Fo Da Efesus Peopo 1 Hawai‘i Pidgin (HWP)
Paulʼs Aloha to da Peopo Efesus Side
1 Aloha! Dis letta from me, Paul. You know Jesus Christ, da Spesho Guy God Wen Send. Jesus wen send me all ova fo tell peopo bout him, cuz dass wat God like me fo do. Dis letta fo you guys dat stay Efesus side. You guys da peopo dat stay spesho fo God. Peopo trus you guys, cuz you guys stay tight wit Jesus Christ. 2 I like our Fadda God an our Boss Jesus Christ do plenny good kine tings fo you guys, an make yoa hearts rest inside.
Da Good Tings God Goin Do fo Us Wen We Stay Tight wit Christ
3 Good everytime fo tell how good God stay! He da God an da Fadda fo our Boss Jesus Christ. God everytime do good kine tings fo us, cuz he put all kine good stuff inside our hearts, all dat strait from wea God stay inside da sky. He put all dat inside our hearts cuz we stay tight wit Christ. 4 Befo God wen make da world, he wen pick us awready fo be his guys an fo stay tight wit Christ. He wen like us be good an spesho fo him. so den no goin get nobody fo poin finga us guys. God know everyting bout us guys. He get choke love an aloha fo us. 5 From befo time, God wen make plan fo everyting. He wen make plan fo make us his kids. He wen make plan fo Jesus Christ fo make all dat happen. Dass wat God wen like, an dass wat stay make him stay good inside. 6 God like his kids tell how awesome all da good kine tings he stay do fo us. God do good kine tings fo us, cuz we stay tight wit Christ, an he get plenny love an aloha fo Christ.
7 No matta us guys wen broke Godʼs Rules, still yet Christ da One dat wen go bleed an mahke fo us. Christ wen cut us guys loose from da power da bad kine stuff get ova us, an he hemo our shame, cuz he like do plenny good kine stuff fo us, an cuz we stay tight wit him. 8 God everytime go all out fo us guys. He know how everyting stay, an he know da right tings fo do. 9 God, he know da tings he like do. Befo time he neva tell nobody notting, but now he wen tell us guys. He wen go make plan fo all da tings dat he wen like do, an he wen pick Christ fo do um. 10 God wen make one plan fo do all dat wen da right time stay come. Dis da plan: God goin make everyting dat he wen make come togedda, an his Spesho Guy Christ goin be in charge. Dat mean Christ goin be in charge a everyting inside da sky an inside da world!
11 An us guys dat stay tight wit Christ, was us God wen pick from befo time. An cuz we his kids awready, he stay give us all da tings he get fo us. He wen go make everyting jalike he wen figga befo time. God, he da One dat can make everyting he like happen. 12 God wen go do all dat, cuz he wen like us guys dat wen go trus Christ first, show da oddas how awesome God stay. Den da odda peopo goin tell how awesome he stay too.
13 Same ting wit all you guys dat stay tight wit Christ, you guys wen hear da true kine stuff God wen say. Dass da Good Kine Stuff bout how God take you guys outa da bad stuff you guys stay in.
An cuz you guys wen go trus Jesus, an stay tight wit him, God wen give you guys his Spesho Spirit, jalike he wen promise befo time. Dass da Spirit dat make you guys go all out fo him, an da Spirit jalike one mark fo show dat you his guys. 14 Wen we stay tight wit Godʼs Spirit, dass da first proof fo show us all da good kine stuff God goin give his kids. Bumbye God goin cut loose his kids from all da power dat da bad kine stuff get ova dem, an den everybody goin tell how awesome he stay.
Paul Pray Fo Da Bruddas an Sistas Efesus Side
15 Cuz I wen hear dat you guys trus da Boss Jesus, an you guys get love an aloha fo all da peopo dat go all out fo him, 16 az why I no stop telling God, “Mahalo plenny fo dem guys!” I everytime tink bout you guys, an pray fo you guys.
17 Everytime, dis how I pray: “God, you da God fo our Boss Jesus Christ. You our Fadda, an you stay awesome! I like you help da Efesus peopo fo know inside dea heart wat fo do. An show dem plenny bout Christ, so dey goin know him mo betta. 18 God, I like you help da Efesus bruddas an sistas fo undastan mo betta da good kine stuff you wen promise fo do fo dem bumbye. Az jalike you goin open one light inside dea hearts fo dem fo see. Den dey goin start fo wait fo da tings you wen promise, cuz you wen tell dem fo come be yoa guys. Help dem fo know dat goin be plenny, all da awesome stuff you wen promise fo give us. Az jalike same ting you goin give all yoa kids, cuz dey stay all out fo you. 19 Plus, I like dem know how strong you stay fo help us guys dat stay trussing you, cuz you get da power fo make anyting happen!”
20 You know how strong da power God get? He wen go make Christ come back alive afta he wen mahke, dass how strong his power! Den God wen put Christ da mos importan place, by his own right side up dea inside da sky. 21 Dat show dat Christ mo importan den all da kine leadas inside da sky, an all ova da place, an da leadas dat get da right fo tell odda peopo wat fo do, an all da guys dat get power fo do tings to odda peopo, an all da bosses, an all da guys dat get big name. Christ, he stay da mos importan leada now, an he goin be da mos importan leada inside da time dat goin come bumbye. 22 God wen make everyting inside da world an inside da sky unda Christ. An same time he wen make Christ da head guy fo us church peopo. 23 Us church guys, we jalike Christʼs body. Cuz we da ones dat goin pau do everyting dat Christ wen start wen he was hea. He stay tight wit all his peopo, an he get plenny power fo make everyting come jalike suppose to be.