A A A A A
Bible Book List

Ebrayujmet 6Ne Bibliaj Tik Nawat (NBTN)

Yek, tikajkawakan ne ajachtu tay nemit pal timumachtiat ipal ne Mawaltijtuk, wan tiawit tikitat ne uij. Inte tiawit tiktekat senpa ne tetzilnaj ne mumatiaya: ka muneki ma timuyulpatakan itech ne tutekiw miktuk, wan ma tikyulmatikan ne Teut; ne tamachtilis ipanpa teulyujmakalis; wan ipanpa tay ne mutuktijtuk ipal ne tujtumey; wan ne muyulkwepalis kwak timiktiwit; wan nusan ka tiawit timuchiwat juzgar pal senpa. Wan tiawit tikchiwat ijkiuni, asu kineki ne Teut.

Ika se ká mutawilujtuk seujti, wan kiejekuj ne itetakulis ne ilwikak ka ikajku wan kikwija ne Ijiutzin, wan kishmatkia ne yek palabraj ipal Teut wan ne itajpal ne taltikpak witz, asu yaja wetzi senpa, inte weli mukwepa muyulpata, ika yaja kicruzpilua ne itelpuch ne Teut wan kichiwa ka yawit tajtaketzat ken inte yek ipanpa. Ika kwak ne tal tami kiuni ne ajat ne wetzit ijpak wan tamaka yejyek sakat ken kinekit ne tatukat, ne Teut kiteuchiwa; asu waltakatit wijwitzti wan kijkilit te tatka ipatiw yaja inte yek wan achka muchiwa maldictar wan yawi tami tik tit.

Yejyektasujtatuk, melka titanutzat kiane, tikmatit muchi tay yek anmupanpa wan tay kipia tamakishtilis, 10 ika yek ne Teut, wan te yawi kielkawa ne anmutekiw, wan ken ankitasujtatiwit ne itukay, wan antekittiwit ipal ne tayulmatit, wan antekitit kenhayuk ashkan. 11 Tikelewiat ma shimutatemuilikan muchi pal tajpiat ne tejchialis hasta kwak tami, 12 ma inte shitatziwikan, asunte ma shinakakan iwan muchi ká yawit kipiat ipromesaj ipanpa tayulmatilis wan weytejchialis.

13 Kwak ne Teut kichiwilia Abraham se promesaj, ken inte kipiatuya aka mas wey que yaja, kichiwa katka jurar ipanpa yaja isel, 14 wan ina: "Ijkia, sujsul nimetzteuchiwas wan sea nimetztepewilis", 15 wan ijkiuni, kwak tamik tejchia wey, ajsik ne promesaj. 16 Ne takamet kichiwat jurar ipanpa ne tay sujsul wey, wan iwan ne juramentoj pal kimatit ka tejkia, tami ne najnankilis. 17 Kwakuni, kwak ne Teut ina ka yawi kinhilwitia ka yekkaya ne ipromesaj inpal, kichijki se juramentoj, 18 pal kiane, ipanpa ume tay inte keman yawit mupatat, ken ne Teut inte weli tashijshikua, tejemet tiawit tikpiat se wey tepalewilis pal kiane, kwak tiawit tichuluat, tiawit tikitzkiat ne tejchialis ne muishpanua. 19 Kenha ken se tepusti kitetilia se barcoj pal te mijkwani tik ne weyat, uni tejchialis tikpiat ijtik tuyulu, wan tikalakit kalijtik ne kwachtzakka 20 kanka kalak tupal Yeshu, ne achtumutaluani, ká muchijtuk tupalej pal senpa ken ne ipalejtal Malkitzedek.

Ne Bibliaj Tik Nawat (NBTN)

Ne Bibliaj Tik Nawat · © 2008, 2012 Jan Morrow

  Back

1 of 1

You'll get this book and many others when you join Bible Gateway Plus. Learn more

Viewing of
Cross references
Footnotes