Bible Book List

Numba 2 Fo Da Corint Peopo 4 Hawai‘i Pidgin (HWP)

Rich Kine Stuff Inside Cheap Clay Bowls

God wen give us guys chance, so he wen give us dis job fo tell peopo bout his New Deal. Dass why we no give up. So dis wat we do: we tell everybody we no goin do da bad kine stuff some odda peopo do. Dey do um wen nobody can see, an dey no mo shame. We no try bulai nobody. We no try teach fake stuff bout wat God say, but we goin teach da true stuff strait out. Den everybody can go check us out demself, an dey can see wat kine guys us in front God. If get peopo dat no undastan da Good Stuff From God dat we teach, dey da peopo dat goin wipe out. Da Devil, he jalike da god fo da peopo nowdays. He wen make some peopo jalike dey blind inside dea heads. Az da peopo dat no trus da Boss who fo real. Dass jalike dey no can see da light. Dey no can undastan da Good Stuff bout how awesome Christ stay. Christ, he o same like God. He jalike one picha fo show how God stay. Us guys no talk plenny bout ourself. We talk plenny bout Jesus Christ da Boss. We ony say dis bout ourself: us guys come fo kokua you guys, cuz we Jesus guys. God wen say, “From da dark place, I like da light shine,” an he wen make his light shine inside our hearts. God like give us da light. Dat mean, wen we tink bout Christ, we know how awesome God stay.

We get plenny rich kine stuff from God inside us, no matta we jus regula kine peopo. Dat show dat da big power come from God an not from us guys. Dass jalike wen somebody get rich kine stuff inside cheap clay bowls. We get plenny presha from all ova, but we still can handle. We no can undastan everyting, but we no give up. Get guys dat make us suffa plenny, but God no leave us by ourself. Dey bus us up, but dey no wipe us out. 10 Every place we go, da way us guys suffa an get bus up, show how plenny Jesus wen suffa wen he wen mahke. An cuz our body no mahke no matta we get bus up, dat show dat Jesus still stay alive now. 11 Every day, us guys dat stay alive, we almos mahke cuz we Jesus guys. An dis way everybody can see dat Jesus give us real kine life, no matta our bodies goin mahke bumbye. 12 So den, us guys no scared fo talk fo Christ, no matta we can mahke cuz a dat, so dat you guys can stay live fo real kine.

13 Inside da Bible, get somebody dat tell, “Cuz I wen trus God, dass why I wen talk.” Us guys tink togedda same ting: Cuz we trus God, dass why we talk. 14 We know dat da God dat wen make our Boss Jesus come back alive from mahke, he goin make us guys come back alive too, cuz we stick wit Jesus. God goin put us guys an you guys dea in front him, wea he stay. 15 God do all dis stuff fo help you guys. He goin do plenny good kine stuff fo mo an mo peopo, an dey goin tank him plenny, an tell how awesome he stay.

We Trus God Everytime

16 Dass why us guys still can handle an no bum out. No matta our bodies stay coming junk outside, but inside God stay making us mo strong every day. 17 We get plenny big time trouble now, but you know wat? Wen we tink bout how we goin come awesome foeva, all dat trouble, ony manini kine stuff! 18 So we looking at an tinking bout da kine stuff you no can see, not da kine stuff you can see. Da stuff you can see, ony goin stay litto wile. But da kine stuff you no can see, dat kine goin stay foeva.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references