Matthew 17 Hawai‘i Pidgin (HWP)
Jesus Look Diffren On Top Da Mountain
17 Afta six days, Jesus wen take Peter, James, an James brudda John wit him up on top one big mountain wea neva have nobody. 2 Den, da same time dey stay looking at him, Jesus wen start fo look diffren in front dem. His face wen shine jalike da sun, an his clotheses wen come shiny kine jalike one bright light. 3 An you know wat? Right den an dea Moses an Elijah from long time befo wen come outa no wea, an dey stay talking wit Jesus.
4 Den Peter tell Jesus, “You know wat, Boss? Good we stay ova hea! If you like, I goin make shacks ova hea, one fo you, one fo Moses, one fo Elijah.”
5 Peter still talking, an you know wat? Had one bright cloud go ova dem. Den, one voice from inside da cloud say, “Dis my boy! I get plenny love an aloha fo him. I feel real good inside cuz a him. Eh, listen to him!” 6 Da guys hear da voice, an dey come real scared, an dey put dea face on top da groun.
7 Jesus go by dem, an touch um, an say, “Get up! No scared!” 8 Wen dey look up, dey see ony Jesus.
9 Afta dat, Jesus guys stay going down da mountain, an Jesus tell um, “You guys wen see someting real spesho. No tell nobody wat you guys wen see. I Da Guy Dass Fo Real. I goin mahke, an I goin come back alive afta I mahke. Ony dat time, you guys can tell peopo wat you guys wen see.”
10 Jesus guys aks him, “Eh, da teacha guys dat teach da Rules from God, how come dey say Elijah gotta come back first befo Godʼs Spesho Guy goin show up?”
11 He say, “Dass right. Elijah gotta come back first an make everyting ready fo Godʼs Spesho Guy. 12 But I telling you, Elijah wen come back awready, an da peopo neva know who him. Dey even wen make um any kine. An me, da Guy Dass Fo Real, same ting, dey goin make me suffa lidat too.” 13 Den his guys wen figga dat wen he talk bout Elijah coming back, he mean John Da Baptiza Guy.
Jesus Throw Out Da Bad Kine Spirit From One Boy
14 Jesus an his three guys come by choke peopo. One guy from ova dea wen go by him, an go down on his knees. He say, 15 “Boss, try pity my boy! He fall down an start fo shake plenny, an suffa real bad. Plenny times he fall down inside da fire o inside da water. 16 I wen bring um ova hea by da guys you stay teaching, but dey no can make him come good.”
17 Jesus say, “You guys! Nowdays nobody stay trus God! You guys, yoa head, all kapakahi! How much time still I gotta put up wit you guys? Bring da boy ova hea!” 18 Den Jesus talk strong to da bad kine spirit. Den da spirit let go da boy. Right den an dea da boy wen come good.
19 Jesus guys go by him wen neva have nobody, an aks him, “How come we no can throw um out?”
20 He say, “Cuz you guys neva trus God nuff, az why. An I telling you guys dis too: if you guys trus God ony litto bit, jalike da smalles mustard seed, you can tell dis mountain, ‘Go move ova dea,’ an da mountain goin go. No goin get notting dat you guys no can handle. 21 [But ony get one way fo make dis kine bad spirit let peopo go, you know. You gotta skip food so you can pray mo hard.]”
One Mo Time Jesus Say He Gotta Mahke An Come Back Alive
22 Den all Jesus guys wen come togedda wit him, Galilee side, an Jesus wen tell um, “I da Guy Dass Fo Real, you know. But den get peopo dat goin set me up an bus me. 23 Dey goin kill me, an afta dat, day numba three, I goin come back alive.” Dat make Jesus guys come real sad.
Jesus Pay Da Tax Fo Da Temple
24 Den Jesus an his guys go Capernaum town, an da guys who take money fo tax go by Peter an say, “Yoa teacha pay da tax fo da temple, yeah?”
25 He say, “Yeah, he pay um.”
Wen Peter go home, Jesus talk first, an say, “Eh Simon! Try tell me wat you tink bout dis: All da kings inside da world, from wea dey take da tax from? From dea own peopo, o from da odda peopos?”
26 He say, “From da odda peopos.”
Jesus say, “Den dea own peopo no need pay, yeah? 27 But if us guys no pay um, da tax guys goin tink bad bout us guys. So, go by da lake, an drop one line inside da water. Da first fish you catch, open da mout. You goin find one silva coin inside. Take dat coin to da tax guys. Dat goin be nuff fo me an you.”