Ebrayujmet 7

Ne Bibliaj Tik Nawat

7 Ini Malkitzedek, tatuktiani ipal Shalem, ipalej ne Wejkapan Teut, munamik iwan Abraham ká mukwepki walaj kwak panuk ne tamiktilis ipal ne tatuktianimet, wan yaja kiteuchij, ² wan Abraham kijkwan se majtaktakutun ipal. Yaja achtu ne tatuktiani ipal tamelakchiwalis, ken kineki ina ne itukay Malkitzedek, wan tipan yaja ne tatuktiani ipal Shalem, kineki ina ne tatuktiani ipal nejmachnemilis. ³ Inte tikmatit ká ne iteku, nian ne inan, nian ne inoywan, nian keman nesik wan mikik. Melka uni, yaja ken ne itelpuch ne Teut. Yaja naka ken se palej senpa.

⁴ Shikitakan ken wey yajini, ka hasta tutatanoy Abraham temakak ne majtaktakutun ipal ne yejyek tay kalkwij yajki. ⁵ Ne takamet ká ipilawan Lewi, ne muchijket palejmet, kipiat se tatuktilis ma kikwikan se majtaktakutun itech ne techan ken ina ne tajtuli, melka yejemet ikniwan wan muchi kistiwit itech ishinach Abraham. ⁶ Wan Abraham temakak ne majtaktakutun iwan se ká inte tikishmatit inoywan, wan yajuni kiteuchij Abraham, ne kipiatuya projpromesaj. ⁷ Ká ne wey senpa kiteuchiwa ká ne chikitik: muchi tikmatit uni. ⁸ Wan melka nikan takamet ká mikit kikwit majmajtaktakutun, ikuni se ká tikmatit ka yultuk. ⁹ Ma tinakan, itech Abraham hasta Lewi ká kikwi majmajtaktakutun temakak imajtaktakutun, ¹⁰ ika Lewi nakatuya ijtik ishinach ne iteku kwak Abraham kinamik Malkitzedek.

¹¹ Asu ijkiuni, wan timuteuchiwat itech ne palejtal ipal Lewi, ika ne techan kikwij ne tajtuli itech, taika muneki ma muketza ukse palej ken ne ipalejtal Malkitzedek? Taika inte muilwia ne ipalejtal Aaron? ¹² Ika asu mupata ne palejtal, muneki ma mupata nusan ne tajtuli. ¹³ Ika yajane ká ipanpa titaketzat se ipal ukse tribuj, wan te aka ipal uni tribuj tekittuk itech ne tikashit tik ne teupantzin. ¹⁴ Ika tikmatit ka ne tutajtzin kistuk itech Yuda, wan Moshe inte inak ken ijtuk iwan palejmet ipal ini tribuj.

¹⁵ Wan tikmatit sujsul mas, asu muketza ukse palej ken Malkitzedek, ¹⁶ ne muchijki intesu ipanpa tajtuli ipal tatuktilis ipal tunakayu asunte ipanpa itajpal nemilis inte keman mutajkali. ¹⁷ Ika ina:

¹⁸ Muajkawa ne tatuktilis pal ikman, tel, ika inte kipia itajpal wan te techpalewia, ¹⁹ ika iwan ne tajtuli inte yektiak tatka; wan mukalaktia se tejchialis mas yek, wan iwan tiajsit itech ne Teut mas.

²⁰ Wan muchijki iwan se juramentoj. Yejemet muchijket palejmet wan te muchiwa katka jurar. ²¹ Yaja iwan se juramentoj ipal yajane ká kilwij:

²² Yajika, Yeshu muchijtuk se pal tikmatit ka tiawit tikpiat se sentaketzat sea yek.

²³ Ne palejmet nemit mijmiak ika inte welit nakat pal senpa ika mikit; ²⁴ yajini naka pal senpa, yajika inte keman panus ne ipalejkayu. ²⁵ Yajika yaja weli kinmakishtia sujsul ne ajsit itech ne Teut ipanpa, ika senpa yawi yultuk pal kitajtani ne Teut ka inmaku.

²⁶ Yek nemik ma tikpiakan se palej ijkiuni, se ká yulchipawak, ne inte kipia tatka tay teyek nian susul, ne kupewik itech ne tateyekchiwanimet wan muchijki wejkapan ijpak ne ilwikak; ²⁷ ne inte muneki kalwika tejtetakulis mujmusta ken kichiwat ne weypalejmet ipanpa ne tay yejemetsan tateyekchijtiwit, pal tipewat; tipan ka imaku ne techan. Ika yaja kichijki uni seujti kwak mutemakak. ²⁸ Ne tajtuli kichiwa ka sejse takat muchiwat palejmet melka kipiat kujkukulis. Ne palabraj ipal ne juramentoj, ne walajtuk ipan ne tajtuli, kichiwa ka yek ne ipiltzin pal senpa.