Roma 14

Ne Bibliaj Tik Nawat

Maka shimutenewakan

14 Shikwikan yek ne teuk ujuksituk tik intayulmatilis, wan maka shinajnankilikan ipanpa tajtajtanilis.

² Ne tayulmati, welit tinat ka yaja ken se weli kikwa muchi. Ne te uksituk, ken se kukuya ne sema weli kikwa kilit. ³ Ne takwa, ma te ina ka te tatka ipatiw ne te takwa, wan ne te takwa, ma te ina su yek ne takwa, ika ne Teut kikwijtuk yek.

⁴ Ká taja pal tina su yek ne tepal kaltekitini? Semaya ne itekuyu yawi kita su naka o su wetzi. Wan yawi naka, ika ne itekuyu kipia itajpal pal kiselia ejkatuk.

⁵ Sejse inat ka te kenhat muchi ne tujtunal ipal ne shiwit pal titajpiat ne ijilwit, wan sejse inat ka muchi ne tujtunal kenhat. Ma muchi kimatikan tay kimatit. ⁶ Ká ne kishkejketza ne tunal, kishkejketza ipanpa ne Teut; nusan ne takwa, takwa ipanpa ne Teut, ka kilwia panpadiush; wan ne te takwa nusan te takwa ipanpa ne Teut wan kilwia panpadiush!

⁷ Ika nian se pal tejemet yultuk ipal isel, nian aka miki ipal isel: ⁸ su tiyujyultuk, tiyujyultuk ipal ne Tajtzin, wan su timikit, timikit ipal ne Tajtzin. Yajika, su tiyujyultuk wan su timikit, tejemet tiipal ne Tajtzin. ⁹ Yaja taika ne Mawaltijtuk mikik wan muketzki, pal muchiwa tajtzin ipal ne miktiwit wan ne yujyultuk.

¹⁰ Taja taika tina su yek ne muiknew? Wan taja nusan, ken ka tiaw tina ka te tatka ipatiw ne muiknew? Su muchi tiawit timutaliat iishpan ne ikalpuli ne Teut, ¹¹ ika muijkwilujtuk:

¹² Yajika tel, muchi tejemet tiawit timuishpanuat iwan ne Teut, sejse ika, pal yaja kita tay tikchijtiwit.

¹³ Yajika nina ma intea timutenewakan ne se iwan ne seuk, mas yek shiktenewakan su aka kitalilia ne iiknew se kan yaja weli mukshichalua wan tatzunchalua. ¹⁴ Nikmati, wan ne tajtzin Yeshu kichijtuk ka nikmati yek, ka te nemi tatka tay susulnaj isel, wan semaya ne tay muishkejketza susulnaj, yaja susulnaj. ¹⁵ Su kikukua ne muiknew ipanpa ne takwal, kineki ina ka tea timuwika iwan tetasujtalis. Maka shikpulu ipanpa ne mutakwal se ká mikik ne Mawaltijtuk ka imaku. ¹⁶ Ma te kukujtaketzakan, tel, ipanpa tay tikchijtuk melka yek. ¹⁷ Ika ne itatekimakalis ne Teut te tay tikwat wan tay tikunit, yaja tamelakchiwalis wan nejmachnemilis wan pakilis ipanpa ne Ijiutzin. ¹⁸ Ne ká tekiti ijkiuni ajwiak ipal ne Teut, wan ne takamet nusan kitat yek.

¹⁹ Kiane tel, tiakan ipan ne tay ipal ne nejmachnemilis wan ne kalketzalis ijtik muchi. ²⁰ Maka shiktajkali ipanpa takwal ne itekiw ne Teut! Melka muchi pupujtuk, te yek ma se takwa ken kichiwa ka seuk mukshichalua; ²¹ yek ma te tikwakan nakat wan ma te tikunikan atata nian tatka taika weli mutasa ne muiknew.

²² Su taja tikpia tayulmatilis, shikpiaya tik itachialis ne Teut. Suertej kipia ne ká inte mutenewa ipanpa tay ne ipal ajwiak; ²³ ne ká takwa iwan mawi, yaja te, yaja mutenejtuk ika te muwika iwan tayulmatilis; muchi tay te muchiwa iwan tayulmatilis, te nemi yek.