Bible Book List

Fo Da Hebrew Peopo 8 Hawai‘i Pidgin (HWP)

Jesus, Our Head Priest Give Us One Mo Betta Deal

So, all dis stuff I stay telling you guys, dis da main ting: Us guys get da kine Head Priest dass perfeck. Dass Jesus. He da One dat wen sit down in da mos importan place, by da right side a da throne wea God Da Awesome King stay up dea inside da sky. Jesus stay working inside da place dat stay spesho fo God, da real place wea God stay, dat da Boss wen make, not jalike da kine tent da peopo wen make.

All da head priest guys, dey wen pick um fo come priest fo give da peopoʼs gifs to God, an fo kill da animals fo make da sacrifices. Az why Jesus, he gotta bring someting fo give to God too. But you know, if Jesus was hea inside dis world now, he no can be one priest guy, cuz awready get guys dat give da gifs to God, jalike da Jewish Rules say. Dose priest guys, dey work fo God inside one big tent dass ony jalike one copy a da real place dat stay wit God inside da sky. Dass why, wen Moses wen tink fo make da big tent, God wen tell him, “Make shua you do everyting jalike da picha I wen show you, wen you was on top da mountain.”

But da priest kine stuff dat Jesus stay doing fo God, dat stuff plenny mo betta den da stuff da odda priest guys stay do. An jalike dat, same ting, Jesus da middle man fo da deal dass plenny mo betta den da first deal. An dat new deal plenny mo betta, cuz God wen make mo betta promises wen he make dat new deal.

Now, if no mo trouble wit da first deal, den no need make one nodda deal. But God wen get plenny hard time wit da peopo, cuz dey no can handle. Dass why he wen say dis inside da Bible:

“Da Boss say,
    ‘Listen! Da time goin come,
Wen I goin make one new deal
    Fo da Israel ohana,
    An fo da Judah ohana.
No goin be same same jalike da deal
    Dat I wen make wit dea ancesta guys,
    Da time I wen take dea hand
    Fo bring um outa Egypt.
Dem guys, dey neva stick wit da deal I wen make wit dem.
    Cuz a dat, I wen pau listen dem.’
    Az wat da Boss wen say.

10 ‘Dis da deal I goin make bumbye
    Wit da Israel ohana peopo.
I goin put my Rules inside dea head.
    I goin write um inside dea heart.
I goin be dea God fo real kine,
    An dey goin be my peopo fo real kine.
11 Den dey no need go teach all da guys dat live close,
    An dey no need go teach dea bruddas an sistas.
No need tell um, “Eh! Gotta know da Boss!”
    Cuz dat time, dey goin all know me,
    Da small litto guys all da way to da big importan guys.
12 I goin pity dem an give um chance,
    No matta dey wen do tings dat no stay right.
An I no goin stay tink bout
    Da bad kine stuff dey wen do.’ ”

13 Wen God wen say “da new deal,” dat mean he wen make da first deal no good awready. An you know, wateva stay coming old an no good, dat litto mo gone awready.

Hawai‘i Pidgin (HWP)

Copyright © 2000 by Wycliffe Bible Translators International. All rights reserved


1 of 1

You'll get this book and many others when you join Bible Gateway Plus. Learn more

Viewing of
Cross references