Matthew 25 Hawai‘i Pidgin (HWP)
Ten Girls An Da Wedding
25 “Dat time, wen God in da sky stay King, goin be jalike dis: Had one wedding. Ten a da wahineʼs girl friends wen take dea olive oil lamps an go dea friendʼs house fo wait fo da groom. 2 Five a dem smart, cuz dey tinking, an da odda five no tink notting. 3 Da girls dat no tink, dey take dea lamps, but den, dey no take olive oil wit dem fo burn. 4 Da girls dat tink, dey take dea lamps, an dey take plenny olive oil wit dem. 5 But da groom neva come yet, an all da girls like go sleep. 6 Midnite, somebody wen yell, ‘Eh! Da groom coming! Come outside fo meet him!’
7 “All da girls wen get up fo make dea lamps ready. 8 Da girls dat no tink wen tell da odda girls, ‘Eh, you guys get olive oil. Try give us some! Da fire stay inside our lamps, goin pio.’
9 “Da smart girls say, ‘No can! No mo nuff fo everybody, jus us. Eh, go buy from da guys dat sell um.’ 10 Afta dey wen go fo buy some mo olive oil, da groom wen come ova dea. Da girls who was ready, dey wen go wit him to da wedding party. An dey wen shut da door.
11 “Bumbye, da odda girls wen come. Dey say, ‘Eh, Mista, open da door fo us!’
12 “But da guy tell um, ‘No can! Cuz I donno you guys.’ ”
13 Den Jesus say, “Eh! Az why I telling you guys, watch an stay ready, cuz you guys donno da day o da time, wen me, da Guy Dass fo Real, goin come back, you know.”
Three Worka Guys An Da Money
14 Jesus tell um, “Dat time wen God stay King, goin be jalike dis: Had one guy, he was going on one trip to one far place. Befo he go, he tell his worka guys, ‘Come. I like you guys take care all my stuffs fo me.’ 15 He put one guy in charge a five bag money, one nodda guy two bag money, an one nodda guy one bag money, cuz he know how much each guy can handle. Den he go way.
16 Da guy who wen get da five bag money wen go use um fo make business, an wen get five mo bag money. 17 Da guy who get da two bag money wen do da same ting an wen get two mo bag money. 18 But da guy who wen get da one bag money wen dig one hole, an wen put um inside da groun, an wen hide da bossʼs money inside.
19 “Long time afta, da boss wen come back. He wen go check out how da worka guys wen handle all his money. 20 Da guy who wen get da five bag money wen bring five bag mo to da boss. He say, ‘Boss, you wen give me five bag money. Eh, try look! I wen make five mo bag money.’
21 “Da boss say, ‘Eh good! You wen do good. I can trus you. You wen do good wit ony litto bit. I goin put you in charge a plenny stuff. Come. Stay wit me. I stay good inside, same ting, az wat I like you feel.’
22 “Den da guy wit da two bag money wen come an say, ‘Boss, you wen give me two bag money. Look, I wen make two mo bag money.’
23 “Da boss say, ‘Eh good! You wen do good. I can trus you. You wen do good wit ony litto bit. I goin put you in charge a plenny stuff. Come. Stay wit me. I stay good inside, same ting, az wat I like you feel.’
24 “Den da guy wit ony one bag money wen come an say, ‘Boss, I know you one hard guy who no fool aroun. You cut da crop wea you neva plant, an you go get da wheat wea you neva throw seed. 25 An den, I was real scared, an I wen hide yoa money inside one hole undaneat da groun. Hea, yoa money, still yet stay all safe.’
26 “Den da boss say, ‘Auwe! You one real poho worka! You one lazy bugga! You know I like cut da crop wea I neva plant, an I like go get da wheat wea I neva throw seed. 27 Cuz you wen know all dat, how come you neva put my money inside da bank, so dat wen I come back, I can get my money back, an da interes too. 28 Eh, you guys ova dea, take away da money from dis guy an give um to da guy wit da ten bag money.’
29 “Cuz everybody who get stuff goin get mo plenny. But da guy who no mo notting, even da litto bit he get, goin lose um. 30 Go throw dis poho worka guy outside dea inside da dark. Ova dea dey goin cry real hard an grind dea teet cuz dey so huhu an futless.”
Everybody Goin Stand In Front God Da Judge
31 Jesus tell um, “You know, I da Guy Who Fo Real. Wen I come back, I goin be awesome. All da angel guys goin come wit me. Den I goin sit down on top my throne dat stay awesome. 32 All da diffren kine peopos from all ova da world goin come togedda in front me, an I goin put some on one side an some on da odda, jalike one sheep farma guy put da sheeps on one side an da goats on da odda side. 33 Same ting, I goin put da guys dat stay do da right ting on my right side an da odda guys on my left side.
34 “I da King, you know. Dat time I goin tell da guys on my right side, ‘Come ova hea! My Fadda like do plenny good kine stuff fo you guys an give you guys everyting you guys need. You know, wen he wen make da world, he wen make all dis stuff ready fo you guys, cuz I goin be yoa King. So, all dis fo you guys. Take um awready!’ 35 Cuz I was hungry an you guys wen give me food fo eat. I was thirsty an you guys wen give me someting fo drink. I wen go one new place wea nobody neva know me, an you guys wen say, ‘Eh, come stay our house.’ 36 I neva had clotheses, an you guys wen give me clotheses. I was sick an you guys wen take care me. I wen stay inside da prison an you guys wen come see me.
37 “Den da guys who everytime do da right ting goin aks me, ‘Boss, wen was dis, dat you was hungry an we wen give you food fo eat? Wen was dis, dat you was thirsty, an we wen give you someting fo drink? 38 Wen was dis, dat you wen go one new place wea nobody know you, an we wen say, “Eh, come stay our house”? Wen was dis, dat you neva had clotheses, an we wen give you clotheses? 39 Wen was dis, dat you was sick o inside da prison, an we wen come see you?’
40 “Me, da King, I goin say, ‘Dass it! I tell you guys fo shua, wateva you guys wen do fo one a my bruddas, no matta peopo tink da guy not importan, was me you guys wen do um fo.’
41 “Den I goin tell da odda guys on my left side, ‘Go way from hea, you guys! God goin punish you guys! Go inside da fire dat stay ready fo da Devil an his angel messenja guys, da fire dat no goin mahke eva. 42 Cuz I was hungry an you guys neva give me food. I was thirsty an you guys neva give me notting fo drink. 43 I wen go one new place wea nobody know me, an you guys neva tell me come stay wit you. I neva had clotheses, an you guys neva give me notting fo wear. I was sick an inside da prison, an you guys neva bodda fo come see me.’
44 “Den dem buggas goin tell, ‘Boss, wen was dis, dat you was hungry, o thirsty, o one new guy in town, o no mo clotheses, o sick, o inside da prison, an we neva come fo kokua you?’
45 “I goin tell um, ‘Dass it! I tell you guys fo shua, da stuff you guys neva do fo one guy dat da peopo tink not importan, was me you neva do um fo.’
46 “Den da bad guys going way, an suffa foeva. But da guys dat everytime do da right ting, dey goin live to da max foeva.”