Mark 1 Hawai‘i Pidgin (HWP)
John Da Baptiza Teach
1 You wen hear da story bout Jesus? He da Christ, da Spesho Guy God Wen Send. He Godʼs Boy. Dis da time da Good Kine Stuff Bout Christ wen start happening.
2 Isaiah, da guy who wen talk fo God long time ago, he wen write dis inside da Bible:
“God say, listen! I goin send my messenja guy.
4 Dat time da guy John wen show up inside da boonies, baptizing da peopo. He stay teaching, “You guys gotta come sorry an like pau do all da bad kine stuff you stay doing now, an no do um no moa. Den God goin let you guys go an hemo all yoa shame. Dass why I stay baptize peopo.” 5 All da peopo from Judea side an Jerusalem town, dey wen go da boonies fo hear John. Dey wen tell um strait out all da bad kine stuff dey wen do, an he wen baptize um inside da Jordan River.
6 You know, Johnʼs clotheses come from da camel hair. He wen make one rope outa leather fo belt. He eat grasshoppas, an he get honey from da bees.
7 Dis wat he tell um, “Afta me, goin come one nodda guy. He get mo power den me. An you know wat? I not even importan nuff fo go down an help him hemo his slippa from his foot. 8 I baptizing you guys wit water, but da way he goin baptize you guys, he goin give you Godʼs Good an Spesho Spirit fo take ova you.”
John Baptize Jesus
9 Dat time, Jesus come from Nazaret town, Galilee side, an John wen baptize him inside da Jordan River. 10 Right den Jesus wen come up outa da water. An you know wat? Jesus wen see da sky broke open, an wen spock Godʼs Spirit coming down on top him, jalike one dove. 11 An wow! Had one voice from da sky wen say, “You my boy! I really get love an aloha fo you, an I stay good inside cuz a you!”
Da Devil Try Make Jesus Do Bad Kine Stuff
12 Right afta dat, Godʼs Spirit wen make Jesus go inside da boonies. 13 Had wild animals ova dea. Jesus, he wen stay dea forty days. Da Devil try presha him fo make him do bad kine stuff, but he neva. An had angel messenja guys from God dat wen come an take care him.
Jesus Start Fo Teach Galilee Side
14 Latas, King Herod wen throw John Da Baptiza Guy inside da prison. Afta dat, Jesus go Galilee side, an he tell da peopo da Good Stuff From God. 15 He tell, “Time awready! God stay King hea now. You guys gotta come sorry fo all da bad kine stuff you guys doing, an no do um no moa. An da Good Stuff From God I telling you guys, you guys gotta believe um!”
Jesus Tell Four Fisha Guys Fo Come Wit Him
16 Dat time Jesus stay walking by Galilee Lake, an he spock Simon an his brudda Andrew. Dey throwing dea net inside da water, cuz dey fisha guys. 17 Jesus tell um, “Eh you guys! Come wit me! Be my guys! Da way you guys bring in da fish, I goin teach you guys how fo bring in peopo fo be my guys too!” 18 Right den an dea, dey wen leave dea nets an go wit him.
19 Going from dea, he spock James an his brudda John. Zebedee dea fadda. Dey inside da boat fixing dea nets. 20 Right den an dea he tell um fo come wit him. Dey go way from dea fadda Zebedee who stay inside da boat wit da workas, an dey go wit Jesus.
Jesus Make One Bad Kine Spirit Let Go One Guy
21 Jesus an his guys, dey wen go Capernaum town. On da Jewish Rest Day, dey go inside da Jewish church. Jesus start fo teach da peopo. 22 Wat he teach um wen blow dea minds! Cuz he teach wit plenny power, not like da teacha guys dat teach Godʼs Rules, an dem guys no mo power.
23 Get one guy inside da Jewish church wit one bad spirit dat wen take ova him. Right den an dea he wen yell, 24 “Ho! You Jesus from Nazaret! Wat you like do to us? Why you wen come ova hea? Fo wipe us out? I know who you! You da Good An Spesho Guy from God!”
25 Jesus wen scold da spirit, “Shut yoa mout! Let go da guy!” 26 Den da bad spirit wen shake up da guy plenny. Da spirit wen yell real loud, an let go da guy.
27 Da peopo, wen blow dea minds. Dey tell each odda, “Eh! Wass dis?! Wat kine new teaching dis? Dis guy, he get power! He even tell da bad kine spirits wat fo do, an dey do um!” 28 Right den an dea, da peopo wen go all ova Galilee side, fo tell everybody bout Jesus.
Jesus Make Plenny Sick Peopo Come Good
29 Right den an dea Jesus dem wen go outside da Jewish church, an dey go inside Simon an Andrewʼs house. James an John go too. 30 Simonʼs mudda-in-law get feva. Simon dem tell Jesus, “Eh, her sick, you know.” 31 Jesus go an take her by da hand an pull her up. Right den da feva wen pau, an her wen give dem food.
32 Wen da sun go down, an da Rest Day pau, da peopo bring all da sick peopo an da peopo who get bad spirits da wen take ova dem. 33 All da peopo from da town was jamming outside da house. 34 Jesus wen make plenny peopo who get all kine sick come good. He make all da bad kine spirits let go da peopo, an he tell da spirits, “No talk!” cuz dey know who him.
Jesus Pray An Teach All Ova Galilee
35 Early in da morning, wen starting fo get light, Jesus wen get up an go outa da house. He go one place wea neva have nobody, an pray ova dea. 36 Simon dem wen go look fo him. 37 Dey find him, an dey tell, “Eh, everybody stay looking fo you, you know!” 38 But he say, “Neva mind! We gotta go da odda towns aroun hea, cuz I gotta teach dea too. Dass why I wen come.” 39 So, he teach inside all da Jewish churches all ova Galilee, an make all da bad kine spirits let go da peopo.
Jesus Make One Lepa Guy Come Good
40 Had one lepa guy wen go by Jesus, an go down in front him an beg him. He say, “If you like, you can make me come good so I can go wit da odda peopo fo pray, yeah?” 41 Jesus wen look at him, an he pity him. He touch da guy, an say, “Okay, I do um. Come good.” 42 Right den an dea da lepa guy come good. No mo lepa!