Bible Book List

Numba 2 Fo Da Corint Peopo 10Hawai‘i Pidgin (HWP)

Paul Talk Bout Wat He Do Fo God

10 Dis yoa brudda Paul talking. You guys tink I shame fo talk strait out wen I stay wit you guys, but I no mo shame fo talk strait out wen I stay one far place? Eh, I telling you guys fo listen to me, cuz Christ get good heart fo you guys, an he give you guys chance. Get guys ova dea dat say dat us guys stay ack jalike da odda peopo inside dis world ack. So wen I come ova dea, I tink I gotta talk strait to dem guys. I telling you guys fo try listen to wat I saying now, so den wen I come ova dea, I no need talk strong to dem guys. Wen we get beef wit odda peopo, we no fight like da peopo inside da world dat donno God, no matta we live inside da world too. We no use da same kine tings fo beef, jalike da peopo inside dis world use. Wen we beef agains da hard head kine peopo dat try fo make argue, we get Godʼs power fo show dat dea hard head tinking all hamajang. Everyting dey do fo make demself mo importan, an fo stand agains anybody dat like know God, we goin teach um fo tink diffren kine, da way Christ like us tink. Afta you guys start fo do everyting Christ say, we goin stay ready fo handle anybody dat still yet do wat Christ say no do.

You guys ony like look at da tings on da outside. If one guy tink he Christʼs guy, he gotta tink bout dis, dat we Christʼs guys too, jalike him. I no mo shame fo tell everybody dat da Boss wen give us guys da right fo make you guys strong inside, an no wipe you guys out. I no like make like I try fo scare you guys wit da lettas I write. 10 Some guys say, “Da lettas from dis Paul guy, dey talk strong an dey get plenny power, but wen he stay ova hea, he no ack lidat, an wat he say, good fo notting.” 11 Try let dem guys figga dis: Da lettas we write wen we no stay dea, an how we ack wen we come dea, same ting.

12 Get peopo dat tell everybody dat dey real good peopo. We no make ourself jalike dem. We no like say we jalike dem. Dose guys, dey ony look at odda guys jalike demself, an dey figga dey stay good jalike dem. Wen dey make lidat, dey no undastan notting. 13 We no goin talk big bout someting we neva do. We ony goin talk big bout da job God wen give us fo do. Wat we wen do fo you guys, God wen tell us fo do dat. 14 We no stay ova-do um wen we talk big bout you guys. Cuz we da guys wen come an tell you guys da Good Stuff From Christ, an you guys wen listen. If God neva send us by you guys, an we still yet wen talk big bout you guys, den dass not right. 15 We no talk big bout da stuff odda peopo wen do. You guys stay trus God mo an mo now, an we stay waiting an trus dat we goin help you guys mo an moa, jalike God wen tell us fo do. 16 Den we can tell da Good Stuff From Christ inside da places da odda side a you guys, wea nobody stay working. No good we talk big bout wat odda guys wen do inside dea kuleana like we was da guys wen do um. 17 You know, da Bible say, “Da guy who talk big, let um talk big bout God da Boss.” 18 Anybody talk good bout demself, dat no goin make da Boss say, “Dis guy okay.” So den, who okay? Da guy da Boss talk good bout, he okay.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references