Matthew 13Hawai‘i Pidgin (HWP)
Da Farma Plant Seed
13 Same day Jesus go outside da house, an sit down near da lake fo teach. 2 Plenny peopo come aroun him, so he go inside one small boat, an sit down dea. Da peopo, dey stay standing on top da beach. 3 He use plenny stories fo teach um. Dis wat he say,
“You guys hear da story bout da farma guy? He go plant seed. 4 He throw da seeds fo plant. Some fall down by da side a da trail, an da birds go eat um up. 5 Some fall down on top da rocks wea ony had litto bit dirt. But dey grow up fast, cuz ony litto bit dirt dea. 6 Wen da sun come up, da plants burn, an dry up, cuz no mo root. 7 Odda seed, dey fall down inside da kine bushes wit kukus. Da bushes wen grow. Dat wen choke da plants. 8 Odda seed, dey fall down inside da good dirt, an dey grow good, an come up plenny. Some seed, dey make thirty times mo seed, some odda seed make sixty times mo seed, an odda even make hundred times mo seed.” 9 Jesus say, “If you guys hear dis, den tink bout um!”
How Come Jesus Teach Wit Stories
10 Da guys Jesus teaching come by him, an say, “How come you use stories fo teach da peopo lidat?”
11 He say, “God let you guys know all da stuff bout how he stay King in da sky. But da odda guys, he no let dem know all dat kine stuff. 12 If you guys undastan all dat kine stuff, den God goin let you know moa, plenny moa. But if you guys no like know all dat stuff, den even da litto bit you know, he goin take um away. 13 Dass why use stories fo I teach um, cuz
‘Dey see, but dey no can see fo real.
14 Dey ack jalike da guys Isaiah wen talk bout befo time. He say,
“You guys goin hear,
Dass wat God say.
16 “But you guys, you stay good inside cuz yoa eyes can see fo real an yoa ears can hear fo real. 17 Dass fo shua. An I like tell you guys dis too: Long time ago plenny guys who wen talk fo God an plenny guys who wen do da right tings like see da stuff you guys see, but neva see um. An dey like hear da stuff you guys hear, but neva hear um.
Wat Da Story Mean
18 “Listen! Dis wat da story bout da farma mean. 19 Any guy hear da stuff bout da King in da sky, an no undastan, da Bad Guy come an take away da stuff dat da guy wen hear dat stay inside him. Dass jalike da seed dat fall down by da trail. 20 Da seed dat fall down on top da rocks, dass jalike one guy dat hear da good kine stuff, an he trus wat God tell him right den an dea, an he stay good inside. 21 But da guy, he no mo root. He stick wit um fo litto wile, but wen da odda guys make him suffa cuz he trus da stuff he wen hear, den he give up. 22 Da seed dat fall down inside da kine bushes wit kukus, dass jalike one guy dat hear wat God say, but bumbye he worry bout all da kine stuff he need hea inside da world. He like come rich, an dat throw him off da track, so all dat stuff choke da stuff God say dat was inside him. He no can do da right tings, jalike one plant inside da kine bushes wit kukus dat no can give wheat. 23 Da seed dat fall down inside da good dirt, dass jalike one guy dat hear wat God say an undastan um. He do da right tings, jalike da good plant dat give wheat. Da good stuff dat guy do, he goin do good stuff hundred times moa, one nodda guy sixty times moa, one nodda guy thirty times moa.”
Da Story Bout Da Weeds
24 Jesus teach da peopo wit anodda story. He say, “Wen God in da sky stay King, dass jalike wen one farma plant good seed inside his field. 25 But wen everybody sleeping, one guy dat stay agains him go ova dea wea da wheat seed stay planted, an plant weeds, an bag. 26 Wen da plants come up an make wheat, same time da weeds come up, but den can tell da weed diffren from da wheat. 27 Da guys dat work fo da owna go by him an tell, ‘Eh boss, da seeds you wen plant inside da field, was good, o wat? How come get weeds?’
28 “He tell um, ‘One guy dat stay agains me wen plant um ova dea.’
“Da worka guys say, ‘You like us go pull out da weeds?’
29 “He say, ‘No, I no like. If you guys do dat, you goin pull out da wheat too. 30 Let um grow togedda till dey stay ready. Den pull out da weeds first, an tie um togedda fo burn. Den cut da wheat, an put um inside da storage place.’ ”
Da Mustard Seed Story
31 Jesus use anodda story fo teach da peopo. He say, “Wen God in da sky stay King, dass jalike one mustard seed. Wen one guy plant da mustard seed inside his field, 32 dat kine seed da mos smalles seed, mo small den all da odda seeds. But wen dat seed grow, da plant come big, mo big den all da odda plants, an come big jalike one tree. Get birds in da sky dat come an make dea nest inside da branches.”
Da Yeast Story
33 Jesus teach da peopo wit anodda story. He say, “Wen God in da sky stay King, dass jalike wen one wahine take yeast an mix um wit plenny dough fo make bread. Bumbye da whole dough goin come mo big, cuz a da yeast.”
How Come Jesus Tell Stories Fo Teach
34 Jesus wen teach plenny peopo plenny stuff wit ony stories. He neva teach um wit odda kine stuffs. 35 He do um lidat fo make um happen jalike da guy who wen talk fo God wen say befo time,
“I goin teach um wit stories,
Wat Da Story Bout Da Weeds Mean
36 Jesus wen go way from da peopo, fo go inside his house. Da guys he stay teaching wen come by him, an say, “Dat story bout da weeds inside da field, wat dat mean?”
37 He say, “Da farma dat plant da good seed, dass me, Da Guy Dass Fo Real. 38 Da field, dass da world. Da good seed, dass da peopo who get God fo dea King. Da weeds, dass da peopo who stick wit da Bad Guy, da Devil. 39 Da guy dat stay agains da farma an plant da bad seed, dass da Devil. Wen da plants stay ready, dass da time wen da world goin pau. Da worka guys, dey da angel guys from da sky. 40 All dat mean, wen dey pull out da weeds an burn um inside da fire, dass jalike goin be wen da world goin pau. 41 I da Guy Dass Fo Real, you know, an I goin send my angel guys all ova da place wea I stay King, fo pull out all da guys dat broke Godʼs Rules an dat wen tell da odda guys fo broke da Rules too. 42 Den dey goin throw um inside wea ony get plenny fire. Dea dey goin cry real hard an grind dea teet cuz dey so huhu an futless. 43 Den da guys dat doing da right tings goin stay wit dea Fadda da King, an be awesome an shine jalike da sun. If you hear dis, make shua you listen.
Da Rich Stuff One Guy Bury
44 “Wen God in da sky stay King, dass jalike had rich kine stuff dat one guy wen bury inside one field. Get one nodda guy dat find um, an den he bury um one mo time. He stay good inside. Den he sell all his stuffs, fo buy dat field.
Da Pearl Story
45 “Wen God in da sky stay King, dass jalike one trader guy dat looking fo good kine pearls. 46 He find one pearl dat cost plenny money. Den he sell all his stuffs, fo buy dat pearl.
Da Net Story
47 “Wen God in da sky stay King, dass jalike wen dey throw one net inside da ocean, an get any kine fish. 48 Wen da net come full, da fisha guys bring um on top da beach. Dey put da good kine fishes inside one bucket, an throw out da rubbish kine fishes. 49 Dass how goin be wen da world goin pau. Da angel guys from da sky goin go all ova da place, an take away da bad guys from da guys dat stay do wat Godʼs Rules say. 50 Dey goin throw da bad guys inside wea ony get fire. Dea dey goin cry real hard an grind dea teet cuz dey so huhu an futless.
Da New Kine Stuff An Da Old Kine Stuff
51 “Eh! You guys undastan all da stuff I telling you?”
Dey say, “Yeah, yeah, we undastan.”
52 Jesus tell um, “All da teacha guys dat teach Godʼs Rules, an den go learn how dey can get God inside da sky fo dea King, dey jalike one rich guy dat bring out from his place new kine stuff an old kine stuff too.”
Da Nazaret Peopo, Dey No Mo Respeck Fo Jesus
53 Jesus pau use all dis kine story fo teach. Den he go way from dea. 54 He wen go his own place Nazaret town, an teach inside da Jewish church ova dea. Da peopo, wen blow dea minds, an dey say, “Eh, from wea he get all dese smarts? From wea he get da power fo do all dis awesome kine stuff? 55 Dass da carpenta boy, yeah? His mudda, Mary. An his brudda guys, James, Joseph, Simon, an Judas, yeah? 56 His sistas, dey stay hea wit us. So, from wea he get all dis stuff?” 57 Wen bodda dem, how he stay.
But Jesus tell um, “One guy who talk fo God get choke respeck. But he no mo respeck notting inside his own town an his own ohana.” 58 Az why Jesus ony do litto bit awesome stuff ova dea fo show his power, cuz dey no trus him.