay tikchijtiwit teyek wan muyulkweptuk ipanpa ne tutamelakchiwalis.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes