A A A A A
Bible Book List

Epesos 5Ne Bibliaj Tik Nawat (NBTN)

Shimuchiwakan tel sejse ká kichiwat tay kichiwa ne Teut, ken kukunet yejyektasujtatuk, wan shimuwikakan iwan tetasujtalis kenha ken ne Mawaltijtuk ne techtasujtak wan mutemakak ka tumaku, pal kitakulia ne Teut se tay sea ajwiak.

Tatzinhejenchiwalis, wan muchi tay susul, wan tepalelewilis, ma inte keman mutukayti ijtik anmejemet, ken muneki iwan ne sejse ipal Teut, nian se palabraj ne ipanpa welit tishpinawat, nian timeletaketzakan, nian se chuntal tay inte muneki, sema mas yek panpadiush, ika shikmatikan ini: ka nian se tatzinhejenchiwani yawit kiajkawat kalaki tik ne itatekimakalis ne Mawaltijtuk wan ne Teut, nian se susul, nian se tepalelewiani, ika yajuni ken se ká kitennamiki teutzitzinmet.

Ma inte aka metzinshijshiku iwan pajpalabraj ne inte tatka ipatiw, ika yajika witz ne ikwalan ne Teut itech ne inte tetakamatit. Kiane tel, maka shimuchiwakan inkunpalejwan, ika ikman ankujkunyua katka; ashan anmejemet se tawil ipal ne Tajtzin. Shimuwikakan ken sejse ipal tawil! Ika muita ne itakil ne tawil tik muchi yek wan tamelakchiwalis wan tejkia. 10 Shitachiakan tel tay ajwiak ipal ne Tajtzin. 11 Wan maka shikunpachiwakan ne tejtekitilis ipal ne takumi ne inte tamakat tatka, mas yek shikajajwakan, 12 ika se ishpinawa hasta su tinat ne tay yejemet kichiwat ichtaka. 13 Muchi tay ipanpa titeajajwat, ne tawil kineshtia, 14 ika muchi ne muneshtijtuk yaja tawil. Neka ina:

    "Shisa, kuchini, wan shimuketza itzalan ne miktiwit, wan metztawilus ne Mawaltijtuk."

15 Shikitakan tel ken anyawit muwikat: inte ken melemet asunte ken sejse kimatit wey. 16 Maka shitunalpulukan ika ini tujtunal ipal teyek wey. 17 Yajika, maka shimuwikakan ken tzujtzuntet, shikmatikan tay ne itaelewilis ne Teut, 18 wan maka shimutawantikan iwan ne atata, ne kichiwa ka timuwikat ken te nemi yek, sute shimutemakan iwan ne Ijiutzin, 19 wan shitajtaketzakan iwan sajsalmoj wan tajtakwikalis ipal ne Teut; shitakwikakan wan shitatzutzunakan ipal ne Tajtzin ijtik anmuyulu; 20 wan senpa shikilwikan ne Teut, ká ne Teteku, padiush ipanpa muchi, tik itukay ne tutajtzin Yeshu Mawaltijtuk.

Shiktasujta yek ne musiwaw!

21 Shimutakamatikan ne se iwan se seuk tik tetakamatilis ipal ne Mawaltijtuk. 22 Ne siwatket ma kitakamatikan ne inshujshulejyu ken kitakamatit ne Tajtzin, 23 ika se takat kitekimaka ne isiwaw kenha ken ne Mawaltijtuk kitekimaka ne sennemit. Yajaya itamakishtiani ne iweyka. 24 Wan ijkiunisan ken ne sennemit kitakamati ne Mawaltijtuk, ma kitakamatikan ne siwatket ne inshujshulejyu tik muchi.

25 Ne takamet ma kitasujtakan ne isiwawan kenha ken ne Mawaltijtuk kitasujtak ne sennemit wan mutemakak ka imaku, 26 pal ma kiekchiwa ipal Teut; yajika kiawij iwan ne pajpalabraj pal kipajtia, 27 pal yajasan kishpanua iishpan yaja isel se sennemit tzitzinaka, nian tilwijtuk nian pustektuk nian tatka ijkiuni, pal naka yek ipal Teut wan inte kipia nian se ipelech.

28 Ijkiuni ne takamet muneki ma kitasujtakan ne insijsiwawan, ken kitasujtat ne innakayu isel: ká kitasujta yek ne isiwaw, yajasan mutasujta; 29 ika te aka kishijia ne iweyka, mas yek kitakwaltia wan kitajpia yek; wan ne Mawaltijtuk kichiwa kenhaya iwan ne sennemit, 30 ika tejemet titajtakutun ipal ne iweyka.

31     "Yaja ika, se takat kinnaktia iteku wan ne inan wan musalua itech ne isiwaw, wan muchiwasket ne ume ken sanse inweyka."

32 Wey ini ichtaka! Naja nina ipanpa ne Mawaltijtuk wan ne sennemit. 33 Melka uni, ma shiktasujtakan muchi anmejemet sejse isiwaw ijkiuni, ken yajasan mutasujta. Ne siwat, ma kitakamati ne ishulejyu.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes