A A A A A
Bible Book List

Luke 16Hawai‘i Pidgin (HWP)

Da Story Bout Da Smart Luna

16 Jesus wen tell da guys he teaching, “You wen hear da story bout da rich guy dat get one luna, an he wen spend da rich guyʼs money on all kine stuffs? So da rich guy tell da luna fo come, an he say, ‘Eh, wat dis I hear bout you? You betta give me one paper dat tell how you wen spend my money, cuz you no goin be in charge no mo.’

“Da luna tink, ‘Wat I goin do now? My boss goin fire me, an I not strong nuff fo dig da ditch, an I shame fo beg. I know wat I goin do, so dat wen I no mo job hea, da peopo goin let me come dea house.’

“Den da luna tell all da guys dat owe da rich guy money fo come. He aks da first guy, ‘How plenny money you owe my boss?’ Da guy say, ‘One hundred barrel olive oil.’ Da luna say, ‘Dis yoa bill. Hurry up! Sit down an write fifty.’ Da luna aks anodda guy, ‘How plenny money you owe?’ He say, ‘One tousand bushel wheat.’ Da luna say, ‘Dis yoa bill. Write eight hundred.’ No matta da luna wen do stuff dass not right befo, now da boss talk good to him bout dis smart ting he wen do. You know, da peopo dat stick wit dis world mo smart wit da kine money stuff den da peopo dat stick wit Godʼs light.”

“I telling you, no matta can use money fo all kine stuff dass not right, you guys can use um too fo make friends fo yoaself. Den bumbye, wen da time come dat da money an everyting goin pau, God goin tell you guys ‘Aloha!’ inside his place dat stay foeva. 10 Whoeva do da small kine stuff he suppose to, you can trus him fo do da big kine stuff he suppose to. Whoeva no do da right ting fo da small kine stuff, you can trus him fo no do da right ting fo da big kine stuff. 11 So, no matta peopo can get money fo do stuff dass not right, if you not da kine guy peopo can trus wit even dat kine money, no way God goin trus you fo take care all his rich kine stuffs dass fo real. 12 An if nobody can trus you fo take care odda peopoʼs stuffs, no way God goin give you stuff fo yoaself.”

13 “Da worka guy no can work, an two boss guys own him same time. Bumbye he goin hate one boss an love da odda boss. He goin do good kine stuff fo one boss an tink bad bout da odda boss. You no can work fo da God dass fo real an da money god.”

14 But da Pharisee guys, dey love money. Wen dey hear all da stuff Jesus wen say, dey make fun a him. 15 Jesus tell um, “You da guys dat tell da peopo you do da right kine stuff, but God know how you guys stay inside. Da stuff da peopo tink stay real good, dass da stuff God tink no good.”

Odda Stuff Jesus Say

16 “Had da Rules Moses wen write down, an da stuff da guys dat talk fo God wen write down, till John Da Baptiza Guy come. Afta dat us guys tell da Good Stuff bout how peopo can get God fo dea King, an everybody stay jamming, cuz dey like get God fo dea King. 17 Stay mo easy fo da sky an da earth fo go pau den fo one litto line from Godʼs Rules fo go pau.

18 “Whoeva dump his wife an marry anodda wahine, dass jalike he stay fool aroun somebody not his wife. An da guy dat marry one wahine afta her husban wen dump her, dass jalike he stay fool aroun wit anodda guyʼs wife.”

Da Rich Guy An Lazarus

19 Jesus say, “One time had one rich guy dat wear da rich kine clotheses. Everytime he live jalike one king. 20 Had one begga guy name Lazarus dat get sores all ova him. Every day his friends wen put him down by da rich guyʼs gate. 21 You know, he like eat da stuff dat fall down from da rich guyʼs table. An da dogs even wen come lick his sores.

22 “Bumbye da begga guy wen mahke an da angel guys carry him by Abrahamʼs side wit God. An da rich guy mahke too, an dey bury him. 23 Inside da Mahke Peopoʼs Place da rich guy wen suffa plenny, an he look up. He spock Abraham far away wit God, wit Lazarus by his side.

24 “So he yell, ‘Eh Abraham, my ancesta guy! Pity me an send Lazarus fo dip da tip a his finga in water fo cool my tongue, cuz I stay suffa plenny inside dis fire.’

25 “But Abraham say, ‘My boy, rememba dat wen you wen stay alive, you wen get all da good kine stuffs, an Lazarus wen get all da bad kine stuffs. Now he stay good ova hea, an you stay suffa inside dis fire. 26 Anodda ting, in da middle get one real big ditch. You stay on one side, an we stay on da odda. Da peopo dat like go from ova hea to you no can, an da peopo dat like go from ova dea to ova hea no can.’

27 “Da rich guy say, ‘Den I beg you, cuz you my ancesta guy, send Lazarus to my faddaʼs house, 28 cuz I get five bruddas. He gotta tell dem bout dis place, so dat dey no come hea an suffa.’

29 “Abraham say, ‘Yoa bruddas get Moses Rules, an da tings da odda guys dat talk fo God wen write down inside da Bible. Yoa bruddas can hear wat dey say.’

30 “But da rich guy say, ‘No way, Abraham, my ancesta guy! But if one guy come back to dem from mahke, dey goin come sorry fo da bad kine stuff dey wen do, an pau do um.’

31 “But Abraham say, ‘If dey no listen to Moses Rules, an to da guys dat wen talk fo God, dey no goin listen an trus God, even if one guy come back alive from mahke.’ ”

Hawai‘i Pidgin (HWP)

Copyright © 2000 by Wycliffe Bible Translators International. All rights reserved

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes